الجمعة، 28 أغسطس، 2009

Uget + مقابلة شخصية + حملة .

السلام عليكم و رحمة الله و بركاته





تدوينة ثلاثية على السريع D:

ـ
-----------


# Uget Download Manager .

اول الاسبوع اللي فات انضميت لمشروع Uget - صفحة المشروع على سورس فورج - ، برنامج يو جت مدير تحميل جميل جدا ، بسيط و خفيف و فيه مميزات جميلة جدا و كمان حر و مفتوح المصدر ، و الاجمل انه مكتوب بـ GTK+ ، يعني بيستخدم نفس المكتبات المستخدمة في جنوم - الواجهة الرسمية لعدد من نوزيعات جنو/لينوكس المشهورة زي اوبنتو ، فيدورا ، دبيان ، ريد هات و غيرهم -

طبعا انا مش مبرمج و مليش في البرمجة - بغض النظر عن شوية باش سكربتنج على شوية بايثون - ، لكن مين قال عشان تساهم في البرمجيات الحرة لازم تكون مبرمج ؟ : )
ممكن تساعد باي شكل من الاشكال ، اي طريقة متاحة ليك ساعد بيها ، اكيد مجهودك ده هيستفاد منه ناس كتير : )

مطور البرنامج "Raymond Huang" و معروف على الانترنت باسم plushuang ، الوضع الحالي هو هيهتم بالبرنامج نفسه من ناحية البرمجة ، و انا ههتم بالحاجات التانية المتعلقة بالبرنامج ، او حاجة عملتها ، عمل شعار جديد للبرنامج لان الشعار القديم مكنش ليه دلالة تقريبا ! ، و برده مش انا اللي عملت الشعار ، انا بس نظمت موضوع لجمع الافكار لشعار البرنامج ، و شاركت ببعض الافكار من ضمنها الفكرة الحالية للتصميم ، انما التصميم كان الاخ الفاضل صفوان المعروف باسم saf1 - ما شاء الله عليه عنده حس فني جميل جدا -

و ده الشعار اللي توصلنا اليه




ونفس التصميم مع بعض التعديلات



البرنامج اسمه Uget ، مغنطيس على شكل U ، بيدل على قوة الجذب (التحميل) ، على الاقل فيه فكرة D:

حاليا انا شغال على الموقع البرنامج ، لان تقريبا مكنش ليه موقع فعلي - الموقع القديم مكنش يسر عدو ولا حبيب D: - ، استخدمت تطبيق ورد برس (wordpress) كنظام ادارة للمحتوى ، تقريبا الموقع يعتبر خلص ، مش فاضل غير كام حاجة بسيطة كدا و هيبدأ تشغيل الموقع مع صدور النسخة 1.5 من يو جت ، و ده اللي وصلتله حاليا .


Uget web site



اضغط على الصورة للتكبير



----------------------------


# مقابلة شخصية لوظيفة .
من يومين ، روحت عشان المقابلة الشخصية (interview) عشان شغل دعم فني في شركة كمبيوتر بتاعت استضافة و حاجات زي كدا ، كانت تجربة مفيدة جدا بالنسبة ليا ، بالرغم ان المقابلة مكانتش زي ما انا عاوز ، انما نظراً لان دي تقريبا اول مقابلة شخصية لوظيفة ، استفدت من حاجات كتيرة ، و اخدت بالي من كذا نقطة مهمة .

اتصال الشركة كان بناء على ترشيح احد المعارف اللي شغالين في الشركة ليا ، لشغل الوظيفة - طبعا كنت بعت الـ cv بتاعي قبل ما اروح -
و لاني معرفش مكان الشركة تحديدا ، اول حاجة عملتها بعد اتصال الشركة بيا ، اني روحت لويكي مابيا و بحثت على اسم الشارع اللي فيه الشركة و بعض المعالم المحيطة بيها ، و قدرت اوصل لمقر الشركة بالظبط و ده ساعدني اني اقدر اوصل بسهولة من غير ما اتوه في الطريق ، موقع ويكي مابيا WikiMapia هو موقع خرائط تشاركي ، بنفس نظام الويكي ، اي شخص ممكن يشارك فيه و يضيف اسم مكان هو يعرفه او اسم شارع او اي مَعْلم تاني ، فعلا استفدت من الموقع ده كتير ، و من وقت للتاني بشارك فيه بإضافة اسماء الاماكن و الشوارع اللي اعرفها .

وصلت للشركة بسلام و الحمد لله ، و لقيت واحد صاحبي كنت متوقع الاقيه لاننا تقريبا نفس المستوى في المعرفة ، و لاننا برده نعرف نفس الشخص اللي رشحنا للشغل ده D:
الرخم في الموضوع ان اليوم ده شعري مكنش ليه مزاج يتسرح !! D: ، جيبته في جميع الاتجاهات و مش عاوز يتسرح كويس برده !! ، في الحالات اللي زي دي كنت بلبس عليه كاب و خلاص - سكلتون و الكاب الاحمر علامة مسجلة D: - ، بس اكيد مش هروح مقابلة شخصية و انا لابس كاب يعني ! ، في الاخر سرحته اي حاجة و نزلت D:


المهم ، قعدنا حوالي 10 دقايق ، بعدين هو دخل الاول لانه كان موجود الاول ، بعد ما خرج دخلت انا : )

من قبل ما اروح اساسا و انا عارف ان امكانية اني اشتغل في مكان بدوام كامل قليلة جدا ، و ده بسبب ظروف الدراسة - ده بغض النظر عن موضوع الجيش يعني - ، لاني باخد اجازة من كل حاجة و حتى الكمبيوتر في البيت ، لمدة شهرين او شهرين و نص كل تيرم !! ، يعني على اقصى تقدير لو اشتغلت من اول الاجازة اكتر مدة متوصالة هقدر اشتغلها هى خمس شهور بس !!
لكن مع ذلك كنت واخد الموضوع بكل جدية ، لاني اكيد هطلع بحاجة مفيدة من التجربة دي حتى لو مشتغلتش ، و حتى حاجات مفيدة على المستوى الاجتماعي ، زي تقبل فكرة الرفض ، و انهم مش هيرفضوك عشان شخصك انما هيرفضوك عشان انت مش مناسب للوظيفة دي تحديدا - ان شاء الله قريب ناوي اكتب موضوع عن "الخوف من الرفض" : ) -

