الجمعة، 24 سبتمبر 2010

صور - الإفطار الأول لمجتمع لينوكس في القاهرة

السلام عليكم و رحمة الله و بركاته

http://img837.imageshack.us/img837/6417/connectk.jpg

في الحقيقة، أنا واحد من الناس اللي بتكره فكرة بقاء الناس في العالم الافتراضي ديما، و عدم تواصلهم على أرض الواقع، بالرغم من إني مش بصنف نفسي كشخص اجتماعي! بكره كون كل شخص قاعد ورا شاشة و على مقعده الوثير، و إنترنته السريع، و بيتعامل مع شخصيات افتراضية، على الإنترنت بعض الناس بتكون أقرب للمثالية و تخفي الأجزاء السيئة في شخصيتها، و البعض الآخر بيستغل عدم وجود تواصل مباشر و بيكون أسوأ! بعض الناس بتكون أجرأ على الإنترنت، و البعض الآخر بيكون أكثر ظرفا! كل شخص بيستغل الإنترنت بشكل مختلف، لكن في النهاية الحقيقة هي الحقيقة، و إننا في الأول و الآخر بشر : )

يمكن الموضوع ده بيكون بشكل مختلف في المنتديات التقنية أو الخاصة بالكمبيوتر، خصوصا اللي مفهاش قسم اجتماعي، المنتديات دي بحس كإننا رجال آليين! مع إننا في الواقع أشخاص ليهم نفس الميول و الإتجاهات، و من اللطيف إن الواحد يتعرف على أشخاص ليهم إهتماماته.

عشان كدا، قررت -و من فترة طويلة- تنظيم إفطار جماعي لأعضاء منتدى مجتمع لينوكس العربي، عشان نتعرف على بعض أكتر، و يكون في تواصل اجتماعي أكبر بعيدا عن المواضيع التقنية. اقترحت الفكرة في أول رمضان اللي فات، و ناس كتير عجبتهم الفكرة، و الحمد لله تم أول إفطار جماعي لأعضاء مجتمع لينوكس العربي في القاهرة.
طبعا الإفطار بقاله مدة، بس كان لازم الكتابة عنه في المدونة و لو بعد حين، و و أهو حصل الحمد لله : )

المكان: من أفضل الحدائق العامة في القاهرة، حديقة الأزهر.
الزمان: الإثنين ٢٠ رمضان ١٤٣١هـ -- ٣٠ أغسطس ٢٠١٠م.

كنا سبعة، العدد ميعتبرش كبير لإنها كانت أول مرة، و في ناس كتير كانت ناوية تيجي و معرفتش عشان ظروفهم الشخصية، بس أكيد إن شاء الله هيكون العدد أكبر، حقيقي كان يوم جميل جدا، و اتعرفت بناس جميلة ما شاء الله عليهم، و إن شاء الله يكون الإفطار السنوي عادة دائمة للينوكساوية في القاهرة : )
ناوي اكتب عن تجربة تنظيم الفطار ده، بس وقت تاني إن شاء الله. 

و طبعا كل الشكر لعبد الرحمن غانم اللي ساعد كتير في تنظيم الإفطار ده ^_^

هنا تلاقوا ألبوم فيه كل الصور اللي اتاخدت في الإفطار، الصور إلتقطها كذا شخص، بس كتير من الصور إلتقطها أنس عماد. و الأجهزة المستخدمة في التصوير هي:
OLYMPUS D555Z,C315Z - SONY ERICSSON P1 - Nokia E66

بالمناسبة، أنا رفعت كل الصور، الكويسة منها و الوحشة، اللي فيها مشكلة في الإضاءة و اللي الواحد طالع فيها شكله بايخ! (أنا شخصيا ليا هنا صور فظيعة http://img408.imageshack.us/img408/6410/laughc.gif) عشان ببساطة الحياة كدا فعلا، مش دايما مثالية!

