الثلاثاء، 25 أغسطس، 2009

من هنا و هناك .


السلام عليكم و رحمة الله و بركاته


#
لو سمحت اغلق الـ Ad Blocker !

موضوع كتبته عن استعمال اضافات منع الاعلانات ، و خصوصاً اضافة adblock plus بتاعت الفاير فوكس ، الاضافة فايدتها منع اي اعلانات في المواقع اثناء التصفح ، سواء اعلانات نصية ، صور ، سكربتات ، الاضافة ممتازة و قوية جدا و بتمنع كل حاجة تقريبا .
لكن من ناحية تانية المفروض نستعمل اضافة زي دي بانصاف و منكونش انانيين ! ، كتير من المواقع و المنتديات - سواء عربية او اجنبية - مش بيكون ليها مصدر دخل ثابت ، و بتعتمد على العائد من الاعلانات - مع انه مش كبير اوي ! - و ناس كتير بتستخدم الاضافة و مش بتراعي المواقع اللي زي دي ! كملوا الموضوع على الرابط و هتلاقوا توضيحات اكتر : )



# 400 سنة على توجيه اول تيليسكوب للسماء .
انهارده بيحتفلوا بمرور 400 سنة على توجيه جاليليو جاليلي اول تلسكوب للسماء ، و زي ما هو معروف ان جاليلو من اوائل الناس اللي استعملت التليسكوب - فعليا مخترع التليسكوب هو هانز ليبرشي Hans Lippershey - ، و على حسب ما افتكر ان جاليلو هو اول من نظر للشمس عبر التليسوب بأن جاب قطعة زجاج و عرضها للنار و اصبحت سودا اللي خلاه يقدر يبص للشمس بشكل مباشر عن طريق التليسكوب .
و في مجال الفلك ، و من توابع استعماله للمنظار ، كان جاليلو واحد من مؤيدي نظرية ان الارض هى اللي بتدور حول الشمس مش العكس ، و اللي بسبب رأيه ده اتهمته الكنسية بالهرطقة ، لان افكاره مخالفه للافكار الموجودة في الكتاب المقدس ، و اجبروه على الاقرار بأن الارض مركز الكون ، و اتسجن و اتنفى لاخر عمره بسبب الموضوع ده .
جاليلو اتولد في بداية عصر النهضة في اوربا ، و كان ليه اسهامات كتير مش بس في الفلك انما كمان في الهندسة ، زي تجربته المشهورة لما طلع على برج بيزا المائل و رما حجرين مختلفين في الحجم واحد اكبر من واحد ، عشان يثبت ان تأثير عجلة الجاذبية على الجسمين واحد ، و ان الاتنين هيوصلوا مع بعض في نفس الوقت مش زي ما كان سائد ان الجسم الاتقل هيوصل الارض قبل الجسم الاخف .

بعض المعلومات المخزنة في ذاكرتي من كتاب عن العلماء قريته و انا صغير D:
و دي معلومات اكتر عن جاليلو من ويكي بيديا :
جاليليو جاليلي - ويكيبيديا .
Galileo Galilei - wikipedia



# تقرير سريع عن كتاب: No Logo .
الاخ عبدالله المهيري كتب في مدونته حاجة زي تقرير سريع بعد ما قرأ الكتاب ، تدوينة جميلة جدا و فيها معلومات ممتازة ، بجد لازم تشوفوها .
من زمان جدا و انا بكره فكرة العلامات التجارية - من المرحلة الاعدادية و قبل ما استخدم الكمبيوتر بشكل فعلي اساسا ! - ، مش بكره العلامة التجارية في حد ذاتها ، انما بكره فكرة ان الناس بتشتري الشيء لعلامته التجارية ، بغض النظر عن اي حاجة تانية !! ف مش غريب اني مش بحب اسلوب دعاية شركة ابل ! و الناس اللي كل شوية بتتفاخر فقط لانهم بيستعملوا كمبيوتر عليه علامة التفاحة ! ، ابل عندها منتجات كتير كويسة و ممتازة ، لكن عندها برده طرق كتير عشان تتحكم في المستخدمين اولها استغلال نزعة التميز ، و تانيها حاجة زي ادارة الحقوق الرقمية Digital rights management (DRM) ، و حاجات تانية !

