السبت، 21 أغسطس، 2010

نجحت ^_^


السلام عليكم و رحمة الله و بركاته

# ملحوظة: التدوينة طويلة، لو عندك حاجة، خلصها و عدي علينا مرة تاينة D:



الحمد لله النتيجة ظهرت امبارح و نجحت صافي في الفصل الدراسي التاني ^_^ كان ترم رخم فعلا!

بس للأسف لسه معايا مادة من الترم الأول، و واقفة على درجة! عملت فيها التماس الترم الأول بس مخدتش أي درجة : (
المادة سهلة و لولا الموضوع بتاع الترم الأول كنت عديت منها بتقدير كمان، بس بصراحة مش عاوز امتحنها تاني، هحاول أشوف إذا كان في أي إلتماس عشان أخد الدرجة دي.

و للأسف برده بسبب إني عييت الترم الأول، أول سنة أنزل عن جيد بعد ما كنت جيد مرتفع و كان فاضلي كام درجة على الجيد جدا (جيد جدا في حقوق القاهرة يعني تقدير ممتاز، حتى أوائل الكلية بيكونوا جايبين جيد جدا مش امتياز، بس طبعا بيكونوا قريبين جدا من الامتياز) بس الفرق بسيط و إن شاء الله يتغطى بدرجات التلات سنين اللي فاتوا : )

الحمد لله : )


لاحظت شيء غريب جدا، إن السنة بتاعت نهاية كل مرحلة اعيا فيها، او زي ما بنسميها سنة الشهادة (تالتة اعدادي، ثانوي عام، رابعة كلية!) كشخص مسلم طبيعي أكون مؤمن بوجود الحسد، بس مش بحب الاشارة للحسد لاني بحس إنه شماعة الفاشلين! و كمان حتى مع الحاجات اللي حصلت دي مفيش مرة الموضوع أثر عليا بشكل كبير و لله الحمد : )

يعني في امتحانات تالتة اعدادي جالي التهاب في جفون العين، كنت داخل الامتحانات بعينين شبه مغلقتين!
تانية ثانوي، نزلة شعبية حادة أثرت عليا بشكل كبير، لكن كان من حسن حظي -و للأسف في نفس الوقت!- إن الكلية اللي كنت عاوز ادخلها (كلية الحقوق) كانت من أقل الكليات مجموعا! (للاسف عشان الكلية دي مش واخدة وضعها كويس زي باقي الكليات، و ناس كتير بتعتبرها كلية من كليات القاع!) و الحمد لله فترة الثانوي عدت على خير و مجموعي كان مجموعي أكبر من المجموع المطلوب في الكلية بل و بفائض كويس كمان.
رابعة كلية الحقوق، الفصل الدراسي الأول مرضت تلات مرات خلال خمس امتحانات! يعني دمار!

الكويس في الموضوع إن كل المرات اللي عييت فيها كان بسبب أمراض مؤقتة، يعني الحمد لله الإلتهاب بتاع العين كان بسبب ميكروب بسيط مش مرض مزمن. أثر النزلة الشعبية راح بشكل كبير خلال سنتين. العيا بتاع الفصل الدراسي اللي فات برده كان ميكروب بسيط و مفيش شيء مقلق.

الحمد لله الذي عافنا مما ابتلى به كثيرا من خلقه، الحمد لله


-------------------------


الفصل الدراسي الأول كان شنيع فعلا، مجموعة من العوامل حصلت مع بعض فكانت قصم ضهر : (
مع إني مش بحب أسرد المشاكل اللي بتحصلي عشان بحس إني عامل زي التلميذ البليد اللي بيدور على حجة يتعذر بيها، لكن ممكن يكون اللي هكتبه محفز لأي شخص، و طالما الواحد بذل مجهود كويس و مكنش بسبب تخاذل منه، فربنا عمره ما هيضيع جهده : )

