الأربعاء، 10 فبراير، 2010

أسبوع من الأجازة : )


السلام عليكم و رحمة الله و بركاته

رجعنا تاني و الحمد لله : )

اولا بس عاوز الفت نظر الناس الى اني قريب جدا ان شاء الله هنتقل للعنوان الجديد "مدونة أحمد أبوزيد !" ، يا ريت اللي مهتم يضيف اللينك الجديد عنده لاني دي هتكون التدوينة قبل الاخيرة ان شاء الله : )
انتقلت فعلا و دي مدونتي الجديدة .

--------

اخيرا الامتحانات خلصت و عدى حوالي اسبوع من يوم ما خلصت ، كانت للاسف امتحانات مش كويسة ، مش عارف في ايه السنة دي ، الامتحانات كانت اصعب من كل سنة ! و مرضت تلات مرات في فترة الامتحانات !! مع اني غالبا بكون حريص بشكل اكبر في فترة الامتحانات اني اتجنب مسببات الامراض عشان الامتحانات ، لكن تلات مرات امرض في فترة الامتحانات دي غريبة فعلا !! ، الحمد لله على كل شيء طبعًا ، بس المشكلة ان الواحد بيزعل لما يكون مذاكر كويس لكن مجموعة من العوامل الخارجيه بتأثر في نتيجته ، بس كنت اتمنى اني احسن تقديري شوية و اجيب جيد جدا بدل ما انا متعلق في اواخر الجيد ، الحمد لله : )



خلينا في دلوقتي : )
اسبوع تقريبا عدى ، استريحت شوية ، و حضرت كتب كتاب اخت واحد من اعز و اقدم اصدقائي (تقريبا احنا مع بعض في كل حاجة من اولى ابتدائي) ، عقباله كدا ان شاء الله ^_^

و مع بداية الاسبوع الجاي ان شاء الله ، عليا ما يسمى بالعسكرية ، و هي ببساطة حوالي اسبوع الى اسبوعين بيتم فيها تعريف الطلاب بالنظام العسكري ، و دي الحاجات اللي المفروض هيكلمونا عنها (التعليم الأولي – التقاليد العسكرية – التدريب الطبيعي – التدريب الكيماوي – فن القتال – القيم السلوكية – تاريخ مصر العسكري الوطني – الأمن الحربي – الشئون الإدارية – فن القيادة – إدارة عسكرية) ده طبعا بعد طابور الجمع الصباحي و شوية حاجات كدا ، و اللي يحب يعرف اكتر عن النظام ده ممكن يشوف صفحة تعريفية من على موقع جامعة القاهرة (التربية العسكرية)

----

تقريبا خصلت تظبيط المدونة الجديدة و حسابي على جوجل ، و حولت كتير من حساباتي على الانترنت لـ "أحمد أبوزيد" ، مش فاضل غير اضافة سكربت يظهر لمستخدمي انترنت اكسبلور 6 و 7 ينبههم لتحديث متصفحهم (و كنت بفكراضيف 8 كمان بس قولت بلاش )

حاولت اختار تصميم بسيط و نضيف ، عملت التعديلات اللازمة عشان يناسب العربي و يناسبني : )

----

بدأت برده في تحضير موضوع عن "مدرسة تحسين الخطوط العربية بالجيزة" اللي كنت قولت عليه قبل الامتحانات ، الخط العربي من الاشياء العبقرية فعلا ! و للاسف يعتبر فن منسي ! ، ايوه مش مطلوب من كل شخص يكون خطاط ، انما لازم يكون عنده الحد الادنى من المعرفة بتراث امته ! مجرد المعرفة دي بتعزز الانتماء عند الشخص و تقوي ارتباطه بأصله ، لان بطبيعة الحال اذا كان المجتمع مش لاقي هويته هيدور على هوية تانية من ثقافات مختلفة سواء صينية او يابانية او اي ثقافة تانية قوية ، مش هتكلم عن الثقافات الغربية لانها بطبيعة الحال تأثيرها نابع من اسباب واقعية و من اتصال حقيقي ، ما علينا يعني ! (بالمناسبة انا من اكتر الناس اللي بتحترم و بتقدر الثقافة و التراث الياباني لانه فعلا رائع ، لكن ده مش معناه مثلا اني هحط الكاتانا الياباني عندي في البيت ولا هلبس كيمونو ! ، الافضل ليا البحث عن تراثي الحقيقي و اللي لا يقل روعة عن غيره لكنه محتاج نفض التراب عنه مش اكتر !)

بالرغم من الفترة الجاية هتكون ملخبطة شوية عشان اخر سنة ليا في الكلية ، و بعد كدا هشوف مواضيع الجيش و الحاجات دي ، لكن هحاول اتعلم نوع من انواع الخط ، و ان شاء الله هحاول اتابع مع مجموعة عرب آيز عشان على حد علمي بيحضروا لعمل خط الكتروني جديد مناسب للعرض على الشاشات : )

----

ناوي باذن الله تحديث كتاب "الدليل العملي في استخدام أوبنتو" ، عشان يكون متناسب مع الاصدار الجديد من ubuntu 10.04 و اللي هي نسخة طويلة الدعم (النسخة للاجهزة المنزلية مدعومة لمدة تلات سنين و نسخة الخوادم لمدة خمس سنين) ، و هحاول احضر للكتاب بشكل كويس ، عشان ميحصلش زي النسخة الاولى ، لان للاسف معملتش غير حوالي ٩٠٪ من الحاجات اللي كنت مخططلها ، و اضطريت الغي بعض التفاصيل (بالنسبة ليا ، التفاصيل الصغيرة دي هي اللي بتعمل فرق فعلا !) ، و بفكر اوفر نسخة مخصصة للطباعة على موقع lulu (موقع لولو بيوفر خدمة الطباعة عند الطلب و معروف برده بالنشر الحر) عشان لو حد مهتم انه يحط نسخه من الكتاب في مكتبة عامة مثلا او يهديه لواحد من اصحابه .

