السبت، 29 ديسمبر، 2012

خمسة أسباب تجعل "المصادر الحرة مفتوحة المصدر" أولوية لنا.

لغرض الأرشفة والنشر على الويب، لقيت إن الأفضل إني أنشر النص بتاعه وعدم الاكتفاء بالصورة من المجلة، ده نص مقالي المنشور في مجلة لغة العصر الصادرة عن مؤسسة الأهرام، عدد أكتوبر ٢٠١٢ صفحة ٤٤.


خمسة أسباب تجعل «المصادر الحرة مفتوحة المصدر» أولوية لنا على المستوى الوطني والعربي.

ربما قد تكون سمعت مؤخراً بمصطلح "برمجيات حرة" أو "مصدر مفتوح"، الشركة الفلانية تدعم البرمجيات الحرة مفتوحة المصدر، أو البلد الفلاني بدأ في اعتمادها في مؤسساته، والكثير من الزخم حول البرمجيات الحرة والمصدر المفتوح، وربما تود أن تعرف أنت أيضاً لماذا كل هذا الاحتفاء؟ ولماذا البرمجيات الحرة والمصادر المفتوحة ليست رائعة فحسب بل هي أولوية بالنسبة لنا على المستوى العربي؟

في البداية ما هي البرمجيات الحرة مفتوحة المصدر؟ ببساطة شديدة تعريف البرمجيات الحرة (Free Software) والمصادر المفتوحة (Open Sources) وفقاً لموسوعة ويكيبيديا هو: «البرمجيات الحرة برمجيات حاسوبية يمكن استخدامها ودراستها وتعديلها لأي غرض دون قيود، وكذلك نسخها وتداولها مُعدّلة أو غير مُعدّلة بلا قيود. أو بقيود تضمن أن متلقيها ستكون لهم الحقوق ذاتها. البرمجياتُ الحرةُ عموما مجانية، إلا أن بعضها قد يكون بمقابل.»

قد تكون لاحظت أنه هناك مصطلحين، الأول Free Software والآخر Open Source، حدث ذلك بسبب مشكلة في اللغة الإنجليزية حيث كلمة free تعني "مجاني" وتعني أيضاً "حر"، فظهرت حركة تدعى مبادرة المصدر المفتوح Open Source Initiative وجاءت هذه المبادرة بالدعوة لاستخدام مصطلح Open Source عوضا عن Free لأن الكثير من الأشخاص يختلط عليهم الأمر وخصوصاً قطاع الأعمال.

في الوقت الحالي قد يكون المصطلحان وجهان لعملة واحدة (ولذلك غالباً ما يرمز لهما اختصاراً بـ FOSS أي Free/Open Source Software) وبالطبع في لغتنا العربية الرائعة لا نعاني من أي مشاكل في المعاني والمترادفات فالحر حر والمجاني مجاني، وحتى في اللغة الانجليزية بتوضيح بسيط يمكن إزالة هذا الالتباس بقول "Free as in freedom".

في الواقع، قد تكون تستعمل برمجيات حرة مفتوحة المصدر دون أن تدري بذلك! هل تستعمل متصفح الإنترنت الشهير فَيرفُكس Firefox؟ مشغل الوسائط الرائع VLC؟ عميل التورنت السريع Azureus؟ وأخيراً عميل البريد القوي ثاندر بيرد Thunderbird؟

نكتفي بهذه المعلومات البسيطة دون الدخول في التفاصيل، من ذلك نستنتج أن هذه البرمجيات تتيح حريات أكثر من البرمجيات الاحتكارية الأخرى، وهذه الحريات نتج عنها العديد من المميزات الرائعة والتي تفيدنا كثيراً على المستوى العربي لجب الفجوة الرقمية بيننا (كدول نامية) وبين الدول المتقدمة. نتعرف الآن على بعض هذه المميزات التي تجعل البرمجيات الحرة مفتوحة المصدر مميزة حقاً، ونكتفي حالياً بخمس مميزات أساسية كالتالي:

الحرية.
الحرية هي الميزة الجوهرية والرئيسية للبرمجيات الحرة مفتوحة المصدر، هذه الميزة تعتبر المزية الأم حيث تنبثق منها كل المزايا الأخرى بشكل أو بآخر، الحرية التي تتيحها البرمجيات الحرة مفتوحة المصدر تجعلنا قادرين ليس فقط على قراءة الأكواد البرمجية بل أيضاً دراستها وتعديلاها بالشكل الذي يلائم كل بيئة، هذه الميزة هي التي تطلق العنان للإبداع البشري للوصول لمداه الأقصى دون أي قيود، هي التي تجعل حياتنا أفضل.

الأمان.
تمتاز البرمجيات الحرة مفتوحة المصدر بدرجة عالية جداً من الأمان ويمكن لأي جهة أن تقوم بمراجعة أمنية لأكواد أي برنامج مفتوح المصدر وهذا غير متوفر في البرمجيات المغلقة المصدر الاحتكارية، وهذا مفيد بحق في حالة اعتماد أحد البرمجيات في المؤسسات الحكومية والرسمية الحساسة.

الجودة.
هناك حكمة تقول "عقلان أفضل من واحد" فما بالك بآلاف العقول المبدعة من كل أنحاء العالم؟ بسبب توفر المصدر البرمجي للجميع يقوم المئات من الأشخاص سواء المبرمجين أو المستخدمين العاديين بقراءة ومراجعة وتجربة الأكواد البرمجية وإفادة المطورين بأي ملاحظات مما يزيد من جودة هذه البرمجيات بشكل ملحوظ عن غيرها، وهذا ينعكس أيضاً على سرعة تطورها حيث تتطور بشكل أسرع كثيراً من غيرها.

التكلفة.
بسبب اعتماد البرمجيات الحرة مفتوحة المصدر على نموذج أعمال مختلف عن أغلب البرمجيات الموجودة حالياً فإن تكلفتها تكون منخفضة جداً وتكاد تقترب من الصفر، وهذا يمنحها ميزة اقتصادية هائلة بالمقارنة بغيرها من البرمجيات، وهناك العديد من الدول والمؤسسات التي استطاعت خفض نفقاتها والتخلص من ملايين الدولارات باستخدامها البرمجيات الحرة مفتوحة المصدر. هذا لا يعني أن البرمجيات الحرة غير قادرة على الربح، بل على العكس فبسبب مميزاتها والأساليب غير التقليدية في الربح فهي تحقق أرباح عالية، أحد أفضل الأمثلة لهذا هي شركة ريدهات حيث تخطت مؤخراً قيمة أسهمها في البورصة العديد من الشركات الكبرى!

المرونة.
البرمجيات الحرة مفتوحة المصدر ليست كغيرها من البرمجيات التي تأتي في قوالب جامدة غير قابلة للتشكيل يجب عليك التاقلم معها، بل على العكس هي أشبه بالصلصال تستطيع تشكيلها بالشكل الذي يلائمك ويلائم بيئتك لا العكس. من ناحية أخرى لكل بيئة متطلبات مختلفة لا يمكن استخدام نفس القالب مع كل منها فالبيئة التعليمية تختلف عن البيئة الإنتاجية تختلف عن البيئة الترفيهية، لهذا السبب تعتبر البرمجيات الحرة مفتوحة المصدر هي الأفضل من ناحية المرونة حيث يمكن تطويعها بالشكل الملائم لأي بيئة كانت.

الاستقلالية.
في البرمجيات الاحتكارية مغلقة المصدر أنت تكون مرتبط بمصدر واحد فقط لا غير وهي الشركة أو المؤسسة المطورة للبرنامج الذي تستعمله، أنت مضطر لانتظار الشركة لتطوير برنامجها وإصلاح أي علل قد تظهر فيه وهذا ما يعرف بـ Vendor Lock-in، على العكس في البرمجيات الحرة أنت فعلياً غير مرتبط بشركة واحدة تستطيع أي شركة تقديم دعم وحلول بأفضل الطرق التي تناسبك. هذا يفتح المجال أمام استقلال الدول والهيئات الرسمية للدولة، ودعم والاعتماد على الشركات المحلية عوضاً عن الاعتماد على شركات أجنبية وبالتالي صبح هناك نوع من التبعية التقنية.


ربما لاحظت أنني ذكرت ستة أسباب وليس خمسة، اعتبره هدية مجانية، حيث البرمجيات الحرة مفتوحة المصدر لها من المميزات ما يصعب حصره في مقال. لكن إليك سبب أخير؛ لماذا يجب أن نكون في المؤخرة دائماً؟ إذا كانت كل دول العالم سواء الدول المتقدمة أو الدول الناهضة أو حتى الدول النامية بدأت تلتفت إلى البرمجيات الحرة مفتوحة المصدر وتستفيد منها بأفضل طريقة سواء على المستوى العام أو الخاص، هل يجب علينا التأخر أكثر من ذلك؟ اترك لك الاجابة على هذا السؤال.

إذا أثارت هذه البرمجيات الرائعة حقاً فضولك، ابدأ بالبحث والتعرف أكثر على مميزاتها وابدأ بتفكير جدياً في التخلص من برامجك القديمة واستعمال برمجيات تزيد من قدراتك الانتاجية والابداعية، فالأشخاص الأكثر قدرة على التغيير هم الأكثر نجاحاً.

-----

لاحقاً، كتبت كتاب دليل البرامج الحرة مفتوحة المصدر، وهو يستعرض أشهر البرامج الحرة مفتوحة المصدر Free Open Source Software التي تعمل على نظام ميكروسوفت ويندوز وذلك للتسهيل على المستخدمين الراغبين في استعمال البرمجيات الحرة مفتوحة المصدر دون تكبد العناء وتوفير الكثير من الوقت والمجهود.

يوفر الكتاب مصدراً متكاملاً لكل من يود البدء في استخدام البرمجيات الحرة مفتوحة المصدر على نظام ويندوز، ويتكون من ستة فصول ويحتوي على أكثر من 190 برنامج حر مفتوح المصدر تغطي الاحتياجات المختلفة للمستخدمين.


الثلاثاء، 25 ديسمبر، 2012

ملخص ٢٥\١٢\٢٠١٢

طيب طيب، أنا بقالي كتير مكتبتش، وعاوز أكتب عن كام حاجة كدا، عن أهم اللي تم في الفترة اللي فاتت (بدون ترتيب) كان كالتالي:

- كتاب تعرف على البرمجيات الحرة.
قمت بتنسيق كتاب صغير (٦٩ صفحة) بعنوان "تعرف على البرمجيات الحرة"، كتبه الصديق "فهد السعيدي" عن البرمجيات الحرة من حيث تعريف بيها وبعض الملعومات المفيدة عنها وتجربة بعض الدول في استخدام البرمجيات الحرة زي ماليزيا، البرازيل، ألمانيا.
المميز في الكتيب ده إن أسلوبه سهل وبسيط ومش بيدخل في أي تفاصيل معقدة ... الكتاب مميز لدرجة إنه عميل أكتر من ١٠٠٠ تحميل خلال كام يوم من إطلاقه، فعلاً أنا أنصح أي حد عاوز يعرف عن البرمجيات الحرة والمصادر المفتوحة إنه يقراه.

الكتاب تم إخراجه باستخدام البرمجيات الحرة حصراً، استخدمت فيه أوبنتو كنظام تشغيل، وليبر أوفيس كمحرر نصوص، وإنكسكيب وجمب كمحرري صور، وحتى الخطوط كانت حرة!

من ناحية تانية المميز في الكتاب ده إني اتعلمت فيه استخدام التعبيرات النمطية (Regular Expressions) وكيفية استخدامها في تهيئة النصوص، وفعلاً وفرت عليا وقت كبير جداً. وبرده اتعلمت شوية حاجات ممتازة في برنامج sed. وكتبت عنها مقال خفيف وطريقة الاستفادة منها: استخدام Regular Expression في تهيئة النصوص.


- إنفوجرافيك موزيلا في ٢٠١٢.
موزيلا من المؤسسات اللي بحبها جداً في عالم البرمجيات الحرة، لإن ليها فكر ممتاز جداً ونشاط رائع يخلي الواحد ينبهر بيها، موزيلا مش مجرد فايرفوكس وثاندربيرد والبرامج اللي بتعملها، موزيلا ليها نشاطات تانية كتيرة بتساهم بيها في جع الويب مكاناً أفضل للجميع.

كنت اكتشفت موزيلا بشكل أعمق لما عملت تحدي لتصميم مبتكر للتابز في ٢٠٠٩.
مؤخراً نشرت إنفوجرافيك لأهم إنجازاتها في سنة ٢٠١٢، فلقيتها فرصة كويسة عشان أكتب عن موزيلا تاني ... نشرت النسخة العربي واللي لاقت تفاعل كويس جداً على النت، موجودة هنا "إنفوجرافيك عربي: موزيلا في ٢٠١٢".

الظريف في الموضوع إني أعدت انتاج الإنفوجرافيك بالكامل على إنكسكيب، مفيش غير تلات صور بس هما اللي راستر، لقيت إني أسرع أعمله من أول وجديد على إنكسكيب من إني أراسل حد من موزيلا اللي مراسلتهم مش هتاخد وقت أصلا D:


- دراسة عربية عن البرمجيات الحرة.
من فترة أطول شوية، كنت برده قمت بتنسيق دراسة عن استخدام البرمجيات الحرة والمصادر المفتوحة، أهميتها، مزاياها، إيه الفوائد اللي هتعود علينا (الدول العربية)، المزايا التقنية، الاقتصادية، الأمنية، وحتى السياسية! الدراسة دي قامت بيها شركة "".

بصراحة، في رأيي الشخصي إذا كنا عاوزين نتحول لاستخدام البرمجيات الحرة والمصادر المفتوحة، يبقى لازم يكون عندنا شركات زي دي! شركات قادرة على إدارة عمليات الهجرة من الأنظمة والتكنولوجيا القديمة! مفيش أمل من الحكومات والدول، مفيش أمل من مؤسسات ماسكينها عواجيز بتفكير قديم معندهم نية (وعلى الأغلب ولا حتى القدرة) على الانفتاح والاستفادة من الفرص المتاحة، والتكنولوجيا المبتكرة!

كنت كتبت عن الدراسة هنا "دراسة عربية: الأبعاد الاستراتيجية للبرمجيات الحرة ومفتوحة المصدر"، والشيء المميز فعلاً فيها إنها موجهة لأشخاص معندهمش خلفية تقنية قوية، وده حال أغلب متخذي القرار في بلادنا! وطبعاً تم الإخراج ببرمجيات حرة تماماً :-)


- مقالي في مجلة لغة العصر.
في أكتوبر اللي فات، مجلة لغة العصر المصرية (وهي تعتبر أكبر المجلات التقنية انتشاراً على مستوى مصر والدول العربية) نشرت ليا مقال بعنوان "خمسة أسباب تجعل «المصادر الحرة مفتوحة المصدر» أولوية لنا على المستوى الوطني والعربي".
المقال وضحت فيه ليه البرمجيات الحرة والمصادر المفتوحة مهمة لينا على المستوى العربي!! وإيه مزاياها وإيه اللي ممكن تقدمه لينا. وهكتفي بالاقتباس ده:
«إليك سبب أخير؛ لماذا يجب أن نكون في المؤخرة دائماً؟ إذا كانت كل دول العالم سواء الدول المتقدمة أو الناهضة أو حتى النامية بدأت تلتفت إلى البرمجيات الحرة مفتوحة المصدر وتستفيد منها بأفضل طريقة سواء على المستوى العام أو الخاص ... هل يجب علينا التأخر أكثر من ذلك؟»

هنا نسخة نصية من المقال.

