من هنا و هناك 2 .

السلام عليكم و رحمة الله و بركاته

هكمل هنا بقية الحاجات التقنية شوية ، و اللي ليها دخل بالبرمجيات الحرة : )

------------------------------

الأن ، شغل نظام اندرويد على جنو/لينوكس - مجتمع لينوكس العربي .

ترجمة شرح مع شوية اضافات كدا لطريقة تشغيل نظام اندرويد الحر على اللينوكس ، عن طريق المحاكي الموجود مع الـ SDK
حتى الناس اللي مش هتطبق الشرح ، عملت مقدمة لطيفة كدا للموضوع عشان يعرفوا معلومات اكتر عن نظام اندرويد .

بس فعلا الـجهاز الاخير - HTC Hero - بنظام اندرويد من شركة HTC عاملين فيه شغل جميل ، و الواجهة المحسنة اللي عملتها HTC فعلا حلوة .



-------------------------------------




Design Challenge: Summer 09 - تحدي التصميم من موزيلا - مجتمع لينوكس العربي .

الفترة اللي فاتت حبيت اتعرف على مؤسسة موزيلا اكتر ، و كنت متابع للموقع الرئيسي ، و المدونة بتاعتهم ، و الفروع التابعة لهم ، فعلا الخاصة بالنظام .تعرفت على موزيلا كما لم اعرفها من قبل !

الموضوع مش بس عن المسابقة اللي عملاها موزيلا لتصميم افضل فكرة ، عملت مقدمة مطولة شوية عن موزيلا و المواقع التابعة ليها ، بجد موزيلا دي حاجة رائعة و مش مجرد مؤسسة كدا و خلاص !! ، اقروا الموضوع اكيد هيعجبكم : )

المهم ، الصيف ده موزيلا عامله مسابقة عن افضل طريقة للتعامل مع التبويبات "Tabs" ، و خصوصاً التعامل مع التابز الكتيرة - انا واحد من الناس ساعات كتير بفتح بالـ 20 و الـ 30 تاب في نفس الوقت D: -
اعتقد ان مستخدمي اللينوكس عارفين اهمية التابز و ازاي بتوفر الوقت ، لان في تابز في كل حاجة دلوقتي ، متصفح ، محرر نصوص ، مدير ملفات ، محادثة فورية ، طرفية و غيرهم !

حاليا جاري التصويت على الافكار المطروحة ، عمال بتفرج على التخطيطات و الفيدوهات الخاصة بالافكار عشان اختار فكرة منهم - غالبا بكتفي بالتخطيط/النموذج "mockup" الا لو عجبتني الفكرة ، عشان عدد الافكار كتير نوعا ما
و شوف احسن تصميم عجبك ، وشايف انه عملي و فعلا بيوفر الوقت و المجهود في التعامل التابز الكتيرة و صوت عليه ، هتلاقي معلومات اكتر عن المسابقة في الموضوع : )

اذا شوفت الموضوع في المنتدى ، اهه لينك للمسابقة

Cast your Vote for the "People's Choice" Award





اخيرا ، لو حد يعرف خلفية كويسة لموزيلا يا ريت يبعتهالها ، لاني قلبت النت تلات مرات على خلفية كويسة لموزيلا ملقتش !! ، و لان النسخة 3.5 من الفاير فوكس عملتلي حاجة في دماغي D: - نسخة جامدة جدا ^_^ - حاليا حاطط خلفية للفاير فوكس ، برده لقيت خلفية تانية جميلة ، بس فاتحه اوي ، عشان كدا بستعمل الصورة الاولى ، الاتنين اهم

|
اضغط على الصورة للتكبير




بس فعلاً يعني ،،،

المزيد »

من هنا و هناك 1 .

السلام عليكم و رحمة الله و بركاته

تدوينة سريعة كدا عن شوية حاجات عملتها الفترة اللي فات او بعملها دلوقتي : )

----------------------

اول رسم على جيمب - مجتمع لينوكس العربي .

