الأحد، 25 أكتوبر 2009

دورة تنمية مهارات الخط العربي في جامعة القاهرة .


السلام عليكم و رحمة الله و بركاته


انهارده حضرت أول محاضرة من 10 محاضرات لتنمية مهارات الخط العربي ، المحاضرات تبع جامعة القاهرة و بتقدم بشكل مجاني ، و كانت محاضرة لطيفة جداً .

الدورة دي جت في معادها تمام ، لان موضوع الخطوط و الكتابة من الحاجات اللي مهتم بتنميتها الفترة اللي جاية .
كنت من وقت للتاني بشوف برنامج بيجي على قناة الهدى و هى قناة اسلامية لغير الناطقين بالعربية و برامجها بتتقدم باللغة الانجليزية ، البرنامج ده كان عن تعليم الخط و اغلب الناس اللي بتتعلم لغتهم الام مش العربية ، كان شعور جميل جداً ان الواحد يشوف مدى شغفهم بتعلم الخط العربي ، و دي كانت حاجة محفزة جداً ليا ، ازاي اكون عربي و مش بكتب بشكل يليق بلغة زي العربية !
بالمناسبة خطي مش وحش ، لكن احب يكون افضل : )




المحاضرة كانت لذيذة جداً و الاستاذ اللي كان بشرح لطيف جداً و شرحه حلو ما شاء الله .
ربنا يسهل في بقية المحاضرات و تكون بداية لتعلمي فن الخط العربي : )

و احب اقول تاني ، المحاضرات مجانية ، و لو حبيت تحضر تعالا و سجل اسمك بداية من المحاضرة الجاية ، الدورة معمولة في راعية الشباب (جنب الملاعب) كل يوم حد و اربع من الساعة اتنين للساعة اربعة .

: )

هناك 5 تعليقات:

  1. والله يا أحمد بفكر فيها من زمان , بس للأسف المواعيد دي متناسبنيش .

    ردحذف
  2. انت سابع شخص يقولي المواعيد دي مش مناسبة ، في ايه ؟ هههههههههه D:
    بس بجد الدورة ممتعة جداً ، امبارح كان تاني محاضرة ، و كانت ممتازة ، و المحاضر أكتر من ممتاز ما شاء الله عليه ادب و تواضع و علم ، ربنا يكرمه بجد : )

    ردحذف
  3. أخى الكريم

    هل ستعقد هذه الدورة فى وقت قريب مرة أخرى

    - إذا نويت الذهاب فى المحاضرة الثالثة ماذا سأفعل فى المحاضرتين السابقتين خاصة أنى أهتم بالبدايات والتفاصيل جدا

    - هل يمكن تفصيل مكان الدورة وهل يسمح لأى شخص بالدخول وهل يكون الدخول من باب الجامعة الرئيسى

    هل يوجد أى تفاصيل أتصال بالمحاضر أو الجهة - إذا كانت خارج الجامعة-

    ردحذف
  4. Nasr Alshazly :
    معنديش خلفية اذا كانت هتتعمل تاني قربي و اعتقد انها مش هتتعمل .

    تعالا انت بس و هتلاقي المعلومات بتتعاد تاني و لو سألت الاستاذ اللي بيشرح هيقولك على انت عاوزه تاني ، و كمان مفي ملزمة صغيرة كدا بتوضح الكلام اكتر .

    مش عارف اذا كان بيسمح لأي حد يجي ولا ﻷ ، لكن بشكل عام تعالا و اسال ، و الدخول من باب المدينة الرياضية بجانب المدينة الجامعية ، لما تدخل المدينة الرياشية هتمشي شوية و هتلاقي ادارة رعاية الشباب على ايدك الشمال ، و هو ده مكان الدورة .

    اخيرا ، في حاجة ممتازة جدا اسمها مدرسة الخط ، و دي مقرها في مدرسة السعيدية الثانوية في الجيزة (قبل الجامعة بشوية) ، ممتازة جدا و بتدي دورة متكاملة و مصاريفها قليلة جداً (٦٠ جنيه في السنة) ، و كمان الدروس مسائية ، يعني مناسبة جدا للناس اللي بتشتغل (و مش لازم تكون منتظم ، أي وقت فاضي فيه روح احضر و استفاد)

    ان شاء الله ناوي أكتب موضوع عنها قريب : )

    ردحذف
  5. اكاديمية شوقى للخط العربى دورات تدريبية وورش فنية القاهرة الاسكندرية 01000373872

    ردحذف