طبعاً مقدرش أنسى دينامو البرمجيات الحرة والمصادر المفتوحة في مصر، أنس عماد! وباقي الشباب الرائعين في الفريق المحلي لأوبنتو في مصر "أوبنتو إيجي" على اللي بيقدموه من وقتهم وجهدهم (وفلوسهم كمان D:) لدعم البرمجيات الحرة والمصادر المفتوحة في مصر والدول العربية!


كفاية لحد كدا وهبقى أكمل لاحقاً! :-)


السبت، 22 ديسمبر، 2012

استفتاء الدستور المصري.

استفتيت من ساعة تقريباً الحمد لله :)

لا مع بعض الأسف!
دستور كويس بس نستحق دستور أفضل، المشكلة الحقيقة مش في كدا المشكلة فعلاً إن "كتير" (وحاططها ما بين علامتين اقتباس عشان ملاقيش حمار عمال ينهق في البوست) من المعترضين على الدستور مش قايلين ﻷ عشان الدستور وحش إنما لأسباب تانية (كارهين الاخوان، معترضين وخلاص، بيتكلموا عن نقط هبلة ... إلخ) فأنا مش ضامن تماماً إن المواد اللي فيها مشكلة هتتغير فعلاً! (وده نفس السبب السبب اللي خلاني مقولش نعم، على أساس إن الدستور ممكن يتعدل بعد كدا ويتحسن ... مفيش أي ضمان برده!!)

لكن في كل الأحوال كن لازم تطبيق مبدأ "طظ في الجميع" واختار اللي أنا مقتنع بيه فعلاً، ومخليش موضوع "الاستقرار" و "كفاية تضيع وقت" و "مؤسسات الدولة اللي بتقع" و "الخوف من المستقبل عموماً" وغيرهم يخلوني أميل لنعم مثلا!

-----------------

- عموما يعني كان عملية الاستفتاء كانت كويسة جداً، نفس مكان لجنة انتخابات الرئاسة.

- بس كان في المرة دي طابور أطول شوية، بس الكويس إنه كان بيمشي، الطابور بس كان تنظيمي لإن بمجرد دخولي المدرسة اللي فيها لجنتي الموضوع مأخدش غير خمس دقايق.

- المشكلة بتاعت كل مرة، لجنة ٢٧، ٢٨ و٢٩ تقريباً هي اللي عاملة الزحمة لإن فيها ناس كبيرة في السن كتير وبالتالي بياخدوا وقت كبير في العملية (وتقريبا ده كان السبب الرئيسي في الزحمة)، وده نفس اللي حصل في انتخابات الرئاسة اللي فاتت بالظبط، نفس اللجان ونفس المشكلة.

- التفاعل كان ظريف جداً وناس من فئات مجتمعية مختلفة وآراء وأسباب متنوعة لاختارهم في الاستفتاء.

- حتى الشباب السيس قرر يشارك أو حتى كان عاوز يشارك لما شاف اقبال الناس (الشباب السيس ترمز هنا إلى شباب ولاد ناس ومستواهم كويس لكن مش في دماغهم أي مشاكة إجابية أو سلبية فيما يخص أي حاجة ... مقضينها يعني)

- حتى الشباب المتكحرت شاركوا أو كانوا عاوزين يشاركوا لنفس السبب، كان في كام واحد واقفين وواحد منهم كان عاوز يروح يشارك بس واحد منهم بيقوله فيما معناه كبر دماغك (الشباب المتكحرت ترمز هنا إلى شباب مستواهم الاجتماعي أقل من المتوسط وبرده مقضينها)

- تفاعل سواقين الميكروباص ظريف ومتباين جداً D:

- شارع الهرم شبه ميت من الزحمة!! زحمة جداً لدرجة إني عشان أوصل لجنتي اللي هي بعدينا بتلات محطات تقريبا ومش بتاخد أكتر من ١٠ دقايق بالميكروباص في أسوء الأحوال، أخدت فوق النص ساعة وأنا رايح، وأكتر وأنا راجع! (الزحمة بتزيد أكتر كل ما الليل يليل).
بس عموماً ده شيء كويس مش وحش يعني، وشايف إن في تفاعل كويس من الناس ... نفسي بس أعرف نسبة المشاركة وصلت كام :‑)

الحمد لله :‑)

الجمعة، 21 ديسمبر، 2012

تدوينة سريعة

انهارده ارتكبت فظيعة جديدة من آخر فظائعي في الكام يوم اللي فاتوا دول DDDDD:

حضرت الفيست بتاع كيو نت انهارده في الصالة المغطاة باستاد القاهرة!!

قررت أعصر على نفسي شوال لمون وأحضر عشان يبقى عندي تجربة واقعية تخولني إني أشتم الشركات اللي زي دي، واشتم الناس اللي بتشترك فيها! ومن ناحية تانية عشان أرغم نفسي على الحاجات اللي مش بحبها (صمدت لمدة ٣ ساعات في حفل صاخب ... ده إنجاز فعلا D:)

لكن قبل ده كله، أقول الحق، أنا استفدت استفادة مبهرة انهاردة فيما يخص التسويق! ﻷ هما مكانوش بيتكلموا عن التسويق ولا حاجة أنا بس كنت بلاحظ كل تفصيل وكل كلمة بتتقال وكل حاجة بتتعمل!
وفعلاً أكدولي على العديد من النظريات اللي استنتجتها واستخدمتها مؤخراً.

الخلاصة؟ الناس دول ولاد كلب فعلاً! وهكتفي بكلمة ولاد كلب كناية عن كل الكلمات القبيحة اللي ممكن تتقال لإنهم محتاجين كلمة قبيحة بطول ١٢ حرف عشان توصفهم!!

بيلعبوا على وتر مشاعر الناس بطريقة فظيعة ، باختصار الاستهلاكية في أبشع أشكالها!

صدق اللي قال إن أسوء أنواع الكذب هو الكذب الممزوج بحقيقة! ممكن لاحقاً ابقى أكتب أكتر عن التجربة دي.

الأحد، 11 نوفمبر، 2012

ملخص ١١\١١\٢٠١٢

بقالي حبه حلوين مكتبتش هنا! طيب ده ملخص لبعض الحاجات في الفترة الأخيرة.


فاب لاب مصر.
في آخر سبتمبر حضرت ورشة مصغرة عن أردوينو، واتعرفت على فاب لاب مصر (فاب لاب اختصار لـ Fabrication laboratory)، كان يوم جميل جداً واتعلمت بعض الحاجات الظريفة عن أردوينو وطريقة استخدامه، وعملنا فريقين لعمل أي حاجة باستخدام أردوينو، مع إني مكتبتش كود بس كنت فاهم أغلبه، وكنا الفريق الفايز D:

الورشة كانت بمناسبة إطلاق كتاب أردوينو، طيب هو إيه أردوينو أصلا؟ كنت كتبت سابقاً عنه هنا «إطلاق كتاب "أردوينو ببساطة"»

الواحد بيكون سعيد لما يشوف ناس بتشتغل بالإمكانيات الذاتية وتقدر تحقق شيء كويس، فاب لاب ده مثال رائع على ده، واﻷروع إنهم شغالين في مجال ملهوش تغطية كبيرة على المستوى العربي.


زيارة لمدينة السادات.
في نص الشهر اللي فات (أكتوبر)، قررت أزور بعض أقاربي اللي مزرتهمش قبل كدا، بطبيعة فروع كانت بتتجمع في بيت العائلة، لكن في بعض الأقارب مزرتهمش قبل كدا في بيتهم! ولإننا عائلة متفرعة ومتوسعة فموجودين في كل المحافظات تقريبا D: فكان عليا الاختيار من بين عدة مدن ومحافظات، فوقع الاختيار على مدينة السادات.

إدارياً مدينة السادات تبع محافظة المنوفية لكنها على طرف المحافظة فهي بتطل على طريق مصر اسكندرية الصحراوي، وده كان ممتاز جدا بالنسبة ليا، ركبت من موقف مصر اسكندرية في الهرم (مشعل) والموضوع مأخدش غير ساعة تقريباً.

مدينة السادات مدينة جديدة، بدأ العمل فيها أواخر السبعينات، مدينة جديدة متقسمة صح، مراعى فيها كل احتياجات، الشوارع الواسعة، المباني، المساحات الخضراء.

وأنا رايح مكنتش ناوي على بيات بصراحة لكن المدينة كانت رائعة بصراحة وأنا مشوفتش عمتي بقالي كتير جدا D:

للأسف الشديد مدينة السادات اهملت اهمال شديد من حيث جذب الكثافة السكانية المناسبة وجلب الاستثمارات الداخلية إليها، بعد شوية بحث لقيت إن عدد السكان في مدينة السادات (المدينة نفسها بدون المراكز التابعة ليها) بحسب الإحصاءات الرسمية لسنة ٢٠١١ ما يقترب من ٨٠ ألف شخص! (يبدوا إن الأرقام على ويكيبيديا قديمة جدا!) وده للأسف رقم صغير جداً بالنسبة لمدينة بقالها أكتر من ٣٠ سنة!

يعني هي حلوة جدا وصحية ورااااائعة، لكن للأسف مفيهاش سكان كتير! وبالتالي كل النشاطات اللي بتعتمد على الكثافة السكانية مش موجودة! أهل البلد منقسمين لتلات فئات، يا إما الناس اللي شغالين في المصالح الحكومة (المجلس المحلي، المستشفيات، المدارس ... إلخ)، ناس شغالين في الجزء الصناعي من المدينة، أو عدد قليل من الناس بيمارس نشاطات خدمية بسيطة (حلاق، بقال، إلخ).

طبعاً في اسطورة بتقول إن الرئيس السابق المخلوع مبارك مكانش مهتم بالمدينة عشان اسمها على اسم الرئيس الأسبق السادات! لكن في اعتقادي الشخصي الموضوع مكانش كدا، الموضوع يبدوا إن مدينة السادات في الأساس مدينة سكنية لسكن الطبقات الوسطى، مبارك وحاشيته كانوا بيدوروا على حاجات يبيعوها لرجال الأعمال، فلل، منتجعات، أراضي واسعة بأبخس الأثمان، وده مكانش متوفر في مدينة السادات خصوصاً إنها تبع محافظة المنوفية مش القاهرة أو الجيزة وما حولهما زي مدينة ٦ أكتوبر مثلا!

بعد زيارتي لمدينة السادات اعتقد إني محتاج أقرا أكتر في بناء المجتمعات العمرانية الجديدة وكيفية جذب الكثافة السكنية ليها.
عموماً ممكن أبقى أرجع اكتب في الموضوع دة مرة تانية إن شاء الله.


لاب توب جديد.
في يوم ٣٢\١٠\٢٠١٢ قبل عيد الأضحى بيومين، أخيرا وبعد طول تفحيص وتمحيص، وبعد تجربتي السيئة مع موقع سوق دوت كوم، وبعد ما وصلي جهاز منهم ومكانش هو نفس الجهاز اللي طلبته وتأخير كبير في وصول الطلب أصلا. نزلت اشتريت جهاز من مول البستان في وسط البلد.



استقريت على Lenovo IdeaPad Z580 - 20135 وإمكانياته كالتالي:
  • المعالج: Intel Core i5 3210M - 2.5G. - الجيل الثالث.
  • الذاكرة: ٦ جيجا DDR3.
  • الشاشة: ١٥.٦ بوصة.
  • بطاقة العرض:
    • مدمجة مع المعالج: Intel HD 4000.
    • خارجية: Nvidia GT 630M بذاكرة ٢ جيجا. (لاحظ أن هذا الكارت ينتج بثلاث معماريات Architecture، يأتي مع هذا الجهاز معمارية GF108 أي يعادل في الأداء GT 540M)
  • القرص الصلب: ٥٠٠ جيجا.
  • أشياء أخرى: وايرلس، بلوثوث، منفذ ذاكرة SD، ٤ منافذ USB منهم اثنين USB 3.0، منفذ HDMI.

الجهاز ممتاز مع لينوكس، حذفت وندوز تماماً من عليه وسطبت أوبنتو ١٢.١٠ ومستمتع جدا بالنسخة الجديدة.


الموضوع مخلصش على كدا، كان لازم يكون في مغامرة من نوع ما، في الحقيقة أنا مش بس حذفت وندوز من على الجهاز، إنما حذفت نظام لينوفو المدمج للحفظ الاحتياطي واستبداله بنظام مفتوح المصدر، المزيد من التفاصيل تلاقوها في المقال اللي كتبته في وادي التقنية: «تجربتي مع Lenovo Z580».


الذكرى السنوية التالتة.
في يوم ٦\١١\٢٠٠٩ أطلقت كتيب إلكتروني صغير عبارة عن أكتر من ٢٠٠ برنامج حر مفتوح المصدر لنظام وندوز، الكتيب كان عشان الناس اللي بتستعمل البرامج المكركة، بالإضافة لكونها حركة استباقية لاستخدام برامجيات متعددة المنصات وبالتالي يكون سهل الانتقال لأنظمة تانية غير وندوز (لينوكس على الخصوص)، ويعني لو كنت لسبب أو لآخر مضطر تستخم وندوز فعلى الاقل استخدم برمجيات حرة بتحترم حريتك مش بتقيدها.

كتيب «دليل البرامج الحرة مفتوحة المصدر لنظام وندوز» كمل عامه التالت من كام يوم.
بفكر إني أحدثه بس مش متأكد تماماً بخصوص توفر الوقت :(


مؤسسة أضف.
امبارح زرت لأول مرة مقر مؤسسة أضف للتعبير الرقمي العربي، وبالأحرى أول مرة أروح المقطم! يمكن أكون روحت أغلب المناطق اللي حوليها لكن المقطم نفسها ﻷ!

من كتر الهذي اللي الواحد بيشوفه ليل ونهار، شيء كويس إن الواحد يشوف ناس بتشتغل فعلاً وبتحاول تقدم شيء حقيقي مش مجرد كلام في الهوا.

كنت رايح أحضر مهرجان عن الرخص الحرة، كان يوم لذيذ، وعرفت هناك ناس لطيفة واتكلمنا في حاجات كتير. المكان نفسه ظريف وفعلاً يخلي الواحد يحب إنه يروح تاني.



كفاية كدا دلوقتي :-)

الاثنين، 29 أكتوبر، 2012

تدوينة سريعة

من وقت للتاني بحاول أجرب الحاجات اللي مش بحبها ....

لقيت الموضوع عادي؟ يبقى زي الفل يمكن أكون أنا نسيت مش بحب الحاجة دي ليه D:
لقيتني لسه متضرر منها، يبقى افتكرت أنا مكنتش بحبها ليه xD

ده بالظبط اللي حاصل معايا دلوقتي، قولت أجرب آيس كريم بالمانجا، وأجيب حجم كبير عشان الحجم الصغير كتير من الأوقات بيكون طعمه مضروب.

دلوقتي بس أنا افتكرت مش بحب أي مانجا مصنعة ليه! عمري ما حبيتها ... طعمها شنيع يا جدعان : (
المانجا متتاكلش أو تتشرب غير طازة!

الاثنين، 22 أكتوبر، 2012

تدوينة سريعة

تقريباً أنا مولود بدون بعض الشرائح في دماغي زي اللي عند كل الناس ... لسبب ما أنا عندي مشكلة في "التلاعب بالآخرين".

التلاعب بعقولهم، التلاعب بمشاعرهم، أو حتى التلاعب لمجرد التسلية، أي نوع من التلاعب بالآخرين بيعمل قفله في دماغي ...