بالرغم من إني بهتم أكتر بالاستمتاع باللحظة بدل تجفيفها و الاحتفاظ بيها كذكريات، لكن هنا بعض الصور اللطيفة:


http://lh6.ggpht.com/_tb7UW2nr6KA/TH-oAzTrOqI/AAAAAAAAAFY/if0dG2Yv8rw/s720/P1010204.JPG
جامع محمد علي في قلعة صلاح الدين الأيوبي- الصورة متصورة من داخل حديقة الأزهر


http://lh3.ggpht.com/_tb7UW2nr6KA/TH-p9SjKrnI/AAAAAAAAAFs/vwq0u761U8o/s720/P1010200.JPG 
أنا آخر واحد على الشمال، اللي لابس أخضر.


http://lh4.ggpht.com/_tb7UW2nr6KA/TH-aApfOTgI/AAAAAAAAAC8/0EIFfnCpBcY/s720/20100830054.jpg
أنس عماد، نص قعدة أو نص وقفة D:


http://lh5.ggpht.com/_tb7UW2nr6KA/TH-bOAmJEEI/AAAAAAAAADQ/fi-3RzTdn4U/s720/20100830050.jpg
بحب الصور اللي بتتاخد في أي وقت كدا D:


http://lh5.ggpht.com/_tb7UW2nr6KA/TH-rrUiAXzI/AAAAAAAAAGI/HfWie-Uj75E/s720/P1010195.JPG 
جرادة مسكينة لقيتها هناك، اسيبها يعني؟ لازم آخد مع سعادتها صورة D:
و مش عارف إيه الكاميرات اللي بتستهبل دي؟ أنا إيدي مكنش فيها عرق ظاهر! خلاص يعني من الدقة مقطعة بعضها و جايبة إنعكاس الضوء على حبيبات العرق في مسام إيدي؟ http://img408.imageshack.us/img408/6410/laughc.gif


http://lh3.ggpht.com/_tb7UW2nr6KA/TH-TMFRH5TI/AAAAAAAAACE/22GQSXr3INM/DSC00023.JPG
صورة لذيذة، فكرة أنس، بس لسه في واحد مجاش :-)


http://lh3.ggpht.com/_tb7UW2nr6KA/TH-snFQTImI/AAAAAAAAAGY/RWvRvfi1kx0/s720/P1010243.JPG 
أنا اللي صورتها دي، لمبة في الأرض وسط النباتات، شكلها كان تحفة بس الإضاءة بتاعت الكاميرا كانت المفروض تتظبط عن كدا!



أخيرا، صورة من صفحة حديقة الأزهر في ويكيبيديا، مش إحنا اللي صورناها لكنها جميلة : )

http://upload.wikimedia.org/wikipedia/ar/b/b4/West_wing_resturant_building_azhar_park.JPG


شكرا ليكم جميعا، كان لقاء جميل فعلا : )
و إذا كنت مستخدم نظام جنو\لينوكس في القاهرة و ما حولها، ممكن تشرفنا السنة الجاية، و لو مكنتش من مصر حاول تشوف الناس اللي بتستخدم لينوكس في مدينتك و حضّروا ليوم مشابه، أكيد هيكون رائع : )

هناك 5 تعليقات:

  1. فكرة رائعه ومبادرة اروع من شخصك الكريم

    عني انا بتمنى اكون في مثل هذه الجمعات(((((لو كنت شاب طبعاً-_-

    ردحذف
  2. فكره حلوه جدا
    ان شاء الله تستمر
    وياسلام لو تثبتوا يوم الفطار
    يفضل مثلا يوم 20 رمضان دايما
    ومش هاتفرق يجى اى يوم من ايام الاسبوع
    بس نبقى كلنا عارفين ان يوم 20 رمضان افطار جماعى
    فى حديقه الازهر

    ردحذف
  3. >lossy:
    شكرا : )
    لا يشترط أن يكون الشخص شاب، فقط حاولي تجميع بعض صديقاتك و قوموا بشيء ممثال بما يناسكن.

    >i-control:
    تمااااام : )
    هو ده الغرض فعلا، إن يكون في يوم ثابت و بالتالي الناس يكون في دماغها إن في إفطار و تظبط نفسها على كدا مسبقا : )
    يا ريت تشرفنا السنة الجاينة إن شاء الله ; )

    ردحذف
  4. صور جميلة والتقاطة موفقة افضل صورة هي صورة اللمبة على الارض

    ردحذف
  5. >Ĥ!bØ:
    شكرا لك ^_^
    إن شاء الله تشرفنا مرة في مصر و تزور حديقة الأزهر ^_^

    ردحذف