الخميس، 2 أبريل 2009

اول تاج :)



السلام عليكم و رحمة الله و بركاته

اول واجب D: ، تاج مبعوتلي من طارق ، صاحب مدونة شخابيط : )

طارق واحد من الناس اللطيفة اللي عرفتها من على النت ، بس ديماً مشغول عننا بالكلية و الكورسات و مش عارف ايه كدا ، ربنا يوفقه : )

المهم يعني ، التاج اهه :

-----------------------------------------------


- اسمك ؟
احمد .


- المشهور بيه وسط اصحابك ؟
احمد او سكليتون برده - خصوصاً لو اصحابي من النت - ، او غالبا لقب العيلة .


- سنك ؟
20 سنة الا شهرين تقريبا D:


- مجال دراستك ؟
الحقوق (القانون) .


- اسم مدونتك ؟
من غير اسم تقريباً ، بس كاتب "skeleton-eel" بدل ما تبقى من غير عنوان كدا ، بس كنت بفكر اسميها "مجرد مدونة اخرى" بس قولت عادي يعني مش مكشلة يعني :) .


- صورتك الرمزية في المدونة بتعبر عن إيه ؟؟
صورتي الرمزية الحالة المفروض انها رسمة تشبهني ، بس في الحقيقة مبقتش شبه الصورة دي خالص !! بسبب قعادي على الكمبيوتر كتير عنيا دخلت لجوا و ظهرلي هالات سوده تحت العين ، و بقيت عامل زي العواجيز !

بس ان شاء الله فترة و تعدي يعني :)
الحاجة الكويسة في الموضوع اني فعلا بستفيد و بفيد في قعادي على الكمبيوتر مش بضيع وقتي على الفاضي :)


- هل فكرت في اغلاق المدونة والسبب ؟
لا ! ، و حتى لو قفلتها هسيبها زي ما هى كدا من غير ما احذفها ، مش عارف ليه الناس بعد ما تمشي ساعات بتحذف المدونة ! مع ان اي مدونة اكيد فيها حاجة مفيدة ، ممكن اي حد يجي ستفيد بيها بعد ما تمشي او حتى بعد ما تموت :)


- ايه رد فعلك لو حد قل ادبه في تعليق ؟
ده بيتوقف على تعريفك لـ "قل ادبه" ، قله ادب بشتيمه يعني ؟ ولا قلة ادب مجرد سخرية و كدا ؟ ، بس على العموم اي رد فيه الفاظ مش تمام هيتحذف .


- اسوأ مدونة ؟
امممممممم ، مفيش حاجة معينة ، بس عموما اي مدونة بحس ان اللي فيها كلامنجي او الناس اللي ماشية بنظام "خلقنا لنتعرض" ! ، و في الاول و الاخر ده مجرد احساس و مش بيغير من الحقيقة في حاجة :)


- هيحصل ايه للايميل بعد ما تموت ؟
اكيد هيموت معايا ، و الناس اللي اعرفهم على الماسنجر هيقولوا كان هنا في واحد اسمه احمد ، و مش عارف اذا كانوا هيقولوا كان كويس او وحش بس اكيد هيقولوا كان شخص غريب :)


- اديت الباسوورد لحد قبل كده ؟
مفتكرش .


- السفر بالنسبة لك ؟
اكيد حاجة ممتعة D: ، تغيير جو ، و تشوف اماكن جديدة ، و حتى وجوه جديده :)


- الموووود بتاعك ايه ؟؟
كويس و لله الحمد ، بس مرتبك شوية بسبب النتيجة اللي كل ده لسه مطلعتش ، و عاوز اذاكر كويس شوية .


