السبت، 16 أكتوبر، 2010

أخيرا...


السلام عليكم ورحمة الله وبركاته

أخيرا خلصت المادة اللي عليا!
أول مرة في حياتي أذاكر/امتحن في الوقت ده من السنة! والظريف إني بمتحن على درجة واحدة D:
بس في الحقيقة واضح إني كنت عيان بذمة وضمير، في أجزاء كتير كنت مفوتها، يعني كنت في حالة صعبة جدا D:


اممممم، في كذا حاجة عاوز اعملها الفترة دي،
أشوف ورق الجيش، والإصدار التاني من كتاب أوبنتو، وكام موضوع تاني كانوا متوقفين الفترة اللي فاتت بسبب الامتحان!
وقررت كمان أفتح مدونة عن الدرجات الهوائية! (يعني عجلة، بسكلته، سيكل، بيكالا، اختار الكلمة المناسبة للهجتك D:)

هعمل المدونة دي عشان من المؤسف والمعيب كون أمة عدد المنتمين ليها يزيد عن الـ ٤٠٠ مليون شخص ومفيش موقع واحد بالعربي بيتكلم عن الدراجات الهوائية!! وكأنها موضوع في العلوم النووية! تخيلوا إني تقريبا سألت كل اللي أعرفهم (و اللي معرفهمش كمان!) مفيش واحد فيهم يعرف حاجة عن الفرق بين أنواع الدراجات؟ (الأنواع مش أسماء الشركات!)

المشكلة الحقيقة مش إن مفيش موقع، المشكلة إن الثقافة نفسها شبه منعدمة! بستغرب إن الناس بتشوف ركوب الدراجات الهوائية قلة قيمة أو إنها يا للأطفال يا للفقراء! ممكن استوعب الكلام ده من شخص كبير في السن في عمر والدي، لكن الغريب إن حتى الشباب بيشوف الموضوع بنفس الطريقة! وبعد كدا بنسأل هو لسه في حد بيعبد الأصنام لحد دلوقتي؟! أيوة إحنا بنعبد أصنام أهلنا المتمثلة في العادات والتقاليد، وبنتعامل مع حاجات كتير على أساس "هذا ما وجدنا عليه أباؤنا"!

عموما افتتاح المدونة هيكون في أقرب وقت، مع إن الفترة الجاية معالمها مش واضحة تماما، وممكن انقطع لمدة سنة على الأقل عن الانترنت عشان أداء الخدمة العسكرية! لكن على أي حال المدونة بإذن الله هتتفتح عاجلا أو آجلا! وطبعا الكتابة فيها هتكون بالعربية الفصحى (للمرة الـ١٢ أنا بكتب بالعامية في المدونة هنا عشان هي مدونة شخصية، لكن أغلب إن لم يكن كل المواضيع العامة -زي المواضيع التقنية- بتكون بالفصحى تماما)
إذا كنت مهتم بالدراجات الهوائية أو تحب تتعرف عليها أكتر، ممكن تحفظ رابط المدونة عندك لحين افتتاحها : )
الدراجات الهوائية بالعربية (مازالت تحت الإنشاء)

كمان، إن شاء الله على يوم ٢٣-١٠ أو ٣٠-١٠ هيتعمل احتفالية في القاهرة بالنسخة الجديدة من أوبنتو (Ubuntu (10.0 Maverick Meerkat وبإذن الله هشارك فيها وهتكلم عن المجموعة المكتبية أوبن أوفس دوت أورج (OpenOffice.org) الاحتفالية هتكون في كلية الهندسة جامعة القاهرة، والدعوة عامة ^_^
إن شاء الله لما يتم التأكيد على الميعاد هنزل اعلان في المدونة : )






ربنا ييسر الفترة، والواحد يعرف ينجز فيها : )


هناك 5 تعليقات:

  1. ألف مبرووك يا أ. أحمد أو يا خريج بقى^_^
    ربنا يوفق حضرتك في المرحلة القادمة إن شاء الله :)

    وحلوة فكرة المدونة اللي بتتكلم عن الدراجات الهوائية دي كنت اتفرجت على برنامج مش فاكرة كان على ديسكوفري تقريباً
    كان واحد بيركب الدراجة دي وكان عايز ينط بيها على سقف طيارة هليكوبتر ، مش عارفة دي من اللي حضرتك تقصدها ولا إيه اللي هيا بيطعوا وينزلوا ويلفوا في الهوا دول !!

    بث كدا ^^

    ردحذف
  2. بالنسبة للدراجات فمعظم الشباب حاليا بيفكروا يشتروها لأنه الزحمة بتقتل اي مشوار انت رايحه
    كويس جدا انك هتفيدنا بهذه الخدمه
    ياريت يكون فيه الأسعار والموديلات (انا عارف ان ده هايبقى موجود بس بأكد بس )
    ( كمان فكره قد تكون عندك اصلا : انك ممكن تتعاون مع معارض الدراجات زي " بسكلته " او " ابوالجوخ") همه هايستفيدوا كانتشار والمدونة هتستفيد انها تعرف اخر الاخبار واحنا هنستفيد كمشاهدين بردو

    طبعا أحييك على عقليتك
    ..
    وربنا يعينك على الخدمة العسكرية وعلى تخليص ورق الجيش
    ..
    حسين

    ردحذف
  3. >ophelia-CFD:
    الله يبارك في حضرتك، عاش من شاف حضرتك ^_^
    و شكرا على الدعوة الجميلة ^_^

    المقصود بالدراجات الهوائية يعني العجل أو البسكلتة زي ما بنسميها، بنقول "هوائية" للتفريق بينها وبين الموتوسيكلات و اللي اسمها دراجات "نارية"
    بس برده ممكن اتكلم على الأمثلة اللي حضرتك ذكرتيها D:


    > حسين:
    للأسف بالرغم من مشكلة الزحمة فالناس لسه مش مقتنعة بإن العجلة ممكن تكون وسيلة مواصلات يومية! و شايفين إن ركوب العجل "قلة قيمة" و ازاي يعني واحد كبير ريكب عجلة عشان يعمل بيها مشوار! و كأن الناس كلها لابسة بدل و كلاسيك!
    النقطتين اللي قولت عليهم في دماغي فعلا، وممكن يكونوا مصدر تمويل للمدونة كمان، بس الأول المدونة تبدأ و تحقق الملحوظية بعد كدا الجزئية دي هتتظبط : )
    ربنا ييسر و تبدأ بس : )

    ردحذف
  4. يادي الإحراج أنا أخدت بالي بردو إن حضرتك كاتب المسميات اللي هيا العجلة او البسكلته بس قولت انا أعرف إن الدراجات الهوائية اللي هيا بيطلعوا وينزلوا على قوس ويلفوا في الهوا دي ، حضرتك ممكن تضيفها وتتكلم عنها بردو ^_^ !

    ردحذف
  5. ساعات دماغ الواحد بتروح لحاجات بعيدة، بتحصل في أحسن العائلات D:
    يمكن الغرض الأساسي من المدونة مش النوع ده من الدراجات، بس أكيد إن شاء الله هيكون في جزء عنه كنوع من المعلومات العامة : )

    ردحذف