الأربعاء، 22 سبتمبر 2010

كاريكاتير - حفلة ناموس!

السلام عليكم

لما الواحد يكون قرفان من كتر الهبل اللي بيشوفه، أو حتى لأي سبب تاني، فمن الأفضل إنك تغير جو أو تعمل شيء بتحبه. بالنسبة ليا من الحاجات اللي بفضل أعملها، إني أكتب عن موضوع من الموضوعات العامة أو عن الكمبيوتر، و برده أعمل حاجات محتاجة شوية دقة و صبر، بحس إنها بتضغظ القرف في كبسولات صغيرة و بالتالي يسهل التخلص منها : )

المهم،

زي ما هو معروف الناموس بيكون أكتر نشاطا ليلا، و ده لغرض واحد و هو سفك دماء الأبرياء النيام! و لكن نظرا لإني من الناس اللي أفضل أوقات التحصيل ليها الدراسي بيكون بالليل، خصوصا بعد الساعة ١٢ (منتصف الليل)، غالبا بواجه الناموس النشط و أنا صاحي!

شخصيا عندي اتلدغ من ناموس الشارع كله بس مستعملش المبيدات اللي بتترش زي البيروسول! عشان كدا غالبا بنستعمل الأقراص طاردة الباعوض زي ريد، كيتو، إزالو! مع إني شخصيا أعتقد إن الحل المثالي لتجنب لدغات الناموس هي "الناموسية" (و إياكم حد يقولي إيه الناموسية دي!) لكن مشكلتها إنها مش عملية غير للنوم، و كمان للتطور الحاصل في البيوت، مبقاش في حاجة تتعلق فيها الناموسية! و مازلت فاكر لماكنت أنا و أخويا صغيرين و بنجيب كل الأشياء الطويلة في البيت عشان نثبت الناموسية بالشكل المثالي زي ما كانت بتتثبت في عواميد السراير العتيقة اللي انقرضت دلوقتي و مش هتشوفها غير بيت جدك أو جد أبوك حتى!

المهم تاني،

الناموس ليه مواسم، و جزء كبير منه بيكون في الشتا، الواحد بيدخل الأوضة و يقفل على نفسه عشان يذاكر، كل شوية يلاقي ناموسة عمالة تقرف فيه، يقول في عقله، مش هقوم اشغل قرص ريد عشان لو قمت من على المذاكرة غالبا مش هرجع تاني قريب! فيقوم مموت الناموسة الرخمة، يلاقي اختها جاهزة عشان تقوم بمهمة اختها الشهيدة! المشكلة إنهم مش بيظهروا مرة واحدة، فعلا تحس إنهم ماشيين بالدور! عشان كدا بعد ما الواحد يموت ١٧ ، ١٨ ناموسة، يقتنع إن في كتائب ناموس مستنين دورهم، و عليه يقوم يحط قرص في الجهاز و يشغله.

يفضل الجهاز شغال، و برده لسه في ناموس، استنى شوية، برده لسه في ناموس، أبص لجهاز الناموس ألاقي الناموس بيطير حواليه، لأ و كمان ساعات ألاقي ناموس واقف جنبه بيدفى!!
ساعتها كنت رسمت كاريكاتير في الورق اللي بذاكر فيه، و قولت أحبره على الكمبيوتر عشان تخفيف القرف و بمناسبة ظهور الناموسات اليانعات في الأرجاء المحلية لبيتنا.

http://i524.photobucket.com/albums/cc322/Skeleton_Eel/caricature/ki2.png
اضغط على الصورة للتكبير

استمتعوا D:




آه بالمناسبة، إذا كنت في مكان فيه ناموس كتير، أو ناموس من فصيلة أبو جاموس اللي مش بيتأثر بحاجة، ممكن تبقى تجرب قبل النوم بفترة احرق أقراص الكيتو أو الريد بدل ما تحطها في الجهاز، بس اعملها زي البخور كدا يعني مش بتكون مولعة بنار، دي تعتبر من أفضل الطرق للتخلص من كافة أشكال الناموس، و متنساش تهوي الأوضة شوية بعد الموضوع ده، و متقلقش الناموس مش هيهوب تاني ناحية الأوضة لفترة من الزمن تكفي إنك تنام قرير العين مرتاح البال.

هناك 11 تعليقًا:

  1. نفس الكلام عندنا برضو في البلد بالظبط نفس المشاكل و الحلول

    شفت انت البخاخة و لا معاصرتهاش ؟؟ :)

    ردحذف
  2. أيوه شوفتها، كانت عند جدتي xD

    بجد مفيش أحسن من الناموسية للنوم!

    ردحذف
  3. ابو حميد حبيب قلبي
    اول تعليق في مدونتك و هو عبارة عن سؤال واحد بي

    ايه هي (النــــــــــــــاموسية)
    ههههههههههههههههههههههههه

    و معلش سؤال تاني
    هو الموضوع عن الناموس و لا عن الناس اللى بتقعد تذاكر و في الاخر مش بيعرفوا يذاكروا لوجود الناموس و يقوموا يناموا احسن

    و شكرا




    نسيت اقولك
    كان عندنا ناموسية زمااااااااان اوي كنت دايما بنام تحتها بس الايام دي راحت خلاص

    ردحذف
  4. xD
    ناموسية هي اللي بتنومس الناموس p:
    و الموضوع عن كل ما يتعلق بالناموس D:

    المدونة نورت يا ابراهيم ^_^

    ردحذف
  5. بحثت عن الناموسية في كوكل لأرى بعض الصور، أهناك من ينام فيها فعلا؟ لم يسبق لي رؤيتها ذات يوم، ولا حتى في بيوت الأجداد :D
    كنت أظن أنها قطعة من زمن لويس الرابع عشر :P