مرضت  تلات مرات في فترة الإمتحانات! (كنت مش قادر اتحرك من السرير مش مجرد عيا خفيف زي البرد!) و هما أصلا كلهم خمس مواد! و المشكلة كمان إن الموضوع مكنش مرض بس، المواد اللي مرضت فيها بس الحمد لله عديت فيها لاني كنت مذاكر، المشكلة بقى كانت في المادة اللي نزلت فيها، اللي حصل كالتالي:

المفروض الواحد بيقسم المنهج لأجزاء في المراجعة، راجعت جزء كبير من المنهج، يومين قبل الإمتحان مرضت، و بالتالي آخر جزء ملحقتش أراجعه، دخلت الإمتحان، لقليت الدكتور جايب امتحان غريب جدا! المادة جزئين، الطبيعي إن الامتحان بيغطي اغلب اجزاء المنهج من الجزئين، لكن اللي حصل إن الامتحان كان عبارة عن سؤال إجباري و تلات أسئلة اختياري نختار منها اتنين، المشكلة بقى إن الأسئلة الاختياري كانت عبارة عن فقرتين "أ" و "ب"، الجزء ب في التلات اسئلة عبارة عن جزئية واحدة في الكتاب! يعني اللي مذاكرش الجزئية دي هيضيع منه اكتر من تلت الامتحان، و الجزئية دي اللي ملحقتش اراجعها عشان عييت! أخيرا الدكتور كان من النوع اللي مش بيدي الدرجات بسهولة، فالمحصلة إني جبت ٧ (درجة النجاح ١٠ و الشخص ليه ٤ درجات رأفة في السنة)

الامتحان التاني كنت عيان فيه برده، بس الامتحان ده مش مشكلته إني عيان، المشكلة إن المادة طويييييلة جدا (كتاب حوالي ١٠٠٠ صفحة و المشكلة إن المادة مفهاش عملي، كله نظري، يعني كنت بدخل لجنة الامتحان مش برفع راسي من على الورقة غير بعد انتهاء الوقت يعني تلات ساعات!) نفس الدكتور كان بيدينا السنة اللي فاتت، كنت عارف الامتحان بس ملحقش أحل اكتر من نص الامتحان! السنة دي اتكرر نفس الوضع بالظبط نفس الدكتور، نفس المادة الكبيرة، نفس نظام الامتحان، نفس الوضع، و بالتالي نفس الدرجة، ٨!

كدا المادة التانية هتتجبر و تبقى ١٠، و يتبقى درجتين رأفة، يعني مش هينفعوا مع المادة اللي بـ ٧! عملت إلتماس في المادين، عشان أخد أي درجة، لكن للأسف مفيش أي حاجة.



نيجي للفصل الدراسي التاني، كان كبير جدا، ست مواد كل مادة مجزئة لأكتر من كتاب (من كتابين لأربعة، و المادة اللي كتاب واحد كانت حوالي ٩٥٠ صفحة!) في وقت الامتحانات كنت بحاول بكل الطرق الابتعاد عن أي شيء ممكن ينقلي أي مرض! لدرجة كنت بغسل ايدي بالصابون أكتر من ١٤ مرة في اليوم ههههههههههه D:
لكن لإن المكتوب على الجبين لازم تشوفه العين، و لكل شخص قَدَره، في ليلة مادة الدولي الخاص و اللي كان فيها دكتور صعب و دقيق، معروف إنه مش بيدي الدرجات غير بالقطارة! يعني لو جبت ١١ في مادته يبقى انت كدا شخص متفوق D: (مع ذلك هو دكتور محترم جدا ما شاء الله و عنده علم غزير جدا في مجاله)، دخلت أنام شوية عشان أبدأ المراجعة خلال ليلة الامتحان (و ده أهم وقت بالنسبة ليا عشان بجمع فيه المادة كلها) و فترة الإمتحانات معروف فيها إن الكهربا بتقطع فيها كتير في أجزاء كتير من القاهرة الكبرى، اللي حصل إني لما نمت الكهربا قطعت، فحد فصل المكيف، فلما الكهربا جت تاني المكيف مكنش شغال، فطبيعي و أنا نايم أحس بالحر فرميت الغطا من عليا، بعد فترة حد شغل المكيف بس مغطانيش D: و أنا مكنش عندي نية أطول في النوم فكنت في مكان غلط، كنت في مواجهة هواء المكيف تماما! الخلاصة أخدت برد في معدتي! يعني الموضوع المرة دي مش مؤثر بيولوجي زي الميكروبات، إنما تأثير فيزيائي :D