من اول ما عرفت الكمبيوتر و انا مقتعنع ان مينفعش تستعمل برنامج رسم عشان ترسم زي ما بترسم بإيدك ، عشان الماوس مينفعش للموضوع ده خالص ، بس في يوم كنت زهقان شوية و النت كان قاطع ، قولت اجرب ارسم باستخدام برنامج GIMP ، بس مش بالفُرشة العادية ، انما بأداة رسم المسارات paths .
ـ
- "GIMP محرر الصور الشهير" مقال ممتاز عن البرنامج -


من حوالي سنتين ، كنت رسمت بإدي على الورق رسمة لبطريق ، و قولت اجرب انل الرسمة و لكن بشكل كرتوني شوية ، و طلعي الاخ ده D:


اضغط على الصورة للتكبير .


بعديها بيومن ، و ما زال النت قاطع و الملل مستمر D: ، قولت اجرب ارسم حاجة من دماغي ، اي حاجة تيجي على بالي ، راح طلعلي الاخ ده - اول حاجة بتفكرني بالبطاريق انها بتعيش في مكان تلجي و صعب يعيش فيه كائنات كتير ، وتقريبا مفيش اي فراش بيعيش في المناخ ده ، يعني صعب الاتنين يلتقوا ببعض ، اعتقد ان لو في بطريق لو شاف فراشة هيكون عنده الفضول الكافي انه يمسكله واحده يسكشفها D: -


اضغط على الصورة للتكبير .

بس بعد الرسمتين دول ، عرفت ان افضل برامج للرسم بالشكل ده هى برامج الرسم المتجهي زي Inkscape
ـ
"Inkscape للرسوميات المتجهة" مقال ممتاز عن البرنامج -

------------------------------

فكرة شعار لحملة Play Ogg - مجتمع لينوكس العربي .

بعد موضوع الرسم ده ، نفسي كانت مفتوحة على برنامج جيمب مع اني مليش في التصميم ولا برامج الجرافكس خالص ، و في فترة الامتحانات الواحد بيلاقي افكار غريبة كدا ميعرفش بيجبها منين ، تلاقي الواحد في وسط ما هو بيذاكر يلاقي فكرة نطت في دماغة من غير اي مقدمات D: ، عن نفسي بكتب اي فكرة في ورق عشان لما اخلص الامتحانات ابقى اجربها او اعملها

المهم ، كان عندي فكرة صغيرة لحملة "Play Ogg" ، مبدئياً بس عشان اللي ميعرفش ايه هى الحملة ، دي حملة بقيادة مؤسسة البرمجيات الحرة "FSF.org" لدعم صيغة Ogg الحرة ، ده مقال ممتاز جدا عن الصيغة دي "صيغة ogg المفتوحة" ، هتلاقو اللوجو الاساسي للحملة اخر شعار تحت على اليمين في الجزء بتاع "مشاريع و حملات ادعمها" .

الفكرة الاساسية للتصميم ، هى عمل زرار play جوا حرف الـ o بتاع كلمة ogg ، بحيث تدل على play ogg ،،



و عشان مش كل الناس تعرف باسم الحملة ،، ممكن متفهمش الفكرة اوي ، قولت ممكن اكتب play ogg تحت التصميم ، كدا



طبعا التصميم المفروض يكون اصغر من كدا ، بس انا كنت عامله كبير شوية لان الغرض كان توضيح الفكرة الاساسية .

------------------------------

جهاز Mp4 خربان !

الاسبوع اللي فات ، كان في واحد عامل موضوع في منتدى شمساوي - منتدى طلاب جامعة عين شمس - كان عنده مشكلة في الـ mp4 ، منتدى شمساوي انا متابعه بشكل دائم و ليا اصحاب كتير هناك مع اني من جامعة القاهرة ، فعادي يعني D:
المهم ، الـ mp4 بتاعه مكملش اسبوع و كان ضارب !! - mp4 متقدم شوية و بكاميرا ، اللي الناس بتقول عليه بالغلط mp5 ، جاله شاشة الموت البنفسجة D: ، الجهاز مش بيفتح اساسا ، لما بيشغله بيعلق عند الجزء بتاع light ur life و مش بيكمل !! ، انا فكار المشكلة دي لان واحد صاحبي من سنتين كان معاه mp4 ، و كان مش راضي يتوصل بالكمبيوتر ، و اول حاجة شكيت فيها ان في مشكلة في السلك او الفيرم وير (firmware) - ده زي السوفت وير بس من اسمه كدا ، بيحتاج لطريقة معينة للتغيير ، عشان بينزل على الـ ic مش وحدة تخزين عادية زي الهارد او كارت الميموري - ، الحمد لله الموضوع طلع بسيط و المشكلة كانت في السلك ، بس انا كنت عملت شوية سيرش على النت و عرفت شوية معلومات عن مشاكل الفيرم وير

