الاثنين، 12 مارس، 2012

مازال لدي وقت

في بعض الأحيان الناس اللي حواليك بتشكك في نفسك من كتر ممارستهم لسلوك معين!

العنبر اللي أنا فيه في الجيش، معايا مجموعة من الشباب بيتراوح سنهم ما بين ٢٠ لـ ٢٩ سنة بس الغالبية في بداية العشرينات، إحنا حوالي ١٥ شخص، من فترة كدا لقيت إن كلهم خاطبين (أو على الأقل قاريين فاتحة ومستنين لما يخلصوا الجيش عشان يخطبوا ويكتبوا الكتاب) ومفيش غيري أنا وواحد تاني بس اللي مش خاطبين!

أغلبنا مؤهلات عليا وفي مجالات متنوعة ومن محافظات مختلفة، بس أنا مش عارف هما على أي أساس خطبوا بالسرعة دي؟ ده بيخلينا (أنا والشخص التاني اللي مش خاطب) نشك إننا أشخاص غرباء فضائيين! طيب يا ترى إحنا كد متأخرين يعني؟

في الحقيقة أنا شايف إني عشان أتجوز عندي بعض الحاجات اللي لازم أحققها الأول، مش أهداف مادية إنما أهداف شخصية تربوية واجتماعية شايف إنها الحد المطلوب عشان الواحد يقدر يكون أسرة!

الظريف إني لما سألتهم، لو واحد شايف بنت كويسة بس عاوز يسألها عن رأيها قبل ما يتقدم رسمي، إيه أحسن طريقة لعمل ده؟
كل واحد قال طريقة، بداية من طرق تقليدية جداً زي خلي اختك تسألها (طيب واللي زي حالاتي معندهوش اخوات بنات كبار؟ يموت نفسه؟ D:) لحد طرق مجنونة جداً D:
بس ولا واحد اقترح فكرة إني بكل بساطة أسألها بشكل مباشر! (مع إني اكتشفت لاحقاً أد إيه الطريقة دي صعبة جداً لكن مازلت مقتنع بيها D:)

عموماً مازال عندي الوقت الكافي لحد ما أخلص الجيش بتاعي ...تلات شهور مش كتير على أي حال : )

هناك 3 تعليقات:

  1. اهلا بك يا صديقى

    فى هذه المرحلة كثير من الرجال ما يقنعون انفسهم بانهم ما ذالوا بحاجة الى الخبرة الحياتية والاجتماعية والنفسية للتعامل مع زوجة او بناء اسرة ولكن مع الوقت تغلبهم الظروف فلا يستطيعون تنفيذ ما كانوا يخططوا له ولان الرياح تاتى دائما بما لا تشتهى السفن فلابد من اغتنام الفرصة اذا اتيحت لان الوقت لا يمكن تعويضه والحياة اقصر من مانتخيل ..

    اما بخصوص الطريقة التى تعرف بها مشاعر من تختار
    (بالمناسبة هذه اصعب خطوة فى هذا الموضوع ... الاختيار )
    عموما افضل طريقة هى السؤال المباشر ولكنه ايضا اصعب شىء
    ولكنه يظل الانسب والافضل والاروع على الاطلاق

    ربنا يرزك ببنت الحلال يا دفعة :)

    ردحذف
  2. فعلاً معاك في نقطة الوقت، خصوصاً إن ناس كتير بتفكر بمنطق "بكره هلاقي الأفضل" ... لكن عمره ما بيلاقيها وبيفضل مستني على أمل يلاقي أحسن.



    ربنا ييسر ويكتب اللي فيه الخير : )

    ردحذف
  3. ربنا يوفقك يا احمد
    كاب

    ردحذف