الخميس، 16 سبتمبر 2010

كتاباتي، البحث في المدونة و أشياء أخرى.

السلام عليكم و رحمة الله و بركاته
# أخيرا صفحة "كتاباتي" اكتملت!
الصفحة فيها مقدمة صغيرة عن تعرفي على الإنترنت، و أهم المواضع و المقالات اللي كتبتها من أول لما بقى عندي جهاز كمبيوتر في البيت، يعني خلال الأربع سنين اللي فاتوا!
و أنا بكتب الصفحة كنت سعيد فعلا إني حقق جزء كبير من الأهداف اللي حددتها أول ما عرفت الأنترنت، و هي ببساطة البعد عن أي شيء فيه مضيعة للوقت و الجهد، زي نقاشات الجديلة العقيمة اللي مفهاش فايدة!و التركيز على الإنتاج، إنتاج محتوى جيد ذو قيمة و مفيد!
اغلب المواضع اللي كتبتها منقولة في كل مكان على الإنترنت و ده شيء كويس جدا، لإني بشجع على نشر المحتوى لكن طبعا مع احترام حقوق الملكية الفكرية.

كتبت حاجات كتير، يمكن أهمها كتاب الدليل العملي في استخدام أوبنتو لينُكس (و حاليا بحضر للإصدار التاني منه إن شاء الله)، و كتيب عن البرمجيات الحرة المفتوحة المصدر على نظام وندوز، و الإتنين حققوا نسبة انتشار ممتازة جدا، خصوصا الكتاب الأول عمل حوالي ١٥ ألف تحميل! (في الحقيقة ده فقط اللي عرفت احسبه! لإني اثناء نشر الكتاب على الإنترنت مكنش في دماغي حساب مرات التحميل و مستوى الإنتشار، و بالتالي في روابط كتير معرفتش احسب منها عدد مرات التحميل!).

يمكن اغلب المواضع خلال الفترة اللي فاتت هي المواضيع التقنية، لكن الفترة جاية إن شاء الله ناوي أكتب عن أشياء أخرى بهتم بيها من صغري لكن لم تنل حظها من الكتابة، زي المواضيع الاجتماعية، البيئية، الاقتصادية، و غيرهم : )


# أضفت مؤخرا أيكونة للبحث، و استخدمت البحث المخصص من جوجل.
بس اعتقد إني في وقت لاحق هخلي الأيكونات تحت الكلام مش جنبه!

 http://img440.imageshack.us/img440/262/search1.png 

# من فترة كنت بدور على خدمة للمراسلة عن طريق نموذج البريد الإلكتروني email form، جرب كذا موقع بيقدم الخدمة، يا إما فيهم مشكلة! (معلش لو حد راسلني قبل كدا و مردتش عليه!) في كذا خدمة كويسة لكن المشكلة إنهم مش بيدعموا غير اللغات اللاتينية فقط زي الإنجليزي! يعني الخانات و الكلام اللي عليها بيكون من الشمال لليمين!
موقع WUFOO من المواقع الممتازة جدا لكن برده نفس المشكلة من الشمال لليمين! راسلت فريق الموقع، قالولي إن معندهمش نية قريبة لدعم الغات اللي بتتكتب من اليمين للشمال زي العربي!
لكن الجميل إن عندهم خاصية للتعديل على شكل النماذج اللي عندهم باستخدام css، حملت قالب css بتاعهم و عدلت فيه و خليت اتجاه النموذج من اليمين للشمال، و حاليا أنا بستعمله و شغال كويس ^_^
و من كام يوم لقيت موقع EmailMe Form و هو لنفس الغرض و شكله بيدعم العربي كويس لإني عرفته عن طريق مدونة عربية، أنا مستريح مع الموقع الحالي، بس ممكن اجربه مرة تانية.

بالمناسبة، نصيحة مهمة جدا، إذا قررت استعمال نموذج المراسلة، لازم كل فترة تتأكد إن النموذج شغال و مفهوش اي مشكلة! تتأكد يعني تستعمله و تجرب تبعت منه رسالة لنفسك!