المهم ، هو اساسا كان وداه عن واحد و قاله مش فاضي اعمله - شكله معرفش يعمله اساسا D: - ، و الجهاز يا دوب مكمل الاسبوع عنده اصلا !! ، قولت احاول اساعده عشان انا نفسي مستخسر الـ 200 جنيه اللي ادفعوا في الجهاز D:

ضفته على الماسنجر ، عشان موضوع المنتدى ده مش هينفع خالص ، و فهمت الوضع ، و لقيت ان الموضوع مش هينفع بالكلام كدا ، و لقيت ان افضل حل للموضوع ده هو برامج التحكم عن بعد زي UltraVNC ، RealVNC و دي برامج مفتوحة المصدر ، و برده في برامج مغلقة ، زي TeamViewer ، اول برنامجين ممتازين جدا ، و خصوصوا الترا في ان سي ده ممتاز و فيه خصائص قوية ، بس محتاج شوية اعدادات في الاول كدا ، و قولت بلاش اوجع دماغه بيها ، و نستخدم برنامج اسهل زي تيم فيور - البرنامج بيشتغل على واين في اللينوكس - ، سطبنا البرنامج ، و دخلت على جهازه ، و بكدا كأني قاعد جنبه و شايف نفس الشاشة و بتحكم في الماوس و الكيبورد عادي خالص .

انا عارف الفكرة العامة ، و ازاي نعمل الموضوع بس مكنتش جربته قبل كدا بشكل عملي ، طبعا بعد ما فك الجهاز و جاب اسم/موديل البرودة بتاعت الـ mp4 ، عرفت اجيب البرنامج اللي بينزل الفيرم وير و اجيب الفيرم وير المظبوط كمان .
المشكلة بقى ان اجهزة الـ mp3/mp4 اللي في السوق كلها تقريبا صيني ، و شركات غريبة كدا مش معروفة ، بس الحمد لله لقيت الفيرم وير المظبوط ، بس كان في مشكلة عويصة بقى ، ان في مجموعة من الاجهزة الفيرم وير نفسه فيه مشكلة ، يعني المفروض اننا نزلنا نفس الاصدار الخاص بالجهاز ، بس الشاشة مكانتش شغاله ، كل حاجة شغاله فيه ، بس الشاشة سودا خالص !! ، جربت فيرم وير من موقع تاني لنفس الموديل ، برده نفس الوضع !! ، بعد فترة من البحث ، لقيت واحد كاتب معلومة مفيدة في مدونته ، و ان في اجهزة مش بتقبل الفيرم وير بتاع موديها ، فلازم تستعمل فيرم وير بتاع موديل تاني !! - المفروض اساسا لو استعملت فيرم وير بتاع موديل تاني الجهاز ميشتغلش كويس - ، في الاخر جربت الفيرم وير ده ، و الحمد لله الجهاز رجع للحياة تاني و اشتغل ^_^

هو الموضوع مش صعب بس كان محتاج شوية تجريب ، دا غير اني مش بتحكم في الـ mp4 فزيائياً ، كنت بقول لصاحبه يعمل ايه من عنده ، فالموضوع ممل نوعا ما يعني ، ، بس برده صاحب الجهاز ما شاء الله عليه دماغه حلوة و مصحصح و الحمد لله الموضوع نفع في الاخر ^_^

اخيرا ، ده رد ليا كنت بوضح الطريقة في المنتدى و الخطوات اللي عملناها و المشاكل اللي واجهتنا عشان لو حد وقع في نفس المشكلة يقدر يحلها بسهولة .

