الاثنين، 13 سبتمبر، 2010

عبرو لهم عن امتنانكم : )


السلام عليكم ورحمة الله وبركاته

حاجة كنت كتبتها قبل كدا، اعتقد ده أفضل وقت ليها بمناسبة العيد، يمكن يكون يوم العيد خلص، لكن المفروض يكون العيد في قلبنا طول السنة  : )

http://img833.imageshack.us/img833/52/439397983.jpg

لو سمحت، أي شخص تشعر ناحيته بمشاعر كويسة، أبسط حاجة انك تقوله. صديق، قريب، معلم، أو حتى شخص ملكش علاقة بيه وبتشوفه كل فين وفين!
أبسط حاجة تقوله شكرا، شكرا من اعماق قلبك وبكل صدق.

كتير من الأحيان السبب اللي بيمنعك انك تعبر عن امتنانك مش موجود غير في راسك وبس!
كنت غبي جدا لما حسيت اني عاوز اعبر عن امتناني لشخص ما لكن معملتش كدا عشان ميفتكرش اني بعمل كدا عشان مصلحة!
> وكنت غبي برده لما كنت محتاج حاجة من شخص لكن قررت مطلبهاش عشان اعبر ليه عن امتناني! لاني فكرت انه ممكن يفهم الموضوع غلط.

لكن بعد فترة اكتشفت إن مفيش أي تضاد بين المصالح والتعبير الصادق عن المشاعر والحب، وكتير من الأحيان إن الواحد هو اللي بيحط الحواجز، واللي في الحقيقة مش موجودة في أي مكان غير عقله.

التعبير عن الامتنان ممكن يكون من أبسط الأشياء، ليكن أثره بيكون أكبر مما تتوقع!

ممكن مجرد انك تسلم على شخص بحرارة وتشكره بصدق على شيء عمله ليك، ممكن يكون بكارت صغير فيه كلمة شكر بأفضل خط عندك، ممكن بهدية رمزية قليلة في سعرها لكن كبيرة في معناها، وافتكر إن الهدايا اللي بتكون من غير مناسبة بتكون أجمل : )
أو حتى وردة حقيقية أو شيكولاتة طعمها جميل ملفوف عليها فيونكة بلون مبهج : )

متستناش مقابل لإنك احتمال مش هتلاقي، عبر عن امتنانك عشان انت عاوز تعمل كدا، عشان هتبقى أسعد إذا عملت كدا.

صدقني لما تعبر عن امتنانك هتكون في حال أفضل، والشخص التاني كمان. هتكون سعيد ومعنوياتك مرتفعة بل وكمان ثقتك في نفسك أعلى بكتير، حاجات كتير صغيرة ليها أثر كبير جدا، يمكن يكون أثر أكبير مما تتخيله : )

التعبير عن الامتنان لشخص معين مش محتاج مناسبة ولا تحضير ولا أي مقدمات حتى، إبدء دلوقتي وفكر في شخص حاسس ناحيته بشعور جميل وقوله، أو حضرله هدية رمزية لكنها بكل الحب والإمتنان.

> وافتكر إن الهدية أحلى لما تكون مغلفة، وبتكون أجمل وأجمل لما تكون شخصية، زي لما يكون معاها كارت فيه اسم الشخص ويا سلام لو إنت اللي عامل الكارت، وطبعا مش محتاج أقول الهدية عمرها أبدا ما كانت بتمنها : )

بس كدا : )


هناك 3 تعليقات:

  1. شكرا يا أحمد
    شكرا على كل مجهوداتك اللي ديما بستخدمها في الدعايا للمصادر المفتوحة كل كتبك وملفات PDF اللي بتعملها :)
    شكرا

    ردحذف
  2. السلام عليكم ,,,

    ممممم التعبير عن الإمتنان شيء رائع ، وخصوصاً لما يكون حد قريب مننا !

    في ناس كتير أوي أثروا في حياتي وتفكيري نفسي أعبرلهم عن إمتناني .

    والقرايب التعبير عن الإمتنان بيبقى كنوع من صلة الرحم !

    لما نشوف كدا حد هايعبرلي عن إمتنانه ولا لأ :D

    جزيت خيراً :)

    ردحذف
  3. >بهاء:
    ربنا يكرمك على كلامك الجميل :$
    أنا بقى بشكر المصادر الحرة و المفتوحة اللي كانت السبب في معرفتني بـ ناس جميلة زيك : )
    شكرا يا بهاء : )


    >ophelia-CFD:
    و عليكم السلام و رحمة الله و بركاته
    تمام : )
    لكن للأسف اغلب الناس مش متعودة على التعبير عن الإمتنان، بيكون صعب عليهم إنهم يقوموا بده : (
    فالأفضل إننا نتعلم ده، عشان ده هيخلينا بحال أفضل و أكتر سعادة : )

    جزانا الله و إياكم كل خير : )

    ردحذف