عموما ربنا يسهل ، هبدأ التخطيط للاصدار ده بشكل كويس بحيث الكتاب يكون جاهز مع صدور اوبنتو 10.04 (في اخر شهر اربعة يعني)

-----

امممممممم ، ايه تاني ، اخيرا من فترة تم الاعلان على مدونة موقع Creative Commons انه حاليا بيتم التحضير لترجمة و نقل الرخص للقانون المصري ، للاسف مفيش ولا دولة عربية تم نقل الرخص لقانونها غير الاردن و دلوقتي مصر لحقتها ، و الاتنين ما زالوا في مرحلة النقل يعني مش مكتملين !

كتبت عن الموضوع على مدونة وادي التقنية ، تلاقوا الموضوع هنا التحضير لنقل رخص Creative Commons للقانون المصري .
اعتقد اني هحاول اتابع معاهم ممكن اقدم اي مساعدة ، و اي شخص عاوز يساعد ممكن يشارك ، سواء الناس المهتمة بالقانون او اللغويين او حتى الاشخاص العاديين ، هتلاقوا معلومات اكتر عن الموضوع في الرابط اللي فات : )

-----

ما زلت مشوش شوية
و محبط نوعًا ما بسبب الامتحانات ، ، لكن عادي يعني ، الموضوع موضوع وقت و كل حاجة هتكون تمام : )

هناك 8 تعليقات:

  1. حمدا لله على السلامة
    الواحد كان كل يوم يفتح المدونة و ينتظر منك تدوينة جديدة و خصوصا بعد اجازة نصف العام

    ردحذف
  2. > محمد طه :
    ربنا يكرمك ، انا بقالي فترة عاوز اكتب بس كان في شوية حاجات لازم اعملها الاول كدا : )

    منور المدونة : )

    ردحذف
  3. السلام عليكم
    كيف الحال؟
    عدلت على الرابط فى المدونة و جميل ان الواحد يظهر باسمه الحقيقى :)
    و مبروك على الأجازة اللى خلصت خلاص :D

    و صحيح بالنسبة لطباعة الكتاب, إيه هى اجرائاتها القانونية؟
    و أخيراً وصلت Creative Commons << حمدا لله على السلامة

    و فرفش بقى خلاص علشان الامتحانات خلصت و اللى فات مات!

    ردحذف
  4. أزال المؤلف هذا التعليق.

    ردحذف
  5. معلش حذفت الرسالة اللي فاتت كان فيها غلطة

    عامل ايه يا بو حميد والف مبروك علي المدونة الجديدة ويارب تبقي في ميزان حسناتك

    أنا افتكرت إنك نقلت بدومين كامل خاص بيك بس لما لقيت بلوج سبوت في الاخر قولت لسه الاخ بيحب بلوجر أد عينيه
    :D
    كان عندي سؤال
    انت ليه عملت مدونة تانية باسمك الحقيقي
    وليه ماغيرتش اسم المدونة القديمة باسمك الجديد؟؟

    ردحذف
  6. abdoghanem :
    اهلا عبد الرحمن ^_^

    اجازتي كانت اسبوع واحد بس ، انا شغال في تربية العسكرية من اول الاسبوع ده D:

    على حسب ما اتذكر اجراءات طباعة الكتب بسيطة ، هحاول اجيبهالك بالظبط ، فترة العسكرية دي تعدي بس : )

    منورني دايما يا جميل : )


    MohAmed tAhA :
    ههههههههه ، لا يا سيدي الموضوع مش كدا ، انا مش بحب بلوجر للدرجة دي يعني D:
    الموضوع و ما فيه اني لو عندي موقع مستقل اكيد كنت هستعمل ورد برس ، لكن المشكلة ان حسابات ورد برس المجانية محدودة نوعا ما ، مثلا عشان تعدل في ستايل المدونة لازم تدفع مبلغ (في الحقيقة هو مبلغ رمزي ، على حسب ما افتكر في حدود دولار في الشهر او 15 دولار في السنة ، او حتى ممكن تتحاسب باليوم !!) المشكلة بقى اني معنديش اي حساب بنكي او طريقة ادفع بيها على الانترنت اساسا !!


    بالنسبة للسؤال ، ليه مغيرتش اسم المدونة ، الموضوع في الاساس ان المدونة كانت على اسم المستخدم skeleton_eel ، و حاليا نقلت كل حاجة ل ahmed abouzaid و لو كنت غيرت الاسم ، اسم الدخول مش هيتغير و هفضل اسجل دخول باسم سكلتون ايل : )

    بس كدا ^_^

    ردحذف
  7. مُبارك عليك يا أبو أحمد
    كده كويس جداً والمدونة الجديدة كلاسكية ولطيفة للغاية
    فقط الغي رمز التأكيد لأنه بينفر الناس من المشاركة يا أحمد وبيعطلنا والسبام مش كثيرة لهذه الدرجة
    أنا عندي بقالي أكثر من سنتين ولم يأتيني سبام غير 3 أو 4 مرات فقط

    ردحذف
  8. > أحمد شريف :
    تمام يا باشا ، انا بس كنت عاوز اتأكد انه شغال ، و تم الغاؤه خلاص ^_^

    ردحذف