الخميس، 5 مارس، 2009

العنصر المشترك D:


السلام عليكم و رحمة الله و بركاته

حاجة كدا لاحظتها ، و كمان الموضوع طلع مش في مصر بس ، ده كمان في اغلب الدول العربية او الدول اللي فيها انظمة حاكمة فاسدة او مش قد المسئولية و مبلطة في الحكم برده !

العنصر المشترك بين كل الموالين للنظام الحاكم ، ان الحياة وردي !

يعني مثلا واحد اعرفه ، تبع الحزب الوطني ، تلاقي الحياة عنده وردي ، و يقولك الحكومة دي شغاله 100 100 ، و يقعد بقى يقولك انجازات الحكومة و مش انجازات الحكومة ، و اي حاجة تعملها الحكومة تبقى تمام !

برده كان في موضوع في مجتمع لينوكس العربي ، موضوع كدا عن توزيعة جزائرية ، و كان في شوية نقاشات في الموضوع ، و كان في واحد تبع النظام الحاكم ، تقريبا كان الوحيد اللي شايف ان الحياة وردي عندهم في الجزائر و كل حاجة تمام ! على عكس بقية الناس !

قبل كدا برده شوفت اكتر من مثال على الموضوع ده بس الموضوع بقى واضح اوي بالنسبة ليا !


--------------------------

عن نفسي مش بحب المعارضين اللي بيعترضوا على اي حاجة و خلاص ! ، اي حاجة تعملها الحكومة تلاقيهم بيعترضوا ! ، و برده مش بحب الناس المتشائمين و السوداوين ، و اللي تلاقيهم عندهم اكتئاب دائم و مش عاوزين يعملوا اي نشاط ، و يقولولك مفيش فايدة من اللي هنعمله !!

بس برده خلينا واقعيين و موضوعيين و لو شوية !
بلاش بقى نظام انتوا كلكم معارضين للنظام و مش عاوزين تعملوا حاجة و متخاذلين و مش عارف ايه كدا !!

الناس دول غالبا بيكونوا نوعين اساسيين ، نوع عايش الوهم فعلا ، و نوع بيوصل للي هو عاوز بالوسايط بما انه ليه معارف في النظام !

المهم يعني ، من الموضوع ده مش عاوز اقول غير ارحمونا بقى ! متبقوش انتوا و النظام بتقرفونا في عيشتنا ! عاوزين نتغير بجد !


-----------------------

ملحوظة اخيرة احترامي للجميع سواء كان موالي للنظام او معارض او حتى ملهوش اي توجه ، بس الموضوع ممكن اعتباره مجرد فضفضة او نصيحة : )

هناك 7 تعليقات:

  1. فعلاً يا أحمد كلامك صحيح ,
    اللهم خلص كل دوله عربيه من حكومتها الفاسده اللهم امين يا رب العالمين .

    ردحذف
  2. كيفك ياأحمد بيه ؟

    سؤال هل لديك بطاقة انتخابية ياأحمد

    وآخر مرة شاركت فى أى تصويت كانت امتى ؟

    ردحذف
  3. ahmedmisry : انا الحمد لله تمام 100 100 : )

    بالنسبة للبطاقة الانتخابية ، لا معنديش ، و مش هطلعها غير بعد المرحلة الجامعية : )

    بالنسبة للتصويت ، تقصد ايه بالتصويت ؟ تضويت من اي نوع يعني : )

    ردحذف
  4. ليه مش هتطلعها إلا بعد المرحلة الجامعية ياأحمد

    .. انت مش عديت 18 سنة بردك ولا ايه يازعيم ؟

    اللى أعرفه ان المفروض انك رجل قانون ... مش كده والا ايه ؟ وأولى الناس بمعرفة حقوقهم وواجباتهم هم رجال القانون !

    الأهم من كده انى شايفك مُقصر ياحج أحمد ... لا تلوم الناس وأنت مُلام .. لم نفسك أولاً ومن ثم وزع الاتهامات ياطيب

    وأظن مش محتاج أعرفك أهمية بطاقة الإنتخابات ودورها الفعال فى حياة أو مجتمع ...
    واوعى تتحج بالتزوير والكلام اللى على شاكلته .. لأن التزوير عمره ما هيعرف يطرق باب السجلات طالما أصحاب الأصوات موقعين فى السجلات ومختارين الأصحوات .. انما كل ما كانت السجلات الفاضية يبقى انت بتسمح للغير انه يزور وبمزاجه

    ولله الأمر من قبل ومن بعد

    ردحذف
  5. ahmedmisry : الدستور لما ادا الحق للشخص للتصويت في سن الـ 18 ، يبقى لازم على الشخص يستعمله لما يكون ناضج كفاية مش مجرد تخليص حق : )

    عن نفسي فترة الجامعة ، فترة لتكوين الشخصية و تحديد الاتجاهات ، و هكتفي بالمراقبة حاليا ، و لما المرحلة دي تخلص اعتقد اني هكون ناضج كفاية لاستخدم حقي في التصويت : )

    و طبعا مش هتحجج بالتزوير ، حكومتنا الرشيدة عمرها ما تزور حاجة D:

    و اخيرا ، انا مش بتهم حد ولا حاجة ، دي مجرد حاجة لاحظتها مش اكتر : )

    ردحذف
  6. عجبني جدااااااا الكلام
    خاصة اول 5 سطور

    ردحذف