السبت، 27 سبتمبر 2008

تشويش داخلي :(





السلام عليكم و رحمة الله و بركاته

كل سنة و انتوا طيبين رمضان فاضله كام يوم و يخلص ، وان شاء الله تكونوا استفدتم بيه على احسن وجه :)

و بالرغم اني مكنتش ناوي اكتب حاجة لحد ما العشرة الاواخر يخلصوا ، الا اني زهقان شوية و مرتبك نوعاً ما ! فقولت اكتب :)

*************

بغض النظر عن الخلافات مع والدي و اللي بقيت متعود عليها ! ، لانه كل شوية يتخانق معايا بسبب او من غير سبب فقط لاني بقعد على الكمبيوتر و مش بنزل الشارع زي اخويا ! - بالرغم من اني بقعد كتيرعلى الكمبيوتر لكن بقوم بكل الالتزامات اللي عليا ! و مش عارف هو مضايق ليه ! -

المهم
مش عارف ليه بقالي فترة كدا مشوش داخلياً ! - من بعد الفطار الجماعي الاخير ده -



مش عارف ليه حاسس باحاسيس غريبة كدا ، احاسيس مختلفة و متداخلة !

حزن ، غضب ، سعادة ، عدم مبالاة ، هيمان ! ، بفكر في كذا حاجة في نفس الوقت ، ارتباك ، الموت ، حاجات عاوز اعملها ، اصحابي القدامى ، حاجات تانية كتير كدا متتوصفش !

مش عارف ده ليه ولا من ايه ! - اعتقد ان لما واحد يحب واحده بيحصله كدا ! ، و انا ولا بحب ولا حاجة !

******************

و المشكلة ان الموضوع كدا طول ! يعني ساعات لما الواحد يجيله اكتئاب الموضوع مش بياخد اكتر من يوم او يومين و بعد كدا كل حاجة ترجع لطبيعتها

انما المره دي الموضوع داخل في اسبوعين ولا حاجة !



على العموم ربنا يسهل :) ، و يمكن لما انزل يوم الكساء اتحسن شوية - يوم الكساء بيكون 29 رمضان برعاية جمعية رسالة للاعمال الخيرية ، و ان شاء الله هنزل موضوع تعريفي باليوم ده بالرغم ان الوقت بقى متأخر :) -

و كل سنة و انتوا بخير :)

هناك 3 تعليقات:

  1. هوا يا أحمد ساعات الواحد كتير بيقع في الحاله دي , وفعلاً تدور متلاقيش سبب مباشر , او ممكن يكون في وانت بتقنع نفسك انوا مفيش !!
    غير جو وروح مكان جديد ولف وان شاءالله هتبقي تمام .

    ردحذف
  2. انا فعلا معتمد على موضوع تغيير الجو ده

    يعني اسبوع كدا و هيكون رمضان و العيد خلصوا و ابدأ انزل الكلية ، و ربنا يسهل :)

    ردحذف
  3. عن الخلافات مع والدك,غالبا هيكون متخوف من ان النت بينمي الانطوائية وحب العزلة الفكر دي عامة عند كل الاهل والى حد كبير المخاوف دي حقيقية والبعض بيتاثر من النت فعلا...
    ربنا يستر على جيلنا كلنا,

    ملاحظة: انا كمان اتقالي الكلام ده :D

    ردحذف