الخميس، 9 أبريل 2009

الجيوب الانفية .


السلام عليكم و رحمة الله و بركاته

في اول الاسبوع روحت كشفت عند دكتور "انف ، اذن و حنجرة" ، بقالي فترة عندي مشكلة في الاحبال الصوتية ، صوتي بقى غرييييب جدا ، كنت متوقع ان المشكلة اساسها الجيوب الانفية ، و اللي اساسا كان فيها مشكلة بسبب نزلة شُعبية جامدة كانت جاتلي في تالته ثانوي ، الحمد لله اثار النزله راحت من زمان ، بس مشكلة الجيوب الانفية بدأت تظهر مع بداية المرحلة الجامعية - من سنتين و شوية تقريبا كدا - ، كنت بحاول قدر الامكان تجنب اي حاجة ممكن تاثر على الجيوب و تعمل التهابات ، بس كانت في شوية اعراض كدا بتيجي من وقت للتاني بشكل خفيف ، لكن الفترة الاخيرة دي الموضوع مأثر اوي على الاحبال الصوتية و بالتالي صوتي : )

من اسبوعين كدا ، كنا عملنا محاضرتين عن البرمجيات الحرة و نظام لينوكس ، تبع "مجموعة مستخدمي جنو/لينوكس في القاهرة" ، طبعا انا كان صوتي في الضياع خالص ، بس قولت مش مشكلة ، اديها محاضرة و هتعدي ، انا هحاضر مش رايح اتجوز يعني D:

كانت اول محاضرة ليا و كانت بشكل عام كويسة ، بس نظرا لانها كانت اول محاضرة ليا قصاد عدد من الناس - العدد مش كبير اساسا D: - فالموضوع كان فيه شوية لخبطة كدا و كنت متوتر شوية بالاضافة اني بعاني في الكلام D:

المشكلة ان برده في محاضرة تانية بكره ان شاء الله ، و برده نفس مشكلة صوتي الخربان ده D: ، و مش هينفع اخد الدوا عشان الدكتور كان الطالب اشعة على الجيوب الانفية قبل بداية العلاج ، و لسه معملتشها :s
بس خير ان شاء الله : )



المهم يعني ، بعد ما روحت للدكتور ، و طلع زي ما توقعت الموضوع ليه علاقة بالجيوب الانفية ، و كتبلي على الدوا اللي لسه مجبتهوش عشان لسه معملتش اشعه D:

لما روحت البيت قولت ادور على معلومات اكتر عن الجيوب الانفية على النت : )

في مقال لطيف و بسيط عن "التهاب الجيوب الانفية" في موقع طبيب دوت كوم .

التهاب الجيوب الانفية



الموضوع بسيط و فيه معلومات و ارشادات مفيدة ، و اول مرة اخد بالي من "الجيوب الجبهية" ، كنت عارف التلاتة الباقيين : )
ربنا يسهل و اعمل الاشعة في اقرب فرصة و ابدا في العلاج و ان شاء الله الموضوع ميكنش مزمن : )



و حافظوا على جهازكم التنفسي و خلو بالكم منه بقى : )

هناك 6 تعليقات:

  1. ألف سلامه على حضرتك ..

    إن شاء الله خير ..

    حضرتك اشرب ينسون مثلاً او حاجه دافيه زى القرفه برضو قبل ما تدى المحاضره

    ممكن تهدى الأمور شويه :)

    ردحذف
  2. سلامة حضرتك ..
    ربنا يشفيك ويعافيك يا رب ..

    ياليت حضرتك متهملش الموضوع وتروح في أسرع وقت تعمل أشعه وتاخد الدوا عشان ممكن يحصل مضاعفات ..

    وزي ما قالت أمل ممكن حضرتك تشرب مشروبات دافيه عشان بتضبط الأمور شويه ..

    ردحذف
  3. الف سلامه يا فندم
    شفاك الله وعفاك ..

    زى ما قالت امل و دودو اشرب حاجه سخنه
    عشان بس مش يتعب اكتر ..

    وان شاء الله تخف عالطوول :)

    ردحذف
  4. زهرة الأمل - إني ملكة - sh!ko

    جزاكم الله كل خير : )

    و على فكرة انا اساسا مش بشرب شاي كتير زي الشعب المصري ، انما بشرب حاجات تانية زي اليانسون ، القرفة ، الشمر ، الجنزبيل ، كركديه ، القرفل و اي نباتات تاينة و خصوصا العطرية : )

    الشعب ده غريب اوي ، حد يسيب كل الحاجات دي و يفضل يشرب شاي بس ! ، و حتى الشاي و مع انه مفيد بيشربوه بطريقة غلط !!

    انا حتى شكيت ان الحاجات دي يكون ليها تأثير عكس ولا حاجة و سالت الدكتور و قالي عادي يعني و المفروض ان الحاجات دي مفيده : )

    الحالة مستقرة من فترة كدا و الحمد لله بس هو موضوع الصوت ده اللي كان رخم شوية
    و الحمد لله المحاضرة خلصت على خير بدون اضرار D:

    و ان شاء الله هعمل الاشعة في اقرب فرصة : )

    ردحذف
  5. ربنا يوفقك في امتحاناتك و تخلص علي خير

    ردحذف
  6. > mhewedy : امين : )

    شكرا على الدعوة الجميلة ، و ربنا يوفقك : )

    ردحذف