سارينه كبيرة تفتضل تنور تطفي وتعمل صوت جامد جداً في دماغي إني لازم أوضح أي كلام أو أفعال أو اي حاجة صدرت مني ممكن تعلق اي شخص وتخليه يفهم سلوكي بشكل غير حقيقي.

بس الشيء المؤكد إن التلاعب بالآخرين ده شيء ممتع جداً وإلا مكانش كمية الناس دي بتقوم بيه! وبالتأكيد برده هو شيء سيئ جداً عشان ديماً نتائجه سيئة! سيئة جداً!

ده في حد ذاته شيء كويس، بس أنا مش فاهم هو ليه بيتم بشكل تلقائي كدا! آه افتكرت، إنها الشرائح الدماغية يا سيدي :-)

أكل صيني لأول مرة!


توثيقا للحاجات اللي بعملها يعني، امبارح كان يوم رائع آخر، الحمد لله :‑)

وفي أمل إن قائمة الحاجات اللي عاوز أعملها/أجربها/أروحها يخلص منها جزء كبير قبل نهاية السنة D:

شوفت صديق عزيز بقالي كتير فحت مشفتهوش ... لسه زي ما هو زي ما سيبه آخر مرة، ولد ملهوش حل p:

وعلى إيده أول مرة أجرب الأكل الصيني D:

أكلنا نودلز صيني باردة ذات نكهة قوية أوي كدا، سبب النكهة غالباً كان توم، خل أبيض مركز، بصل أخضر ... مش متأكد إذا كان طعمها حاد أوي ولا بس عشان كنت صايم وأول حاجة أكلها؟

بعد كدا توفو، أنا عندي خلفية عن التوفو بالرغم من إني مأكلتوش قبل كدا، لكن طعمه كان متوقع بالنسبة ليا، كان لذيذ جداً (وزي ما قولت داخل فيه فول صويا ... close enough :p)
توفو - ويكيبيديا

أخيراً، طبق رز بالخلطة كان لذيذ جداً برده، يتاكل لوحده كدا! كان ممتع جداً فعلاً.

أحسن حاجة في الموضوع إن المحل أصحابه مسلمين وبنتهم بتدرس في الأزهر كمان، يعني فمفيش قلق من حته مكونات الأكل (يعني مثلاً لما تعرف إن من ضمن الأكلات الصينية طبق اسمه "ماعز الأرض"، وبعدين تعرف إن ماعز دي ملهاش علاقة بالمعيز من قريب ولا بعيد وما هي إلا تدليع للـ "كلب" والطبق ده بيتعمل من الكلاب! فالموضوع مش متعلق بالاسماء فقط يعني D:)

الظريف كمان إن المحل ده أسعاره كويسة جداً ومش مبالغ فيها، وأهم حاجة حصلت على خبرة ممتازة في استخدام عصيان الطعام الصينية D: (كان نفسي أفهم ازاي بياكلوا الرز بالعصيان دي هههههه) .... أكيد هيكون في زيارة تانية.

أقطع دراعي لو كنت أعرف اسم المطعم ههههههه عشان مكتوب بالصيني D: لكن هو ناحية العباسية، محطة عبدو باشا.

وطبعاً مشينا حبة حلوين (يجي عشرتاشر كيلو كدا D:)
الأشد فعلاً إن النقاش اللي دار بينا والحاجات اللي اتكلمنا فيها خليتني أعيد النظر في عدد من الحاجات المهمة، حقيقي كان كلامه مفيد جداً بالنسبة ليا :‑)

وفي النهاية وأنا راجع عديت على ناس معرفة مشوفتهمش بقالي كتير، سلمت عليهم على السريع وهنيتهم بمناسبة العيد.

الحمد لله : )

الأحد، 21 أكتوبر، 2012

تدوينة سريعة

لسبب ما أنا دلوقتي افتكرت كل الفرص اللي مكانتش على مقاسي!

بحاول بس مدخلش في جدلية، هل الفرص دي مكانتش ليا أصلاً عشان هي مش على مقاسي، ولا مقاسها كان السبب الوحيد مكانتش تنفع ليا!

ماشي ... طالما ده مش هيفيد بحاجة دلوقتي، يبقى أنا لا أهتم على أي حال D:

تدوينة سريعة

امممممم ...
مازلت الدائرة صغيرة...

ده مش شيء وحش ومش شيء حلو، لكل عيوبه ومميزاته ... فعادي بقى :‑)

الخميس، 18 أكتوبر، 2012

كتيب - تحد من أجل حلمك

كتيب ظريف جداً كنت نسقته في أول ٢٠١١ (١٣\١\٢٠١١)

هو ترجمة كتيب مجاني لـ Anthony Fernando


تحد من أجل حلمك أو Dare To Dream
عبارة عن ١٠ مقالات لطيفة وممتعة والأهم مختصرة، بتحفزك وبتحاول تساعدك للوصول للنجاح، أو على الأقل نبذة عن النجاح :-)

الكتيب كان عبارة عن عمل جماعي في منتدى طلاب جامعة القاهرة، العبء الأكبر كان الترجمة، أ. هاجر عصام هي اللي قامت بالترجمة، أ. منة الله قامت بتصميم الغلاف، وأخيراً أنا قمت بتنسيق الكتيب وإخراجه في شكل PDF (باستعمال لينوكس وبرمجيات حرة مفتوحة المصدر!)

كتيب مش هياخد من وقتك كتير لكن متأكد إنك هتستمتع بيه وهتستفيد كمان :-)

لتحميل الكتاب: تحد من أجل حلمك - النسخة العربية.

الأربعاء، 17 أكتوبر، 2012

تخلص من إدمان الشاي، الآن!

مقال كتبته من سنتين تقريباً على مدونة الأخ عبدالله المهيري، كان وقتها محدد فترة لو حد عاوز ينشر عنده مقال مفيد بشرط عدم نقله في أي مكان قبل أسبوعين. لقيت إنها فرصة كويسة للكلام عن نقطة لطالما عانى منها كتير من الناس، وهي إدمان الشاي والقهوة!

ويا للعجب، كأني كاتب المقال الأسبوع اللي فات (مش هقول امبارح عشان كدا هبقى ببالغ فعلا D:) مع إني كتبته في ١٠\٢٠١٠ يعني من سنتين!

من فترة كبيرة كنت عاوز أنقل المقال ده عشان ظاهرة اختفاء المواقع، أعتقد من الكويس ديماً وجود المحتوى في مكانين على الأقل لسهولة الوصول إليه بالطرق الطبيعية (في طرق استثنائية زي جوجل كاش، وطبعاً المنقذ الأكبر، موقع أرشيف الرائع اللي بيوفر خاصية آلة الزمن Wayback Machine).

رابط المقال على مدونة عبدالله المهيري.

اتمنى تستمتعوا :-)

* * * * * * * *


الشاي ذلك النبات ذي الصيت الشائع في أرجاء العالم، الذي يعد من أكثر المشروبات انتشارا على مستوى العالم عموما والدول العربية خصوصا، له العديد من الفوائد لاحتوائه على العديد من مواد وعناصر تفيد الجسم، ومضادات الأكسدة التي تقي من الكثير من الأمراض، لكن هذا يتوقف على شربه بالشكل المناسب، فمهما كان الشيء مفيدا فإن الإكثار منه أو استعماله بشكل خاطئ سيؤدي إلى نتائج عكسية! لكن من الواضح أننا على المستوى العربي نبالغ في شرب هذا الشاي سواء من حيث الكميات أو من حيث الكثافة، وانتشار شرب الشاي أدى إلى حلوله مكان العديد من المشروبات الأخرى، واصبحت نسبة شرب الشاي للمشروبات الأخرى المفيدة أكثر من ٩٠٪ لصالح الشاي! الطريف أن هذا الوضع يمتد من الخليج للمحيط، لكن في المشرق يشربون الشاي الأسود (يسمى أيضا الشاي الأحمر) وفي المغرب يشربون الشاي الأخضر، وفي كِلا الحالتين نشربه بطريقة مبالغ فيها وخاطئة!

لن اتكلم هنا عن الفرق بين أنواع الشاي، وكون الشاي الأسود والأخضر هما من نفس النبتة لكن الأول يتعرض لعملية تخمر بخلاف الثاني، ولن اتكلم عن جمال الجبال المكسوة بشجيرات الشاي في الهند وماليزيا، لن اتكلم حتى عن فوائد الشاي حيث إن للشاي فوائد كثيرة معروفة، ولكن كأي مادة له سلبيات أو أضرار جانبية خصوصا إذا شُرِب بشكل مبالغ فيه، مثل التأثير على الكلى، الإمساك، التأثير على امتصاص بعض العناصر النافعة مثل الحديد والكالسيوم. ومع أسلوب الحياة الحديث الذي يفتقر إلى الطعام الصحي والوجبات الغذائية المتكاملة، تتضاعف أضرار الشاي بشكل واضح.

تتعد السلوكيات الخاطئة في شرب الشاي، فبعض الناس يشرب كميات كبيرة من الشاي يوميا، شخصيا لي أحد الأصدقاء كان يشرب ما بين ستة إلى ثمانية أكواب من الشاي يوميا، وانتهى به الحال بمشاكل في البواسير بسبب الإمساك واضطر لعمل عملية لعلاج البواسير (صدقني لن تحب تجربة أي علاج للبواسير!) وهناك من يبالغ في غليه مما يؤدي إلى إطلاق مادة تسبب الإمساك.

كذلك من السلوكيات الخاطئة في شرب الشاي هي شربه ثقيل جدا، فتجد الكثير من الناس يشربون شايا كالحبر! بل أعتقد أنك إذا وضعت مصباحا كهربائيا في منتصف كوب الشاي لن ترى ضوءه من الناحية الأخرى!

أيضا لربما سمعت عن الأشخاص الذين يعانون من الصداع الشديد بسبب عدم شرب جرعات الشاي التي اعتادوا عليها كل يوم، وأصبح لديهم أختيار من اثنين، إما أن يشربوا الشاي وإما أن يشربوا المسكنات. ويظهر هذا بشكل واضح في شهر رمضان حيث يكون الامتناع عن الطعام والشراب لفترة طويلة نسبيا، مما يجعل للمسكنات حصة أساسية ضمن وجبة السحور!

أخيرا، بالنسبة للكثير، أصبح الشاي أكثر من مجرد مشروب، وشربه أكثر من مجرد عادة! قد لا يكون إدمانا بالمعنى الدقيق للإدمان طبقا لمنظمة الصحة العالمية، ولكنه أضحى قريب جدا من الإدمان، والعديد من الأشخاص لا يستطيعون القيام بمهامهم اليومية دون شرب عدد معين من أكواب الشاي! فإذا كنت تشعر أنك تشرب الشاي بشكل مبالغ فيه، أو أنك لا تشرب سوى الشاي، فكر من جديد، يوجد العديد من المشروبات الأخرى مفيدة جدا لجسمك، وهذا المقال سيساعدك في التخلص من شرب الشاي -بل وأي مشروب آخر- بشكل مبالغ فيه.

وأحب التذكير، أن الغرض من هذا المقال ليس الامتناع عن شرب الشاي لأن الشاي له فوائد كثيرة، إنما هو للإقلال من شرب الشاي والتذكير بمشروبات أخرى لا يشربها الكثير بالرغم من فائدتها.

استراتيجيات التخلص من الإكثار من الشاي
في البداية لابد الحديث عن الاستراتيجية رقم "صفر"! وهي استراتيجية عامة لكنها أهم الاستراتيجيات على الإطلاق! نتكلم هنا عن الإرادة، أي تغيير مهما كان بسيطا يحتاج إرادة قوية، حل أي مشكلة في العالم يحتاج في المقام الأول لإرادة وعزيمة، إذا فشلت في التعامل مع مثل هذه المشكلة الصغيرة في حجمها، الكبيرة في أثرها، فلا تسأل بعد ذلك لماذا تفشل في أشياء أكثر أهمية، أو حتى مصيرية! عوّد نفسك دائما أن تتعامل مع كل المشاكل، من أصغرها لأكبرها، بل الأصغر أولا لكي لا تتفاقم أو تتراكم، فالجبال تتكون من مستصغر الحصى!

نرجع لمرجوعنا :)

توجد ثلاث استراتيجيات بسيطة للتخلص من هذه المشكلة، وهم بالترتيب التخفيف، التنكيه، التغيير، أو كما أحب أن أسميهم "٣ت".

١. التخفيف.
يعتبر التخفيف وسيلة جيدة كبداية للأشخاص الذين يشربون الشاي ثقيلا بشكل مبالغ فيه، يجب ألا يكون الشاي ثقيلا جدا وإذا كان كذلك فيجب أن يكون في حدود نصف الكوب العادي.

بكل بساطة هذه الاستراتيجية تقوم على وضع كمية أقل من الشاي، فقط قلل كمية صغيرة جدا كل مرة، يمكن أن تتبع هذا الأسلوب كل يوم أو كل يومين، لكن المهم أن يكون التغيير بسيط. على نهاية الأسبوع الأول ستجد أن الشاي مازال قريب من لونه الذي اعتدت عليه، لكن في الأسبوع الثاني ستجد تغير، ولكن من ناحية أخرى لن تشعر بيه بشكل واضح لأنه تم تدريجيا.

وفي كل الحالات يجب ألا يكون الشاي ثقيلا جدا، يفضل أن يكون لونه فاتح وليس قاتم، فحتى إذا لم تكن تشرب الشاي كثيرا، فاجعل المرات التي تشربه فيها أكثر فائدا وأقل ضررا.

٢. التنكيه.
الاستراتيجية الثانية، هي التنكيه، أي إضافة نكهات أخرى للشاي. يوجد العديد من النباتات الأخرى التي يمكن مزجها بالشاي لتعطي طعم مميز للشاي بالإضافة لفائدها، سواء كنت تريد التخلص من الإكثار من شرب الشاي أو حتى سئمت من طعم الشاي الصرف، فجرب إضافة نكهات للشاي!نظريا يمكن إضافة أي شيء للشاي! يمكن أن تجرب إضافة أي نبات آخر كنكهة إضافية للشاي، لكن يوجد بعض النكهات شائعة ومستساغة أكثر من غيرها، أهم هذه النكهات هي كالتالي:

قرفة، قرنفل، نعناع، ليمون، زنجبيل، حليب\لبن، ينسون، شمر\شمار، كراوية، مرمرية، حبهان\هيل.

٣. التغيير.
كما ذكرت سابقا، يعتبر الشاي من أكثر المشروبات انتشارا، واحتل مكان العديد من المشروبات الأخرى والتي لا تقل فائدا عن الشاي؛ لذا اعط لنفسك فرصة للتعرف على الشروبات الأخرى خلافا للشاي.

