الأربعاء، 8 فبراير 2012

البِرُّ هَيِّن : )

"البِرُّ هَيِّن، وجْهٌ طَلقٌ وكلامٌ ليِّنٌ"

مقولة/حكمة سمعتها من فترة قريبة، المقولة منسوبة للصحابي "عبد الله بن عمر" رضي الله عنهما، ولقيتها بأكتر من صيغة بس دي في اعتقادي أبلغ صيغة، وكتبتها بخط النسخ بقلم ٢ مم، بس للأسف مفيش سكانر حالياً فقولت أجرب أعملها على الكمبيوتر لكن باستخدام خط النستعليق/الفارسي.

قلت أجرب الخط الحر نستعليق نفيس ١.٠٢ - Nafees Nastaleeq v1.02 (الخط متوفر بشكلين كمان نسخ ورقعة)، فضلا عن كونه خط حر، يعتبر من أفضل خطوط النستعليق اللي شوفتها على الإطلاق بسبب استخدامه خصائص متطورة لأوبن تايب OpenType.

نفيس خط حر مفتوح المصدر مرخص برخصة GPL من انتاج مركز بحوث اللغة الأردوية Center for Research in Urdu Language Processing التابع للجامعة الوطنية للكمبيوتر والعلوم الحديثة بباكستان National University of Computer and Emerging Sciences .

زي ما قولت الخط رائع جداً وتقريباً بيدعم أغلب اللغات اللي بتتكتب بحروف عربية من اليمين للشمال زي العربي، الفارسي، الأردو ... وغيرهم، بس فيه مشكلة صغير -جداً- وهي إنه موجه بالأساس لتخطيط لوحات المفاتيح Layout الأردو وبالتالي بعض بتظهر إنها مش موجودة لكن في الحقيقة هي موجودة بس تحت خانة مختلفة، يعني يا إما يتعمل تعديل في ملف الخط نفسه بحيث يكون متوافق مع التخطيط العربي المنتشر في البلاد العربية (ودي حاجة سهلة جداً خصوصاً كون الخط حر) أو هنكون مضطرين كل مرة نكتب أي حاجة بالخط ده نستعمل أداة Character Map عشان نجيب الحرف الناقص!

طبعاً ده مش مناسب في حالة كتابة فقرات طويلة باستخدام الخط ده، لكن ينفع كحل مؤقت في كتابة العناوين والجمل القصيرة. (أعتقد إني هكلم خالد حسني بخصوص الموضوع ده، الموضوع عبارة عن كوبي بيست ويكون الخط مناسب تماماً لمتحدثي العربية).

المهم،
الصورة:

مرة تانية، الصورة مش معمولة ببرنامج كلك Kelk إنما بخط نستعليق نفيس مع بعض التعديلات ببرنامج إنكسكيب Inkscape، تقدر تحمل خطوط نفيس التلاتة من هنا (نسخ - رقعة - نستعليق).

أخيراً، أنا شاكر جداً لحركة البرمجيات الحرة والمصادر المفتوحة اللي خلتني قادر استمتع بخط بالجودة دي تم تطويره في الناحية الأخرى من الأرض : )

هناك 6 تعليقات:

  1. جميلة ما شاء الله =)

    ردحذف
  2. أزال المؤلف هذا التعليق.

    ردحذف
  3. السلام عليكم
    أوردو فونت , هل هذه الخطوط مفتوحة المصدر و ممكن استخدامها أم ماذا؟
    http://pakworld.net/?p=509

    الصراحة أنا مش قادر أصدق إن مفيش خط رقعة مفتوح المصدر أو حتى يمكن شراؤه و أن كل الخطوط العربية مصصمة أجنبيا

    ياريت لو تعرف خط رقعة مفتوح المصدر او مجانى تخبرنى عشان حقوق الطبع و مثل ذلك :(

    ردحذف
  4. السلام عليكم أستاذي أحمد أبو زيد،
    أعجبتني اللوحة والخطوط لكن يبدو أن روابط الخطوط قد تغيرت:

    نستعليق/ فارسي: http://www.cle.org.pk/Downloads/localization/fonts/NafeesNastaleeq/Nafees_Nastaleeq_v1.02.zip
    رقعة: http://www.cle.org.pk/Downloads/localization/fonts/NafeesRiqa/Nafees_Riqa_v1.0.zip
    نسخ: http://www.cle.org.pk/Downloads/localization/fonts/NafeesNaskh/Nafees_Naskh_v2.01.zip

    فعلا خطوط نفيس رائعة جدا، ولكنها أتعبتني قليلا في التصميم، لكن الناتج كان أكثر من رائع. :)

    ردحذف
    الردود
    1. طيب ورينا اللي عملته يا أخي D:

      حذف
    2. تفضل. :)
      هذا تصميم خاص بعيد الأضحى. طبعا عدّلت على النص الناتج بأدوات إنكسكيب المختلفة للوصول لهذا التصميم.
      أرحب جدا برأيك. :)

      https://www.facebook.com/Pi.activity/photos/a.696489127117593.1073741828.696383943794778/707830349316804/?type=3

      حذف