المقابلة نفسها كان لطيفة جدا ، و مفهاش اي توتر ، و في الاول سأل اسئلة عادية زي ساكن فين ، بتدرس ايه ، مجموعك ، بتحضر محاضرات الجامعة ولا ﻷ - طبعا السؤال ده ليه علاقة بالشغل بشكل عام - ، و شوية حاجات تانية كدا .
قبل ما اروح محضرتش اي كلام عشان اقوله ، و كنت متوقع انه هيسأل على حاجات معينة ، لكن اللي حصل انه مسألش على حاجة بعينها ، و قالي اتكلم عن الحاجات اللي تعرفها ! ، و ده خلاني مش مرتبك انما مكنش في حاجة معينة في دماغي ، فكنت بحاول افتكر كذا حاجة اعرفها و كذا حاجة اتعاملت فيها ، بس برده مقدرتش اقول كل حاجة - منها حاجات مهمة و ليها صلة بالشغل ! -

اللي فهمته من جزء ده انك ببساطة المفروض تكون رايح المقابلة عشان تتفاخر ، مش التفاخر في معناه السيء ، انما مفيش مجال للتواضع او تهميش اي شيء انت عملته ، قول كل حاجة كبيرة و صغيرة انت عملتها او جربتها سواء كانت مرتبطة بالوظيفة بشكل مباشر او غير مباشر .

طبعا مش محتاج اتكلم عن الثقة بالنفس ، ممكن تكون متوتر نوعاً ما و ده شيء طبيعي خصوصاً اذا كانت المقابلات الاولى او وظيفة مهمة بالنسبة ليك ، لكن اكيد من اهم الاشياء انك تكون واثق من نفسك بشكل كويس : )

كان من ضمن الاسئلة ، سؤال عن مدة الاجازة اللي ممكن تاخدها خلال السنة ، قلته بكل وضوح و بدون اي تلاعب ، ان الامتحانات لوحدها بتاخد حوالي شهر كل تيرم ، و انا بحتاج شهر او شهر و شوية قبل كل امتحانات عشان اعرف اذاكر بشكل كويس ، يعني المجموع اربع شهور !! ، تقريباً هو تفاجئ بحاجة زي كدا و لسان حاله بيقول ازاي هتشتغل كدا D: ، ف زي ما قولت في الاول ، انا متوقع ان نسبتي قليلة جدا الحصول على الشغل ده - على الاقل بدوام كامل - بسبب موضوع الدراسة ، و خصوصاً ان السنة اللي جاية دي الرابعة و الاخيرة و لازم اركز فيها كويس جدا ، و بعد كدا لما اخلص ابقى اعمل اللي انا عاوزه : )

في حاجات تانية كنت اعوز اكتبها بس نسيتها !! ، لو افتكرتها هبقى ارجع اعدل التدوينة : )

----------------------------

# حملة "أوقف العادة السرية" .
بغض النظر عن اني فعلا مش بحب كلمة "حملة" ! ، لان كل شوية تلاقي كام واحد عاملك "حملة" عن مش عارف ايه كدا !

المهم ، محمود و المعروف بإسم "محب سينين" ، عامل موضوع جميل عن العادة السرية ، و اضراها و ادلة تحريمها و معلومات عنها .

يمكن الموضوع بالنسبة ليا مش جديد تمامأً ، لاني قبل كدا عملت بحث مكثف عن كل ما يتعلق بالعادة السرية على سبيل العلم بالشيء .
تعليقي على الموضوع ، هتلاقي مواضيع و ابحاث علمية بتقول ان الموضوع مش مضر و مفيد كمان ! (كل او اغلب الابحاث العلمية بتتكلم عن القيام بيها بدون افراط ) و حتى اراء فقهية بتقول ان العادة السرية هى فقط مكروهه ، او مباحة عند الضرورة فقط ,او حتى مستحبة ! ( مفيش رأي فقهي بيقول باستحبابها ، هى مباحة عن الضرورة فقط ، عذرا غلطة مني ) .

الموضوع فيه كلام كتير و ز ما قولت في كذا رأي فقهي في الموضوع زي مثلاً انها مباحة عند الخوف من الوقوع في الزنا - الخوف من الوقوع في الزنا لازم طبعا يكون مبني على اسباب جدية و حقيقية ، مش مجرد ان واحد يشوف واحده غير محتشمه في الشارع يقول انا خايف اقع في الزنا ! - ، و كمان في اشياء ليها فوائد و لكن فوائدها لا تقارن بأضرارها !!

لكن اللي انا متأكد منه انه مش من المعقول نحط النار جنب البنزين و نقول يمكن متحصلش حريقة !!

العادة السرية زي الادمان بالظبط ، مش هينفع اقول الهروين لو اتاخد على جرعات تقليلة بشكل متباعد مش هيعمل حاجة بل مفيد كمان !! ، لما بتاخد جرعة في التانية في التالتة مش هتقدر تمنع نفسك ، و اي واحد بحث عن الموضوع ده اكيد هيكون عارف ان في ناس بتفضل تمارسها حتى بعد الجواز !!!! ، يعني غالبا الوضوع بيتحول لادمان في الاخر !

المهم يعني ، اقروا الموضوع ، و برده ابحثوا عن الاراء التانية اللي بتتكلم عن نفس الموضوع عشان تكونوا عندكم فكرة كاملة : )
و زي ما بيقول في بداية الموضوع
من الواقع المر الذى نعيشه والذى لا ينبغى السكوت عنه بسبب الحياء وبسبب المشكلات التى تسببها تلك الممارسة الممقوتة كان يجب الكتابة عنها وبيان مخاطرها وأضرارها فليس من المفترض أن يمنع الحياء الخير





مش عارف ليه الكلام عن الموضوع ده بالذات بيفكرني بموضوع "حزام العفة" (chastity belt) ، و ادوات منع الاستمناء" عند الرجال (male anti masturbation device) !! ، ادوات كانت بتستخدم من القرن الـ 15 الى اواخر القرن 18 في اوربا - مفيش روابط ، لان كل الروابط اللي بتتكلم عنها ملغومة ! -

الثلاثاء، 25 أغسطس، 2009

من هنا و هناك .