بالتأكيد لا أحثك على الإقلال من الشاي لتذهب لبنت عمه القهوة أو ابن أخيه النسكافية، بل لأشياء أروع مثل التي استعملتها نكهات للشاي (قرفة، قرنفل، نعناع، ليمون....) فهم في الأساس يشربون بشكل مستقل، هل جربت من قبل مشروب القرفة؟ وما رأيك في الحليب بالقرفة؟ (طعمه رائع جدا، نصيحه جربه!) الينسون؟ الحلبة؟ كمون؟ وماذا عن المشروبات الباردة؟ عصائر الفاكهة؟ مخفوق الزبادي بالفواكه؟ لمونادة، كركديه، خروب، عرق سوس؟ أو حتى هل جربت الشاي المثلج؟ الطبيعة مليئة بالعديد من الأشياء المفيدة لصحتك فلا تحرم جسمك منها :)

إذا كنت في المشرق ما رأيك في تجربة الشاي الأخضر على الطريقة المغاربية؟ وإذا كنت في المغرب العربي ما رأيك في تجربة الشاي الأسود مع النعناع أو القرفة؟

ملاحظات عامة.
  • قالوا قديما: “مازاد عن حده انقلب ضده”، فأي شيء مهما كان مفيدا إذا أُفرط في استخدامه سيكون ضرره أكثر من نفعه؛ لذا عليك الاعتدال والترشيد في كل شيء، خصوصا ما يدخل جسمك، وليس معنى أنك تشرب مشروبات طبيعية أن ليس لها ضرر! فأولا وأخيرا كل نبات يحتوي عناصر كيميائية مختلفة، فالإكثار من شيء ما يعني زيادة هذه العناصر في جسمك عن المطلوب،  وهذا ملا تريده بالتأكيد.
  • احرص على شرب قدر كافي من الماء كل يوم، فالماء أفضل وسيلة للتخلص من السموم في جسمك، ويساعد على قيام الكليتين بوظائفهما. الكثير من الأشخاص لا يشربوا كفايتهم من الماء في الشتاء بسبب الطقس البارد، فتأكد من شرب القدر الكافي خصوصا في الشتاء حيث أن حر الصيف سيجبرك على الشرب. لكن تذكر ألا تفرط في شرب الماء.
  • احرص كذلك على ممارسة الرياضة بشكل منتظم اثناء الأسبوع، أبسط شيء خصص بعض الوقت للمشي، لكن راعي ارتداء ملابس وحذاء مناسب أثناء المشي، كي لا تتحول جلسة الرياضة لجلسة تعذيب. أيضا ركوب الدراجات الهوائية من الأشياء الرائعة جدا.
  • إذا كان لا قدر الله لديك أحد الأمراض المزمنة مثل القلب أو الضغط، يجب عليك استشارة الطبيب بخصوص المشروبات التي يمكنك شربها، فبعض المشروبات بها مواد قد تزيد من المرض، أو تتفاعل سلبا مع الدواء الذي تتناوله.
  • أيضا إذا كنت تستعمل نظام تشغيل مليء بالفيروسات والبرامج الخبيثة، أو كثير التعليق مما يزيد من توترك وبالتالي تشرب الكثير من الشاي والقهوة يوميا فقط لتستطيع التعامل مع نظام التشغيل الممل هذا، ربما عليك أن تجرب نظام التشغيل الرائع جنو\لينُكس فهو سريع التطور، حر مفتوح المصدر، مستقر وآمن، ولا يوجد به فيروسات وقابل للتخصيص بشكل ممتاز. أو ما رأيك بتجربة البرمجيات الحرة مفتوحة المصدر على نظام وندوز؟ هذا سيساعد أيضا. نعم نعم، هذه مجرد دعابة لا أكثر D:، لكن البرمجيات الحرة مفتوحة المصدر تستحق التجربة، فجربها ;)
الخلاصة.
إذا كنت تكثر من شرب الشاي أو تشرب الشاي فقط، فابدأ بتنكيه الشاي وجرب مشروبات أخرى لذيذة ومفيدة لجسمك، عندما تشرب الشاي اشربه بالطريقة الصحيحة لا تشرب الكثير من الأكواب في اليوم الواحد، لا تجعله كثيفا ضع كمية قليلة من الشاي، لا تغليه انما استعمل اسلوب النقع وهو اضافة الماء المغلي إلى الشاي الجاف.

احرص على شرب القدر الكافي من الماء خصوصا في فصل الشتاء، مارس الرياضة بانتظام، ابسط شيء رياضة المشي أو ركوب الدراجات الهوائية.

أخيرا، بالرغم من اني تحريت اكبر قدر من الدقة بخصوص المعلومات الواردة بهذا المقال، وبالرغم من كون المقال لا يحتوي أي علاج أو وصفات طبية، لكن يجب التأكيد على أني لست طبيبا أو متخصصا، كل ما في هذا المقال عبارة عن معلومات ونصائح عامة ليس أكثر.

مصدر الصورة: ويكي كومونز. المقال مرخص تحت رخصة الابداع المشترك: النسبة للكاتب، أي لك مطلق الحرية في نشر، نقل وبناء نسخة مشتقة من الموضوع، بشرط الاشارة إلى الكاتب الأصلي.

Creative Commons License
(Creative Commons — Attribution 3.0)

ودمتم بألف صحة وعافية، محبكم أحمد م. أبوزيد :)


الثلاثاء، 16 أكتوبر، 2012

تدوينة سريعة

من فترة كان في حد على النت بيقول حاجة زي: مفيش حد بسيط أو سهل، مفيش حد أهبل اليومين دول.

جه في بالي ساعتها إن أكيد في ناس كتير عايشين الحياة ببساطة كدا، مش دماغهم شغاله عمال على بطال، مين قال، ومين جاب، ومين عمل، ومين سوى. ويقعدوا يفكروا وعقلهم يجيبهم ويوديهم ... وكله على الفاضي!

بس مؤخراً اكتشف ربما أكون أنا الأهبل الوحيد اللي لسه عايش في هذا العالم.
بس على الأقل أهبل وسعيد، بدل مش أهبل وتعيس :-)

الاثنين، 8 أكتوبر، 2012

سيرتي الذاتية حتى ٦\١٠\٢٠١٢

سيرتي الذاتية لحد الآن، شغل ٢٤ ساعة كدا D:
تظبط موقع، كتابة المحتوى، تظبيط الـ css، وحتى عمل لوجو على السريع كدا D:
لقيت نفسي كدا كدا هحدث الرزيوم بتاعتي وكنت عاوز أعمل صفحة بيها بدل جوجل دوكس والكلام ده.

هي مش للشغل على قد ما هي بتقدم نظرة عامة ... اكتشفت بعدها إن لسه في حاجات كتير عاوز أعملها في الدنيا دي، خصوصاً الحاجات اللي بنيت ليها أساس كويس وفاضل الأجزاء الظاهرة، أو بمعنى أصح التفنيش بتاعها :-)

وده يخليني محتاج فعلاً تحديث الخطة الخمسية، حاجات كتير بقت أقرب مما أتصور وحاجات لسه هتحتاج وقت زيادة ... فيا رب مموتش خلال خمس سنين D:

وزي كل مرة بكتب كود، بعمل فيه افتكاسات وأقول بعدين هنضفه ... وبعدين ده ساعات كتير مش بيجي D:
كمان عاوز أبقى أشوف صورة رسمية أكتر من الحالية.

الحمد لله :)

أحمد م. أبوزيد - سيرتي الذاتية.


الجمعة، 5 أكتوبر، 2012

تدوينة سريعة

لم لاترّقُ المليحةُ؟

- عمرو صبحي.

:-)

الأربعاء، 26 سبتمبر، 2012

تدوينة سريعة

(وإن أصابك شيء فلا تقل: لو أني فعلت كان كذا وكذا، ولكن قل: قدر الله، وما شاء فعل؛ فإن لو تفتح عمل الشيطان) - حديث شريف.

فإن "لو" تفتح عمل الشيطان :-)

الأحد، 23 سبتمبر، 2012

إطلاق كتاب "أردوينو ببساطة"

من فترة قريبة لقيت واحد معرفهوش باعتلي رسالة بيقولي إنه قرأ كتابي "أوبنتو ببساطة" وعجبه ... ماشي لحد كدا ده عادي من أول ما الكتاب نزل وأنا بستلم رسايل زي دي كتير D:

الموضوع مخلصش على كدا!
الشيء اللي مكانش عادي بقى إنه عمل كتاب عن واحد من تطبيقات Open Hardware متحكم دقيق قابل للبرمجة (single board microcontroller) وهو "أردوينو" وسماه بنفس الأسلوب! "أردوينو ببساطة"

الكتاب جميل فعلاً ومش أي كلام، بسيط وسلس، وبيغطي موضوع تغطيته قليلة على المستوى العربي، وكمان يخلي أي واحد ميعرفش أي حاجة عن الميكرو كنتلرولرز بعد ما يخلص الكتاب (وهو صغير بالمناسبة، أقل من ٢٠٠ صفحة) يكون عنده خلفية ممتازة عشان يقدر يخوض في مواضيع أكتر تقدماً بعد كدا.

كتبت مراجعة سريعة عن الكتاب على موقع وادي التقنية، تفاصيل أكتر على:
إطلاق كتاب "أردوينو ببساطة"!‏ - وادي التقنية.

وده كان الغرض الرئيسي من كتاب أوبنتو ببساطة، إني مكونش مجرد "بوء" تاني من اللي موجودين في البلد، اللي بيتكلموا أكتر ما بيعملوا! ويفضلوا طول حياتهم يسبوا الظلام ولا في يوم ولعوا عود كبريت حتى! إني بدل ما أقعد أضيع وقتي في الهراء (النت مليان trolls وهراء كتير ملوش أي قيمة!) أعمل حاجة مفيدة تفيد الناس!

ده فعلاً من الحاجات اللي أسعدتني كتير مؤخراً، الحمد لله :)

شكراً يا عبد الله :)

السبت، 22 سبتمبر، 2012

خطوط عربية حرة مفتوحة المصدر


من فترة كتبت على فيس بوك بعض أسماء الخطوط العربية القابلة للاعتماد عليها فعلاً واستخدامها في بيئات انتاجية. ونظراً لإن الفيس بوك زي أغلب الشبكات الاجتماعية اللي موجودة حالياً لا يمكن الاعتماد عليه في جزئية المحتوى، لإن الحسابات ممكن تتقفل في أي لحظة!

المهم، دي الخطوط الحرة مفتوحة المصدر اللي بستعملها بشكل مستمر:


ممكن نقسم الخطوط لنوعين، الأول خطوط كلاسيكية (نسخ، رقعة، فارسي ... إلخ) وخطوط حديثة (بشكل أساسي مش بتتبع أي مدرسة من مدارس الخطوط الستة الأساسية).

خطوط كلاسيكية:

Amiri Font / KacstOne 5.0 / Scheherazade / Lateef / Droid Arabic Naskh / Nafees (Naskh/Nastaleeq/Riqa) / Farsi Fonts 0.4 /
UthmanTN1 v0.10 (مش حر لكن مجاني)


خطوط حديثة:

Ubuntu Arabic Font (خطي المفضل، بس غالباً مش هتلاقي لينك تحميل ليه لإنه لسه بيتا، هبقى أجيب لينك ليه بعد كدا)
Droid Arabic Kufi (Arabic)
KufyanArabic (مش حر لكن مجاني).



طبعاً مفيش مشكلة بالنسبة للخطوط الإنجليزية مفتوحة المصدر، أو حتى المجانية لإنها بالمئات!
لكن من الخطوط الإنجليزية الحرة المفضلة عندي هو خط Droid Serif

إذا كنت تعرف خط حر مفتوح المصدر سواء عربي او إنجليزي قولي عليه :-)

الله نور السماوات والأرض.



اللَّهُ نُورُ السَّمَاوَاتِ وَالْأَرْضِ ۚ مَثَلُ نُورِهِ كَمِشْكَاةٍ فِيهَا مِصْبَاحٌ ۖ الْمِصْبَاحُ فِي زُجَاجَةٍ ۖ الزُّجَاجَةُ كَأَنَّهَا كَوْكَبٌ دُرِّيٌّ يُوقَدُ مِنْ شَجَرَةٍ مُبَارَكَةٍ زَيْتُونَةٍ لَا شَرْقِيَّةٍ وَلَا غَرْبِيَّةٍ يَكَادُ زَيْتُهَا يُضِيءُ وَلَوْ لَمْ تَمْسَسْهُ نَارٌ ۚ نُورٌ عَلَىٰ نُورٍ ۗ يَهْدِي اللَّهُ لِنُورِهِ مَنْ يَشَاءُ ۚ وَيَضْرِبُ اللَّهُ الْأَمْثَالَ لِلنَّاسِ ۗ وَاللَّهُ بِكُلِّ شَيْءٍ عَلِيمٌ - الآية ٣٥ / سورة النور.

-------------

المكان: جامع السلطان حسن
تصوير: أحمد فتح الباب. (انا معرفش هو مين)
مواقع للحصول على نص القرآن الكريم:

١. القرآن الكريم: مشروع المصحف الإلكتروني بجامعة الملك سعود.
٢. المصحف الجامع: تفسير - تجويد - تراجم - قراءات - بحث.


الاثنين، 17 سبتمبر، 2012

علّب أحلامك!

من حوالي أسبوع، اكتشفت حاجة مهمة جداً! يمكن تكون أحد أسباب الضغط الزائد، أو الاحباط، أو حتى التعاسة!

في بعض الأحيان بيكون عند الواحد أحلام أو أهداف معينة، لكن لسبب ما مش هيقدر يحققها في الوقت الحالي، هي مش مستحيلة وقابلة للتحقيق بس زي ما قولت لسبب أو لآخر مش هتتحقق دلوقتي.

للأسف طول ما الحاجة دي حاضرة في ذهنك، وطول ما هي عماله تتنطط قدام عينك هتفضل تعملك صداع! ليه؟ عشان إنت بتشوفها في كل حاجة قدامك! كل حاجة في بتعملها! في كل فرصة وكل شخص وكل شيء تقابله في حياتك! وده بيعمل عليك ضغط ملوش نهاية.

الحل؟ من الحاجات البليغة جداً اللي قريتها الكام يوم اللي فاتوا دول: «إنَّ النَّفسَ متَى يئِسَتْ منَ الشَّيءِ استراحَتْ منه» (أعتقد إنها لابن القيم).
في حل بسيط جداً جربته على مدار الأسبوع اللي فات، بالتأكيد التخلي عن حلمك ده مش أحد الخيارات! كل ما عليك فعله إنك "تعلّب أحلامك!" علّب أحلامك يعني حطها في علب جميلة وأنيقة، واقفل عليها وحط العلب دي في مكان أمين، إحرص كل يوم إنك تبص على العلب دي وتنضفها وتشيل أي تراب عليها وتحافظ عليها، بس من غير ما تفتحها :)


بكدا هتتجنب كتير من الصداع، وتقدر تركز في حاجات تانية، بعدين لما تيجي الفرصة "المناسبة" تقدر تطلع حلمك وتستمتع بيه بدل ما يكون مصدر للتنغيص عليك :)

بالنسبة للناس اللي مش بتحب الكلام المنمق أوي ده، خلاصة الموضوع، حاول تركن الأحلام أو الأهداف اللي مش هتقدر تحققها دلوقتي، وبطل تدور على الفرص اللي ممكن تحقق هدفك لو إنت عارف إنك مش هتقدر تحققه دلوقتي لإن كل ده بيزيد من التشويش والضغوط عليك. وده عن تجربة فعلاً، أنا الآن أكثر راحةً وتركيزاً :)

بس كدا :)


-----
مصدر الصورة: Apartment Therapy | The Kitchn

تدوينة سريعة

يخرب بيت الجمودية يا أخي :-)

«عن التي لا أمل من انتظارها ولا تكف عن الغياب.»

- عمرو صبحي.

الجمعة، 7 سبتمبر، 2012

CT غير تصميمه!

أي واحد يعرف موقع css-tricks.com أكيد كان يعرف الضفدعة الشهيرة بتاعته D:

كان راسم وش ضفدعة بـ css (من غير أي صورة) وكانت كمان response يعني بيتغير شكل الوش مع تغير حجم المتصفح أو الجهاز اللي بتشوف منه الموقع.

