السبت، 7 مارس، 2009

مش مهم !

السلام عليكم و رحمة الله و بركاته

----------

طبيعي جداً ان الواحد كل ما بيكبر بيكتسب خبرة و يعرف حاجات اكتر ، حاجات ممكن يكون عارفها بشكل نظري ، انما بعد كدا بيوصل لمرحلة معينة و بيفهم الحاجات دي و يجربها بشكل عملي !

بعد فترة من الزمن ، من الاعدادي ، مروراً بالثانوي ، و بعد كدا في المرحلة الجامعية ، الواحد بيتأكد ان في حاجات كتير فعلا مش مهمة ، و الواحد شاغل دماغة بيها لفترة معينة ، بس في الاخر بعرف ان كلها حاجات مش مهمة بجد ! و ساعات بيحبس نفسه في قفص وهمي !


مش مهم اذا كنت رفيع زي عود القصب او تخين زي الشوال ، مش مهم اذا مكنش شعرك ناعم او حتى عامل زي السلك ! ، مش مهم لو مناخيرك طويلة او عريضة او حتى "معقوفة" ! ، مش مهم اذا مكانتش عنيك ملونة او زي عيون اليبانيين ، او حتى واسعين جدا لدرجة ان كل الناس بتعتقد انك حسود ! ، مش مهم شكلك اساساً ، لان مفيش حد كامل حتى على مستوى الشكل بس !

و برده مش مهم اذا مكنتش وسيم جداً و مش شبه مش عارف مين كدا ! ، مش مهم لو مش بتجيب هدومك من الماركة الفلانية او المول الفلاني ! مش مهم حتى اذا كنت مش مهتم بمظهرك !

مش مهم اذا مكنش لاقي حد يفهمك صح بالرغم من ان عندك صحاب كتييير جدا ، او حتى معندكش !
مش مهم اذا كنت حاسس انك مهمش ، او ان مفيش حد مهتم برأيك ، او انك منطوي و الناس فاكرين انك مغرور و شايف نفسك ! كتير ما بيتم تفسير الصمت على اساس انه جهل او غرور !

مش مهم اذا مكنتش عبقري و ذو "ذكاء حاد" ، و مش بتعرف تعمل قسمه مطولة او حتى مش عارف جدول الضرب ! ، مش مهم تكون ذكي اساساً ! ، الحياة محتاجة حاجات تانية غير الذكاء !

مش مهم نظرت الناس ليك ، و اذا كانوا بيعتقدوا بصفات مش فيك ! ، مش مهم لو وصفوك بأسواء الصفات ! الكلام مش بيغير من الحقيقة حاجة !

كل ده مش مهم ، و غيرهم كتير ، حاجات فعلا مش مهمة و بنشغل نفسنا بيها ! ، حاجات كتير من دي شوفتها في الناس و فيا !
مش المفروض انك تزعل او تحس بالسوء بسبب اي حاجة من دول ، اكيد هيجي عليك يوم و هتحس بالرضا عن اغلب الحاجات دي ان مكنش كلها ! ، و هتعرف انك كنت بتركز على حاجات هبلة و محجم نفسك بسببها !


####################
المهم تكون ما انت عليه فعلاً ، المهم طيبة النفس + شوية ثقة + شوية خبرة + انك تكون شخص مفيد
####################

وخليك فاكر ان كل حاجة بتجي بمعاد معين !


اخيرا ، مش مهم اذا مكنش الموضوع منسق ، او الكلام مش مترابط ، المهم ما انا عليه دلوقتي : )

الحمد لله حمدا كثيرا : )



هناك 6 تعليقات:

  1. ايه الفكرة ؟

    اشمعنه انت بتقول كده ؟

    لو حد شتمك و قالك انت عيونك زرقاء قوله ..

    بلاش :D

    ردحذف
  2. كلام حلو ورأي أحلى

    ردحذف
  3. الفكرة مش في كدا يا احمد ، ده غير ان مفيش حد هيشتمك و يقولك انت عنيك زرقا D:

    انما اللي اقصده ان في حاجات سعات بتاثر على ثقة الواحد بنفسه ، مع انها حاجات هبلة جدا !

    يعني عشان تتعامل مع الناس و تكون اجتماعي او محبوب بينهم ، مش مطلوب تكون عنيك زرقا اساسا ولا اي حاجة من الحاجات اللي فاتت دي : )

    ردحذف
  4. Dr.AMA : معلش مخدتش بالي من ردك : )

    انت اللي حلو يا باشا : )

    ردحذف
  5. btw check my last post
    feha 7aga leek :)

    ردحذف
  6. بالعكس تدوينة خطيرة جدا جدا جدا ما شاء الله

    بجد تبارك الرحمن .. كلامك معقول ومهم جدا

    عايزة أرجع أقرأ التدوينة دي تاني وأخلي ناس كتير يقرأوها :)

    ردحذف