السلام عليكم و رحمة الله و بركاته


#
لو سمحت اغلق الـ Ad Blocker !

موضوع كتبته عن استعمال اضافات منع الاعلانات ، و خصوصاً اضافة adblock plus بتاعت الفاير فوكس ، الاضافة فايدتها منع اي اعلانات في المواقع اثناء التصفح ، سواء اعلانات نصية ، صور ، سكربتات ، الاضافة ممتازة و قوية جدا و بتمنع كل حاجة تقريبا .
لكن من ناحية تانية المفروض نستعمل اضافة زي دي بانصاف و منكونش انانيين ! ، كتير من المواقع و المنتديات - سواء عربية او اجنبية - مش بيكون ليها مصدر دخل ثابت ، و بتعتمد على العائد من الاعلانات - مع انه مش كبير اوي ! - و ناس كتير بتستخدم الاضافة و مش بتراعي المواقع اللي زي دي ! كملوا الموضوع على الرابط و هتلاقوا توضيحات اكتر : )



# 400 سنة على توجيه اول تيليسكوب للسماء .
انهارده بيحتفلوا بمرور 400 سنة على توجيه جاليليو جاليلي اول تلسكوب للسماء ، و زي ما هو معروف ان جاليلو من اوائل الناس اللي استعملت التليسكوب - فعليا مخترع التليسكوب هو هانز ليبرشي Hans Lippershey - ، و على حسب ما افتكر ان جاليلو هو اول من نظر للشمس عبر التليسوب بأن جاب قطعة زجاج و عرضها للنار و اصبحت سودا اللي خلاه يقدر يبص للشمس بشكل مباشر عن طريق التليسكوب .
و في مجال الفلك ، و من توابع استعماله للمنظار ، كان جاليلو واحد من مؤيدي نظرية ان الارض هى اللي بتدور حول الشمس مش العكس ، و اللي بسبب رأيه ده اتهمته الكنسية بالهرطقة ، لان افكاره مخالفه للافكار الموجودة في الكتاب المقدس ، و اجبروه على الاقرار بأن الارض مركز الكون ، و اتسجن و اتنفى لاخر عمره بسبب الموضوع ده .
جاليلو اتولد في بداية عصر النهضة في اوربا ، و كان ليه اسهامات كتير مش بس في الفلك انما كمان في الهندسة ، زي تجربته المشهورة لما طلع على برج بيزا المائل و رما حجرين مختلفين في الحجم واحد اكبر من واحد ، عشان يثبت ان تأثير عجلة الجاذبية على الجسمين واحد ، و ان الاتنين هيوصلوا مع بعض في نفس الوقت مش زي ما كان سائد ان الجسم الاتقل هيوصل الارض قبل الجسم الاخف .

بعض المعلومات المخزنة في ذاكرتي من كتاب عن العلماء قريته و انا صغير D:
و دي معلومات اكتر عن جاليلو من ويكي بيديا :
جاليليو جاليلي - ويكيبيديا .
Galileo Galilei - wikipedia



# تقرير سريع عن كتاب: No Logo .
الاخ عبدالله المهيري كتب في مدونته حاجة زي تقرير سريع بعد ما قرأ الكتاب ، تدوينة جميلة جدا و فيها معلومات ممتازة ، بجد لازم تشوفوها .
من زمان جدا و انا بكره فكرة العلامات التجارية - من المرحلة الاعدادية و قبل ما استخدم الكمبيوتر بشكل فعلي اساسا ! - ، مش بكره العلامة التجارية في حد ذاتها ، انما بكره فكرة ان الناس بتشتري الشيء لعلامته التجارية ، بغض النظر عن اي حاجة تانية !! ف مش غريب اني مش بحب اسلوب دعاية شركة ابل ! و الناس اللي كل شوية بتتفاخر فقط لانهم بيستعملوا كمبيوتر عليه علامة التفاحة ! ، ابل عندها منتجات كتير كويسة و ممتازة ، لكن عندها برده طرق كتير عشان تتحكم في المستخدمين اولها استغلال نزعة التميز ، و تانيها حاجة زي ادارة الحقوق الرقمية Digital rights management (DRM) ، و حاجات تانية !

اقروا التدوينة ، بجد ممتازة جدا ، و ان شاء الله في اقرب فرصة ناوي اعمل موضوع عن ادارة الحقوق الرقمية و تأثيرها على حرية المستخدمين : )



# مراكش الحمراء، مدينة المرابطين والموحدين .
من فترة كبيرة و انا بتابع مدونة محمد من المغرب ، بشكل اساسي هى مدونة شخصية ، بيكتب فيها اي حاجة يحبها ، في تدوينات كتير جميلة و استمتعت بيها جدا ، و دي واحدة من التدوينات الرائعة و فيها معلومات كتير حلوة عن مراكش في المغرب ، و بما اني بحب جدا الجزائر و المغرب ، من عادات و تقاليد و طبيعة و معالم و حتى الاكلات الشعبية D: ، و الاهم من ده ، اهلها نفسهم ، اعرف كذا شخص على النت جزائري و مغربي ، بجد ناس محترمة جدا و من اكتر الناس اللي بعزهم على الانترنت - عموما خلينا فاكرين ان اي بلد فيها الحلو و فيها الوحش ، و لو اتعاملت مع واحد مش كويس من البلد دي مش المفروض تاخد انطباع سيء عن البلد دي -
المهم ، اقروا الموضوع : )



# IE6 No More !
حملة للتخلص من انترنت اكسبلورر 6 !! ، كفاية بقى الزفت بلورر ده ! ، متصفح من العصر الحجري و متخلف عقليا ، مليان مشاكل ، مش ماشي على اي معايير قياسية ، مطلع عين مطورين المواقع ، كل ده و لسه في ناس بتستعمله !! و نظرا لان انترنت اكسبلورر 7 كان تقيل و غبي برده ف ناس كتير لسه بتستعمله ، و مع انترنت اكسبلورر 8 اتغير الحال شوية بس اساسا عيلة اكسبلورر كلها عيلة متخلفة عقليا !! حتى انترنت اكسبلورر 8 اللي لسه صادر من قريب غبي و بليد في موضوع المعايير القياسية ! جايب 20 من 100 في اختبار acid3 بتاع المعايير القياسية ، في حين ان كذا متصفح جايب 100٪ ، و اقل متصفح جايب 93٪ !! ، يعني فرق شاسع !!! ، و عن نفسي انا عاوز اتخلص من كل الانترنت اكسبلورر ، حتى لو عملوا انترنت اكسبلورر 21 ، هيكون غبي برده :@

الحملة اساسا موجهه للتخلص من انترنت اكسبلورر 6 ، الجميل في الموضوع ان في مواقع كبيرة و مشهورة كتير بتساند الحملة دي ، و كمان شركة جوجل كانت عامله اعلان في موقع يوتيوب بنفس المضمون ، شوفوا المواقع اللي بتساند الحملة في الصفحة الرئيسية .
عندك موقع و عاوز تشارك ؟ ، هتلاقي اكود جهازه في موقع الحملة ، كل ما عليك انك تنسخها و تضيفها في موقعك ، و هيظهر بانر في موقعك بينبه الشخص ان عليه تحديث المتفح بتاعه عشان قديم .
انا عن نفسي عملت شوية تعديلات بسيطة في السكربت ، و هكتفي بتلات متصفحات ، فاير فوكس ، كروم ، اوبرا ، و هخلي التنبيه يظهر لكل مستخدمي انترنت اكسبلورر !! ، ان شاء الله يومين و هعمل موضوع عن السكربت ده .



