الاثنين، 14 ديسمبر 2009

التحضير للمذاكرة .


السلام عليكم و رحمة الله و بركاته

اخيرا جدول الامتحانات نزل بتأخير كبير عن ميعاد نزوله في كل سنة ، و بداية الامتحانات هتكون ان شاء الله يوم 16\1\2010 ! (في الحقيقية ناس كتير كانت متوقعة التاريخ ده عشان احنا بنبدأ مع كلية التجارة ، و امتحانات تجارة هتبدأ يوم 15 تقريبا)
طبعا انا بدأت المذاكرة من فترة لكن دي تدوينة في السريع كدا : )


كل فترة قبل الامتحانات لازم يكون في تحضيرات لتكثيف المذاكرة
من اهم التحضيرات الاساسية للامتحانات تلات حاجات :

١. الكمبيوتر يتشال عشان اقدر اذاكر و اركز بشكل افضل .
٢. احلق شعري ! ده برده متعلق بالتركيز .
٣. اعمل جولة تسوق عند العطار ههههههه .


الكمبيوتر لازم يتشال عشان احظى بشوية صفاء ذهني و تركيز اكبر في المذاكرة ، الكمبيوتر كدا متشال بقاله اسبوعين و شوية ، لكن التدوينة دي من على جهازي في البيت لاني بظبط شوية حاجات في النت ، التلفون كان مقطوع اكتر من تلات اسابيع و بالرغم من التبيلغ عن المشكلة اكتر من مرة ، السنترال مبعتش فني غير لما كتبت شكوى لمدير السنترال !! (مع ان العطل كان عبيط جدا و مش محتاج كل التأخير ده ، مجرد الفني يجي يظبط الخط من الكابينة الرئيسية مش اكتر !)

لازم احلق شعري عشان اعرف اذاكر ، مش عارف ليه لازم احلق لكن بحس براحة نفسية ، يبقى ليه ﻷ
و بما اني في الفترة دي بستهلك كمية كبيرة من المشروبات و لاني مش من مدمني الشاي و عشان مخلصش التوابل اللي في البيت كلها فلازم اعدي على العطاراشتري حاجات زي قرفة ، قرنفل ، ينسون ، شمر ، كركديه ، نعناع ، الخ الخ الخ

بحاول استغل الفترة دي في عمل حاجات تانية لاني بالتأكيد مش هقعد اذاكر ٢٤ ساعة في اليوم ! - ده فضلا عن اني لو قعد اذاكر بس هتخنق من المذاكرة ! -

بحاول احفظ قرآن ، او في الحقيقة براجع على الحاجات اللي كنت حافظها ، للاسف بقالي فترة كبيرة جدا مش بحاول احفظ حاجة !

و من ناحية تانية ، بحاول اعمل بنصيحة الاستاذ طه الوكيل مدرس الخط اللي قدم دورة تنمية مهارات الخط العربي في جامعة القاهرة ، و نصيحة الاستاذ طه هي عمل تدريب على الخط لمدة خمس دقايق يوم بعد يوم (تلات مرات في الاسبوع يعني) ، و فعلا نصيحة ممتازة جدا جزاه الله خير عنها ، لان خير الاعمال ادومها و ان قل ، مجرد خمس او عشر دقايق كل يومين اكتب تدريب خط ، هتلاقي نفسك مع الوقت بتتقن الخط و بتكون اسرع في الكتابة : )

بجد الدورة دي استفدت منها كتير جدا و عرفتني على مجال الخط العربي الرائع ، انا الحمد لله خطي كويس لكن لما عرفت قواعد كتابة الحروف خطي انتقل لمستوى تاني خالص ، و كمان عرفت بعض الاخطاء زي خطأ شائع جدا (و انا شخصيا كان مضحوك عليا لمدة ١٥ سنة ) كانوا ديما في المدرسة بيقولولنا ان الكاف اللي في الاخر عليها همزة ! الواقع ان اللى على الكاف المفردة او في نهاية الكلمة => "ك" ده مش همزة ! شارة الكاف دي مش همزة فعلا ! افتح اي مصحف و قارن بين شارة الكاف و الهمزة ، دي شيء و دي شيء تاني خالص !
و برده حاجة كمان ، في التنوين بالفتح ، الفتحتين مش بتكون على حرف الالف الزائد انما بتكون على الحرف الاخير الحقيقي زيه زي التنوين بالضم و التنوين بالكسر ! برده افتح المصحف و شوف

و من يومين عديت على مدرسة تحسين الخطوط العربية بالجيزة و مقرها مدرسة السعيدية الثانوية اخدت من هناك شوية معلومات و بيانات عن المدرسة و الدارسة فيها و المعارض اللي بتتعمل كل آخر سنة دراسية و الاساتذة هناك ناس محترمة جدا ما شاء الله ، و ربنا يسهل بعد الامتحانات كدا هيكون جاهز تقرير مدعم بالصور و الفيديوهات عن مدرسة تحسين الخطوط لاني اعتقد ان خسارة جدا مدرسة عريقة زي دي مش واخدها حقها بالمستوى الكافي اعلاميا و خصوصا على الانترنت !