طبعا مع أول أكل نزل في معدتي بعد ما صحيت، بقى عندي ألم فظيع في بطني، لدرجة مش قادر حتى أقعد! بدأت أعمل مشروبات سخنة يمكن تفيد، لكن للأسف كانت محتاجه وقت طويل، و مكنش في حل غير الدواء، لكن أنا كنت عارف النتيجة الحتمية للدوا، النوم! المفروض إني كنت اراجع لمدة ١٠ ساعات تقريبا قبل الامتحان، لكن على ما ألم بطني يخف انتهى الحال بساعتين بس! ساعتين مع كمية كبيرة من الاحباط و التوتر، قلت خلاص المادة دي كدا هنزل فيها : (

بس بعد شوية صغيرين بدأت أحفز نفسي ذاتيا، مع أقل من ساعين مراجعة، معنديش شيء أخسره! فقلت لازم أبذل أفضل ما عندي، لازم أوصل لأقصى مجهود عندي. راجعت اللي أقدر عليه و روحت الامتحان، و كانت المفاجأة
D:
الدكتور جايب امتحان خزعبلي! D: امتحان شكله غريب غير الأسلوب المعروف للدكتور، طويل، اغلبه عملي، كل سؤال فيه أ ب ج، مقسومين لـ ١ ٢ ٣ !!!!
حتى الناس اللي ذاكرت كويس كانوا بيجاهدوا للحصول على الدرجات، يعني مشكلة على مستوى الدفعة كلها! يعني أنا لو قلت مفيش أمل إني أعمل حاجة في ساعتين قبل الامتحانات كنت هكون بذاكر في المادة دي دلوقتي!!

بالنسبة ليا العملي أفضل بكتير عشان محتاج فهم أكتر من الحفظ، و الحمد لله عديت في المادة دي ^_^ لكن للأسف ناس كتير نزلوا فيها، و جايبين أرقام غريبة يعني ٢ أو ٣ من ٢٠!

ده غير امتحانين كمان، كانوا صعبين جدا! فالمحصلة النهائية تلات امتحانات صبعة جدا و تلات امتحانات صعبة بس D:
مثلا في مادة الدكتور أول مرة يحاضر لسنة رابعة، و بالتالي معندهوش أي امتحانات سابقة، و كمان مرضاش يقول أي شيء على شكل الامتحان حتى! و كان في جزء عملي نزل في الآخر قالنا مقرر عليكم و ممكن يجي في الامتحان، يعني مفيش أي معلومة واحدة ممكن تعين الطلاب في المذاكرة! في الآخر مجاش عملي (يعني خلانا نذاكر جزء هو مش ناوي يجيبه!) العملي جه نظري!! يعني الاجزاء اللي بتيجي فها مسائل عملي جبها نظري يعني ارتباك لأبعد الحدود D:

بس الحمد لله أهو خلص بخيره و شره، و مع إنه كان ترم رخم جدا بس كان ممتع برده ^_^

 


-------------------------


بالمناسبة اللي جابلي النتيجة الترم ده برده صديقي الصدوق "باسم"، قولت يعني الراجل جابلي نتيجة ٧ فصول قبل كدا خليه يكمل المجموعة و يجيب التامن ههههههههههههه
شخصيا مش بكون متلهف على النتيجة زي أغلب الناس! تطلع وقت ما تطلع، يعني لو طلعت بدري هاخد درجات أكتر؟ ولا لو اتعلقت انهارده و جبتها بكرة هلاقي الدرجات قلت؟ مش عارف الناس مسروعة على إيه D:


كدا يعتبر -تقريبا- خلصت مرحلة الجامعة، كانوا أربع سنين رائعين فعلا، استمتعت كتير، اكتسبت خبرات أكتر، و الأكيد اصبحت أنضج بكتير : ) ربنا ييسر في الفترة اللي جاية : )

الجمعة، 20 أغسطس، 2010

تدوينة سريعة

بيقولوا النتيجة اتعلقت :s بدأت أخاف D:
للأسف بسبب عدد من العوامل المجتمعة يعتبر الفصل الدراسي الأول يعتبر أسوأ فصل عدى عليا من بداية دراستي في الجامعة! و بالتالي الفصل الدراسي التاني تأثر جدا!
المرة دي (و على خلاف ٧ فصول دراسية!) بفكر أنزل أجيب النتيجة بنفسي! نفسي أفهم الناس بتبقى مستعجلة على ظهور النتيجة ليه! اللي اتكتب اتكتب و اتعمل اتعمل، لو النتيجة اتعلقت و شوفتها انهارده مش هلاقيها تاني يوم زايدة درجات يعني!
بدأ تقفز في راسي بعض الأفكار السيئة ... أعوذ بالله من الشيطان الرجيم ... أعوذ بالله من الشيطان الرجيم، بعد الشر عليا من السقوط :s

الخميس، 12 أغسطس، 2010

رمضان كريم : )

السلام عليكم و رحمة الله و بركاته

http://img838.imageshack.us/img838/9845/e80a1b108f.jpg


- كل سنة وانتوا طيبين بمناسبة شهر رمضان، و يا رب كل الناس تقدر تستفاد من الشهر ده على أكمل وجه : )
ناوي إن شاء الله اطبق نظام جديد الشهر ده (أو على الأقل هحاول!)، و هو الجلوس على الكمبيوتر يوم و يوم! يعني يوم اقعد على الكمبيوتر عادي و يوم ملمسش فيه الكمبيوتر! اعتقد ده هيوفر لي وقت كويس.


- حتى اللحظة نتيجة الكلية لسه مظهرتش! شكل الكلية هتنزلها على ليلة القدر ولا حاجة D:
و بالشكل ده تقديم أوراق الجيش هيكون على شهر عشرة بخلاف اغلب الكليات اللي المفروض ان طلابها قدموا اوراقهم فعلا لان نتيجتهم ظهرت من زمان!


- اعتقد اني هبدأ استخدم بشكل أكبر خاصية التدوين المصغر المدمجة في قالب المدونة، عشان منقطعش تماما عن المدونة، أو للمواضيع الصغيرة اللي مش محتاجة تدوينة كاملة. و هتكون التدوينات دي بلون مميز و تحت تصنيف "تدوينات مصغرة".


- امبارح (الأربعاء) كان أول يوم من رمضان و رائع كالعادة، كانوا في البيت عندنا معزومين عند قرايبنا، بس أنا و أخويا ملحقناهمش! و لقينا أخويا تاني مش رايح برضه، و بالتالي و قررنا نفطر مع نفسنا في البيت ^_^

بما إني من كبار مشجعي فن الطعام و الاعتماد على النفس في كل حاجة، فعمل الأكل مش مشكلة بالنسبة ليا، الحمد لله بعرف أعمل انواع كتير من الأكل و بتطلع حلوة كمان. بس المشكلة ناكل إيه D:
بعد المداولات و المناقشات قررنا ناكل شومن! الشومن (chow mein) و هي أكلة صينية و موجودة في دول جنوب شرق آسيا التانية زي اليابان و كوريا مع اختلاف المسميات. الشومن ببساطة عبارة عن نودلز مع خضار مقلية و دجاج أو جمبري. بعد البحث و التعرف على طرق تحضير الوصفة من الإنترنت نروح للخطو التانية.