امبارح غير التصميم بتاع ... ناس كتير (أنا واحد منهم) سابوا التصميم الجديد وبيسألوا على الضفدعة ههههههههههههههههه DDDDDDDDDDD:

أشد حاجة في الموضوع إن التصميم الجديد مش مستخدم فيه غير ٣ صور بس! وكل حاجة تانية عاملها بـ css! حتى الأيكونات عاملها بـ css مش صور! (عن طريق فونت طبعاً).

التصميم ده النسخة رقم ١٠ ... وهنا شكل التصميمات القديمة.

ومفيش غير إننا نقول ... حرام عليك يا كريس وديت الضفدع فين D:


الاثنين، 3 سبتمبر، 2012

تدوينة سريعة

ما عادَ يفيدُ الانتظار :)

الجمعة، 31 أغسطس، 2012

كل قرار في آخر سنتين!

شيء لاحظته مؤخراً، إفري سنجل قرار في آخر سنتين!

الشيء الجيد إني بوصل للنتيجة في النهاية، الشيء السيء إني مش بوصل من أول مرة وغالبا النتيجة مش بتكون المطلوبة من الأول.

الشيء الأسوء بقى، إن في حاجات مينفعش تكون غير من خطوة واحدة، بعد كدا بتفقد معناها.

في بعض الاحيان بسأل ليه مش من مرة واحدة ونخلص؟ ... له في ذلك حكم :)


السبت، 25 أغسطس، 2012

على مفترق الطرق

من حوالي أربع سنين تقريباً، عملت ما يسمى بالسوات أنالسز SWOT Analysis
هي طريقة تحليل غالباً بتستعمل في تحليل حاجات تبع الأعمال ... مثلاً مشروع جديد، شركة جديدة، صفقة جديدة!

SWOT هي اختصار لأربع كلمات (Strengths - Weaknesses - Opportunities - Threats)

Strengths
نقاط القوة وهي حاجة مستمدة أو صادرة من من موضوع التحليل نفسه.
Weaknesses
نقاط الضعف، وبرده مستمدة من موضوع التحليل نفسه.
Opportunities
الفرص، مميزات لكن من الخارج يعني مش من موضوع التحليل.
Threats
االتهديدات، عيوب وبرده من الخارج مش مستمدة من موضوع التحليل.

SWOT analysis - Wikipedia, the free encyclopedia


فعلياً هي مش مقتصرة على البزنس، إنما هي ببساطة ممكن استعمالها في تحليل أي حاجة تقريباً، وعليه هي بتستعمل كمان في تحليل الشخصية.

من أربع سنين تقريباً جربت أعمل الموضوع ده، ببساطة بتعمل محورين سيني وصادي (س،ص)، زي بتاع الرسوم البيانية، ساعتها ركزت على نقاط القوة ونقاط الضعف، بتعمل رسم لكل واحد. (طبعاً من الناحية الإحصائية ممكن نخليهم في رسم بياني واحد، لكن تسهيلاً بنعملهم منفصلين). االمحور السيني (الأفقي) بيكون الخطورة أو الأهمية، والمحور الصادي (الرأسي) بيعبر عن القوة.

يعني ممكن يكون في خاصية أو عادة معينة في الواحد مهمة جداً لكن سهل جداً ميعملهاش أوي أو مش بيقوم بيها كتير، مثلاً زي وجبة الفطار! مهمة جداً لكن ناس كتير بتنفضلها! وعلى العكس ممكن تكون عنده عادة سيئة جداً لكن التخلص منها محتاج وقت كبير جداً! مثلاً زي التدخين!


كل ما بتبقى دقيق وصادق مع نفسك، كل ما التحليل بيطلع صح! عشان كدا العبرة مش بالتحليل نفسه إنما بالمعطيات اللي بتغذيه بيها. والحمد لله قدرت في الاربع سنين دول أزود وأصقل كتير من مميزاتي، وأتخلص من عدد أكتر من عيوبي أو على الأقل أحطها في حدها الأدنى. قدرت أواجه أغلب مخاوفي واللي -ويا للعجب يعني!- اكتشفت إنها أصغر مما كنت أتوقع بكتير!

في كذا مشكلة كنت شايف إنهم محتاجين وقت مش أكتر، يعني مهما حاولت أحل فيها ساعتها مكنتش هوصل لنتيجة! وفعلاً الحمد لله ده كان صح، ويادوبك لسه متخلص منهم من فترة قريبة :-)

دلوقتي أنا عندي ثقة بنفسي أكتر من أي وقت عدى، اتعلمت حاجات كتير، زودت قدراتي واتخلصت من كتير من نواقصي، ومريت ببعض التجارب اللي ممكن نقول عنها "أساسية" قبل الدخول للمرحلة اللي بعدها ... دولوقتي بقيت جاهز لمرحلة تانية تماماً.

أد إيه حاجات صغيرة قادرة إنها تخليك تفكر بعمق كبيييير جداً، وتخليك تقرر إن في حاجات محتاجة إعادة نظر فيها! وحاجات محتاج تتخلى عنها!

من كام سنة مثلاً كنت بقول إن في حاجات كتير لا يمكن أعملها لإنها مش مناسبة ليا! مثلاً لا يمكن إني أشتغل في التسويق أو المبيعات! لإني كنت شايف إنه مش مناسب ليا، أو بالأحرى أنا اللي مش مناسب ليه ومعنديش القدرات اللازمة لإني أكون كوالفيد ومتميز فيه!

كل ده اتغير! حاجات كتير -جداً!- اتغييرت في الكام سنة اللي فاتوا دول، يمكن ده طبيعي خصوصاً في العمر ده، أو حتى بالنسبة للبني آدم بشكل عام، بس كل ده ميهمنيش! اللي يهمني دلوقتي حاجة واحدة!


دلوقتي أقدر أقول إني على مفترق الطرق.
الحمد لله على كل شيء :-)

تدوينة سريعة

يوم جميل آخر .... الحمد لله :-)

ومعنديش غير إني أقول على رأي الست فيروز ...

"إيه في أمل" : )

الجمعة، 24 أغسطس، 2012

فرس النبي

مش عارف إذا قولت ده قبل كدا ولا ﻷ! لكن واحد من أكتر الحشرات المفضلة عندي هو حشرة "السرعوف" أو زي ما بنسميه في مصر "فرس النبي"!

في الانجليزية بيسمى Mantodea أو mantises أو mantii أو Praying Mantis لإن شكله بيبقى عامل زي الشخص اللي بيصلي/بيدعي في الكنيسة.


وده مش بس كائن ظريف وكيوت D:
لكن كمان مفيد جداً في التخلص من العديد من الحشرات الضارة لإنه بيتغذى عليها.

كنت بستمتع بإني أمسكه وأنا صغير D: (ومازلت D:)

معلومات أكتر عنه:

فرس النبي (حشرة) - ويكيبيديا، الموسوعة الحرة
Mantis - Wikipedia, the free encyclopedia


وكمان في منه نوع متحور بيشبه الورق اسمه يعسوب الورقة الميتة Dead leaf mantis، مثال تاني رائع في تخفي:

Dead leaf mantis - Wikipedia, the free encyclopedia
Dead Leaf Praying Mantis - Deroplatys desiccata.


وهنا قايمة بأشكال وأنواع فرس النبي المختلفة:

List of mantis genera and species - Wikipedia, the free encyclopedia




أخيراً ألبوم فيه بعض الصور الظريفة ليه D:



الخميس، 23 أغسطس، 2012

مقياس شدة حرارة الطعم الحار.

مقياس سكوفيل لقياس شدة حرارة الطعم الحار (الحراق/الحريف) زي اللي في الفلفل والشطة DDDDD:

Scoville scale - Wikipedia.

بس قشدة يعني طلعت عارف كام نوع ابن ناس ... هالبينيو وتاباسكو وتاي تشيلي ^_^
أنا نفسي ألاقي محل زي اللي في الصورة دي D:


الثلاثاء، 21 أغسطس، 2012

العيد الرائع السعيد! ١٤٣٣.

أنا قولت من الأول دول أفضل رمضان وعيد عدوا عليا من خمس سنين تقريباً!

امبارح كان يوم خزعبلي بهبل! من أشد الأيام في حياتي فعلا!
عملت كمية حاجات وقابلت كمية ناس رجعوني بالزمن مابين ٦ لـ ١٢ سنة! وحصلت كمية حاجات في اليوم ده!

ناس بقالي كتير جداً مشفتهمش وناس بقالنا كتير متجمعناش مع بعض بالشكل ده وبالروقان ده من فترة كبيرة جداً!
ضحكنا لحد الثمالة، فرحنا لحد الثمالة، استمتعنا لحد الثمالة ... وحتى أكلنا لحد الثمالة D: ... (والأكل كان جااااااامد فحت!)

أنا أكيد شخص سعيد :-)
حقيقي الحمد لله على نعمه الكتير ... الحمد لله :-)

الأحد، 19 أغسطس، 2012

شل سكربت باستخدام Case.

تقريباً أنا وقعت في حب الشل السكربتنج D:
امبارح كتبت سكربت بسيط خالص -وبدائي خالص برده D:- بقالي يومين منشكح وليا مزاج أعمل حاجة جديدة انهارده، فقولت اكتب شوية عن السكربت ده (وﻷ مش ناوي أستمر في الكتابة اللي من النوع ده، مجرد تغيير ليس إلا) وبكره العيد يعني ده وقت المرح :-)

متأكد إنه ممكن يتحسن عن كدا، وكمان أكيد في طرق تانية تؤدي نفس الغرض، بس أنا وصلت للطريقة دي ... على قدي يعني :-)

السكربت بيقوم بالتحقق من تاريخ اليوم وينفذ أمر معين إذا جه التاريخ ده ... إزاي يعني؟
طيب نبدأ مع الحكاية الافتراضية :-)

* * * * *

عباس عنده تلات عيال، شادي وفادي وهادي D: مشكلة عباس مع عياله بسيطة جداً وفي نفس الوقت رخمة جداً! المشكلة هي إن عياله مش بتنضف الأوض بتاعتها بانتظام، وبالتالي أمهم هي اللي بتشيل الليله وتكون مضطرة للتعامل مع ٣ غرف لـ ٣ مراهقين! وما أدراك ما الشباب المراهقين!

فراح عاملهم جدول شهري وحدد فيه أيام معينه، كل واحد منهم - اللي هم شادي وفادي وهادي D:- يقوم بتنضيف غرفته فيها، بس الأيام دي مش زي بعض كل شهر، يعني فادي ممكن ينضف الشهر ده يوم ٣ والشهر اللي بعده يوم ٧ والشهر اللي بعده يوم ٢٧! وهكذا فالجدول ده بيتغير كل شهر.


شهر في التاني في التالت، الغرف لسه زي ما هي! شادي وفادي وهادي D: كانوا ديماً بيقولوا لأبوهم إنهم نسيوا اليوم اللي عليهم يقوموا فيه بتنضيف الأوض بتاعتهم!

اممممم إيه العمل؟ عباس صاحبنا ده كان كمبيوتر جيك (Geek) ومبياكلش معاه الكلام ده D:
عباس راح عمل إيه بقى؟ كتب برنامج صغير (سكربت) بلغة شل (Shell Script)، اللي هي موجودة بشكل أساسي في كل أنظمة اليونكس/اللينوكس. عباس عنده سرفر عليه الموقع بتاعه في ألمانيا، وبطبيعة الحال السرفر ده شغال ٢٤ ساعة وبالتالي هو مكان مناسب جداً عشان يحط عليه السكربت بتاعه بحيث يضمن إن جهاز الكمبيوتر (السرفر) ديما شغالً عشان يشغل السكربت اللي كتبه.

المشهور في شل سكربت لما حد يجي يتحقق من قيمة أو حاجة معينة بيستخدم قاعدة IF، لو كذا حصل، إعمل كذا لو محصلش إعمل كذا ... مثلاً لو انهاردة يوم ١٨ في الشهر ابعت إيميل للعنوان الفلاني، أبسط شكل لقاعدة IF في الشل سكربت بتكون بالشكل ده:
if [ الشرط ]
 then
       في حالة تحقق الشرط نفذ أمر معين
 else
       في حالة عدم تحقق الشرط نفذ أمر تاني
       (أو ممكن مينفذش حاجة)
fi
لكن للأسف في الحالة اللي عندنا دلوقتي مش مناسبة مع IF، بالرغم من إننا ممكن نستعمل IF لكن هنضطر نكرر أجزاء كتيرة على الفاضي، ليه؟ عشان في كذا شرط (كل واحد من أولاد عباس ليه كذا يوم في الشهر مش يوم واحد)، وفي كذا فعل (أمر معين يتنفذ لكل ابن من أبناء عباس)

عشان كدا عباس استخدم تركيب تاني في الشل سكربت وهي case، الشكل البسيط لـ case بيكون بالشكل التالي:
case $متغير in
 حالة١|حالة٢|حالة٣)
      الأمر المطلوب تنفيذه إذا تطابق المتغير مع واحد من الحالات.
   ;;    
esac

وعلى ذلك، كتب عباس السكربت بتاعه بالشكل ده:
#!/bin/bash

todaydate=`date +%m-%d`
ftodaydate=`date +%F`
cmonth=08

shady="Shady Abbass"
fady="fady Abbass"
hady="Hady Abbass"

case $todaydate in
 "$cmonth-10"|"$cmonth-18"|"$cmonth-25")
 echo -e "\nDear $shady, please remember you have to clean your room today (w ela enta 3arf eh elly ha7ssalk!). \n\nBob!" | mail -r "Room Cleaning Reminder! " -s "$shady, Remember! You have to clean your room today. ($ftodaydate)" shady.abbas@gmail.com abbas@gmail.com
   ;;
 "$cmonth-7"|"$cmonth-16"|"$cmonth-25")
 echo -e "\nDear $fady, please remember you have to clean your room today (w ela enta 3arf eh elly ha7ssalk!). \n\nBob!" | mail -r "Room Cleaning Reminder! " -s "$fady, Remember! You have to clean your room today. ($ftodaydate)" fady.abbas@gmail.com abbas@gmail.com
   ;;
 "$cmonth-2"|"$cmonth-11"|"$cmonth-20")
 echo -e "\nDear $hady, please remember you have to clean your room today (w ela enta 3arf eh elly ha7ssalk!). \n\nBob!" | mail -r "Room Cleaning Reminder! " -s "$hady, Remember! You have to clean your room today. ($ftodaydate)" hady.abbas@gmail.com abbas@gmail.com
   ;;
 *)
 exit 0
esac

الاول نبدأ بالمتغيرات، المتغيرات في شل عبارة عن قيمة بتحددها لعنصر لقيمة تانية، يعني مثلاً انت بتحتاج تكتب عنوان بيتكم كذا مرة في السكربت وطبعاً عنوان بيتكم ده طويل (البيت رقم كذا في الشارع الفلاني في المنطقة الفلانية في الحي الفلاني ... إلخ) وبالتالي مش كل شوية هتقعد تكتب فيه؟ هتكتبه مرة واحدة وتستعمل المتغير بتاعه اللي انت حددته، كدا يعني:
myaddress=("101 Paul st, first call, Islets of Langerhans, Pancreas.")
وبعد كدا تستعمل القيمة اللي انت حددتها وقبلها علامة الدولار $ ، يعني مثلاً بعد تحديد المتغير اكتب الأمر ده:
echo "My Address Is: $myaddress"
الناتج هيكون كدا:
My Address Is: 101 Paul st, first call, Islets of Langerhans, Pancreas.


المهم، نكمل مع السكربت، عرفنا فكرة المتغيرات، نعرف بقى المتغيرات اللي استخدمناها في السكربت، أول حاجة هي:
todaydate=`date +%m-%d`
الأمر date بيعرض التاريخ بتاع انهارده، بالشكل ده Sat Aug 18 10:57:49 EET 2012 طبعاً إحنا مش عاوزين كل ده.