== خطوات حل مشكلة الـ mp4 ==


-----------------------------------

كفاية كدا على الموضوع ده عشان بقى كبير اوي O_o !

المزيد »

مايكل جاكسون مات ...

السلام عليكم و رحمة الله و بركاته

اعتقد ان ناس كتير سمعت بخبر موت مايكل جاسكون من يومين ، و برده اعتقد ان ناس سمعت عن الضغط الكبير على عدد من المواقع زي تويتر و المواقع الاجتماعية زي الفيس بوك و كمان مواقع البحث زي جوجل !!

بغض النظر عن مايكل جاسكون نفسه كمغني ، كان ليه معايا حكاية و انا صغير شوية : )

ده رد كتبته في منتدى ، بيوضح قصدي : )


#############################


لسه قاري الخبر من ساعة تقريبا ، ، ، ياااه ، مايكل جاكسون مات : )

بغض النظر اذا كان اسلم فعلا ولا مأسلمش - بحسب ويكي بيديا هو مأكدش الموضوع ده - ، و بالنسبة للفيديو حتى لو حقيقي ، برامج النميمة الامريكية دي محدش ياخد منها معلومة ، لانها اساسا بتعتمد على الاشاعات و الكلام على المشاهيير : )

مايكل جاكسون كان ليه مواضيع كتير في نص التسعينات - في الحقيقة هى كانت نهاية نهاية الكلام عنه -
طبعا مايكل جاكسون مسلمش على المستوى المصري ، كان دايما مجال واسع للاشاعات ، كنت دايما و انا صغير اسمع كلام عنه و اللي كانت في شكل اشاعات ، اللي يقولك ده خنثى ، و اللي يقولك ده بقى ست ، و اللي يقولك دا غير لون جلده بمزاجه ، و اشاعات كتير بالشكل ده ، يمكن مكنتش مهتم بمايكل جاسكون نفسه او بأخباره - مع ان كان ليه لعبة على جهاز السيجا و كانت حلوة فعلا D: - ، انما ديما بتلاقي صوت في عقلك - حتى و انت صغير في السن - بيقولك ان الكلام ده مش منطقي ، وحتى لو حقيقي ، ايه الفايدة منه ؟

كنت ديما لما حد يقولي كلام عنه ، اقوله انت جبت الكلام ده منين ، و ايه الدليل و الكلام ده ، طبعا مكنش في اي رد ، مجرد اطفال بتردد الكلام ، و اهو كلام بيتقال و خلاص ، يعني مجرد "ثرثرة" : )

انما برده لما كبرت شوية ، تقريبا في المرحلة الاعدادية كنت مهتم اعرف مدى صحة الاشاعات دي ، و الى اي مدى احنا بننقل الكلام من غير ما نفكر فيه سواء كانا اطفال صغيرة ، او شباب ، او حتى كبار !
اتفرجت على فلمين وثائقين عن مايكل جاكسون - واحد منهم مكنش فيلم وثائقي فعلا ، هو كان شو ، راجل بيحاور مايكل جاكسون ، و بيعرضوا معلومات عن حياته - ، و كانوا بيحكوا قصة حياته و الحاجات اللي حصلته ، و انه اساسا كان اسود ، بس بسبب مرض - حاجة زي البهاق كدا - ، بدأ لون جلده يروح خالص ، و كان بيستخدم كريمات على كل جسمه ، ده غير العمليات اللي عملها ، و المشاكل و الفضايح - او اللي مفروض انها فضايح يعني - و حاجات كتير عن حياته يعني ، بس فعلا حياته كانت غريبه جدا : ) ،،، في الاخر عرفت مدى تداولنا للاشاعات و مدى تحريفنا للكلام حتى لو كان صح !