# مؤسسة البرمجيات الحرة تبدأ "GNU Generation" .
مؤسسة البرمجيات الحرة بدأت مشروع / مجموعة اسمها نشء/جيل جنو ، و دي مجموعة بتستهدف الشباب الصغيرين من سن 13 لـ 18 سنة ، لتعريفهم بفكر البرمجيات الحرة ، و تشجيعهم على انشاء و تطوير برامج حرة ، و مش بس بتستهدف الشباب اللي مهتم بالبرمجة ، انما كمان بتوضح طرق المساهمة في البرمجيات الحرة زي التصميم ، التوثيق ، و حتى طرق نشر و تأييد فكر البرمجيات الحرة .

يا رب اكون حي لما يعملوا FSFarabic.org : )


------------------

كفاية كدا دلوقتي D:

الجمعة، 21 أغسطس، 2009

كل سنة و انتوا طيبين : )


السلام عليكم و رحمة الله و بركاته

مصدر الصورة

------------------

كل سنة و انتو طيبين و ان شاء كل الناس تكون بصحة و سلامة : )

ان شاء الله اول يوم رمضان بكرة ، و الجميل في الموضوع ان تقريبا كل الدول العربية - بغض النظر عن ليبيا ! - ، و كمان معظم الدول الاسلامية هتبدأ الصيام بكرة ^_^

الواحد بقاله كتير محسش الاحساس ده : )

و ان شاء الله يكون رمضان كويس ، و نقدر نستفاد بكل دقيقة فيه ، ولا اصدق من قول الرسول صلى الله عليه و سلم ، (( عن أبي هريرة - رضي الله عنه - أن رسول الله - صلى الله عليه وسلم - قال: "من قام رمضان إيمانًا واحتسابا غُفر له ما تقدم من ذنبه" ، متفق عليه . ))

---------

و حاولوا تبعدوا عن المسلسلات الشريرة و المغرية اللي بتتعرض في حرب مسلسلات رمضان D:
و كمان براحة على جهازكم الهضمي D:


كل سنة و انتم بخير ، و شكرا لكل اللي سأل عليا و اتصل بيا : )

الاثنين، 17 أغسطس، 2009

عدنا ، و رحلة سعيدة ^_^


السلام عليكم و رحمة الله و بركاته


الاسبوع اللي فات كان اسبوع جميل جدا ، كنت مسافر مع العائلة للتصييف و الاستجمام D:

على المستوى العائلي ، تقريبا بقالنا اكتر من اربع سنين مروحناش مصيف مع بعض ! ، لاسباب كتيرة سواء عائلية اجتماعية او حتى ميكانيكة ، لانننا مش متعودين على المواصلات في السفر و كان اعتمادنا بشكل كامل على العربية ، و العربية كانت - و ما زالت - بعافية شوية D: ، بصراحة عن نفسي بفضل الجو العائلي عن الرحلات الشبابية ، بس برده من وقت للتاني بيكون شيء كويس ان الواحد يروح مع اصحابه في رحلة - و لكل واحد فيهم مميزاته و عيوبه : ) -

دي فعليا المرة الاولى اللي اروح فيها الاسكندرية ، بغض النظر عن اني روحت السنة اللي فاتت يومين مع واحد صاحبي ، انا شخصياً كنت مخنوق من المذاكرة ، عمال اذاكر بقالي كتير و كتب مش عاوزة تخلص !! ، انا و واحد صاحبي ضربت في دماغنا نروح اسكندرية ننزل البحر ! ، و فعلا تقريبا معملناش اي حاجة غير اننا نزلنا البحر ، و مروحناش في مكان يذكر !

اللطيف في الموضوع بقى ان الاسبوع ده كان متظبط بطريقة ممتازة ، كان بالنسبة ليا مثالي اكتر من اللازم ! - و فعلا الاسبوع مكتملش بشكله المثالي ! -

يعني ، هروح البحر اصييف و استمتع مع العائلة ، و كمان في نفس الوقت كذا واحد من اصحابي كانوا في الاسكندرية ، و قضيت معاهم يوم ، و كمان كلمت ناس اعرفهم من منتدى مجتمع لينوكس العربي ، بيستخدموا نظام جنو/لينوكس ، و قابلتهم و كانت قعدة لذيذة فعلا ، مع اني اتفقت معاهم في مكان ممنوع الوقوف فيه اساسا هههههههههه - ان واحد منهم يعترض على المكان ولا يقول ايه حاجة ، مفيش D: - ، لكن كذا واحد عرف يوصل ، ده بغض النظر عن الناس اللي اعتذرت بعد ما تأكيد حضورهم - الشعب المصري هو الشعب المصري ، في حكاية المواعيد دي ميتواصش هههههه - ، شويه كدا و هروح اشردلهم على المنتدى D: - و كان في رحلة للبحر نظمتها جمعية الروان الخيرية ، و حضرت معاهم من اول اليوم لاخره ^_^ ، و كمان كنت هقابل ناس كانوا جيرانا من زماااااان جدا - اكتر من 20 سنة ، انا فعليا عشت معاهم فترة من طفولتي : ) - ، ولكن للاسف زي ما قولت الوضع كان مثالي اكتر من اللازم ، و يوم ما جيت اعدي عليهم ، لقيتهم مسافرين مطروح لمدة اسبوع ! و معرفتش اشوفهم حتى - بتوع اسكندرية دول بيدلعوا على فكره ! ، يوم ما يصيفوا بيروحوا سيناء ، او مطروح D: -

لكن في المجمل كان اسبوع جميييل جدا ، و استمتعت على الاخر ^_^

--------------

نزلنا - انا و العائلة - في شاطئ النخيل (منطقة العجمي) ، العجمي منطقة غرب الاسكندرية ، عند الكيلو 21 تقريبا ، عشان كدا الاحياء و الشاطئ اهدى بكتير من الاسكندرية نفسها ، و كنا قريبين من البحر بنشوف البحر من البلكونة - اساسا عرض المنطقة مش كبير اوي - ، اول يومين مية البحر كانت ممتازة جدا و صافية ، بس للاسف بعد كدا المية بقت مليانة شوائب كتير - نباتات بحرية - ، و رجعت بقت كويسة على اخر الاسبوع ، و لحسن الحظ اننا مروحناش الكام يوم دول ، انا بس عديت على المية و بعد ما نزلت شوية ، لقيت الموضوع مش نافع خالص .