مخرجات الأمر date ليها كذا هيئة، مثلاً إنت مش عاوز كل ده، عاوز بس تاريخ انهارده بالارقام فتكتب date +%F أو عاوز بس يوم فتكتب date +%d وهكذا (تقدر تعرف كل حاجة عن أي أمر بكتابة (man date في الترمينال بتاعت الشل). اخدنا بس %m %d عشان يطلعلنا الشهر واليوم بس.

تاني حاجة هي ftodaydate وزي ما قولت، ده التاريخ كامل بالارقام زي كدا 18\8\2012
ftodaydate=`date +%F`

تالت حاجة cmonth أو الشهر الحالي، وده عشان لما نحب نغير الأيام بالشهر في السكربت منقعدش نجري ورا كل يوم كتبنا فيه الشهر، تغيير واحد ونستخدم المتغير ده بدل الشهر (أو القيمة %m مع الأمر date)
cmonth=08

بعد كدا أسماء العيال، لإن زي ما قولت، ليه نكتب اسم كبير كل مرة طالما نقدر نستخدم متغير صغير؟
shady="Shady Abbass"
fady="fady Abbass"
hady="Hady Abbass"

التوضيح بتاع بقية السكربت: هكتب السكربت بدون متغيرات، إذا تطابقت القيمة 08-18 (يوم ١٨ من شهر ٨) مع أي قيمة من القيم اللي بعد كدا ( يوم ١٠ أو ١٨ أو ٢٥ من شهر ٨)، هيبعت إيميل باسم الابن اللي عليه الدور في التنضيف.
case 08-18 in
08-10 | 08-18 | 08-25 )
echo -e "\nDear $shady, please remember you have to clean your room today (w ela enta 3arf eh elly ha7ssalk!). \n\nBob!" | mail -r "Room Cleaning Reminder! " -s "$shady, Remember! You have to clean your room today. ($ftodaydate)" shady.abbas@gmail.com abbas@gmail.com
;;
esac

وهنا استخدمنا حاجتين، echo و mail ...
إيكو، ببساطة بيطبع الكلام اللي إنت حددته، بياخد -e عشان يقدر يفهم علامة "\" اللي بيجي معاها حرف n يعني يطبع الكلام على سطر جديد مش نفس السطر.
أما ميل، فهو البرنامج المسئول عن إرسال الرسالة، نص الرسالة بياخده من مخرجات الأمر إيكو، عنوان الرسالة بيجي بعد - ‎(subject) ‎ ‎s‎ واسم المرسل وإيميله بيكون بعد -r (بنفس الصيغة دي) أخيراً الإيميل اللي هيتبعتله الرسالة، وطبعاً هنا عباس كتب إيميل ابنه وإيميله عشان مفيش حد من عياله يحاول يلعب بديله ويقول "أصل الرسالة موصلتليش!" وبالتالي حطهم في خانة اليك!

وكمان عباس استخدم المتغير بتاع اسم كل ابن من ابناءه في عنوان كل رسالةبحيث يظهر اسم الابن اللي اتبعتله الرسالة في عنوان الرسالة، عشان عباس في آخر الشهر ميلاقيش الإيميل بتاعه فيه ٢٠ رسالة بنفس العنوان وميعرفش كل رسالة بتاعت مين بالظبط.

بعدين الـ ٢ سيمي كولون أو الفاصلة المنقوطة ";;" بيهم تنتهي الفقرة الأولى وتبدأ فقرة تانية بحالات تانية.
أخيراً esac دي كلمة case لكم معكوسة واللي بتدل على نهاية بناء جملة case، ودي طريقة شائعة في صدفات يونكس/لينوكس.


طيب لحد كدا وكويس أوي، بس ازاي السكربت ده هيشتغل؟ هيفضل شغال طول اليوم؟ لمدة شهر؟ لأ طبعاً! هنستعمل الأداة الرائعة في لينوكس اللي اسمها Cron ودي ببساطة بتقوم بتشغيل أو تنفيذ حاجة معينة في فترة معينة كل (كل يوم أو كل أسبوع أو كل شهر مثلاً) وبالتالي هنخليها تشغل السكربت كل يوم الساعة ١.٠٠ صباحا (الفجر)، السكربت يتأكد إذا كان في حد عليه ترتيب غرفته انهارده ولا ﻷ، إذا لقى حد يبعت الميل، إذا ملقاش حد يقفل نفسه زي الشاطر.

هنعدل الكرون جوبز (cron jobs):
crontab -e

هنضيف السكربت فيه كدا:
* 1 * * * /root/room_cleaning_reminder.sh

بكدا السكربت هيشتغل كل يوم الساعة ١,٠٠ الفجر ويتأكد إذا اليوم ده يوافق يوم من الأيام اللي المفروض الأوض تتنضف فيها وبعد كدا السكربت يتقفل لحد اليوم التاني الساعة ١,٠٠ وهكذا.

كرون ده موضوع طويل عريض، فمفيش نية للدخول فيه، هكتفي بالصورة اللي فوق دي للتوضيح، واللي عاوز يستزيد فيه ممكن يشوف التالي:

HowTo: Add Jobs To cron Under Linux or UNIX?
Scheduling Tasks with Cron Jobs.

معلومات أكتر عن Case بالإنجليزي:

The case statement - Linux Shell Scripting Tutorial - A Beginner's handbook


وبكدا المشكلة تكون اتحلت، شادي وفادي وهادي هينضفوا اوضهم بمزاجهم أو غصب عنهم، لإن زي ما احنا عارفين، مفيش حد بيعرف يسد قصاد الجييكس ... عشان كدا زي ما بقول ديماً لا تفكر في إغضاب جيك فالعواقب ربما تكون أسوء مما تتصور D:


بس كدا ... عيد فطر رائع عليكم، حاولوا تستمتعوا على قد ما تقدروا! :-)

السبت، 11 أغسطس، 2012

في بيتنا قنفذ!

الصورة لـ Cath Schneider

شوفت الصورة دي إنهارده ... صورة ظريفة جداً وفكرتني بموقف قديم D:
بالقنفد الصغير اللي وصل بيتنا بطريقة غريبة جداً D:

كنت في اعدادي تقريبا، لقيت قنفد قريب من أرض زراعية على حدود منطقتي، قررت آخده البيت، وفعلاً جبت كيس وحطيه جواه، كان في حجم كورة قدم صغيرة (يمكن مقاس ٣ أو ٤)، وده خلاني أغير الكيس يجي أربع مرات عشان كل شوية بيتقطع من شوكه D:

أخدته البيت، قولت أسيبه في الحوش لحد الصبح، حطيته في علبة صفيح، جه الصبح ملقتهوش : (
دخل في الشقة اللي في الدور الأرضي وكانت ساعتها لسه مش متشطبه، دورنا عليه في كل حته، القنفد اختفى!

بعدها بكام شهر، سمعنا صوت جاي من حوش بيتنا ... لقينا عرسة ومخلفة عرستين صغيرين ... مش دي المشكلة لإننا كنا عارفين بيهم، بل ساعات كنت أنا واخواتي نرميلهم أكل D:

العرسة كانت بتتخانق مع حاجة! حزر إيه هي الحاجة؟ ﻷ مش القنفد اللي جبته!
قنفد صغير! في حجم كورة البيسبول تقريبا. فتحنا باب الشقة اللي تحت لقينا واحد تاني كمان ... بس ميت، ويبدوا أنه لسه ميت حديثاً :(

االاستنتاج!
القنفد اللي جبته كان انثى وحامل! في نفس الوقت كانت العرسة خلفت وبالتالي وحصلت معركة على مناطق النفوذ ... والنتيجة إن القنفد الكبير، أو بالأحرى القنفدة اختفت وسابت وراها قنفدين صغيرين، وواحد منهم مصيره كان الموت على يد العرسة الأم، والتاني أخدته مكان ما لقيت أمه ... بعد ما استكشفت فيه شوية D:


أنا ممتن جداً لوالدي ووالدتي إنهم كانوا بيسمحوا بدخول الحاجات دي البيت، أهالي تانين كانوا ممكن يتبروا من عيالهم لو جابوا حاجة زي دي البيت D:


يا لهوي! كانت أيام! D":
DDDDDDDDDDDDDDDDDDD:

الاثنين، 6 أغسطس، 2012

حل مشكلة فونت فيس وفاير فوكس!

يا لهوي D:
شعور استثنائي لما تكون بتواجه مشكلة من سنتين خلتك تشد في شعرك وبالصدفة -بعد سنتين- تعرف إيه سبب المشكلة D:

مكنتش فاهم ليه فاير فوكس الوحيد اللي مش بيعرض خطوط الويب على الموقع بتاع عن طريق خاصية @font-face في css
كل حاجة تشتغل تمام ويجي مع فاير فوكس يقف! ليه؟ مش عارف! فين المشكلة؟ مش عارف؟ إيه الحل؟ أكيد مش عارف برده xD

افتراضياً الباشا طلع بيعمل بلوك لخطوط الويب اللي مش على نفس الدومين (أوحتى السب دومين)! ولإني كنت بتستعمل بلوجر فمكانش ينفع أرفع ملفات تكون على نفس الدومين.
يعني لو الموقع بتاعك كدا

#www.yourdomain.com

لازم الخطوط تكون تحت الدومين .... يعني كدا مثلاً

www.yourdomain.com/fonts/font.ttf


لكن لو استعملت أي دومين تاني (او حتى سب دومين على نفس الدومين الرئيسي) الخطوط مش هتظهر ... كدا يعني:

files.yourdomain.com/fonts/font.ttf
www.anotherdomain.com/fonts/font.ttf


الحل إنك يا إما تخلي الخطوط على نفس الدومين، أو إنك تعدل في الكونفجريشن بتاع الويب سيرفر بحيث تفهمه إنه مفيش مشاكل إن حد يستعمل أي ملفات بامتداد معين زي الخطوط مثلاً على دومين تاني.
ضيف في ملف .htaccess

<filesmatch "\.(ttf|ttc|otf|eot|woff)$">
<ifmodule mod_headers.c>
Header set Access-Control-Allow-Origin "*"
</IfModule>
</FilesMatch>

برده في حل تاني مقترح تستعمل وانت بتعمل الخطوط base64 encoding

font-face fonts only work on their own domain - stackoverflow
Cross domain workaround for @font-face and Firefox

D:

شل سكربت

أحبيبي ألينوكس! xD

كتبت شل سكربت وفر عليا بتاع ١٠ ساعات شغل فحت وردم D:
الشغل ده لو اتعمل يدوي ممكن أول مرة ياخد حوالي ١١ لـ ١٢ ساعة

مع السكربت خلصت الشغل في ساعتين D:

يا لهوي يا جدعان! لينوكس ده نعمة بجد!

بس أحسن حاجة في الموضوع إني رجعت أكتب سكربتات شل تاني بعد أكتر من سنة ونص توقف! :-)

الأربعاء، 25 يوليو، 2012

السبت، 21 يوليو، 2012

نيش الجحيم!

أحد البنات غير المصريات على الفيس بوك كانت حابة تعرف يعني إيه "نيش" وليه كتير من المصريين بيكرهوه؟!

كتبت رد، وبعد ما خلصت لقيت إنه تعدى الـ ٨٠٠ كلمة وبالتالي مينفعش يتكتب كتعليق على الفيس لازم يكون note ... قلت أريح دماغي وأنزله على المدونة، على الاقل ساعتها كل ما أحاول أعرف أنا بكره النيش أد إيه آجي أشوف الموضوع ده! تباً لعادات المجتمع الكريهة!

----------------

أنا هشرح لحضرتك D:

حضرتك عارفة قصة البنت اللي سألت أمها ليه بنقطع السمك نصين وإحنا بنسويه؟ الأم قالتلها معرفش، أنا اتعلمت الطريقة من أمي (جدة البنت)، فلما راحوا سألوا الجدة، قالولها ليه لما بنسوي السمك بنقطعة نصين؟ قالتلهم بدورها معرفش برده! أنا اتعلمتها من أمي (جدة الأم) ... ولما سألوا الجدة الكبيرة، قالتلهم مفيش أي سبب! كل ما في الموضوع إن زمان الطاسة (المقلاة) كانت صغيرة ف بنضطر نقطع السمك نصين لإنه بيكون أكبر من الطاسة!

مع إن الزمن اتغير والمستوى المعيشي العام اتغير وبقى في طاسات كبيرة الحجم في كل بيت وتقدر تستوعب أي سمكة كبيرة، لكنهم مازالوا بيتبعوا عادات قديمة لمجرد العادة في حد ذاتها من غير ما يعرفوا السبب!! (هذا ما وجدنا عليه أباؤنا!)

إيه هو النيش؟ هو ده!


عبارة عن قطعة أثاث كبييييرة جداً بيتم وضع فيها الأطباق والكوبايات وبعض الإكسسوارات ... وأشياء أخرى!

إيه مشكلة النيش بقى؟ مشكلته إن أي حد يتجوز في مصر لازم يشتري نيش، محتاجه أو مش محتاجه لازم يشتريه، حجم النيش كبير وشقته صغيرة لازم يشتريه، غالي على الفاضي مش مهم لازم يشتريه برده! هو كدا لازم أي حد يتجوز في مصر يشتريه وخلاص!


أصلا النيش بيستعمل في إيه؟
زمان لما كانت المطابخ صغيرة في البيوت يمكن تكون بكاد عرضها متر واحد، كان بيتم وضع النيش في الصالة و يتم وضع الأطباق والكوبايات الصيني والزجاجية سهلة الكسر فيه عشان استعمالها وقت الحاجة من عزومات ومناسبات وغيره وفي نفس الوقت المحافظة عليها من الكسر.

حالياً؟ البيوت بقت أوسع وأكبر، حجم المطابخ بقت أكبر بكتير من أي وقت فات (في بعض البيوت بيوصل حجمها لحجم غرفة كبيرة) كل مطبخ فيه أدراج وأرفف كتيرة قادرة تشيل كل صحون الموجودة في البيت (والبيت اللي جنبه كمان!) بما فيها الصيني والأشياء القابلة للكسر ... لكن ما زال كل الناس عندهم نيش وأي حد بيتجوز بيشتري نيش برده!!

مع مرور الوقت، والتغييرات الحاصلة في المجتمع، وعدم عدالة توزيع الموارد الاقتصادية ... ظهر ناس أغنياء جداً وناس فقراء جداً، وتقريباً الطبقة المتوسطة بمعناها الموجود في أغلب دول العالم تلاشت في مصر، الطبقة المتوسطة بمعناها التقليدي انقسمت فعلياً لطبقتين ممكن نسميهم طبقة متوسطة عليا وطبقة متوسطة دنيا!!

في مثل شعبي مشهور جداً بيقول "الصيت ولا الغنى"، يعني مش مهم تكون غني، المهم يكون ليك مكانة اجتماعية، المكانة الاجتماعية دي بتتعمل ازاي؟ عن طريق المظاهر واصطناع الترف!
يعني ممكن يكون دخل شخص (على سبيل المثال) ١٠٠٠ جنيه، وبالكاد قادر إكمال الشهر بالمبلغ ده ... يروح يشتري عربية (المهم تكون ماركة معروفة!) طبعأً بالتقسيط تكلفه أكتر من طاقته، فيستلف ويحاول يتصرف في فلوس كل شهر عشان يدفع قسط العربية!

