الثلاثاء، 10 أغسطس، 2010

أهلا بالسمة الجديدة : )

السلام عليكم ورحمة الله وبركاته

 النت كان مقطوع بقاله كام يوم ولسه فيه شوية مشاكل! بس ده ميمنعش من تفعيل السمة الجديدة D:
بانتهاء اللمسات الأخيرة، تم تفعيل السمة (theme) الجديدة واللي لسه ملقتلهاش اسم D:

http://img829.imageshack.us/img829/2291/newtheme.png

السمة مبنية على سمة "نيو" من إنتاج مدونة المصنع، لكن مع تبسيطها وإضافة لمسة عربية، مع ألوان مبهجة، وكمان تم اضافة خطوط جديدة (اخيرا اتخلصت من خط اريال وتاهوما!) الخطوط مضمنه عن طريق  @font-face (شرح عربي، شرح انجليزي)، يعني الخطوط هتظهر بشكل موحد سواء كانت موجودة عند على جهاز الشخص اللي بيتصفح الموقع ولا ﻷ، بس ده محتاج متصفح حديث، أغلب المتصفحات حاليا بتدعم الخاصية دي (فاير فوكس، كروم، اوبرا، وغيرهم)، ولا عزاء لمستخدمي المتصفحات المتخلفة!

استخدمت خطين رائعين، الأول للعناوين والتاني للمتن.
الخط الأول هو خط نسخ عثمان طه "Uthman Taha Naskh" وهو خط مجاني يصدر عن مجموعة الخطوط الحاسوبية.
الخط التاني هو الإصدار التالت من خط ون "KacstOne" وهو خط  نسخ سطري، حر ومفتوح المصدر من مجموعة خطوط مدينة الملك عبدالعزيز للعلوم والتقنية، والشكر موصول للأستاذ خالد حسني من مجموعة عرب آيز لتحديث الخط واطلاق الاصدار التالت منه.

http://img824.imageshack.us/img824/2174/fossfonts.png
أحب اوضح شيء بسيط، السمة أساسية مش مؤقتة، عشان محدش يفتكر انها عشان رمضان بس! بحاول حاليا اتعرف اكتر على الزخرفة العربية والإسلامية بأنواعها، لاننا فعلا عندنا تراث رائع لا يقل عن تراث أي حضارة تانية، محتاجين بس ننفض عنه التراب، ونخليه مواكب للحداثة زي استخدام الالوان المبهجة والتقنيات الحديثة مع المحافظة على الأصالة والعراقة : )
مع إني مش عارف إذا كنت هقدر أوصل للهدف ده ولا ﻷ لكني بحاول : )


وإن شاء الله في أقرب وقت هحاول انضفها أكتر من الأخطاء عشان تكون متوافقة مع المعايير القياسية للويب (أنا مستلم السمة بحاجة وتلاتين خطأ وتنبيه، دلوقتي الأخطاء وصلت لحاجة وستين، مع إنه على مدونتة التجارب حوالي أربعين خطأ، مش عارف أنا عملته ايه بس http://img15.imageshack.us/img15/4920/tootho.gif)


أخيرا، طبعا أي تعليقات أو ملاحظات على السمة الجديدة (حتى لو كانت صغيرة!) مرحب بيها تماما : )

هناك 3 تعليقات:

  1. مبروك عليك السمة الجديدة^^
    قالب المدونة اكثر من رائع وفيه لمسة اسلامية
    سلام

    ردحذف
  2. عجبتني يا أحمد في بساطتها وألوانها، والخط جميل جدًا، خاصة خط أسمك، بالإضافة للشكل الهندسي الجميل (متعرفش نجيب منين أشكال مميزة زي دي ؟)
    رمضان كريم عليك يا أحمد .

    ردحذف
  3. >هيبو:
    الله يبارك فيك ^_^
    سعيد جدا إن القالب أعجبك، شكرا لك ^_^



    >كريم:
    الحمد لله انها عجبتك ^_^
    و الخطوط العربية بشكل عام رائعة جدا و تخلي الواحد يقع فيها عشقها بمجرد ما يتعرف عليها ^_^ (بالمناسبة الخط اللي مكتوب بيه الاسم اسمه خط الثُلُث، و هو واحد من أروع الخطوط العربية فعلا)

    بالنسبة للأشكال لو بحثت على "ارابسك"بالعربي و بالانجليزي هتلاقي كتير منها بس للأسف اغلبها متقلب D:
    و كمان في خط مجاني (مجاني فعلا!) فيه اشكال زخارف، ممكن تحمله من هنا، و خلي بالك ان في اشكال على الشفت، يعني اضغط شيفت عشان تشوفها.

    و كل سنة و انت طيب يا كريم ^_^

    ردحذف