بس انا مكنتش عاتق البحر يعني ، تقريبا نزلت المية خمس ايام و نص من اصل سبعة D: ، النتيجة طبعا اسمرار شديد ، و جلدي اتقشر على نطاق واسع D: ، بس بجد بقالي كتير محستش بالاحساس ده - بما اني من ذوي البشرات البرونزية موضوع التعرض للشمس و تقشر الجلد ده مش مؤلم اوي -

بس الرخم في الشواطئ اللي فيها ناس بشكل دائم ، ان مفهاش كائنات بحرية كتير ! ، يعني في المكان اللي كنت فيه مكنش في غير سمك صغير بيسموه شراغيش (المفرد شرغوش) ، يعني كان نفسي الاقي اي كائنات تانية ، مثلا كابوريا / سلطعونات ، نجوم بحر ، قناديل ، او حتى اي كائن تاني غير السمك !! ، السنة اللي فاتت روحت رحلة للبحر في راس سدر ، و مسكت كابوريا ، و نجمتين بحر ، و كان في بلح بحر و حلزونات بحرية كمان ، بس رجعتهم تاني للمية : )

المهم بعد بحث سريع على الانترنت ، عرفت بالظبط ايه هى الشراغيش دي ، انا لقيت اسمين بس تقريبا هما الاتنين نفس المعنى الفرق في اللغة او المنطقة او حاجة زي كدا
Diplodus sargus cadenati - Moroccan white seabream

و ده موضوع في منتدى ، واحد عامله - اسمه الرمزي في المنتدى على نفس اسم السمك ده D: - ، و بيتكم على عن انواع السمك في الاسكندرية ، و منهم الشراغيش - الموضوع جميل جدا و فيه معلومات حلوة -
@@ طرق صيد الاسماك في الاسكندرية @@ ، الجزء الخاص بالشراغيش .

و دي صورة للسمكة - بس اللي شوفتهم اصغر من كدا -
الصورة من FishBase.org
اضغط على الصورة للتكبير

------------

- مقابلة لينوكساوية :
في اليوم الرابع ، على المغرب تقريبا ، قابلت بعض الناس اللي كلمتهم ، كانت قعدة ممتعة جدا ، بعد ما اتعرفنا على بعض ، قعدنا على سور الكورنيش و عيشنا ، قعدنا نتكلم في حاجات كتير جدا ، اغلبها عن الكمبيوتر ، جنو/لينوكس ، البرمجيات الحرة و المفتوحة المصدر ، و حاجات تانية كتير ^_^ ، من اللطيف ان الواحد يتعرف على ناس على ارض الواقع ، و خصوصاً الناس المشتركين معاه في نفس الاهتمامات : )

-----------

- يوم مع الايتام :
جمعية الروان الخيرية ، نظمت يوم على شاطئ الاسكندرية للاطفال الايتام ، و طبعا كانوا محتاجين عدد من المتطوعين للاشراف و التنظيم في اليوم ده ، انا كدا كدا كنت ناوي اشارك معاهم و اطلع معاهم من القاهرة ، لكن بما ان اليوم ده كنت في الاسكندرية ف روحت على مقر الجمعية على طول ، و الشكر لمواقع الخرائط زي WikiMapia.org ، اللي عن طريقه عرفت اوصل لمقر الجمعية في الاسكندرية بكل سهولة مع اني عمري ما روحته قبل كدا .

اليوم ده برده كان جميل جدا ، الاطفال لعبت و استمتعت بالبحر ، و انا شاركت في التنظيم و استمتعت ، اتعرفت على ناس جديدة ، و شوفت ناس بقالي كتير مشفتهمش ، يعني استفادة و استمتاع من كل النواحي : )
و الحمد لله مفيش حد تاه ولا حصله حاجة D:

------------

- مقابلة لم تتم :
الشيء المحبط في الاسبوع ، كنت مخطط لمقابلة ناس جيرانا من زمااااان جدا ، بس للاسف ، مكلمتهمش اول ما وصلت الاسكندرية ، و لما اتصلت بيهم ، لقيتهم مسافريين يصيفيوا ، اسبوع في مرسى مطروح - ما البحر جنبهم و خلاص D: - ، في الحقيقة الغلط مني ، المفروض اني كنت اكلمهم اول ما اوصل ، بس مجاش في بالي اي تأخير ممكن يوصل لمدة اسبوع !

شعور غريب انك تقابل حد مشفتهوش من 15 سنة - انا اساسا عمري كله 20 سنه ! ، يعني اتربيت معاهم فترة و اوعى ليهم - ، يا ترى بقوا عاملين ازاي ؟ ، و احوالهم ايه ؟ ايه التغير و ايه اللي فضل ثابت ؟ ، حاجات كتير بتيجي في دماغ الواحد : )

---------------------------------

بعد الاسبوع ما خلص رجعت يوم السبت بلييييل خالص على 12 او 1 ، بس فعلا زي ما بيقولوا
no place like a home

: )


----------

# ملحوظة على جنب : الرسمة اللي في اول الموضوع ، كانت واحده من محاولاتي لرسم شخصية لطيفة و التعديل على ملامحها ، الشخصية هى "سلمى" من بنين و بنات ، على موقع اسلام ويب .