المكونات، النودلز ببساطة استخدمنا إندومي (و يا ريت محدش يجيب سيرة الحوار الفكسان بتاع الاندومي يسبب الموت و مش عارف إيه اللي انتشر فجأة في المنتديات! أيوة الإندومي زيه زي كتير من المنتجات اللي بناكلها كل يوم فيها مواد صناعية، بداية من الشبسي لحد مرقة الدجاج المكعبات! حاجة معروفة من قرن يعني، و انا شخصيا عارفها من ابتدائي! و على العموم لو انت شخص اورجانك أوي كدا ممكن متستعملش التوابل اللي معاها! انا مش بقول منهتمش بصحتنا بس فعلا بتشل من الحاجات اللي بتنتشر مرة واحدة كدا و كأنها اكتشاف علمي عظيم!) افضل طعم مناسب للأكله دي اعتقد إنه "الشعرية المقلية (اللي الكيس بتاعه أبيض). بعد كدا نشوف الخضار، أي خضار ذات قوام مش مائي تنفع تستخدم، يعني بسلة، فاصوليا خضرا، جزر، كوسة، بروكلي، فلفل رومي أو حتى ماشروم و طبعا البصل مكون أساسي. طيب نيجي لموضوع البروتين، اللحوم يعني D:

بعد بحث سريع على الإنترنت، لقيت موقع مفيد جدا بيجيب العروض الدورية للسوبر ماركتس الكبيرة زي كارفور و أبو زكرى و المحمل و غيرهم، الموقع هو "عروض دوت نت"، و احنا بيتنا قريب منه فرع أبو زكري، مترو، و المحمل، يعني براحتنا بقى، بس مش براحتنا أوي عشان أصلا الموضوع ده مكنش معمول حسابه لاننا المفروض كنا هنفطر عند قرايبنا، يعني يا رب الفلوس تكفي D: في النهاية استقرينا على الدجاج (المجمد طبعا D:)

طبعا كان الوقت متأخر نوعا ما، و الخضار اللي في السوق باقي التنقيه، يعني حالتها مش أوي، لإن اللي اشترى اشترى من بدري! المهم انتهى الحال بالغاء فكرة شراء الخضار بتاعت الشومن! و الاكتفاء بخضار السلطة زي الطماطم و الخيار ... إلخ.

كدا الوصفة بقت مش مظبوطة أوي بس تمشي برده. مسكت الدجاجة المسكينة و فصلت اللحم عن العضم لحد ما بقت هيكل عظمي D: (و طبعا الهيكل العظمي ده مش بيترمي! إنما بيتعمل منه مرقة)، قطعت اللحم لشرائح و تبلته بالبهارات الأساسية (ملح، فلفل اسمر، شطة، كمون) و كمان واحدة من التوابل اللي موجودة مع الإندومي، و اتنين من صوص الصويا اللي معاها برده، و خل، مع بعض النغزات بالشوكة عشان اللحم يتشرب التتبيلة بشكل كويس و سبتها مدة ٢٠ دقيقة تقريبا تتشرب التتبيلة. (في الوقت ده كنت بعمل شوية حاجات تانية زي التمر بالحليب و الكركديه) بعد كدا سويتها عادي خالص بالسفع على الزيت. و أخيرا عملت النودلز، بس لازم تكون المية فيها قليلة قدر المستطاع (يعني مش بالطريقة التانية اللي بتكون فيها شوربة كتير). و في النهاية تخلطهم على بعض او تحطهم جنب بعض، براحتك، و بالهنا و الشفا ^_^