- بتعمل ايه في وقت فراغك ؟
اكيد الكمبيوتر و الانترنت D: ، النت لوحده عالم تاني ، و شوية قراءة و شوية في المكتبة ، و اي حاجة مفيدة يعني ^_^


- الأكلة المفضلة ؟؟
الرز بالسمك - خصوصا لو كان من الاسماك الزيتية زي الماكريل كدا - ، و الكبسة بالفراخ ، و كمان المكرونة بالبشاميل - بقو كام اكله كدا ؟ D: -


- الصفات التي أخذتها من والدي ؟
مش عارف بصراحة ، مفيش حاجة معينة D: ، بس ممكن اقول ايه الصفات اللي ماخدتاهش من والدي D:
كنت ديما بحاول تلافي الصفات الوحشة ، مثلا صفة زي العصبية ، والدي عصبي جدا جدا ! ، انا على العكس تماماً هادئ جدا و بعرف اتمالك اعصابي بسهولة :)


- الصفات التي أخذتها من والدتي ؟
الطيبة و الصبر .


- اكتر ست حاجات بتكرههم ؟
مش هقول الكدب ، الخداع ، الغرور و الحاجات دي لان كل الناس بتكرههم بس الفرق في الاولويات يعني ، بس اقدر اقول من اكتر الحاجات اللي بكرهها :
القول من غير عمل ! - التعميم ! - التعصب ! (التعصب غير العصبية ) - استغلال الجهل عند الناس ! - الاشاعات ! - النمطية ! .


- اكتر ست حاجات بحبها ؟
امممممم ، مش عارف ، بحب كل حاجة بصراحة D: ، بس ممكن نقول :
الكمبيوتر و النت طبعاً - القراءة - تعلم حاجات جديدة - الشخبطة ( دي حاجة شبه الرسم كدا ) - مساعدة الناس - الحرف اليدوية .

و الجنو/لينوكس طبعاً D:


- شخصيتك نوعها إيه ؟
في الحقيقة معنديش وصف معين لشخصيتي ، بس انا شخص هادي قليل الكلام ، براقب في صمت ، مش اجتماعي اوي بس اقدر اتعامل مع الناس كويس ، ديما ما تلاحقني كلمة "غريب" يمكن عشان ليا اهتمامات مختلفة عن اغلب الناس ، ممكن اعمل حاجات مجنونة شوية بس عمري ما اضر حد ، مثابر و متفائل نوعا ما ، بس الاكيد اني في الاخر "انسان" :)


- لماذا دخلت عالم التدوين من الاساس ؟
المدونة مكان افضفض و اكتب الحاجات اللي بفكر فيها بعيد عن التقنية و القانون ، يعني كبديل لقلة الكلام ، و بردو بضيف لينكات لاي موضوع تقني او موضوع مفيد بعمله فى المنتديات .


- أحلي جملة قيلت في وصف مدونتك ؟
مش فاكر بصراحة - مش فاكر ان اتقال حاجة اساسا :)


- اهمية التعليقات بالنسبة لك ؟
اكيد بحترم كل رد يتكتب في المدونة ، بس اساسا اغلب التدوينات عبارة عن واحد بيكلم نفسه ، فمفيش مجال للرد اساسا ، فموضوع الرد ده عادي يعني :)


- احلى بوست كتبته ...ضع اللينك , ثم اذكر لماذا ؟
في المدونة ؟ لسه متكتبش ، انما من الناحية التقنية ، الكتابين دول سعيد جداً اني عملتهم
# المدخل نحو البرامج المفتوحة المصدر .
# الدليل العملي في استخدام اوبنتو لينوكس .

و بحبهم لانهم الحمد لله افادوا ناس كتير :)

- أفضل مدونة قراتها ؟
مش فاكر ، في مدونات كتير اوي حلوة .


- أفضل بوست قراته ؟
برده في مواضيع كتير اوي حلوة قريتها .


- الشغل بالنسبة لي ؟
بالنسبة ليا ولا ليك ؟ D:
الشغل ليه كذا فايدة ، اداة لمساعدة الناس ، طريقة لتحقيق الذات ، و اكيد وسيلة لكسب الرزق .