موقع بنين و بنات بيقدم معلومات و ارشادات اسلامية للاطفال بطريقة جميلة جدا و تفاعلية باستخدام الفلاش و المؤثرات الصوتية ، اخواتي الصغييرين بيحبوا الموقع و الشخصيات اللي فيه جدا ^_^

بالنسبة للرسمة ، كنت بحاول اعمل شوية تغييرات في ملامح الشخصية ، بجرب كذا اسلوب عشان كدا الصورة مش متقنة اوي - زاوية الايد المرفوعة مش مظبوطة خالص - و مش شبه الشخصية الاصلية اوي - بس بالنسبة ليا ما زالت لطيفة - ، و دي الصورة الوحيدة المتاحة على الكمبيوتر حاليا : )

السبت، 8 أغسطس، 2009

نجحت و الحمد لله ^_^



السلام عليكم و رحمة الله و بركاته

راحة بالاخيرا النتيجة بتاعتي ظهرت ^_^ ، مع اننا من اواخر الكليات اللي بتظهر تقريبا ، لكن حاليا مفيش غير نتيجة تانية "ب" ، و تالته "أ" - اللي انا فيها - ، احنا اول نتيجة تظهر ، تقريبا بيطيبوا خاطرنا عشان كنا اخر نتيجة تطلع التيرم الاول D:


النتيجة التيرم ده احسن بكتير من التيرم الاول - اي تيرم مفهوش قانون دولي بيكون كويس هههههههههه - ، جبت جيد جدا الا 6 درجات ، معلش خلوني افرح بكلمة جيد جدا ، كنت عاوز جيد جدا ، بس الحمد لله ^_^ - اصل جيد جدا في حقوق القاهرة دي يعني شخص متفوق D: -

مع نتيجة التيرم الاول ، النتيجة الكلية جيد مرتفع - فعليا مفيش حاجة اسمها جيد مرتفع ، ده مصطلح عرفي تعارف عليه الطلاب ، لان الفرق بين الجيد و الجيد جدا اكبر من الفرق بين اي تقديرين -
ده بغض النظر عن مادة القانون الدولي الخاص اللي شايلها من التيرم الاول D:


الحمد لله ^_^


--------------

السنة دي كانت غريبة شوية - كذا حاجة بتأثر على المجموع و التقدير يعني - ، بغض النظر عن القانون الدولي ، اللي مش عارف ماله بيا ، منظمات دولية اولى ، نزلت فيها ، بس عديت بدرجات الرأفة .
دولي عام تانية ، نزلت فيه نزله سودا يعني D: ، بس خلصت منه في تالته ، اسوأ درجة جبتها في الكلية لحد دلوقتي D:
دولي خاص تالتة ، كلنا بقى نزلنا فيه ، اغلب الدفعة شايله المادة ، الدكتور اللي بيدرس المادة ليه نظام معين ، و عاوز اجابة بشكل معين ، بصراحة الدكتور محترم جدا ، و من العقليات الجامدة جدا حاجة ما شاء الله ، بس في جزئية الامتحانات و الاجابة دي ، عاوز طلبة دكتوراه عشان يجاوبوا D:

مع اني فاهم موضوع المادة بشكل كويس جدا و الحمد لله ، بس مش عارف ليه المادة دي معلقة معايا >_<
اصل حاجة رخمة ابقى جايب جيد و جيد جدا في كل المواد و انزل خالص في مادة !

التيرم عموما بيكون فيه 5 مواد و كل مادة غالبا بتكون من كتابين كبار ما شاء الله يعني ، و ساعات تلاته ، الغريب بقى في السنة دي ، التيرم الاول مادة قانون العمل ، الامتحان كان طوييييييل جدا - معلش برده ، الكتاب بتاعه اكتر من 1000 صفحة ، الامتحان هيكون ازاي ؟ - ، و بالنسبة لواحد بطيء في الكتابة نوعا ما زيي ، ملحقتش احل الامتحان ، مع ان الامتحان كويس جدا يعني و عارفه ! انا مش بيجنني قد حاجتين ، الوقت يخلص قبل ما اخلص الاجابة و انا عارف الاجابة ! ، و الحاجة التانية ان كراسة الاجابة نفسها تخلص ، و لسه عندك حاجات تتكتب ! - ده طبعا على حسب نوعية الاسئلة ، لان في اسئلة ما شاء الله بتكون ملياااااانه ! - المهم يعني ، المادة دي جبت فيها 8 من 20 ، و الحمد لله اترفعت بدرجتين رأفه - للطالب 4 درجات رأفة في السنة كلها -

------------

نيجي بقى للتيرم التاني ، التيرم ده جميل جدا بالنسبة ليا ، مع ان ناس كتير بتخاف منه عشان فيه جنائي عملي ، و مواريث و وصية ( شريعة اسلامية - علم الفرائض و الوصية ) ، انا بقى اموت في العملي D: اعتقد اللي عنده خلفية عن تقسيم المواريث و تقسيم التركات هيكون عارف التداخلات اللي بتكون موجودة في موضوع الفرائض، مثلا يقولك "
ماتت عن زوج و بنت ابن و ابن ابن مخالف للدين و جد و اخ شقيق واخ لاب وعم شقيق" ، الاول بتشوف مين اللي بتحجب ، بعد كدا بتشوف موضوع الدين ، مخالفة الدين في المواريث بتمنع التوارث ، انما في الوصية تجوز لغير المسلم ، و مسألة زي دي غالبا بتتحل على مرتين ، المفروض تشوف التقسيمة الافضل للجد ، هل هى السدس ولا هيشارك الاخ الشقيق ؟ ، ده مثال صغير و سريع : )

المهم يعني ، امتحان الشريعة ، بيكون فيه 10 درجات عملي ، مسألتين مواريث ، و مسألتين وصية ، كل واحدة عليها 2.5
جه سؤال عملي في المواريث ، في اخره فيه كسور !! ، تقريبا كل الطلبة واخدين على المسائل اللي مفهاش كسور - كلها اعداد صحيحة يعني - ، مفيش ولا امتحان على مر الكلية جه و فيه كسور في الاخر ! ، يعني الطلبة اساسا خايفين من المادة لوحدها كدا ، يروح الدكتور يجيبلهم كسور في المسألة ههههههههه - المفروض ان الدكتور لما بيحط المسألة بيظبط مقدار التركة عشان ميطلعش فيه كسور في الاخر ، و كل الطلاب حاطيين معييار موحد ، ان لو في كسر في المسألة يبقى المسألة غلط ، مع ان في الحياة العملية وارد جدا يكون في كسور ! - طبعا في طريقة لتصحيح اصل المسألة عشان تشيل الكسر ، بس ساعات التركة نفسها مش بتكون قابلة للقسمة على اصل المسألة ، و لو قسمتها ، هيطلعلك كسور اكتر ههههههههه -

المشكلة مش في كدا ، المشكلة الحقيقية ، ان الطلاب كلهم بلموا قصاد المسألة ، و في ناس شكت في نفسها و قعدت تجرب تحجب ناس مش بتتحجب اساسا ، و تورث ناس مش بتورث ، و برده في الاخر المسألة مش عاوزه تتعدل D:

في الرياضيات كانوا دايما يقولونا و احنا صغييرين ، حل المسألة للاخر ، و بعد كدا عيد عليها من الاول ، و حتى لو الناتج النهائي طلع غلط ، على الاقل هتاخد اي درجة على الخطوات طالما صح ، هما بقى قعدوا في اول خطوة و وقفوا فيها ، ولا كملوا الخطوات عشان ياخدوا نص الدرجة ، و لا ركزوا على بقية الامتحان - الامتحان مكانش قصير ، و كان عاوز وقت ! - ، ف ناس كتير اتظبتط يعني :s

انا بقى في كسر ولا مفيش كسر هحل المسألة يعني هحلها هههههههههه ، المشكلة اللي الناس كانوا متلخبطين فيها ، في اخر المسألة بيبقى اخ و اخت ، و ليهم 35 فدان ، و زي ما معروف للذكر مثل حظ الانثيين ، و بالتالي المفروض ان الـ 35 تتقسم على 3 - و اصل المسألة مكنش ينفع يتصصح ، لان زي ما قولت ، مقدار التركة نفسها مش بتكون قابلة للقسمة على اصل المسألة ، و لو اتقسمت بيكون فيها كسور اكتر ! - ، انا بقى عملت الخطوات و جبتله حل كمان ،35 فدان على تلات رؤوس ، يبقى لكل فرد 11 و 2/3 - تلتين فدان - ، يبقى الاخ هياخد 22 فدان و 6/4 فدان - فدان و تلت يعني - ، و البنت هتاخد 11 فدان و 2/3

اللطيف في الموضوع بقى ، ان عقلي الغبي لسه بيحاول يفكر على التوازي !! ، كنت بحل المسألة اللي بعدها و كنت في نفس الوقت بفكر في المسألة اللي فاتت دي !! ، و طبعا زي ما احنا عارفين ، صاحب بالين كداب ، و صاحب تلاته منافق و عاوز ضرب الدِزَمْ ههههههههه

النتيجة ، اني غلط في المسألة السهلة و حليت المسألة الصعبة !! - و مش أي مسألة ، دي مسألة عليها 2.5 و مضمونة ! -
بس الحمد لله جبت فيها 16 من 20 - جيد جدا - ، بالنظر الى ان في درجتين و نص طايرين في مسألة سهلة و عارف حلها ، فده معناه اني ناقص درجة و نص بس في النظري ^_^

كنت عاوز اعمل كام موضوع عن اسس علم الفرائض و اهميته ، كنت عاوز استأذن الدكتور عشان اقتبس من كتابه شوية حاجات كدا ، بس الموضوع مكنش هينفع في الصيف خالص : )

اكيد الفروض نفسها عاوز حفظ ، و تعرف كل واحد بياخد ايه و امتى ، بس الحفظ لوحده مينفعش ، ولا حتى في كلية نظرية زي حقوق ، و لازم تفهم ، و تربط بين الاجزاء اللي اتعلمتها و حفظتها ، و عشان كدا للاسف طلاب كتير بتخاف من مواد زي المواريث و علم الفرائض .

---------------

بس الحمد لله السنة عدت على خير بحلوها و مرها ، و ربنا يستر علينا في سنة رابعة ، دي فعلا اهم سنة ، لانها دسمة جدا ، و بيكون فيها الخلاصة بتاعت الكلية : )



-------




# ملحوظة لنفسي : انا بقيت رغاي اوي D:

الثلاثاء، 4 أغسطس، 2009

يوم الهندسة المصري 2009 .



السلام عليكم و رحمة الله و بركاته

الواحد بقاله فترة نفسه مقفوله عن اي حاجة بسبب كذا موضوع ، بس اليومين دول في حاجات تشرح القلب يعني ، و تخلي الواحد نفسه مفتوحة تاني : )

المهم ، ،

يوم الحد اللي فات كان يوم جميل جدا ، حضرت يوم الهندسة المصري 2009 (هما فعلا تلات ايام + اليوم صفر ، بيكون فيه تجهيزات و حاجات زي كدا)
لكن الاجمل فعلا اني قابلت واحد حبيبي جدا من المنصورة ، محمود المعروف برده بإسم cis.falcon ، اول مرة اشوفه على ارض الواقع ، و ما شاء الله عليه ، كان لطيف جدا زي ما هو على الانترنت : )

محمود كان ضمن مجموعة من حاسبات و معلومات المنصورة ، تقريبا الهدف الاساسي بتاع المجموعة انهم يشوفوا الافكار المطروحة في اليوم ده عشان يحددوا مشاريع التخرج بتاعتهم هتكون عن ايه .

انا برده كان هدفي الاساسي اشوف المشاريع الموجودة ، بس طبعا مش عشان مشروع التخرج D: ، كنت عاوز اشوف الافكار و اللغات البرمجية المستخدمة ، و مدى معرفة المشاركين بالبرمجيات الحرة / مفتوحة المصدر ، و طبعا كان في مشاريع كتير تانية بتعتمد على الهارد وير مش السوفت وير ، و ده حال اغلب الناس اللي في هندسة .

كان في تباين بين المشاريع من ناحية الافكار ، و من ناحية اللغات البرمجية المستخدمة بشكل اساسي مشاريع كتير معموله بالجافا ، و تاني لغة هى سي شارب ، و كان في حضور للدوت نت بشكل عام .

و بالنسبة لفكرة البرمجيات الحرة و مفتوحة المصدر ، كان في تباين برده ، في ناس واضح انهم عندهم خلفية كويسة عن الموضوع ، و كانوا على استعداد لتقديم الكود البرمجي لمشروعهم ، و في ناس تانية كانوا رافضين فكرة انهم يطلعوا الكود اساسا ، و في ناس كمان كانت مش عاوزه تطلع الكود بحجة انهم تعبانين في المشروع و الكلام ده - على اساس ان الناس اللي فاتحين مصدر مشروعهم مش تعبانين فيه ؟ - ، و من كلامهم مش عارف اذا كانوا اساسا عارفين الفكرة الاساسية في البرمجيات الحرة او المفتوحة المصدر ولا ﻷ ، ولا هو مجرد طريقة للتهرب من اظهار الكود - طبعا ليهم الحق في تحديد اذا ما كان كود مشروعهم هيكون متاح ولا لا ، بس اتمنى يكون فاهمين فكرة البرمجيات المفتوحة المصدر بشكل مظبوط ! -

-------
في كذا مشروع وقفنا عنده ، و اتكلمنا مع الناس اللي عاملينه ، منهم مشروع المفروض انه خوارزمية لتحديد تشكيل الحروف ، هما بيقولوا نسبة الخطأ فيه حوالي 20٪ ، يعني 80٪ بيكون صح ، عموما معرفتش اسمع كويس لان كان في دوشة جامدة و انا جيت في نص الكلام ، بس شكله مشروع كويس جدا !