# أعتقد حاليا مش فاضل غير شوية تظبيطات هنا و هناك، و  صفحة "من يكون؟" : )

هناك 11 تعليقًا:

  1. إنت عندك كمبيوتر من ٢٠٠٦ بس ؟


    بالمناسبه ، الخط شكله زى وشك على لينكس :D

    ردحذف
  2. أيون من ٢٠٠٦ بس، هع هع هع! xD

    الخط زي وشي؟ فائق الجمال يعني D:
    طيب ما تجيب سكرين شوت كدا يا سيد؟!

    ردحذف
  3. تصدق ياض إنك مرزق ، كروم عندى بيعمل كراش لما بعمل أبلود ﻷى حاجه :D

    أول مره مايعملهاش معايا دلوقتى

    و بعدين إيه ده ، ده إنت على كده محدث كمبيوترات بالنسبالى :P

    أنا قبلك ب 6 سنين B)

    ما علينا ، بص كده على خط الكومنتات و الخط بتاع المقال و الفرق بينهم


    http://www.4shared.com/photo/IyX1NqEe/Screenshot-_______-_Google_Chr.html

    ردحذف
  4. كروم ولا عنب، على نفسه يا حبيبي xD احنا مش أي حد يا ابني B)
    شكرا يا باشا على الفيد باك، المفروض كدا المشكلة اتظبطت.

    و يا خويا مش مهم الواحد بيستخدم الكمبيوتر من قد إيه، المهم الواحد عمل إيه في كل فترة استخدام ليه!

    تعرف حاجة؟ صاحبي اللي عملي الإيميل و كان سبب تعرفي على الإنترنت، بعدها بسنتين، بقيت بروح اظبطله الجهاز بتاعه! كذا واحد اعرفه كان سابقني في استخدام الكمبيوتر، دلوقتي بقوا يطلبوني عشان اظبطلهم اجهزتهم و المشاكل اللي فيه xD

    و فوق كل ذي علم عليم، الحمد لله : )

    ردحذف
  5. لدي مشكلة في قراءة محتوى المدونة

    الحروف تظهر بشكل مبعثر ، هكذا مثلا ( ا ح م د أ ب و ز ي د )

    ألديكم حلول ؟؟

    ردحذف
  6. ممكن حضرتك تقوليلي على المتصفح اللي بتستعمليه و إصداره ؟ في أغلب البرامج ممكن معرفة إصداره عن طريق
    help > about

    برده يا ريت نظام التشغيل.

    و شكرا.

    ردحذف
  7. الفاير فوكس 3.6.6
    الإكسبلورر 8
    الويندوز xp

    ردحذف
  8. حلوة الصفحة يا أحمد، وكويس جدًا التنسيق للوصول للمقالات بصورة مفيدة.
    كنت عامل تدوينة شبها في المدونة عندي، لكن صفحة ثابتة أفضل.
    ربنا يوفقك.

    ردحذف
  9. ملحوظة يا أبو حميد:
    أعتقد ان صفحة "من يكون" هتكون أفضل لو سمتها "من أكون".

    ردحذف
  10. ربنا يكرمك يا كريم : )

    بالنسبة لـ "من يكون"، مش عارف، مش حاسس إن في فرق أوي، بس شكرا على الملحوظة، أكيد هفكر فيها بس على رواقة : )

    صحيح يا كريم، لو عندك وندوز -أو بتعدي على أجهزة فيها وندوز D:- إبقى جرب تشوف المدونة عليهم، لإني مش فاهم سبب مشكلة الحروف المفرقة! خصوصا إني جربت معاينة المدونة على وندوز و المشكلة دي مش موجودة!

    ردحذف
  11. جربت يا أحمد المتصفح على فاير وأكسبلورر 8 وشغال تمام.
    مش عارف مشكلة الحروف دي من أيه

    ردحذف