الاثنين، 28 مارس 2011

من أيام المدرسة : )

مش عارف ليه افتكرت كام حاجة حصلت معايا في المدرسة زمان .... اممم اعتقد الحاجات دي مفهاش ليه، هي بتيجي كدا وخلاص :-)

-----------

ديما الناس بتقولي "أبوزيد" ولما يندهوني باسمي ينطقوه بالعامية "احمد" من غير همزة القطع اللي في الأول ... أو في الغالب "أحمااااااا" http://lh4.googleusercontent.com/_tb7UW2nr6KA/TWloUt_MpdI/AAAAAAAAAUE/dxcOzdg44bY/s128/biggrineb.gif
بس في إعدادي كان في مدرس على طول لما يندهني بيقول اسمي صح ... "أحمد" بالهمزة اللي في الأول وحرف الدال واضحين. كان مدرس شاب، لكن كان ملتزم بالنطق الصح وإنه ينطقني باسمي الشخصي مش لقب العيلة ... كنت بحب جدا لما يندهني لإنه بينطق الاسم صح. مش فاكر إني سمعت ناس كتير بتقول "أحمد" بالطريقة الصح ... بس كل ما أسمعها بحس بشعور حلو وأفتكر الأستاذ ده ... الله يمسيه بالخير :-)


افتكرت برده لما كنت في أولى ابتدائي، في امتحان نص السنة تقريبا كتبت اسمي بلقب عائلة أمي بدل لقب عائلة أبويا "أبوزيد" http://lh3.googleusercontent.com/_tb7UW2nr6KA/TY-_4Xjy8OI/AAAAAAAAAV8/aidYrzINio0/s128/LAUGH.GIF
تقريبا أبويا كان مزعلني جامد وقتها، والعيال (ولاد وبنات http://lh4.googleusercontent.com/_tb7UW2nr6KA/TWloUt_MpdI/AAAAAAAAAUE/dxcOzdg44bY/s128/biggrineb.gif) في الفصل ماسكين كلمة "أبوزيد" ونازلين تريقة عليه ... قولت مش معقول يعني، أبويا في البيت والعيال دي في المدرسة .... والله لكتب لقب عائلة أمي بدل لقب أبويا http://lh4.googleusercontent.com/_tb7UW2nr6KA/TWloUt_MpdI/AAAAAAAAAUE/dxcOzdg44bY/s128/biggrineb.gif
طبعا كانت مصيبة، خصوصا إنها في امتحان نص السنة يعني رسمي مش زي امتحان الشهر ... بس الموضوع خلص على خير في الآخر.
http://lh4.googleusercontent.com/_tb7UW2nr6KA/TWloUt_MpdI/AAAAAAAAAUE/dxcOzdg44bY/s128/biggrineb.gif

كل ما افتكر الموضوع ده أقول "يا ابن المجانين!!" http://lh5.googleusercontent.com/_tb7UW2nr6KA/TWloUv2hHLI/AAAAAAAAAUI/ksV1BWKpb8Q/s128/laughc.gif
لكن في الحقيقة كل ما افتكر الموضوع ده بستغرب من كون أحداث صغيرة بتحصل للواحد في بداية حياته بتساهم بشكل كبير في تكون شخصيته لبقية حياته http://lh6.googleusercontent.com/_tb7UW2nr6KA/TY-_fxkj6zI/AAAAAAAAAV4/_0YJZIpoqRY/s128/rolleyes.gif
على ما افتكر الحدث ده -وعلى صغر سني وقتها- كان بداية عدم اهتمامي بآراء الناس، لإني كل ما اهتميت برأي الناس وكلامهم كنت بوصل لنتيجة مش كويسة!أنا فعلا شاكر للأحداث اللي زي دي لإن الاهتمام لرأي الناس متعب جدا وبيستهلك وقت الواحد وأعصابه، وفي الآخر أغلب الناس مش هترضى برده! أخري من وقت للتاني أراجع آراء الناس في نقط معينة عشان يكون عندي زاوية رؤية تانية للأمور.

بل كمان ده كان نواة لحاجات تانية زي إني مهتمش ببعض الأمور اللي مفيش أي فايدة منها، لإن التفكير فيها لا هيقدم ولا هيأخر ولا ليه أي تأثير ... أي حاجة الواحد ملهوش قدرة على تغييرها يبقى يسيبه منها لإنه فعلا "مش مهم". ومن ناحية تانية أنا نوعا ما بشفق على الناس اللي بتهتم بآراء الناس أكتر من اللازم، للأسف بيستهلكوا طاقتهم وروحهم على الفاضي http://lh6.googleusercontent.com/_tb7UW2nr6KA/TY-_fxkj6zI/AAAAAAAAAV4/_0YJZIpoqRY/s128/rolleyes.gif

هناك 5 تعليقات:

  1. فكرتني يا أحمد ب 5 ابتدائي،
    كنت في امتحان نص السنة، وكنت قاعد أكتب باقلام أزرق وأحمر وأخضر في ورقة الإجابة، فالمراقب جيه وقالي انت بتعمل ايه يا بني، قولتله: بلون :D

    ردحذف
  2. طب فهمنى ايه فى اسم والدك يتريقوا عليه ؟؟

    انا عشان اسم الحج جمال فالدلع جيمى ...فيقولك جيمى كارتر...ومعرفش كنت بضايق ليه ...ولما وصلت ثانوى كارتر دى اتحولت لحاجه على وزن كارتر يعنى...فبقيت استغلها ضدهم ومن وقتها مفيش كلب استجرأ انه يتريق :D

    ردحذف
  3. >كريم عبد المجيد:
    D:
    قالك إيه ساعتها طيب؟ D:
    ـ

    >safa7_karmooz:
    هما مش بيتريقوا على اسمي والدي شخصيا ... بيتريقوا على اسم جدي الرابع عشر أبوزيد D:
    أبوزيت، أبوزيت ولمون، أبوسمنة، أبوجاز ... إلخ ههههههه D:

    أنا بقى مش فاهم "كارتر دى اتحولت لحاجه على وزن كارتر يعنى" ... إيه الفرق بين كارتر الأولانية وكارتر التانية D:

    ردحذف
  4. هههههههههههههههه
    صباح الذكريات ...... علفكره انا عارف الاستاذ ده :)
    وكمان فاكر كنا بنتريق عليق وبنقولك ايه :)
    ومش فاكرك انت اصلا :p

    ردحذف
  5. إنت هتستهبل يا باسم .... هو إنت كنت موجود في سنة أولى أصلا؟ p:

    ردحذف