اقروا التدوينة ، بجد ممتازة جدا ، و ان شاء الله في اقرب فرصة ناوي اعمل موضوع عن ادارة الحقوق الرقمية و تأثيرها على حرية المستخدمين : )



# مراكش الحمراء، مدينة المرابطين والموحدين .
من فترة كبيرة و انا بتابع مدونة محمد من المغرب ، بشكل اساسي هى مدونة شخصية ، بيكتب فيها اي حاجة يحبها ، في تدوينات كتير جميلة و استمتعت بيها جدا ، و دي واحدة من التدوينات الرائعة و فيها معلومات كتير حلوة عن مراكش في المغرب ، و بما اني بحب جدا الجزائر و المغرب ، من عادات و تقاليد و طبيعة و معالم و حتى الاكلات الشعبية D: ، و الاهم من ده ، اهلها نفسهم ، اعرف كذا شخص على النت جزائري و مغربي ، بجد ناس محترمة جدا و من اكتر الناس اللي بعزهم على الانترنت - عموما خلينا فاكرين ان اي بلد فيها الحلو و فيها الوحش ، و لو اتعاملت مع واحد مش كويس من البلد دي مش المفروض تاخد انطباع سيء عن البلد دي -
المهم ، اقروا الموضوع : )



# IE6 No More !
حملة للتخلص من انترنت اكسبلورر 6 !! ، كفاية بقى الزفت بلورر ده ! ، متصفح من العصر الحجري و متخلف عقليا ، مليان مشاكل ، مش ماشي على اي معايير قياسية ، مطلع عين مطورين المواقع ، كل ده و لسه في ناس بتستعمله !! و نظرا لان انترنت اكسبلورر 7 كان تقيل و غبي برده ف ناس كتير لسه بتستعمله ، و مع انترنت اكسبلورر 8 اتغير الحال شوية بس اساسا عيلة اكسبلورر كلها عيلة متخلفة عقليا !! حتى انترنت اكسبلورر 8 اللي لسه صادر من قريب غبي و بليد في موضوع المعايير القياسية ! جايب 20 من 100 في اختبار acid3 بتاع المعايير القياسية ، في حين ان كذا متصفح جايب 100٪ ، و اقل متصفح جايب 93٪ !! ، يعني فرق شاسع !!! ، و عن نفسي انا عاوز اتخلص من كل الانترنت اكسبلورر ، حتى لو عملوا انترنت اكسبلورر 21 ، هيكون غبي برده :@

الحملة اساسا موجهه للتخلص من انترنت اكسبلورر 6 ، الجميل في الموضوع ان في مواقع كبيرة و مشهورة كتير بتساند الحملة دي ، و كمان شركة جوجل كانت عامله اعلان في موقع يوتيوب بنفس المضمون ، شوفوا المواقع اللي بتساند الحملة في الصفحة الرئيسية .
عندك موقع و عاوز تشارك ؟ ، هتلاقي اكود جهازه في موقع الحملة ، كل ما عليك انك تنسخها و تضيفها في موقعك ، و هيظهر بانر في موقعك بينبه الشخص ان عليه تحديث المتفح بتاعه عشان قديم .
انا عن نفسي عملت شوية تعديلات بسيطة في السكربت ، و هكتفي بتلات متصفحات ، فاير فوكس ، كروم ، اوبرا ، و هخلي التنبيه يظهر لكل مستخدمي انترنت اكسبلورر !! ، ان شاء الله يومين و هعمل موضوع عن السكربت ده .



