السبت، 1 يونيو، 2013

بعض من الشهرة!

توثيقاً لحدث مميز حصل معايا مؤخراً كنت كتبت عنه في الفيس بوك الأسبوع اللي فات :-)



ﻷ معلش أنا مش متعود على كدا D:
أنا بقيت مشهور وكدا بقى يا جدعان ههههههههههههههههه D:

وأنا في المواصلات شاب كان قاعد جنبي في الميكروباص بيقولي أنا حاسس إني شوفتك قبل كدا، ف ضحكت وقولته أنا حاسس إني شوفت نفسي كتير قبل كدا برده D:
فبيقولي لأ بجد شكلك مألوف، فديماً أول كلمة بقولها للي بيقولي السؤال ده، ساكن في الهرم؟ قالي ﻷ!
قعدنا تكلم شوية ف بيقولي شغال فين ومش عارف إيه، فبقوله شغال لينوكس تكنيكال سبورت، ولسه بكمل الاسطوانة بتاعت كل مرة حد يسألني إنت شغال إيه عشان أفهمه أنا شغال إيه أصلاً ... طلع عارف لينوكس D:

ف بيقولي وعلى كدا شغال أوبنتو ولا فيدورا؟ ف بقوله ما شاء الله وكمان عارف أوبنتو وفيدورا؟ ده شيء عظيم جداً D:
قالي إنه حاول يجرب مع فيدورا من كام سنة بس رجع لويندوز تاني، لحد من سنة لقى كتاب اسمه "أوبنتو ببساطة" هو اللي خلاه يقدر يحول ولينوكس بقى النظام الأساسي بتاعه!

في اللحظة دي قلبي كان هيقف xD
بس مرضتش أقوله إن أنا اللي مألف الكتاب وقعدت اتكلم معاه شوية، قعد يفخم لي في الكتاب ويقولي ده كتاب ملهوش حل وتصميمه حلو وأسلوبه بسيطة وشوية كلام كله أحلى من بعضه D:
اتكلمنا شوية عن لينوكس والبرامج اللي بيستعملها وإيه اللي ناقصه أو يتمنى يكون فيه ... وفي الآخر قولتله أنا بقى أحمد أبوزيد اللي عامل الكتاب ده DDDDD:

الراجل بصلي جامد كدا ... وعين ما تشوف إلا النور هههههههههه DDDDD:
قعد يتكلم بانفعال وحماسة ... أيوة أنا حاسس إني شوفتك قبل كدا، دا كتاب جامدة وملهوش حل وكلام كتير زي اللي قاله من شوية بس بكل حماسة عنده D:
يا ابني اسكت بلاش فضايح إحنا في مواصلات عامة ههههههههه

اتكلمنا شوية عن الكتاب وإن إن شاء الله في نسخة جديدة في الطريق وشوية كلام كتير كدا لحد ما نزلت المحطة بتاعتي : )

--------------

حاسس إني عندي طاقة انشكاحية تكفيني لمدة ٣ شهور قدام D:

بالرغم من إن الموقف ده حصل معايا كذا مرة بس في أماكن تجمع ناس مهتمة بالكمبيوتر أصلاً (مؤتمر، ندوة، محاضرة ... إلخ) بس دي أول مرة تحصل معايا في مكان عام كدا من واحد لا يعرفني ولا أعرفه D:

موهاهاهاااا تجربة جديدة لطيفة أستهل بيها سنتي الجديدة D:

هناك تعليق واحد:

  1. كل عام وأنت بخير وسعاده.. فعلا مواقف من النوع ده بتشحن البطاريات من جديد خاصه فى مجتمع مثبط للهمم كمصرنا الحبيبه.. تصدق انا قرأت "أوبنتو ببساطه" منذ عامين, كان عندى قبلها فكرة بسيطه عن اللينكس لكن الكتاب خلانى أحبه. لكن كل ما أنوى تركيبه عالجهاز ما اعرفش خصوصا انى بستعمل ال usb.. عالعموم هاحاول فى القريب العاجل لأنى عايز اتعلم شئ جديد.. تحياتى يا أحمد

    ردحذف