الأربعاء، 26 أكتوبر، 2011

عن الطلاق!


الطلاق ده من الحاجات العجيبة جداً زي الجواز كدا بالظبط! بل يمكن يكون أكتر حاجة بتخوفني في فكرة الجواز!




المفروض إني كنت هكتب خمس أو ست سطور بحاول فيها أوصف أد إيه الطلاق ده غريب لكن يبدوا إني مش عارف أكتب حاجة! ومسحت الكلام اللي كتبته أكتر من خمس مرات وكتبته تاني وبرده مش لاقي الكلام المناسب لوصف شعوري بالنسبة للطلاق!

بشكل مختصر و بأقل كلمات ... العجيب فيه واللي أنا مش قادر أتخيله إزاي يكون اتنين بقوا عبارة عن شيء واحد، اتنين نشأ بينهم علاقة من أكتر العلاقات الإنسانية تشابكاً وعمقاً، اتنين اعتقدوا بأن كل منهم بالنسبة للتاني هو أفضل إنسان في الكون وأكتر إنسان بيحبه في العالم، اتنين مفيش بينهم أي علاقة دم يعتبروا أقرب لبعض من أي حد تاني ... بنفصلوا عن بعض! بل ممكن يكون بعد الطلاق بينهم كمية من كراهية قادرة على ملء المجموعة الشمسية بكل ما تحتويه من أجرام فضائية!

كل ده بيخليني أفكر في الطلاق كأكثر الكوابيس مخيفة على الإطلاق ... خصوصاً مع تزايد نسب الطلاق في المجتمع المصري بشكل خزعبلي ... لدرجة إني أعرف ناس (أعرفهم معرفة شخصية مش عامة!) جوازهم لم يستمر سنة على بعض!

أنا مقتنع تماماً بإن لكل شخص سمات وظروف مختلفة ومش من المنطقي إني أحط نفسي مكان حد ... بس إيه العمل لو كان الطرف التاني عنده لا مبالاة؟ مش متحمل المسئولية؟ معندهوش الرغبة في التغيير؟ مش مقدر معنى "أسرة"؟

مش عارف هعمل إيه ساعتها ... مش هيكون في غير الطلاق، بس أتمنى من كل قلبي إني مكونش في الموقف ده أبداً ... عشان كدا من زمان وأنا بعمل على إني أكون شخص أفضل، وبالتالي زوج أفضل وأب أفضل وأفضل ... إني أتخلص من الصفات السيئة فيا وأحصل على صفات أفضل، أقرأ في العلاقات الإنسانية، أقرأ في العلاقات الأسرية والتربوية، والأهم إني أحاول أتعلم من تجارب الآخرين! عشان يمكن نصيبي يكون أفضل منهم ... لكن بالرغم من أي حاجة ملناش يد فيها إحنا بس اللي بنحدد نصيبنا وبنصنع قدرنا مش أي حد تاني!

الثلاثاء، 25 أكتوبر، 2011

أسماء لم أحبها قط!


من وأنا صغير كان في بعض الأسماء اللي محبتهاش أبداً ... معرفش ليه! بالرغم من كون كتير من الأسماء مقابلتش ناس تحملها ... مع ذلك مقدرتش أحبها يوما (يعني الكره ناحية الأسماء نفسها مش للأشخاص اللي بيحملوا الأسماء دي!)

- حمادة
(مش فاهم إزاي يكون راجل طويل عريض يكون اسمه "حمادة" سواء دلع أو حقيقي!! في ناس كتير اسمهم الحقيقي "حمادة"!)
- سيد
(كنت ديما بسأل نفسي وأنا صغير ... لما واحد يكون إسمه سيد و عاوز يقدم نفسه هيقول إيه؟ السيد سيد؟! بالتأكيد ده اسم رخم!)
- عبده
(خصوصا لما أقراه في شكل "عبدوووووه"! لكن مؤخراً عرفت بعض الناس خلوني أحس إن الاسم مش بهذا السوء)
- نواف
(مع إنه مش اسم مصري لكن معرفش ليه الاسم ده تقيل عليا!)
- سالم


- نهلة (على الأرجح إن ده أكتر اسم بكره على الإطلاق مع إني عمري ما قابلت أي نهلة قبل كدا!)
- دينا
(وغالبا "دنيا" كمان!)
- نورهان
- بسمة
- ريم
- بطة
(المفروض ان المصريين بيستخدموه كإسم دلع لـ "فاطمة" بس مش عارف ليه بحس إني عاوز أخلع راس اللي بيقوله وأحطه مكانها بطة!)




غالبا في أسماء تانية بس دول اللي فاكرهم دلوقتي!

الجمعة، 21 أكتوبر، 2011

تدوينة سريعة

الدنيا دي عجيبة جداً ! خلال أسبوعين حصلت حاجات كتير جداً!
أحداث مايسبيرو، وفاة ستيف جوبز، نسخة أوبنتو الجديدة ١١.١٠ (واللي يبدوا عليها رائعة جدا!)، مقتل القذافي، شارعنا اتسفلت واترصف!
دا حتى اكتشفت إن كراش (Crash) طلع أحد من أنواع الجرابيات اللي بتعيش ناحية استراليا مش تعلب زي ما كنت معتقد من أيام الطفولة لحد دلوقتي!! ... إيه اللي ناقص؟ سونيك (Sonic) ميكونش قنفذ ويطلع سليل تي-ريكس (T-rex)!!

تباً! أنا حاسس إني عاوز أكتب قايمة بالأسماء اللي مش بحبها!

تحديدث: أنيس منصور انضم لقائمة الأحداث! اتوفى انهارده! ربنا يرحمه : (