--------

يا رب سنة رابعة تخلص على خير ، و ربنا ييسر للجميع في الامتحانات ، دعواتكم : )

هناك 13 تعليقًا:

  1. ربنا يوفقك فى المذاكرة

    ردحذف
  2. وعليكم السلام ورحمة الله وبركاته

    هههههههه أنا دلوقتي فهمت ليه اخويا حلق عالزيرو من كام اسبوع .. يظهر دي حاجة متعلقة بالأولاد مكانش عندي خبر عنها ! :D

    أول مرة اعرف معلومة شارة الكاف دي .. انا بصيت عليها في المصحف فعلا هي مش همزة لكن قريبة جدا منها ..

    أما بالنسبة للتنوين فكنت عارفه المعلومة

    ملاحظة على الهامش : كتير من الكلمات في القرآن بتبقى مكتوبة بشكل مختلف عن كتابتنا لها لأنها مرسومة بالرسم العثماني .. فده لا يعني ان كتابتنا غلط (الملحوظة مش متعلقة بحاجة في التدوينة هي بس حاجة خطرت على بالي) :)

    بالتوفيق إن شاء الله

    ردحذف
  3. الله يوفقك في امتحاناتك و ان شاء الله تكون النتيجة مثل ما بدك...

    صالح

    ردحذف
  4. وعليكم السلام ورحمة الله وبركاته
    ==============================
    بالنجاح ان شاء الله
    متابع جديد لتدويناتك .. خفيفة الدم
    ==============================

    ردحذف
  5. السلام عليكم

    إزيك يا أحمد بيه إيه أخبارك ؟
    شد حيلك يا بطل
    فقد وددت أن ألقي عليه تحية

    ردحذف
  6. بالتوفيق إن شاء اللـه :)

    --

    معلومة الهمزه دي جديده عليا :D
    نفسي أتعلم خط عربي أوي واساسيات الخط وكتابة الحروف وكدا , انا خطي حلو الحمد لله بس محتاجه أنمي المهاره دي .. هحاول أتعلم الخط في الاجازه بإذن الله ..

    ويارب رابعه تعدي على خير وننطلق للحياه العمليه بقى ^_^

    ردحذف
  7. عليك سلام الله سكيلتون :)

    احم ،، حضرتك بجد بتعرف تشيل الكمبيوتر =DD ،، انا ماما ممكن تشلوا بالعافيه
    ومع ذلك ببقى قاعده على المذاكرة كأن
    حد مات =D يارب اعرف اعمل كده !!

    ضحكت اوى على حكاية الشعر دى =D
    وحلوة بتاعه العطار بردو انا مدمنة
    نسكافية وكابتشينو بقى =D
    هجرب اروح للعطار اشترى الحاجات التانية
    علشان التنويع بقى =D

    الله خط عربى ،، انا بحب اقعد ابص للمساجد من جوه علشانه بجد تحففففة
    وانا كمان زى الاخوة اول مره اعرف
    شارة الكاف دى :)

    سؤال بقى مدرسة تحسين الخط العربى
    جوه السعيدية ولا ادارتها بس =D ?
    وفيه للبنات ولا ولاد بس
    اصل انا فعلا عايزة اتعلم الخد العربى
    كويس ،، وبحب اى حاجه تيجى من السعيدية بصراحه ^_^
    اخويا كان فيها

    احم اذكر نفسى للمره المش عارفه كام
    انا بقيت رغايه جدااا =D
    معلش بقى ،،

    المهم ربنا يخرجنى على خير ويخرجك على خير وكل سنه رابعه يارب =DD

    ردحذف
  8. نسيت اقول حاجه ،،
    الويندوز خانقنى انا واخويا جداا
    قولتله على لينوكس ونزلت الكتاب
    بتاع حضرتك وان شاء الله هنسطبة =D

    ادعيلنا هنستخدمه
    المنتدى يرجع تانى علشان يدخل
    يسأل حضرتك لو حاجه وقفت =D

    جزيت خيرا بجد :)

    ردحذف
  9. غير معروف 1 ، غير معروف 2 :
    شكرا لكما و اتمنى التعريف بنفسكم في المرات القادمة : )

    Maha :
    بالنسبة للشعر ، اصل في نظرية بتقول ، يا اما تغذي شعرك و يا اما تغذي مخك D:

    بالنسبة للخط ، المشكلة ان الواحد من و هو صغير بيقولوا له ان الكاف في اخر الكلام عليها همزة ، و الواحد لما يحاول يحسن خطه و هو ميعرفش قواعد الكتابة هيجاول يخلي العلامة اللي على الكاف تكون شبه الهمزة و هي مش همزة اساسا !
    مش عارف ليه بحس بالقشعريرة لما افكر في واحد عمال بيبذل مجهود عشان يعمل حاجة هو فاكرها صح و في الحقيقة هي غلط :s

    بالنسبة للرسم العثماني على حسب معلوماتي ان الفرق بينه و بين الرسم الاملائي في حاجات بسيطة جدا (حروف المد و الهمزات) ، بس عموما الخط الاساسي اللي بيتكتب بيه المصاحف حاليا هو خط النسخ .