المفروض كان في خضار نص مقلية بس الأكلة ملهاش نصيب تكمل، و زي ما انتوا شايفين تعتبر أكله سريعة و مفهاش أي مهارات خاصة D: بس المهم ان طعمها كان حلو و عجبت اخواتي ^_^
و طبعا الأخين اللي كانوا معايا كانوا بيشاركوا في التحضير بطريقة أو أخرى، ما هما مش بشوات يعني أنا اعمل الأكل و هما ياكلوا على الجاهز هههههههههههه. و مكانش فاضل غير أعواد الأكل الآسياوية D: صحيح محدش يعرف بتتباع فين في مصر؟

و لنا لقاء آخر إن شاء الله بخصوص فن الطعام، ممن يكون عن البرجر النباتي مثلا D: و كل سنة و انتوا طيبين مرة تانية ^_^


الثلاثاء، 10 أغسطس، 2010

أهلا بالسمة الجديدة : )

السلام عليكم ورحمة الله وبركاته

 النت كان مقطوع بقاله كام يوم ولسه فيه شوية مشاكل! بس ده ميمنعش من تفعيل السمة الجديدة D:
بانتهاء اللمسات الأخيرة، تم تفعيل السمة (theme) الجديدة واللي لسه ملقتلهاش اسم D:

http://img829.imageshack.us/img829/2291/newtheme.png

السمة مبنية على سمة "نيو" من إنتاج مدونة المصنع، لكن مع تبسيطها وإضافة لمسة عربية، مع ألوان مبهجة، وكمان تم اضافة خطوط جديدة (اخيرا اتخلصت من خط اريال وتاهوما!) الخطوط مضمنه عن طريق  @font-face (شرح عربي، شرح انجليزي)، يعني الخطوط هتظهر بشكل موحد سواء كانت موجودة عند على جهاز الشخص اللي بيتصفح الموقع ولا ﻷ، بس ده محتاج متصفح حديث، أغلب المتصفحات حاليا بتدعم الخاصية دي (فاير فوكس، كروم، اوبرا، وغيرهم)، ولا عزاء لمستخدمي المتصفحات المتخلفة!

استخدمت خطين رائعين، الأول للعناوين والتاني للمتن.
الخط الأول هو خط نسخ عثمان طه "Uthman Taha Naskh" وهو خط مجاني يصدر عن مجموعة الخطوط الحاسوبية.
الخط التاني هو الإصدار التالت من خط ون "KacstOne" وهو خط  نسخ سطري، حر ومفتوح المصدر من مجموعة خطوط مدينة الملك عبدالعزيز للعلوم والتقنية، والشكر موصول للأستاذ خالد حسني من مجموعة عرب آيز لتحديث الخط واطلاق الاصدار التالت منه.

http://img824.imageshack.us/img824/2174/fossfonts.png
أحب اوضح شيء بسيط، السمة أساسية مش مؤقتة، عشان محدش يفتكر انها عشان رمضان بس! بحاول حاليا اتعرف اكتر على الزخرفة العربية والإسلامية بأنواعها، لاننا فعلا عندنا تراث رائع لا يقل عن تراث أي حضارة تانية، محتاجين بس ننفض عنه التراب، ونخليه مواكب للحداثة زي استخدام الالوان المبهجة والتقنيات الحديثة مع المحافظة على الأصالة والعراقة : )
مع إني مش عارف إذا كنت هقدر أوصل للهدف ده ولا ﻷ لكني بحاول : )


وإن شاء الله في أقرب وقت هحاول انضفها أكتر من الأخطاء عشان تكون متوافقة مع المعايير القياسية للويب (أنا مستلم السمة بحاجة وتلاتين خطأ وتنبيه، دلوقتي الأخطاء وصلت لحاجة وستين، مع إنه على مدونتة التجارب حوالي أربعين خطأ، مش عارف أنا عملته ايه بس http://img15.imageshack.us/img15/4920/tootho.gif)


أخيرا، طبعا أي تعليقات أو ملاحظات على السمة الجديدة (حتى لو كانت صغيرة!) مرحب بيها تماما : )