الأحد، 4 أبريل، 2010

ملخص مهرجان البرمجيات الحرة في ساقية الصاوي.

السلام عليكم و رحمة الله و بركاته

مهرجان البرمجيات الحرة في ساقية الصاوي اللي كنت اشرت اليه اول امبارح، اليوم كان جميل جدا، استمعت بيه و اتعرفت فيه على ناس زي الفل ^_^

كان في حوالي تسع جلسات شغالين بالتوازي، الجلسات عبارة عن المحاضر و معاه مجموعة من الناس اللي حضرت، الجلسات كانت متنوعة بين تعريف بالبرمجيات الحرة و المفتوحة المصدر، ثقافة البرمجيات الحرة، طريقة تثبيت اوبنتو، لينوكس مقابل وندوز، البرمجة باستخدام مكتبات qt، البرمجة باستخدام لغة بايثون، تطبيق دروبال لادارة المحتوى، الأمن و الحماية، و بعض الجلسات التانية.

اليوم بدأ من ٩ الصبح، للساعة ٥ العصر، انا وصلت تقريبا الساعة ١٠,٣٠ ، يعني لحقت اليوم من أوله.

كنت متفق مع ناس اعرفهم من مجتمع لينوكس العربي اننا نتقابل، فعليا اغلبنا منعرفش بعض ولا شوفنا حتى صور لبعض، كل التعامل كان في العالم الافتراضي ، لكن قدرنا نتعرف على بعض و نتجمع بسهولة : )
الناس اللي من مجتمع لينوكس العربي مقابلتش غير واحد بس منهم على ارض الواقع، و هو عبد الرحمن غانم (مبرمج بلغة روبي و مكتبات كيوت)

و برده سلمت على بعض الناس و المحاضرين اللي كنت شوفتهم قبل كدا أو اعرفهم من على النت، و خصوصا ان منهم ناس كانوا جايين من اسكندرية، يعني سفر.

بعد ما شوفت مين جه و مين مجاش، قلت احضركام جلسة، مكنش عندي مشكلة اني اقوم بدور المبتدئ ، لان المهرجان اساسا موجه للمبتدئين و المستخدمين الجدد\المحتملين، فكنت بتفاعل و اسأل عن حاجات انا عارفها ، ده مش رخامة يعني، لانه من ناحية بحفز الناس انها تسأل و تتفاعل اكتر مع الشخص اللي بيشرح، و من ناحية تانية لو في اي نقطة حاسس انها هتكون مفيدة و المحاضر نسيها فيفتكرها، و بشكل عام بحب اشوف طريقة شرح و محاضرة الناس : )

حضرة جلسات ثقافة البرمجيات الحرة، البرمجة باستخدام بايثون، التصميم التجهي باستخدام انكسكيب.


في نهاية اليوم، عملوا فقرة عامة عن مفهوم البرمجيات الحرة و اهم الاسئلة اللي بتتسأل عنها، و كان في اتنين واحد منهم بيمثل البرمجيات المغلقة و غير الحرة و هو اللي بيسأل، و التاني بيمثل البرمجيات الحرة و المفتوحة المصدر و بيجاوب على الأسئلة، بعد ما خلصت الاسئلة الشائعة، سألوا الحضور اذا كان عندهم أي اسئلة، في ناس سألت و اتجاوب عليهم، و طبعا لازم تلاقي في النص كدا كام واحد دماغه ميكروسوفتيه صرفة، و برده اتجاوب عليه تمام
الفقرة كانت جميلة و فيها نوع من الفكاهة.


للاسف الناس معرفتش تعمل بث حي عشان الواي فاي كان خربان في المكان! فتعمل تسجيل بس تقريبا.





الواحد بيكون سعيد انه يشوف حاجة زي كدا و يشوف ناس بتبذل مجهود كبير عشان تنشر البرمجيات الحرة و المفتوحة المصدر، و بشكل عام اليوم كان كويس جدا و شخصيا استمتعت بيه : )


---------

طبعا في مناسبة زي دي لازم ناخد صورة جماعية، دي صورة جماعية للناس اللي حضرت من مجتمع لينوكس العربي:

صورة جماعية
ـ
اضغط على الصورة للتكبير

انا اللي بيشاور عليه السهم D:

هناك 9 تعليقات:

  1. السلام عليكم
    مبروك المدونة الجديده أ/ أحمد :)

    ردحذف
  2. و عليكم السلام و رحمة الله و بركاته

    الله يبارك في حضرتك ^_^

    المدونة نورت D:

    ردحذف
  3. ايه الحلاوة ده يامعلم

    شجعتني برده اكتب تلخيص لليوم الحلو ده


    ماكتبتش رايك في السيشن بتاعتي يعني

    ردحذف
  4. وأخيرا رأيناك يا أبا زيد :P
    فين السهم اللي بيشاور على كريم مغربي؟ ولا مكانش معكم ^_^

    ردحذف