نفس الشخص اللي بيعاني من قلة دخله المادي، تلاقيه رايح يشتري موبايل بسعر غالي جداً عشان يظهر بمظهر الغني .... بالرغم من إنه مش محتاج غير تليفون عادي ولا عمره استعمل خاصية الـ GPS ولا حتى محتاج ٢٠٪ من قوة البرورسيسور بتاع جهازه الجديد!!

قيسي على كدا بقية الحاجات! الأكل، ملابس، اكسسوارات، وغيرهم ... أهم حاجة "البرستيج" والمكانة الاجتماعية حتى لو كانت كلها مظاهر ملهاش أساس فعلاً!


نرجع للنيش تاني! الناس دلوقتي بتجيب النيش ليه مع إنهم مش محتاجينه؟
النيش والأشياء اللي بتتحط جواه بقت واحدة من المظاهر الاجتماعية للطبقات الفقيرة/المتوسطة لمحاولة الظهور بمستوى اجتماعي عالي وإنهم "مش فقرا" إنما "أغنيا"!!
فلازم أي اتنين يتجوزوا يشتروا نيش (وزي ما قولت مش محتاجينه فضلاً عن إنه بيحتل مساحة كبيرة من البيت على الفاضي) ويحطوا جواه حاجات مش بيستعملوها (أطباق صيني وغيرها) ... وكل ما حد يتعزم عندهم أو يجيلهم البيت الست تقعد توريهم النيش (أو حتى من غير ما توريهم النيش ديماً في الصالة وأي حد هيجيلهم هيشوفه!) اللي بالشيء الفلاني واللي جوا النيش اللي بالشيء الفلاني برده! وأد إيه هما مستواهم عالي!!

ده بيحطنا في حلقة مفرغة كبيرة!
لما أصحابها البنات يشوفوا النيش واللي جوا النيش هما كمان عاوزين زيها ... ما هما مش أقل منها يعني!!
النقطة التانية بقى الشاب اللي متقدم للبنت لو فكر -مجرد حتى التفكير- إنه ميجيبش نيش والحاجات اللي جواه، يبقى كدا هو مش مقدر بنتهم، وشخص جلدة وبخيل ... إذن فهو مرفوض والجوازة ممكن تتفشكل!! حتى في البنات نفسهم مش مقتنعين بفكرة النيش بس مش بيقدروا يقفوا قصاد أهلهم (ليه هو إحنا فقرا عشان منجبش نيش؟ هو إحنا "هنبيع" بنتنا بالرخيص؟ هي بنتنا أقل من غيره؟ ...)، فأغلب الشباب والبنات بيرضخوا للمطلب ده حتى لو كانوا شايفين إنه شيء ملهوش أي قيمة ومجرد حمل زائد في مقابل إن كل واحد يتجوز الشخص اللي هو عاوزه.

على فكرة في ناس بتستعمل النيش فعلاً وده مفهوش مشكلة لو هما بيستعملوه "فعلاً" مش ممكن الاستغناء عنه!
المشكلة مش في النيش نفسه، المشكلة في كل حاجة بنعملها لمجرد إنها عادات وتقاليد، لمجرد إننا مش قادرين نقاومها ... المشكلة في الأصنام اللي صنعها المجتمع والجميع مضطر يعبدها!

كل فترة الشباب بيبدأ يستخدم مخه ويقول ليه نيش؟ ليه نجيب حاجة مش بنستعملها؟ ليه نجيب حاجة تستهلك مكان على الفاضي؟ ليه أصلا إحنا ملزمين بالنيش؟
كل الناس بتعترض، بتشجب، وبتدين! ... لكن وقت التنفيذ؟ الكل بيرضخ! ونسبة قليلة جداً جداًَ جداً هي اللي بتعمل اللي في دماغها! (الناس بتخاف تتحمل نتيجة قرارتها فيما بعد، بيرضوا بعادات المجتمع عشان يقدروا يعلقوا عليها أخطاءهم لو فشلوا بعد كدا!!)


ويبقى النيش الصنم الأكبر، عمره ما ريح حد، وعمره ما رفع المستوى الاجتماعي بتاع حد ... والأهم، عمره ما أسعد حد!

الجمعة، 20 يوليو، 2012

تدوينة سريعة

ركبت جافا سكربت بلجن infinite scrolling في المدونة عشان تعرض التدوينات كلها ورا بعض كل ما توصل لآخر الصفحة بحيث مش كل شوية next page, next page, next page,

ظريف جداً إنك تقدر تشوف كل الحاجات اللي كتبتها على مدار سنين في صفحة واحدة!

الخميس، 12 يوليو، 2012

مدونة جديدة

من فترة افتتحت مدونة جديدة، فكرتها بسيطة جداً بكتب فيها كل أسبوع ورقة وأعلقها في حته واضحة في المكان اللي بشتغل فيه.

مش المفروض إني بكتب أي معلومات عامة، ﻷ! إنما حاجات معينة أو مواضيع محددة حابب ألفت نظر الناس ليها ... وببساطة ده لإن "الأمر لا يتعلق فقط بالمال، هناك دائماً أشياء أخرى مهمة وربما تكون أهم من المال في بيئة العمل."

معلومات أكتر عن المدونة الجديدة.



استمتعوا :-)

السبت، 16 يونيو، 2012

رسالة إلى مؤتمر ريو +٢٠

باختصار المهمة السرية اللي كانت في حديقة الأورمان كانت عبارة عن التقاط صورة عشان أبعتها لقناة دويتشه فيله كرسالة لمؤتمر ريو +٢٠ : )

الرسالة بسيطة ومختصرة لمؤتمر ريو +٢٠ (مؤتمر عن التنمية المستدامة) تلات حاجات أعتقد لو طبقناهم هيخلوا حياتنا أفضل على اﻷرض : )

«الطاقة المتجددة - إعادة التدوير - المزيد من الأشجار»


معلومات أكتر عن مؤتمر ريو القادم:
- تعريف بريو+20 مؤتمر الأمم المتحدة المعني بالتنمية المستدامة.
- ريو+20 مؤتمر الأمم المتحدة المعني بالتنمية المستدامة. المستقبل الذي نبتغيه.
- Rio+20 | DW.DE.

وتقدر من هنا تشوف رسائل بعتها ناس من مختلف أنحاء العالم لؤسسة دويتشه فيله (تقدر إنت كمان تشارك) .... ودي رسالتي على صفحتهم :-)



دي الصورة اللي تم عرضها على صفحة دويتشه فيله.


دي صورة تانية كانت مرشحة.


دي الرسالة لوحدها.

ألبوم الصور على فيس بوك


------

على الهامش، كتبت الرسالة على السريع، استخدمت اسلوب بسيط في الكتابة باستخدام قلمين رصاص وكتابة الجمل بعد كدا التوصيل بين الحدود الخارجية للحصول على الشكل الحالي.

المفروض إن ده خط نسخ بس طبعاً، بقالي كتير جداً مكتبتش ومتدربتش على خط النسخ وبالتالي مكنتش ملتزم أوي بأصول الخط.

المهم بس إن الكلام مقروء والرسالة توصل للناس :-)

الاثنين، 11 يونيو، 2012

المهمة السرية

امبارح بالتأكيد كان يوم جميل وممتاز :-)

كنت بخلص شوية حاجات فقولت أجدد اشتراك المكتبة (مكتبة مصر العامة في الدقي) ... لقيت نفسي بطبيعة الحال هعدي على حديقة الأورمان واحدة من أفضل الحدائق النباتية في مصر واللي بيقام فيها كل سنة مهرجان الزهور وبيتعرض فيها مئات من أنواع وأصناف النباتات.

كمان أخويا (عمرو) كان في الجامعة (جامعة القاهرة)، فكلمته بعد ما جددت اشتراك المكتبة واتقابلنا في حديقة الاورمان ... فمكنش في وقت أفضل لعمل المهمة السرية D:

جددت اشتراك المكتبة واستعارت كتاب، أو بالأحرى رواية (رواية مدن الملح لعبد الرحمن منيف وهي بتتكون من خمس أجزاء).
طول عمري بكره الروايات والقصص لإن أغلبها بدون مغزى مباشر ... على طول عمري كرهت الروايات اللي ظهرت على جيلي، على عكس أغلب أبناء جيلي كرهت الروايات المصرية للجيب، الرجل المستحيل، سفاري، فنتازايا ... وخصوصاً مجموعة ما وراء الطبيعة!

يمكن القصص والروايات دي كانت سبب في كرهي للروايات بشكل عام، عشان كدا كان مجمل الروايات اللي قرأتها لا يتعدى أصابع اليد!
من فترة سنة أو اتنين قررت أدي الروايات فرصة تانية، لكن روايات منتقاة، دقيقة، عميقة .. بس الظروف مساعدتنيش إن أقرا أي حاجة، إلا إني كنت قررت إني أبدأ مع "مدن الملح" لعبد الرحمن منيف لإني قريت بعض الأجزاء منها ولقيتها رااااائعة فعلاً.

عموماً قولت أمشي بالعكس وأبدأ بالجزء الخامس "بادية الظلمات" بعد كدا أدخل على الجزء الأول D:
الرواية تصنف من الروايات الطويلة، ومجموع الخمس أجزاء ٢٣٤٥ صفحة تقريباً! الجزء الخامس حوالي ٥٥٠ صفحة.

المهم ما علينا من مدن الملح، خلينا في المهمة السرية D:
اثناء أداء المهمة التقطت بعض الصور للحديقة (الألبوم على الفيس بوك)
(بالمناسبة، التصوير بالموبايل، وكان بيفصل شحن فالصور متاخدة على السريع)


بقية الصور على فيس بوك "المهمة السرية - حديقة الأورمان بالجيزة"


إيه هي بقى المهمة السرية؟
ممكن كمان يومين كدا كل شيء يبان p:

الخميس، 7 يونيو، 2012

نهاية الأسبوع الأول!

بانتهاء النهاردة يكون الأسبوع الأول خلص، اسبوع الاستجمام البحت D: واللي للأسف انتهى نهاية مش كويسة كوني تعبان جداً بقالي يومين : ( لكن الحمد لله على أي حال : )

اممممممم ... هبدأ أفكر في بعض الحاجات للأسبوع التاني، غالباً هحاول ازور بعض أقرابي، وهحضر قائمة ببعض الناس اللي مشوفتهمش/مكلمتهمش بقالي كتير وأكلمهم بالتليفون.

حاجة تانية بفكر أعملها في النص التاني من الأسبوع، بفكر أروح الصعيد ... سوهاج! أو تحديداً آخر مراكزها دار السلام! الموضوع مش مؤكد ١٠٠٪ بس في احتمال كبير إن أروح ... أعتقد هتبقى زيارة جميلة :-)

وربنا يسهل كدا وميطلعلناش أي حاجة كدا ولا كدا تخرب الأسبوع :\

الاثنين، 4 يونيو، 2012

تدوينة سريعة

قصة مصورة قصيرة ... بدون أي كلمة.
قوية جداً، مؤثرة جداً، بسيطة جداً!

الأروع بقى إنها معمولة كلياً ببرامج مفتوحة المصدر!
بشكل أساسي البرنامج الرائع MyPaint وبعض التحابيش على برنامج GIMP ... وطبعاً نظام التشغيل لينوكس :-)
استمتعوا : )

l'héritage en couleur

الجمعة، 1 يونيو، 2012

النهاية! ١\٦\٢٠١٢

اوفيشيالي، انهاردة خلصت جيش! سنة، وشهر، و١٥ يوم!

امبارح لما استلمت الشهادة أنا وواحد من أصدقائي في الجيش، جالنا حالة من البلاهة من كتر الفرحة، كل واحد فينا بيبص للتاني ومبلم D:

فرحتي بالشهادة كانت مضاعفة لإني حصل معايا موقف غريب عجيب في أول جيشي احتمالية حدوثه زي احتمال انك ترمي زجاجة في البحر الأبيض وتلاقيها بعد كد في بحر اليابان! لكنه حصل معايا! لأكتر من ١١ شهر بحاول اثبت حقي في حين إن كل الظروف والشواهد ضدك! (دي مش مبالغة على فكرة!)
الموضوع يشبه إنك في يوم من الأيام لا ليك ولا عليك تلاقي الباب بيخبط، فتفتح تلاقي محضر من المحكمة بيبلغك إن عليك قضية، تروح المحكمة تلاقي إن فعلاً في قضية باسمك، بل كمان كل الورق باسمك، وكل شواهد النفي ضدك! وكل حاجة بتقول إن إنت المجرم مع إنك ملكش أي علاقة بالموضوع من قريب ولا بعيد ولا حتى اسمك جه فيه بالغلط!! بل يمكن كمان الأدهى إنك تلاقي كل الناس اللي حواليك يقولولك يا ابني ده نصيبك وارضى بيه انت خلاص لبست القضية دي!

بس الحمد لله والشكر له، كسبت قضيتي الأولى، أو بالأحرى القضية رقم "صفر"! وأخدت الشهادة بتاعتي قدوة حسنة بدون ولا يوم فقد :-)
الحمد لله، الحمد لله، الحمد لله : )

هبدأ اسبوع من عدم فعل أي شيء، اسبوع من الاسترخاء اللا متناهي، أنتخة لدرجة البلاهة D:
وخليني دلوقتي استمتع بأغنية "فات الميعاد" لأم كلثوم :-)

الأربعاء، 23 مايو، 2012

التزلج على الجليد لأول مرة!

خليني بس أسجل إن امبارح يوم ٢٢\٥\٢٠١٢ (تاني يوم في سنتي الـ ٢٣) أول مرة أجرب التزلج على الجليد (Ice skating)ـ D:
التزلج على الجليد لذيذ جداً، صعب شوية في البداية لكن بعد نص ساعة من التجربة بدأت اتحرك بحرية أكبر على الجليد.

حتى إن مهاراتي القوية في التزلج الأرضي باستخدام الباتناج (Roller skates) منفعتنيش كتير في البداية، وطبعاً حصلت على بعض الكدمات والجروح البسيطة، لإني وقعت وقعة معتبرة xD

في الحقيقة هما تلات وقعات، مرتين في البداية، ومرة في آخر الوقت لما اعتقد إني بقيت محترف وجربت آخد الملف على الديق (أوي D:)
بس الوقعات دي وخصوصاً الوقعة الأخيرة دي تخليني افتكر ديماً إن مفيش حد بيتعلم بسهولة، وإن كل شيء ليه منحنى تعليم لو الواحد حاول يتخطاه أو يختصره بشكل كبير، النتيجة النهائية مش هتكون مظبوطة!

أعتقد إني هكررها تاني قريب، وبعض صور لاحقاً بقى :-)

الانتخابات الرئاسية ٢٠١٢


تبدأ انهاردة ٢٣\٥\٢٠١٢ انتخابات رئاسة جمهورية مصر العربية لاختيار رئيس الجهورية.


للأسف ده متزامن مع في انقسامات واضحة في الشارع المصري، مابين طبقات الشعب (فروق طبقات ثقافية، اجتماعية، فكرية، أيدولوجية ... إلخ) ما بين امكانية انتخاب فلول (أشخاص من النظام السابق) زي عمرو موسى وأحمد شفيق ودولا بيدعهم عامة الشعب والطبقات الفقيرة بدعوى الاستقرار وتخوف كبير من وصول الإسلاميين للحكم!، بل حتى ما بين ابناء الفكر الواحد زي الإسلاميين لوجود أكتر من مرشح اسلامي، ومن ناحية تانية وجود معارضين (مقاطعين) للانتخابات في ظل حكم المجلس العسكري والتخوف من حصول تزوير لوصول مرشح معين لرئاسة الجمهورية، وكمان عدم معرفة صلاحيات الرئيس القادم بشكل دقيق.