    و شكرا على الدعوة : )


    SalehRam :
    آمين ^_^
    شكرا ليك يا صالح ، منور المدونة ^_^

    ردحذف
  10. أحمد شريف :
    انا الحمد لله نمام ^_^
    ربنا يكرمك يا احمد ^_^


    • kĕnzy • :
    شكلنا كلنا مضحوك علينا بقى D:
    بس للاسف هو اولا و اخيرا تقصير مننا : (
    حضرتك اكيد هتلاقي كتب عن الخط في مكتبة مبارك العامة في المنصورة
    www.mpl-mansoura.org

    و كمان غالبا هتلاقي مدارس خط عندكم
    ^_^ (في اقرب فرصة هسأل لحضرتك على المكان بالظبط)
    غالبا بيكون في دورات صغيرة في اساسيات خط النسخ و الرقعة ، هتلاقيهم مفيدين جدا : )

    و ان شاء الله نخلص رابعة دي على خير ^_^


    ❣sh!ko❣ :
    شيل الكمبيوتر ده بيتعمل من اول ما جه D: ، فعليا معنديش كمبيوتر غير من تلات سنين تقريبا =)
    عن نفسي من اكتر المناصريين لاسلوب ده ، بيدي فرصة للعقل يشتغل بشكل ممتاز و كمان التركيز بيزيد (تركيز اكتر = تقدير اكبر D:)

    حد يسيب نباتات مفيدة زي اللي عند العطارين و يمسك في النسكافية و الكبتشينو ؟ حضرتك لازم تراجعي موقفك D:

    العربي جميل جدا فعلا : )
    مدرسة تحسين الخطوط مقرها و نشاطها في مدرسة السعيدية ، و دوامها بيبدأ بعد اليوم الدراسي ، حوالي الساعة تلاتة العصر .
    و فيها ولاد و بنات عادي (مش بياكلوا البنات حاليا D:)

    ان شاء الله هتلاقي كل المعلومات عن المدرسة دي في التقرير اللي هعمله عنها بعد الامتحانات : )

    و يا رب تستخدموا اللينوكس و تستقروا عليه ^_^
    بس للاسف مش هكون موجود على الانترنت قبل شهر اتنين ، بس اكيد هكون جاهز لاي اسئلة ^_^

    و جزانا الله و اياكم كل خير ، و يا رب كل الناس اللي في رابعة تخلص بسلام : )

    ردحذف
  11. الأستاذ الفاضل / أبو زيد

    أشكر لك مشاعرك النبيلة تجاه الخط العربي بوجه عام وتجاه مدرستنا السعيدية لتحسين الخطوط بوجه خاص
    وأبشرك بأنني قد حققت ما رجوته أنت لمدرستنا في أن يكون لها موقع على النت
    وإن كانت التجربة متواضعة إلا أنها ستصل إلى ما نصبو إليه جميعا بتعاون المتحمسين أمثالك
    وإليكم رابط الموقع :

    أ / علي رزق مدرس أول لغة عربية
    وطالب بالصف الثاني بمدرسة تحسين الخطوط بالسعيدية

    http://alirezk.ahlamontada.net/forum.htm

    ردحذف


  12. النمل الابيض من المشاكل الكبيرة ايضاً ، فيسمي بالحشرة المخربة لان له اضرار صحية و اضرار تخريب اقتصادي . حيث يتغذي علي العفش
    و جميع الممتكات . فنحن نقضي عليه بطرق أمنه و لدون بعثرة المنزل من خلال خدمة :-
    شركة مكافحة النمل الابيض بالمدينة المنورة

    لمن يخشي علي المكيف الخاص به من التلف ،او من تعشش الحمام علي المكيف ، او خشياً من العوامل الجوية المختلفه و الصدأ . نقوم بتركيب
    اغطية مميزة لجميع انواع المكيفات .
    تركيب أغطية مكيفات بالمدينة المنورة

    نظراً لظروف البلد من انتشار فيروس كورونا فلابد من التعقيم الشامل بالوسائل التي تضمن القضاء النهائي علي الفيروسات .
    و يتم ذلك من خلال شركتنا افضل شركة تعقيم .
    شركة تعقيم بالمدينة المنورة

    الاهتمام بالصحة من اهم الضروريات التي يجب السعي اليها . التعقيم من اهم وسائل الحمايه من اي فيروس او بيكتيريا منتشرة بالمكان . فنقدم افضل خدمة تعقيم من خلال :-
    شركة تعقيم بينبع



    نحل جميع مشاكل تسربات المياه . من خلال اجهزه حديثه و تقنية عاليه في الكشف المبكر عن التسربات و اللحاق باي مشكلة .
    شركة كشف تسربات المياة بالمدينة المنورة

    ردحذف