------------------------

## صورة ##
بس يا ترى اللي كان بيترق و عمل الصورة دي كان عارف ان مايكل جاكسون مش هيعيش لحد 2010 ؟ اكيد لأ ، و ده يخلينا نتعظ اكتر حتى

عموما ، ربنا يرحمه و يغفر له اذا كان اسلم بجد ، اهو برده عبره للاتعاظ ، و بأي حال من الاحوال "لا شماته في الموت" : )

و على فكرة ، في امريكا ، الدنيا مقلوبه على الموضوع ده ، و تويتر ، و المواقع الاجتماعية ، و حتى مواقع البحث زي جوجل و بينج ، عليهم ضغط كبييييير جدا لدرجة انهم بيتوقفوا عن الاستجابة من كتر الضغط : )


#############################

* الفيديو اللي بيتكلموا عليه اهه
http://www.youtube.com/watch?v=zvLLG5Ne35Q

* و لو حد عمل سيرش على كلمات نشيد give thanks to allah بتاع Zain Bhikha ، هيلاقي موضوع منسوخ في كذا منتدى و بيقولوا ان النشيد ده بتاع مايكل جاكسون لما اسلم !! ، انا متابع لكل اناشيد زين بيكا تقريبا و بالتالي عرفت النشيد من كلماته على طول و انه مش بتاع مايكل جاسكون خالص يعني !

المزيد »

اول اسبوع خلص + شوية اكتئاب !

السلام عليكم و رحمة الله و بركاته

ادي اول اسبوع بعد نهاية الامتحانات خلص ، و ما زال عندي شوية اكتئاب ، شكله كدا من اثار الامتحانات ! - بقالي اكتر من شهر فحت و ردم ! -

في حاجات كتير ناوي اعملها ان شاء الله ، بس مليش نفس لأي حاجة خالص ، ولا حتى القعاد على الكمبيوتر !

مش عارف في ايه بالظبط ، بس حاسس اني مخنوق من كل حاجة !


و ما شاء الله الاجازة شكلها مبشرة يعني !

مش عارف ايه النظام ده ، الواحد يقعد على الكمبيوتر في الدراسة يلاقي اهله يقولوله قوم ذاكر ، يقعد في الاجازة يقولوا ارحم نفسك من الكمبيوتر !! ، مش عارف اعمل ايه يعني !

و والدي مش عارف ماله بيا بقاله فترة كدا زي ما يكون مستقصدني ، و كأن البيت كله خلص من المشاكل و مفيش غيري !
شوية يقعد يكلمني عن التخن و اضراره و انه وحش و مش عارف ايه كدا ، مع انه المفروض عارف اني في فترة الامتحانات طبيعي جدا بتخن شوية عشان نشاطي بيكون محدود شوية و بحاول اركز في المذاكرة ، دا غير اني مش بتخن اوي يعني ، هما كلهم خمسه سته كيلو يعني ! ، و مع اول نشاط بعد ما الامتحانات تخلص برجع عادي خالص !


و برده شوية يكلمني على طول الشخص و ازاي بيأثر في حياته ، و ان مفيش حد بيرضى بالرجالة القصيرين لما يجو يتجوزو و مش عارف ايه ! ، و اني مش ببذل نشاط كبير او بلعب رياضة عشان كدا انا قصير !
طيب اعمل ايه يعني ؟ ، مثلا وزن الواحد ممكن الواحد يتحكم فيه - و ان كان في ناس فعلا مهما عملت بيكون تحكمها في وزنها صعب ، دول يموتوا نفسهم يعني ولا ايه ؟ - ، انما بالنسبة للطول دي حاجة بشكل اساسي وراثية و جزء كبير منها بيتحدد بالوراثة ! - مع ان والدي طويل يعني - ، و برده مع ذلك انا مش قصير اوي ، انا في حدود 171 - 172 سنتي ، يعني مع الشعر و الكوتش ببقي كأني 175 سنتيمتر !!
و الله انا مش هقعد اشغل نفسي بشيء مش بيدي ! ، انما اشغل نفسي بحاجة اقدر اتحكم فيها ، اطور من نفسي ، و ازود مهاراتي و معارفي !