- الانترنت بالنسبة لك ؟
حاليا الانترنت بقى جزء مني و انا جزء منه ، مكان وااااسع للمعرفة و العلم و مشاركة المعلومات .


- تمرر التاج ده لمين ؟
مش همرره لحد لان تقريبا كل اللي اعرفهم كتبوا التاج ده ، بس اللي عاوزه ياخده - مع اني بكرهه الجملة دي جدا :@ -




بس اللي يقرا التاج يقولي على حاجتين D:

هو ليه اسمه "تاج" ؟ ، المفروض ان التاج بالانجليزي (tag) يعني وسم ، يعني بيستعمل مع مجموعة حاجات ليها نفس الموضوع - اغلب الاسئلة بتاعت التاجات اللي بشوفها ملهاش علاقة ببعض اساسا D:

الحاجة التانية بقى ، محدش عنده عروسة ليا ؟ ، اصل انا بصراحة ناوي اتجوز في اقرب فرصة D:

لا بجد ، يا ريت تدعولي بالزوجة و الذرية الصالحة :) - و كمان ادعو يجو بسرعة مش عاوز استنى كتير D:


هناك 10 تعليقات:

  1. ما شاء الله اجابات حضرتك جميلة
    وتصدق انا كمان مش اعرف هو ليه بيسموه تاج D: ..

    ومع الاسف مش عندى عروسه D:
    بس ممكن ادعيلك D:

    ربنا يرزقك الزوجه الصالحه والابناء الصالحين ... وكل شباب المسلمين يا رب العالمين ..

    ردحذف
  2. ما شاء الله :)

    حضرتك تلقائى ..

    --------

    نفسى أعرف برده ليه سموه تاج ؟

    وربنا يرزق حضرتك بالزوجه الصالحه والذريه الصالحه .

    :)

    ردحذف
  3. ربنا يكرمكم على الدعوات دي :) ، و جزاكم الله مثله :)

    -----------------

    على فكرة ناس اعرفهم كانوا فاكرين انه تاج بالعربي - التاج اللي بيتلبس على الراس ده - D:

    بس هو الاسم مربك فعلا :s

    بس مسيرنا في يوم نعرف هو ليه اسمه تاج D:

    ردحذف
  4. وش خدوده محمره ومكسوف على الآخر

    أنا واحده من الناس دى :D

    --------

    هو ممكن يكون علشان حد بيهديه لحد

    فيعتبر تاج على رأسه علشان الحد دا فكر فى الحد التانى إنه يبعتهوله بدل يعنى ما يقولوا

    جميلك على راسى من فوق

    يبقى

    " تاجك على رأسى من فوق "

    :D

    تحليل منطقى

    ردحذف
  5. هههه .. منطقى فعلا يا زهورتى .. :)

    ردحذف
  6. > زهرة الأمل :
    والله ما كنت اعرف :$

    بس تحليل منطقي برده D:

    ردحذف
  7. وعليكم السلام ورحمة الله وبركاته :)

    ^_^

    ربنا يرزقك الخير

    بالنسبة للوسم tag

    فهو المفروض إنها مجموعة أسئلة تحت مسمى واحد لكن يبدو إنه بسبب عدم فهم الاسم ضاع المسمى :D

    إجابات جميلة

    في أمان الله

    ردحذف
  8. > Maha :
    D:
    المفروض نشوف اسم تاني غير الـ"تاج" ده D:

    ردحذف
  9. والله يا أحمد انا بردوا كنت بسأل نفس السؤال , هما سموه تاج ليه ؟ :D
    ربنا يوفقك يا أبو حميد ويقوينا جميعاُ في كل شئ في حياتنا

    ردحذف
  10. سبحان الله
    حاجات كتيرة مشتركة بينا D:
    صباح الفل يا حج سكيليتون
    أخوك مصطفى
    SinaR

    ردحذف