السبت، 2 يناير 2010

أول تدوينة في السنة الجديدة : )


السلام عليكم و رحمة الله و بركاته

بما ان معايا لابتوب واحد صاحبي ، قولت اكتب تدوينة على السريع كدا : )

----

أستقبلت أول يوم في السنة الجديدة بمغص معوي شديد ، من حوالي الساعة خمسة فجر أول يوم لحد يا دوب لسه حاسس بتحسن من كام ساعة بس .
مع اني مش فاكر اني كلت اي حاجة غريبة ، بس الواضح انه كان في ميكروب في حاجة كلتها أو اني اخدت برد ! (مش وقته خالص اساسا !) طبعا في الحالات اللي زي دي مفيش احسن من الينسون ، الشمر ، كراوية و النعناع : )


من ناحية تانية ، فاضل حوالي اسبوعين على الامتحانات ، المواد التيرم ده حلوة بس مش قادر اركز بشكل كويس : (
حاسس اني مش مجمع كويس !! هحاول اركز مجهودي في الاسبوع ده عشان اراجع على الحاجات اللي لسه مخلصتهاش : )
دعواتكم بقى : )


من كام ساعة اكتشفت ان في شبكة وايرلس قوية واصلة في الغرفة اللي بذاكر فيها ، و بيستخدم تشفير wpa ، اعتقد ان دلوقتي فك الشتفير ده بقى سهل ، بالكتير ربع ساعة و يكون خلصان ، اخلص بس الامتحانات و العب شوية مع الشبكة دي (هجرب بس كسر التشفير مش هعمل حاجة )



اخيرا ، اعتقد اني سأكون "أحمد أبوزيد"على الانترنت و مش هيكون في "Skeleton_Eel" تاني ، هكون على الانترنت بهويتي الحقيقية بدل الاسم المستعار اللي كنت عايش بيه لمدة اربع سنين تقريبا على الانترنت .
انا خلاص تقريبا اتخذت قراري ، و ده لعدد من الاسباب ممكن ابقى اعمل موضوع عنها لما اخلص الامتحانات ان شاء الله ، و بدأت خطوات الانتقال ، اسم الايميل هيتغير و كمان رابط المدونة (و طبعا واجهت اول مشكلة من المشاكل اللي عشانها كنت اختارت استعمال اسم مستعار جديد و فريد ، و هي مشكلة ان الاسم ممكن يكون حد مستخدمه في المنتديات و المواقع زي بريد gmail) .

بالاضافة اني قررت عمل بعض التغييرات في كذا حاجة تانية مهمة .


عموما ، الموضوع هيخلص ان شاء الله بعد الامتحانات : )



--------


دعواتكم بقى عشان الامتحانات دي شكلها مش مبشر خالص :s
و يا رب تكون السنة الجديدة دي سنة جميلة علي كل الناس و يتحقق فيها كل اللي بيحلموا بيه : )

هناك 8 تعليقات:

  1. وعليكم السلام ورحمة الله

    واضح إنه ميكروب في الجو لاني انا كمان كنت واخده دور جامد لمدة أسبوع بس كان حساسيه :D
    القرفه والينسون مهدىء وحلو أوي انا دايماً بشربهم ..

    ربنا يوفق حضرتك في الإمتحانات بس ابقى اادخل طل ع المنتدي في موضوع هناك محتاجين حضرتك فيه :D

    ومبروك الإسم الجديد الأصلي أحسن حاجه الواحد يبقى بإسمه الحقيقي , تقريباً بسجل بإسمي الحقيقي في كل حاجه بإستثناء المدونة وقريباً هاغيره إن شاء الله


    عذرا ع الرغي : )

    ردحذف
  2. ربنا يجعلها سنة سعيدة يا أحمد عليك , وتحقق الي نفسك فيه .

    ردحذف
  3. وعليكم السلام ورحمة الله وبركاته :)

    معلش ربنا يجعله في ميزان حسناتك :)
    هو بيبقى شيء متعب ومؤلم بس في نفس الوقت بيخلي الواحد يعيد حساباته ويشوف الحاجات اللي حواليه من ناحية تانية
    على الأقل من وجهة نظري :D

    حضرتك بس حاول تركز على المواد بتاعتك وربنا ييسر لك أمرك
    حاول تبتدي بحاجة بتحبها علشان نفسك تتفتح للمذاكرة وبعد كدة هيكون سهل بإذن الله :)

    معلش أول تعليق ليا بس طويل شوية :D

    و يا رب تكون السنة الجديدة دي سنة جميلة علي كل الناس و يتحقق فيها كل اللي بيحلموا بيه : )
    اللهم آمين..

    ردحذف
  4. بالنجاح والتوفيق يا رب

    سنه سعيده

    زاخره بطاعة الرحمن

    اتمناها لك :)

    ردحذف
  5. السلام عليكم يا أبو أحميد .. موفق في الامتحانات
    تفضل هذه قصيدة ألقيتها بصوتي واسمها : وتبقين يا مصر فوق الصغائر لفاروق جويدة
    http://ahmedsherif-eg.blogspot.com/2010/01/blog-post_26.html

    ردحذف
  6. شهرين خلصت في السنة الكديدة وأنت لسه غايب ^_^
    (محمد يتحدث المصرية :P)

    يالله تنجح في ما يسمى التيرم، بل وتتفوق بامتياز..
    ومبروك الإسم الجديد يا أحمد أبو زيد.
    صرت أبا قبل الموعد :P

    ردحذف
  7. شكرا ليكم جميعا ، سعدت فعلا بمشاركاتكم : )



    > محمد :
    انا موجود اهه D:

    ردحذف
  8. عجيب، اكتشفت اليوم وللصدفة أن جديد التدوينة لا يظهر عندي، والسبب أنني كنت أتصفحها دوما عن طريق بروكسي لم يجدد محتوى الصفحة ^_^

    يقال إن الملك حكى لوزرائه وحاشيته نكتة ضحك منها الجميع إلا واحدا، وبعد أسبوع وجدوه يضحك فعرفوا أنه للتو فهم نكتة الملك وللتو أضحكته!

    شيء من هذا حصل هنا :P

    ردحذف