و الموضوع اساسا مش هيفرق يعني في اي حاجة ! ، هو بس في نقطة الجواز دي هتفرق شوية على المستوى الاجتماعي ، و ان الست لازم تكون اقصر من الراجل و مش عارف ايه كدا ، ماشي مفيش مشاكل يعني ، البنات يومين دول خلاص يعني مش ناطحات سحاب ، اكيد هلاقي بنت في حدود الـ 170 سنتي - محدش بس يقولي ان الطول مش مهم خالص ، لا مهم ، و في اكتر من منتدى و خصوصا في المنتديات الطلابية ، اتفتح مواضيع زي دي ، و هل البنت تقبل بولد اقصر منها ولا لأ ، و اغلبهم قال لأ ، و حتى اللي قال ايوه ، مع الوقت و اختلاطهم بالناس اجتماعيا ، كتير منهم هيغير رأيه لـ "لأ" برده - : )

و مع العلم ان اخويا الاصغر مني على طول بقى اطول مني دلوقتي و اخويا الوسطاني قرب يبقى اطول مني ، و معنديش مشاكل يعني و مش هموت نفسي !!


و برده شوية كمان ، يقعد يكلمني عن الكمبيوتر بيخلي الواحد مش اجتماعي ، و بيجيب اكتئاب ، و المفروض انزل اتعامل مع الناس في الحياة الواقعية ، و الكلام ده !
ماشي يعني ، مفيش مشاكل ، بس انا مش من النوع اللي بيحب ينزل الشارع عمال على بطال كدا ! ، بنزل الشارع عشان غرض معين و ارجع تاني ، و لازم يكون غرض محدد و ذو قيمة ! ، مش بعرف انزل و اتصرمح في الشوارع كدا ولا اقف على النواصي ، ولا اقعد مع اصحابي نقعد نجيب في سيرة الناس و ننم ده و نغتاب ده !

اي نعم انا بصنف نفسي اني من المدمنين على الكمبيوتر/الانترنت ، بس اذا كان عندي مسئولية او شيء المفروض اعمله بعمله ، و بقية الوقت بقعد على الكمببيوتر اعمل حاجة مفيدة برده ! ، يعني الموضوع في كل الحالات مش خارج عن الحد !



اللي يغيظيني بقى ان بقدرة قادر كل ده مرتبط بالكمبيوتر بطريقة ما ، و ان في رابط عجيب بين الحاجات دي كلها و بين اني بقعد على الكمبيوتر !!!

---------------------------------------

عموماً ، انا حالياً بدور على اي شغل بعيد عن البيت ، و بعيد عن المنطقة كلها اساساً ، ربنا يسهل و الاقي شغله كويس و متكنش مملة !

ممكن شوية كدا ، و اعمل موضوع عن الحاجات اللي عملتها الفترة اللي فاتت دي ، حتى على الاقل اصحي المدونة شوية : )



# لقيت حاجة شكلها حلو ، اروح اجربها و اعمل موضوع عنها

How to Run Android Applications on Ubuntu

المزيد »

اخيراً الاجازة ! ^_^

السلام عليكم و رحمة الله و بركاته

اخيرا الامتحانات خلصت ، حوالي شهر مذاكرة مكثفة و شد اعصاب و توتر ! ، الحمد لله الموضوع خلص على خير و سلام ^_^

في حاجات كتير عاوز اعملها و اكتب عنها ، سواء حاجات شخصية هنا في المدونة او حاجات تقنية في المنتديات ، و طبعاً كالعادة اي افكار بفكر فيها في فترة الامتحانات و المذاكرة اللي قبلها ، بكتبها في ورق عشان اقدر اركز في المذاكرة و في نفس الوقت الفكرة متضعش : )

يعني ربنا يسهل استريح شوية كدا - و انااااااام - و ابدأ ارتب الافكار و اشوف هعمل ايه الاول و هأجل ايه : )


------------------------

اول حاجة عملتها طبعا بعد ما خلصت ، حملت اخر نسخة من اوبنتو - 9.04 - و سطبتها و ظبطت شوية حاجات كدا و و نزلت كام برنامج بستعملهم بشكل اساسي عشان ابدأ الاستمتاع ^_^



اضغط على الصورة للتكبير

----------------------

انا رايح اكمل نوم بقى D:

# اضافة : عدلت لينكات الصور عشان كان في صورتين منهم مش شغالين !

المزيد »