# مؤسسة البرمجيات الحرة تبدأ "GNU Generation" .
مؤسسة البرمجيات الحرة بدأت مشروع / مجموعة اسمها نشء/جيل جنو ، و دي مجموعة بتستهدف الشباب الصغيرين من سن 13 لـ 18 سنة ، لتعريفهم بفكر البرمجيات الحرة ، و تشجيعهم على انشاء و تطوير برامج حرة ، و مش بس بتستهدف الشباب اللي مهتم بالبرمجة ، انما كمان بتوضح طرق المساهمة في البرمجيات الحرة زي التصميم ، التوثيق ، و حتى طرق نشر و تأييد فكر البرمجيات الحرة .

يا رب اكون حي لما يعملوا FSFarabic.org : )


------------------

كفاية كدا دلوقتي D:

هناك 3 تعليقات:

  1. salam 3alicom

    مممممم من هنا وهناك وهناهو :D

    عجبتنى أوى حملة التخلص من الأكسبلورر 6

    وياريت يبقى فى حمله للتخلص من الويندوز بالمره :D وينتهى عصر الويندوز وشركة مايكروسوفت تنقرض زى الديناصورات ,,

    عموما أنا من مستخدمى اكسبلورر 7 يعنى

    :D فمحدش يشتم فيه ^^ بجانب فايرفوكس

    تحفه طبعاً

    ----------

    الإعلانات اللى بتبقى موجوده فى المنتديات والمواقع والحجات دى بجد بضايق منا جامد وخاصة ان كلها متحركه وكلام بينور ويطفى لما عنيا بتتعب من كتر اللخبطه ^^ ما يجيبوا مصممين بيفهموا كويس يعملوها زيى مثلا :D

    منتظره البوست اللى حضرتك قلت هاتكتبه

    ومعلش ع الرغى اللى فوق دا

    ردحذف
  2. زهرة الأمل :
    و عليكم السلام و رحمة الله و بركاته

    بالنسبة للوندوز نفسه انا معنديش مشكلة يفضل موجود ، المشكلة في الحاجات اللي بتشتغل عليه ، زي متصفح الانترنت و الاوفيس و حاجات تانية ، على الاقل لازم يكونوا ماشيين على معايير قياسية ، المشكلة ان شركة زي ميكروسوفت مش عاوزه موضوع المعايير القياسية دي عشان تفضل فارضه سيطرتها على سوق البرمجيات !

    و لو حضرتك بتدخلي المدونة بانترنت اكسبلورر ، يبقى شوية كدا و هتلاقي رسالة رخمة على المدونة بتطلب تحديث المتصفح D:

    -------

    فعلا في مواقع غبية جدا في موضوع الاعلانات ده ، و بتلاقي اعلانات عماله تتنطط يمين و شمال و تنور و تطفي ، تخلي الواحد يطفش فعلا D: - اكيد الناس دول عاوزين مصمم ذو حس فني زي حضرتك ^_^ ٠-

    انما برده في مواقع ، مدونات ، منتديات كويسة جدا اعلاناتها عبارة عن اعلانات نصية ، او اعلان مصور بسيط و مش متحرك ، فالمفروض برده نراعيهم : )

    لو حضرتك جربتي الاضافة اللي بقول عليها دي ، هتمنع اغلب الاعلانات اللي بتظهر ، و كمان ممكن منع اي صورة في الصفحة .

    و ان شاء الله هحاول اعمل الموضوع في اقرب فرصة : )

    -----

    ولا رغي ولا حاجة ، حضرتك على الرحب و السعة ، زي مدونتك بالظبط : )

    ردحذف
  3. وعليكم السلام ورحمة الله وبركاته

    ظريفة جدا التدوينة ربنا يبارك :)

    عجبتني قوي طريقة التفكير اللى لأول مرة بأقرأها إنه نسمع لبعض المواقع بال"النوافذ القافزة" عشان ندعمها ! تفكير جميل :)

    وناوية إن شاء الله أنضم لحملة وضع أكبر "إكس" على "إكس بلورر" :D

    ...

    بجد أحييك على مدونتك محافظة على تقدمها ومستوى التدوينات الراقي :)

    ردحذف