الخميس، 15 أكتوبر 2009

القدرة على اتخاذ القرار مع تعدد الآراء .


السلام عليكم و رحمة الله و بركاته

في مقولة او مثل بيقول ، "اذا كان لديك ساعة فانت تعرف الوقت ، أما اذا كان لديك ساعتين فانت لا تعرف الوقت تماماً"


الموضوع متعلق بالقدرة على اتخاذ القرار في وجود عدد من الاراء الاخرى .

يمكن انا جربت الموضوع ده بشكل فعلي بسبب طرحي لبعض الحاجات اللي عاوز اعملها للمناقشة العامة في المنتديات ، يعني مثلا في (نقاش - استشارة بخصوص قالب كتاب) ، و ده (نقاش - اريد تحديث كتاب "الدليل العملي في استخدام اوبنتو") و (طلب - تصميم غلاف لكتاب "المدخل نحو البرمجيات الحرة و المفتوحة") .

الفكرة بتدور حول الاستفادة من قوة المجتمع و ان تفكير اكتر من عقل اكيد افضل بكتير من تفكير عقل واحد ، لكن في مشكلة ان الشخص اللي عاوز يستفيد من الافكار الكتيرة لازم يكون عنده القدرة على اتخاذ القرار في حالة تعدد الاراء و تعدد مصادرها ، يعني اذا كان في شخص بيفكر في حاجة معينة ، و طرح بعض الافكار ، هيكون من السهل نوعاً ما انه يقرر اي واحد هيختار لان غالبا بيكون في فكرة مرجحة اكتر بالنسبة ليه ، لكن على العكس اذا كان في افكار و اراء اكتر و من مصادر مختلفة الشخص بيكون قصاد مشكلة حقيقية في اتخاذ القرار !

شخصياً معنديش مشكلة في اتخاذ القرارات ، لكن بدي كل شيء حقة من التفكير و التخطيط ، و اذا قررت التنفيذ بنفذ على طول - في مثل صيني بيقول "اذا فكرت طويلا في الخطوة القادمة ستسير لبقية الطريق على ساق واحدة" - ، لكن برده في قرارات لازم تتخذ بسرعة و تتنفذ اسرع ، عشان كدا اعتقد اني محتاج تنمية جزئية سرعة اتخاذ القرار عندي : )


الموضوع الاول بتاع الاستشارة بخصوص القالب ، كان كافي بالنسبة ليا اني مفكرش افتح موضوع مماثل تاني ! ، مش بسبب تعدد الاراء ، انما بسبب بعض المناقشات الرخمة في الموضوع ، و وجود شخص بيقترح الاقتراح و شايف انه الافضل و لازم يتطبق ! - في الموقف اللي زي كدا مش عارف بالظبط مين المفروض يتعصب لرأيه ؟ انا ولا هو ؟ D: - ، لكن في الحقيقة في نهاية الموضوع استفد كتير من التعليقات اللي اتكتبت في الموضوع و ده خلاني افتح اكتر من موضوع تاني عشان اشوف اراء بقية الناس لان بالتأكيد في حاجات هتكون غايبة عني .
ببساطة في المواضيع دي كنت ممكن اعملها من غير ما اخر رأي حد - و أي شخص يعمل كدا مفيش لوم عليه فعلاً - ، لكن فضلت اطرح الموضوع عشان يطلع العمل في افضل صورة .

لكن من ناحية تاني ، زي ما في الموضوع الاخير بتاع غلاف الكتاب الواحد بيقع في نوع من الحيرة او التردد في الاختيار ! ، التصميمات جميلة ما شاء الله و المفروض اختيار واحد في النهاية .

بشكل عام موضوع الغلاف ده مش ذي اهمية اوي ، و كان ممكن استعمل الغلاف القديم فهو جميل برده ، لكن كنت عاوز اعمل اطلاق جديد للكتاب / الوثيقة ، و لإني عمل تغيير في اسم الكتاب حتى و اول نسخة منه كانت من سنتين تقريباً ، و في السنتين دول اتعلمت حاجات كتير ، بالاضافة الى ان المدخل للبرمجيات المفتوحة كان اول وثيقة اكتبها باستعمال اوبن اوفيس و كانت اول تجربة للتعامل مع برامج الاوفيس بشكل موسع اساسا !