في كذا مشروع تاني عن تحول النصوص لكلام مسموع text to speech ، في واحد منهم كان بس عبارة صوت كل حرف و بيتجمع ، و مفيش مراعاة للتشكيل ! ، يعني مثلا كلمة "كتاب" ، عبارة عن صوت حرف ك ، ت ، ا ، ب !! ، ده كان جافا .

و احد تاني جافا كان بيحول الاصوات لاوامر - speech command - ، المشروع كان بيعتمد على مكتبة/اطار عمل اسمه sphinx بيحدد طريقة نطق الكلام - صفحة مشروع سفنكس - ، يعني مثلا كلمة linux ، لو كتبناها زي ما بننطقها ، تكون كدا lee - no - x ، فانت لما بتطق لينوكس بالشكل ده ، برنامج سفنكس يعرف انك تقصد linux ، ممكن بقى تستخدمها في اي حاجة تاني ، مثلا التنقل بين الصفات ، لو عندك ملف pdf ، و عاوز تروح للصفحة رقم 10 ، تقول page ten ، البرنامج هيحولك على صفحة 10 ، و برده لو عاوز تروع مثلا الفصل التاني ، تقول chapter two ، مش عارف بقى اذا كان سفنكس بيدعم حاجة تانية غير الانجليزي ولا لا ، خصوصا العربي !!
مشروع تاني بالجافا ، كان للتحكم في الكومبيوتر بالموبايل عن طريق النت ، شوفت برامج زي كدا بس عن طريق البلوتوث ، المشروع جميل بس مكنش بيستخدم اي تشفير تقريبا ! ، و لما سألت على جزئية التشفير دي واحد من المشاركين في المشروع قالي حاجات غريبة كدا و انه مش محتاج تشفير او حاجة زي كدا ! ، مش عارف ازاي بس اكيد لو الجهاز اللي بيتحكم فيه ضمن شبكة و مفيش تشفير ، اي واحد على الشبكة سهل جدا يعمل sniffing و يلقط الباسورد !
في مشروع تاني جميل عبارة عن سوفت وير و هارد وير في نفس الوقت ، المشروع عبارة عن نظام حضور و انصراف للموظفين ببصمة الصوابع - كدا مفيش حد هعرف يزوغ من الشغل خالص D: -
المشروع معمول بالسي شارب ، و بيتعامل مع قاعدة بيانات ms sql ، و الهارد وير هما عاملينه كله ماعدا الجزء اللي فيه العدسة اللي بتاخد شكل البصمة ، و جزء تاني اضافي عشان يدعم الوايرلس ، المشروع جميل جدا ، و عملي جدا ، بس لما علقت على جزئية انه مكتوب بالسي شارب ، و بالتالي فعليا هيكون موجه لمنصة وندوز ، قالي ان في دوت نت للينوكس من ميكروسوفت !! ، و انه غير مشروع مونو المفتوح المصدر !! ، قعدنا نتكلم في الجزئية دي شوية ، قلت يمكن في ، بس اكيد الموضوع هيكون فيه حاجة غلط !!
يا اما النسخة قديمة جدا ، و يا اما في حاجة في الترخيص ، و لما رجعت بحثت على الموضوع ده ، و يا للمفاجئة !! ، كما توقعت النسخة بتاعت اليونكس قديمة جدا بالنسبة لاصدارات الدوت نت بتاعت الوندوز ، و الترخيص بتاعها محدود جدا ! ، للاستعمال التعليمي و الاكاديمي فقط ، و مينفعش تشغل عليها اي حاجة تجارية ، يعني مينفعش تستفاد منه فعلا !!
مشروع تاني جميل كان عمول بالسي شارب ، نقدر نقول بشكل مختصر انه كان عن اشكال البحث و الربط بين الاسئلة ، زي البحث الضبابي - fuzzy search -
المشروع كان بعتمد على سور القرآن ، يعني مثلا ممكن تضيفله اي سورة ، و مثلا ، و تكتب في البرنامج "من نوح ؟" ، هيجيبلك المعلومات اللي ليها علاقة بسؤالك بشكل منظم و على اساس السؤال اللي انت سألته البرنامج بيحدد تنظيم الجواب - على حسب ما فهمت يعني - ، و بما انه بيدعم البحث الضبابي ، فمفيش مشكلة مع التشكيل ، او الهمزات ، و كدا يعني
الجميل بقى ، لقيت مجموعة عاملين مشروع عن نظام اندرويد المفتوح المصدر ، مشروعهم كان عبارة عن برنامج بيستفيد من مزايا خرائط جوجل ، و الـ gps - و اللي مكنش مسموح بيه في مصر لحد كام شهر !! الحكومة كانت بتقول عشان اسباب امنية و مش عارف ايه كدا ! - ، مش بس مجرد توضيح مكانك على الخريطة ، انما بيوضحلك الحاجات بشكل ديناميكي ، يعني مثلا لو انت جنب نادي ممكن تعرف ايه الاحداث المقامة فيه حاليا ، او ممكن تعرف ايه الاحداث المقامة في قاعة المؤتمرات ، و شوية حاجات تانية كدا ، تقريبا الفكرة عاملة زي google latitude
---------------
دول بعض المشاريع اللي وقفنا عندهم و اتناقشنا مع الناس اللي مشتركين فيهم ، و كان في كذا مشروع تاني عن الهارد وير ، بس بشكل عام .

اهم حاجة لما تتكلم مع الناس اللي عاملين المشاريع ، متحاولش تحبطهم او تقلل من المجهود اللي عملوه في المشروع مهما كانت العيب اللي فيه : )

و بشكل عام اليوم كان جميل جدا ، و المجموعة اللي قابلتها كانت جميلة جدا ، و كل واحد متخصص في حاجات مختلفة ، منهم الجافا ، و php ، شبكات سيسكو و .net ، مجموعة جميلة و لطيفة فعلا : )
ان شاء الله متجمعين في الخير ديما : )

------


دي صورة للاعلان عن اليوم ده - و نفس صورة المجلد/حافظة الاوراق اللي بيسلموها للواحد اول ما يدخل مع جدول بيوضح احداث و معلومات عن اليوم ده -


----

بس فعلا استمتعت جدا : )