    ثم، الكاريكاتور حلو ^_^
    الاعتماد على ريد ليس حلا مثاليا، هناك حلول بيئية، على سيرة "مفتوحة المصدر" في عالم البرمجة ^_^
    بعض النباتات تفي بالغرض مثل Ocimum basilicum، يسمى الحبق غالبا، الريحان تسمية لنبات آخر. Thymus vulgaris فعال أيضا، يسمى الزعتر غالبا.
    ضع هذه النباتات في أصص صغيرة في البيت، أو في النافذة، ولم لا في المكان الذي تظن أنه مدخل الناموس (مثل شرفة مفتوحة). الرائحة التي تطلقها الأوراق (وهي جميلة وغير قوية) طاردة للناموس، رائحة الأوراق وليس الزهور، لذلك عليك ألا تدعها تزهر ^_^

    ومن باب الدعم الفني، دع حرباء لطيفة تلتقط أي ناموسة جاوزت حدودها :P وعلى فكرة الحرباء لا تحتاج لقفص ما، أصيص به شجيرة والسلام :D

    كذلك هناك أسماك تتفتح شهيتها حينما ترى الناموس، بعضها قادر على القفز من الماء والتقاط ناموسة غبية تحوم فوق الماء! Betta splendens قادرة على هذا وثمنها رخيص ولا تستلزم تكاليف عالية لتربيتها..

    على أي، لو استمررت في كاتبة هذا التعليق فسيتحول بيتك لما يشبه محمية طبيعية، طاردة للناموس نعم، جاذبة لشيء آخر ربما :P خليك تجرب وأخبرنا ماذا جذبت :D

    ردحذف
  6. إيه الأخبار؟
    فكرتني في مرة حرقت يجي 5 أقراص كيتو و كان زميلي في الغرفة (السكن) يغطي رأسه بالغطاء (و هذه عادة في الصعيد للتصدي للنموس) و أنا لا أتحمل تغطية الجسد كله بالغطاء) و خليت الدينا كلها دخان و قفلت كل المنافذ و خرجت و نسبت الزميل جوه نايم!

    ردحذف
  7. الحمد لله لا اتلذغ ابدا

    ردحذف
  8. >محمد:
    ههههههههه، الناموسية في مصر معروفة، خصوصا في المناطق الريفية، هي لم تعد تستعمل بكثرة كما في السابق لكن ما زال هناك من يستعملها، وفي الحقيقة هي من أفضل الحلول للنوم (أو الجلوس أمام الكمبيوتر أيضا P:)
    سمعت موضوع النباتات التي تنفر الناموس، لكن بصراحة لم أجد اي مصدر موثوق عنها، ربما سأجرب الحبق أو الزعتر في مرة، تسكون فائدة مزدوجة، لان طعمهم لذيذ D:

    كان لدي حرباء فعلا، لكنها لم تكن تأكل الناموس أبدا D:
    ألق نظرة هنا، انا و النتيجة و حربايتي !
    D:

    ـ
    >abom:
    الحمد لله تمام يا باشا ^_^
    هههههههههه، يخرب بيت كدا يا جدع، ده شكله ناموس مصفح xD
    والراجل حصل فيه إيه؟ D:

    ـ
    >Ĥ!bØ:
    فعلا الناموس ينتقي الضحية بحسب عدد من العوامل، يعني مثلا تجد شخصين في نفس الغرفة، واحد يذهب له كل الناموس، و الآخر قليلا لما يتعرض له الناموس D:

    يبدوا أن دمك ليس لذيذ p:

    ردحذف
  9. يا ريت كان مصفح كنا لقينا حاجة تخترق الدروع :p
    لكن ده كان منوس كبير و كتير و عجيب (بجوار الزرع فمعقلهم هناك!!)
    و الراجل كان هيتخنق لولا ستر ربنا :D

    ردحذف
  10. عارف الموضوع قديم شوية، بس انت بتحبر الكاريكاتير ازاي..؟
    يعني ارسمه على الورقة بقلم نوعه ولونه إيه، أسحبه سكان ازاي، أعمل إيه ف الإنك سكيب بعد كده وهكذا :)
    أتمنى يكون فيه أي لقاء في السكة، مش لازم ننتظر ماندريفا 2011 يعني :P

    ردحذف
  11. >Ahmed Faissl:
    الموضوع أبسط من كدا بكتير D:
    ممكن يكون في خطوات اضافية بس طالما الطريقة اللي بستعملها تفي الغرض يبقى خلاص D:

    انت بترسم بأي قلم و على أي ورق بس إذا كنت هتستعمل ورق خفيف زي ورق الكراريس (ده بالنسبة للناس اللي بترسم و هي بتذاكر D:) يبقى لازم تستعمل قلم تقيل و خطه واضح عشان لما تعمل سكان للورقة الضوء بتاع السكانر بيخلي الكلام ظاهر خفيف (ممكن تشوف آخر صورة في التدوينة دي، الكلام مكتوب بالاسود و بسبب ضوء السكانر بقى رصاصي!)

    بعد كدا هتاخد الصورة على السكانر، اكيد انت عارف برامج اللينوكس، بس شخصيا بفضل xsane عن برنامج السكان الجديد بتاع أوبنتو اللي اسمه simple scan.

    آخر خطوة التحبير على انكسكيب، هتعمل استيراد للصورة و ترسم فوقها.
    كنت عملت فيديو أقل من دقيقة ونص بوضح فيه طريقة الرسم فوق الصورة، هتلاقيه في الموضوع هنا

    بس كدا يا سيدي : )
    و ابقى ورينا الحاجات اللي هتعملها ^_^

    ردحذف