ده مثال بين صفحة من النسخة اللي بعمل فيها دلوقتي و بين النسخة القديمة - بستعمل اوبن اوفيس في كتابة الكتاب - .

النسخة الجديدة النسخة القديمة
اضغط على الصورة للتكبير
فرق كبير بينهم ، سنتين مش وقت قليل برده D:
** الجزء ده من الاجزاء القليلة المتشابهة مع النسخة القديمة .
بالمناسبة الكتاب ده كنت عملته في الفترة اللي كنت بنتقل فيها من وندوز لـ جنو/لينوكس ، يعني كان اخر حاجة اعملها على وندوز ، و يا للسخرية ، دلوقتي بكتب على جنو/لينوكس موضوع عن برامج وندوز : )

----------------

نرجع تاني موضوع الغلاف ، لحد دلوقتي مش مستقر على واحد معين ، بس ما زال التصميم اللي عملته عاجبني ، لكن مشكلته انه عليه نسخة معدلة من شعار جتك+ - gtk+ هى مكتبة حرة مفتوحة المصدر و هى اللي مستخدمة في الواجهة جنوم - ، هو الموضوع مفهوش مشكلة لان الكتاب مش هيتنشر رسميا ، انما موضوع الشعارات و الاسماء التجارية ساعات كتير بتعمل مشاكل !
الشعار الرسمي هنا اهه GTK+ logo

غلاف الكتاب

بحب جدا الاغلفة البسييييييطة ، بيكون ليها رونق خاص كدا : )
** بالمناسبة ، انا مليش في التصميم بس كانت محاولة و عجبني التصميم D:

------------

عموماً موضوع الغلاف ده بيكون اخر حاجة قبل نشر الكتاب الالكتروني على النت : )
مجرد تدوينة لكسر الروتين : )

هناك تعليقان (2):

  1. السلام عليكم

    سبحااان الله !!

    أنا كمان لسه عاملة حركة مشابهة إمبارح على الفيس بوك .. استشارة جمعت فيها صديقاتي اللى اثق في آرائهم وطرحت عليهم معلومات حول وظيفة جديدة جايالي ومش عارفه اقبلها ولا لأ

    وفعلا امبسطت جدا من الآراء اللى انهالت عليا وكلها اراء ليها وجهة نظر جيدة

    وفعلا وأنا بقرأ الآراء قعدت أفكر إنه من المهم بعد معرفتي بالآراء دي إني أعرف أستفيد منها سواء في اتخاذ القرار بشأن الوظيفة أو حتى في المستقبل وفي حياتي بشكل عام

    وغير كده خطر لي استفادة اخرى من حكاية الاستشارة دي

    إنك باستشارة واتنين بتعرف مين صاحب الآراء الحكيمة والمفيدة والموثوقة من اللى تعرفهم وبكده تقدر بعد كده تجاوب لو سئلت في المستقبل : من الصديق الذي تثق في آراءه وخبرته ؟

    ما خاب من استشار

    مقولة صادقة جدا

    على فكرة أنا عملت قبل كده تدوينة عن الحيرة اللى بتصيب الإنسان مع كثرة المعطيات !

    وفيه أمثلة كتيرة عن الحكاية دي :)

    وبجد ما شاء الله التطور واضح بشدة بين الصفحتين .. ربنا يبارك لك

    بالنسبة لتصميمك للغلاف جميل فعلا

    هو محتاج نوع من الإطار حول التصميم .. مش عارفه انا قعدت اتخيل اطارات للتصميم لكن لقيت إن الشكل النهائي يمكن ميطلعش حلو !

    بس فعلا التصميم من غير اطار مش كامل !

    ردحذف
  2. > Maha :
    و عليكم السلام و رحمة الله و بركاته

    فعلا كلام حضرتك مظبوط ، و الاهم من الاراء ان الشخص يقدر يستفيد من الاراء و الافكار دي و يكون عنده القدرة على الاختيار - ميكنش متردد يعني - ، و اكيد لازم اقرا التدوينة اللي حضرتك قولتي عليها : )

    بالنسبة للغلاف ، موضوع الاطارات دي بقى موضه قديمة D:

    بس المهم يكون ليه اطار خارجي بلون واضح - رصاصي مثلا - عشان لو اتوضع في صفحة بيضة تكون معالم التصميم واضحة .

    : )

    ردحذف