للأسف مش هقدر انتخب في المرحلة الأولى بحكم إن مازلت بأدي فترة الخدمة العسكرية الإلزامية (لكون العسكريين ملهمش الحق في التصويت)، بالرغم من إني فاضلي حوالي ٨ أيام وأخلص، وبالرغم من إني لقيت اسمي موجود في كشوفات الناخبين، بس في اعتقادي الشخصي لو نزلت وادليت بصوتي يبقى كدا أنا كدا بقوم بعملية تزوير! الحق عمره ما كان بيجي بالتزوير أو الغش أو الاحتيال!

على العموم، إن شاء الله هلحق المرحلة التانية (الإعادة) من الانتخابات إذا كان في، وصوتي هيكون لأبو الفتوح إن كان موجود ساعتها : )

لكن على كل حال، اللي شوفناه الفترة اللي فاتت من دعاية ومناظرات بين المرشحين (حقيقة) والسلاسل البشرية لدعم المرشحين وغيرها من الحاجات دي، كان لا يمكن نشوفه لولا قيام ثورة ٢٥ يناير!

ربنا يتولى كل الشهداء برحمته ... آمين : )

الجمعة، 18 مايو، 2012

تدوينة سريعة

زهور التوليب

من مفارقات الحياة كون أجمل الأزهار ليس لها عطر!

الخميس، 17 مايو، 2012

الغراب الأبيض


على مر الزمن حمل الناس الكثير من الكراهية للغربان، فكان الغراب تارةً رمزاً للمصائب والحظ السيئ وتارةً أخرى إلهاً للحرب والدمار، ربما لصوته المزعج أو لكونه يقتات الأشياء الميتة أو للونه الأسود القاتم!

على غير العادة في يوم من الأيام فقس أحد الغربان بلون غير الأسود، كان أبيضاً، أبيضاً بياضاً ناصعاً! كبر الغرب ورأى ما يحمله البشر من كراهية تجاه بني جنسه، اعتقد هذا الغراب أن الأمور ستتغير وستبدا الناس تحب الغربان! لكن للأسف هذا لم يحدث قط!

فلا الناس أحبته فهو مازال غراباً، ولا استطاع العيش مع بقية عشيرته فهو أمهق غريباً عن سائر الغربان! حتى الغراب الأبيض سيشعر بالغربة بسبب لونه بالرغم من أنه لطالما تذمر من اللون الأسود واعتقد أنه السبب في كراهية الناس للغربان!

وقف الغراب الأبيض بقية حياته وحيداً على جزع شجرة قديم ينتظر أن يجد غرباً آخراً مثله ... وبدا أنه سينتظر طويلاً.

-----------


على الهامش
خاطرة كتبتها عندما رأيت بعض الغربان وتذكرت وقتها الغراب الأمهق، وحاولت تخيل كيف سيكون الموقف إذا كان وسطهم.
شخصياً لا أكره الغربان لا للونها ولا لصوتها (صوت غراب أو اثنين ليس مشكلة لكن إذا كان هناك خمسة أو ستة غربان تنعق في نفس الوقت يصبح الأمر أشبه بمناحة في جنازة!) بل على العكس اجدها كائنات ظريفة خصوصاً غراب البيوت ذو اللونين وذكية فعلاً ومفيدة أيضاً للبيئة!
على جانب آخر، اللون الأبيض الفاقع أو "المهق" سببه خلل في الصبغة الوراثية، ويحدث هذا في الإنسان أو الحيوان على حد سواء لهذا قد تجد أي كائن بهذا الشكل، ويوجد العديد من الحالات الأخرى المماثلة، وقد رأيت من قبل ثعباناً أمهقاً ضخماً في حديقة الحيوان بالجيزة.

الجمعة، 27 أبريل، 2012

تدوينة سريعة

معلومة جديدة اتعرفت عليها من فترة قريبة، أول مرة أعرف إن في حاجة اسمها اسم فعل!

تعريفه: اسم الفعل كلمة، تدل على ما يدل عليه الفعل، وتنوب عنه في معناه واستعماله لكنها لا تقبل علاماته.

أمثلة ومعلومات أكتر : اسم فعل - ويكيبيديا الموسوعة الحرة

إطلاق الإصدار الجديد من أوبنتو ١٢.٠٤

بالأمس ٢٦ أبريل ٢٠١٢ أُطلِق الإصدار الجديد من نظام التشغيل الرائع أوبنتو لينُكس. النسخة الجديدة تبدوا رائعة جداً وحصلت على قدر كبير من الصقل والتطوير.

شعار أوبنتو

كنت سأكتب مقالاً عنها لكن الوقت لم يسعفني، لذا لا يوجد مكان أفضل من وادي التقنية والمدونة العربية للبرمجيات الحرة لتقرأ عن الإصدار الجديد من نظام أوبنتو الرائع.

أبونتو 12.04 وصلت - وادي التقنية.
توزيعة أبونتو 12.04 Ubuntu متوفرة للتحميل - المدونة العربية للبرمجيات الحرة

بعض الروابط الإضافية: (الموقع الرسمي لأوبنتو باللغة الإنجليزية)
Overview | Ubuntu
Take the tour | Ubuntu (جرب أوبنتو من متصفحك!)
What's new in Ubuntu 12.04? | Ubuntu

أخيراً، إذا أردت أن تبدأ باستخدام أوبنتو حمل الآن كتاب "أوبنتو ببساطة" وتعرف على عالم أوبنتو الرائع والممتع!

شعار موقع أوبنتو ببساطة


# ملحوظة: هذه رسالة مجدولة، أنا الآن على الاغلب في مكان ليس فيه إنترنت ... استمتعوا ;)

مقابلة بخصوص كتاب أوبنتو ببساطة

مقابلة كانت عملتها معايا مدونة الخطط العفوية المبدعة بعد إصدار كتابي "أوبنتو ببساطة"، قولت انقلها هنا في المدونة تحسباً لأي ظروف ممكن تطرأ على الموقع الأصلي خصوصاً إن الاستاذة سوزان صاحبة المدونة قررت التوقف عن التدوين لمدة سنة تقريباً. الرابط الأصلي للمقابلة.

استمتعوا :-)

-----------------

هذه الأسبوع بما أنه النهاية، لدينا شخص رائع انتهى من إنتاج شيء رائع، يشاركنا بأفكار ونصائح ساعدته على إنتاج ما أنتجه.

انتهى المدون أحمد أبو زيد (AhmedAbouZaid@)، من تأليف الإصدار الثاني من كتابه الثاني (أوبنتو ببساطة) الذي يتحدث عن نظام التشغيل أوبنتو لينكس، المفتوح المصدر. كتاب متكامل، لابد أن تتطلعوا عليه، يعمل أحمد على تحسينه باستمرار بناء على اقتراحات القراء، وقبل أيام صدرت منه نسخة منقحة منه بالرقم (١.١).

طرحت عليه أسئلة، ولا أقصد بكلمة "طرحت" أنني أسقطت شيء على رأسه، هذا سخيف، ومؤلم... :) المهم، سألته عن عملية تأليف الكتاب، وكيف استطاع فعل ذلك مع كل المشتتات التي نعيش معها، من خلال الأسئلة التالية. وأجاب أجوبة تجعلني أريد أكلها وقرص وجنتيها! D:

لقطات من كتاب أوبنتو ببساطة
كتاب أوبنتو ببساطة

كم كتاب ألفت حتى الآن، وهل تعمل حاليًا على كتب أخرى؟
أنا أكتب على الإنترنت من عام ٢٠٠٦ لذا كتبت العديد من الوثائق حول مواضيع مختلفة (تقنية غالباً) لكن أغلبها لا تعتبر كتباً بالمعنى الدقيق، وبالتالي يمكن القول أني ألفت كتابين أو بالأحرى كتاباً وكتيباً والإثنين قد صدر منهم إصدارين.

حالياً لا أعمل على كتب أخرى بل أركز على المواضيع التي تتعلق بكتابي الأخير "أوبنتو ببساطة" من ناحية استلام ملاحظات القراء وتنقيح الكتاب والعمل على توفيره ورقياً. وهناك خطط على المدى القريب لكتاب آخر أو اثنين في غير المجال التقني ... وبالرغم من تبلور فكرة الكتب ووضع الخطوط الأولية لكن لن يبدأ العمل قبل بداية العام الجديد.

هل شعرت أن المواقع الاجتماعية مثل تويتر وفيسبوك، عملت كمشتت لك، وأخرت إنهاء الكتاب؟ وكيف تعاملت معها؟
بالتأكيد! المواقع الاجتماعية عموماً تستهلك الكثير من الوقت وتعتبر مصدر إلهاء وتشتيت لأي شخص يدخل في دائرتها، لكنها لم تكن سبب في تأخير كتاب "أوبنتو ببساطة" فقد كان هناك ما يكفي من الأسباب الأخرى لتأخير الكتاب D: لذا حرصت على تحديد أوقات الشبكات الاجتماعية وأن يكون الدخول عليها بعد العمل على الكتاب وليس قبله، لكن من ناحية أخرى وبسبب كونه كتاب تقني كان لابد من استخدام متصفح الإنترنت على الدوام لإنجاز بعض الأمور المتعلقة بالكتاب وبالتالي كانت إغراء دخول المواقع الاجتماعية والمشاركة فيها لا يقاوم ... لذا نصيحتي هي "أغلق متصفح الإنترنت لكي تنجز عملك" D:

هل كنت تعمل على الكتاب كل يوم؟ أو ما هي طريقة عملك؟
كنت أعمل على الكتاب كلما توفر الوقت مع وضع العمل في الكتاب في أول قائمة الأولويات كل يوم.

طريقة العمل بشكل عام تبدأ مع تبلور فكرة الكتاب ثم التخطيط على الورق وكتابة العناصر الأولية التي سيتم تغطياتها في الكتاب، وهذه في رأيي أهم خطوات كتابة أي كتاب حيث أن التخطيط على الورق يساعدك كثيراً في الحصول على تصور متكامل عن الكتاب الذي تعمل عليه لذا اقوم بتخصيص دفترين الأول أكتب فيه أي فكرة تخطر ببالي بخصوص الكتاب، وأجرب فيه أي أشكال أو تصاميم قد استعملها داخل الكتاب، والآخر يكون للخلاصة أو النتيجة النهائية التي قررت اعتمادها في الكتاب فعلا. ويفضل دائماً أن تستعمل دفتر كبير كي لا تجد نفسك في آخر مراحل إخراج الكتاب لديك خمس أو ست دفاتر موزع فيهم أفكار الكتاب D: (شخصياً أستخدم أجندة من التي تصدر مع بداية كل عام، فهي تتيح لي قدر كبير من الحرية والمرونة).

ثم بعد ذلك أبدأ توزيع العناصر على أقسام الكتاب أي كتابة التفاصيل أو العناوين الفرعية في الكتاب، بعد ذلك البدء في كتابة محتوى الكتاب نفسه والتي في البداية أقوم بها عن طريق محرر نصوص بسيط وليس أدوات التحرير المتقدمة وغالبا ما استخدم برنامج FocusWriter أو محرر النصوص الافتراضي في أوبنتو gedit. هكذا يكون محتوى الكتاب من النصوص شبه مكتمل وأدخل على مرحلة أخرى وهي التي تعطي الشكل النهائي للكتاب وذلك باستخدام برامج الإخراج المتقدمة مثل البرامج المكتبية (أنا استعمل المجموعة المكتبية الحرة والرائعة LibreOffice) وفي هذه المرحلة أبدأ بعمل الصور اللازمة للكتاب.

طبعاً هذه الخطوات تختلف من شخص لآخر لكن الرائع في هذا الأسلوب الذي اتبعه أن أثناء هذه الخطوات يكون لديك محتوى مختلف كثيراً عما كتبته أول مرة في محرر النصوص البسيط فمع كثرة المرور على النصوص تجد أن تعدل وتضيف وتنقح ما كتبته سابقاً وبالتالي يكون محتوى الكتاب أفضل كثيراً.

هل شعرت أنك في لحظات تريد الاستسلام، والتوقف عن العمل على الكتاب؟
مع إني أحاول دائما تحفيز نفسي ذاتياً لكي لا أصل لهذه المرحلة، لكن في كتابي الأخير شعرت بهذا! فالضغوط والمعوقات كانت كبيرة جداً والوقت محدود جداً، فأنا مقتنع أن الشخص لكي ينتج إنتاجاً مميزاً ومفيداً يجب أن يؤمن بما يعمله وأن يستمتع به أيضاً فإذا انتفى الإيمان أو الاستمتاع لن يكون العمل جيداً أو على الأقل لن يكون أفضل ما لدى الشخص.
لذا مع تزايد المعوقات كنت مضطراً الضغط على نفسي أكثر لدرجة العمل لساعات طويلة على كمبيوتر وعدم النوم والاعتماد على المنبهات كالقهوة. لكن عند نقطة معينة تجد أنك بهذا الشكل تستهلك من صحتك وروحك وأنه لا يوجد شيء مهماً كان يستحق ذلك ... لذا نصيحتي هي "لا تضغط على نفسك أكثر من اللازم، ويجب أن تعرف متى تتوقف".

ما هو أصعب شيء في تأليف كتاب؟
الاستمرارية والوقت. هناك الكثير من الأشياء التي تؤثر على الشخص كوجود ضغط في العمل أو الإصابة بالمرض (البرد، الإنفلوانزا ... إلخ) أو حتى بعض الأوقات التي تشعر فيها أنك فقط لا تريد عمل أي شيء! (إكتئاب؟) والمحصلة هي بطء في إنهاء الكتاب أو حتى توقف العمل على الكتاب تماماً!

نصيحة مقرمشة تعطيها أي شخص يريد تأليف كتاب، أو أي شخص يريد بدء عمل أو مشروع، وإنهاءه؟
ماذا عن كوكتيل من أهم المقرمشات الصغيرة التي خرجت بها من تجربتي؟
  • كن دقيقاً - اهتم بالتفاصيل خصوصاً الصغير منها فالأشياء الصغيرة هي التي تصنع فرقاً! ولا تخف فالشيطان لا يكمن في التفاصيل : )
  • استفد بوقتك جيداً - هناك مئات الأشياء التي تستهلك الوقت في العصر الحالي، إذا لم تبتعد عن التشويش لن تنجز شيئاً من أهدافك!
  • لا تستلم - مهما واجهت من معوقات لا تتوقف فأسوأ من عدم البدء التوقف في منتصف الطريق ... دائماً إبذل أفضل ما لديك.
  • لا تضغط على نفسك - لكل شخص طاقة قصوى لا يستطيع تعديها -لكونه بشرياً قبل أي شيء- فلا تضغط على نفسك أكثر من اللازم فالفرص موجودة دائماً.



  • لا تبالغ في التخطيط! - مهما خططت ومهما حاولت التحضير الجيد فدوماً تحدث الأشياء غير المتوقعة، فقط ضغ الخطوط الرئيسية في البداية أما التفاصيل ففي وقتها وكن مرناً دائماً.



أخيراً ... أكتب أحلامك كي لا تنساها : ) للتعرف أكثر على كتاب أوبنتو، وللاستفادة منه، زوروا الموقع الرسمي للكتاب: www.SimplyUbuntu.com، ولمعرفة تفاصيل عن أوبنتو وعن الكتاب. ويرحب أحمد كليًا بأي اقتراحات وملاحظات على الكتاب. صفحة الكتاب على فيس بوك - على جودريدز - شعارات الكتاب بأشكال وأحجام مختلفة لوضعها في المواقع والمدونات.