السبت، 21 أغسطس 2010

نجحت ^_^


السلام عليكم و رحمة الله و بركاته

# ملحوظة: التدوينة طويلة، لو عندك حاجة، خلصها و عدي علينا مرة تاينة D:



الحمد لله النتيجة ظهرت امبارح و نجحت صافي في الفصل الدراسي التاني ^_^ كان ترم رخم فعلا!

بس للأسف لسه معايا مادة من الترم الأول، و واقفة على درجة! عملت فيها التماس الترم الأول بس مخدتش أي درجة : (
المادة سهلة و لولا الموضوع بتاع الترم الأول كنت عديت منها بتقدير كمان، بس بصراحة مش عاوز امتحنها تاني، هحاول أشوف إذا كان في أي إلتماس عشان أخد الدرجة دي.

و للأسف برده بسبب إني عييت الترم الأول، أول سنة أنزل عن جيد بعد ما كنت جيد مرتفع و كان فاضلي كام درجة على الجيد جدا (جيد جدا في حقوق القاهرة يعني تقدير ممتاز، حتى أوائل الكلية بيكونوا جايبين جيد جدا مش امتياز، بس طبعا بيكونوا قريبين جدا من الامتياز) بس الفرق بسيط و إن شاء الله يتغطى بدرجات التلات سنين اللي فاتوا : )

الحمد لله : )


لاحظت شيء غريب جدا، إن السنة بتاعت نهاية كل مرحلة اعيا فيها، او زي ما بنسميها سنة الشهادة (تالتة اعدادي، ثانوي عام، رابعة كلية!) كشخص مسلم طبيعي أكون مؤمن بوجود الحسد، بس مش بحب الاشارة للحسد لاني بحس إنه شماعة الفاشلين! و كمان حتى مع الحاجات اللي حصلت دي مفيش مرة الموضوع أثر عليا بشكل كبير و لله الحمد : )

يعني في امتحانات تالتة اعدادي جالي التهاب في جفون العين، كنت داخل الامتحانات بعينين شبه مغلقتين!
تانية ثانوي، نزلة شعبية حادة أثرت عليا بشكل كبير، لكن كان من حسن حظي -و للأسف في نفس الوقت!- إن الكلية اللي كنت عاوز ادخلها (كلية الحقوق) كانت من أقل الكليات مجموعا! (للاسف عشان الكلية دي مش واخدة وضعها كويس زي باقي الكليات، و ناس كتير بتعتبرها كلية من كليات القاع!) و الحمد لله فترة الثانوي عدت على خير و مجموعي كان مجموعي أكبر من المجموع المطلوب في الكلية بل و بفائض كويس كمان.
رابعة كلية الحقوق، الفصل الدراسي الأول مرضت تلات مرات خلال خمس امتحانات! يعني دمار!

الكويس في الموضوع إن كل المرات اللي عييت فيها كان بسبب أمراض مؤقتة، يعني الحمد لله الإلتهاب بتاع العين كان بسبب ميكروب بسيط مش مرض مزمن. أثر النزلة الشعبية راح بشكل كبير خلال سنتين. العيا بتاع الفصل الدراسي اللي فات برده كان ميكروب بسيط و مفيش شيء مقلق.

الحمد لله الذي عافنا مما ابتلى به كثيرا من خلقه، الحمد لله


-------------------------


الفصل الدراسي الأول كان شنيع فعلا، مجموعة من العوامل حصلت مع بعض فكانت قصم ضهر : (
مع إني مش بحب أسرد المشاكل اللي بتحصلي عشان بحس إني عامل زي التلميذ البليد اللي بيدور على حجة يتعذر بيها، لكن ممكن يكون اللي هكتبه محفز لأي شخص، و طالما الواحد بذل مجهود كويس و مكنش بسبب تخاذل منه، فربنا عمره ما هيضيع جهده : )

مرضت  تلات مرات في فترة الإمتحانات! (كنت مش قادر اتحرك من السرير مش مجرد عيا خفيف زي البرد!) و هما أصلا كلهم خمس مواد! و المشكلة كمان إن الموضوع مكنش مرض بس، المواد اللي مرضت فيها بس الحمد لله عديت فيها لاني كنت مذاكر، المشكلة بقى كانت في المادة اللي نزلت فيها، اللي حصل كالتالي:

المفروض الواحد بيقسم المنهج لأجزاء في المراجعة، راجعت جزء كبير من المنهج، يومين قبل الإمتحان مرضت، و بالتالي آخر جزء ملحقتش أراجعه، دخلت الإمتحان، لقليت الدكتور جايب امتحان غريب جدا! المادة جزئين، الطبيعي إن الامتحان بيغطي اغلب اجزاء المنهج من الجزئين، لكن اللي حصل إن الامتحان كان عبارة عن سؤال إجباري و تلات أسئلة اختياري نختار منها اتنين، المشكلة بقى إن الأسئلة الاختياري كانت عبارة عن فقرتين "أ" و "ب"، الجزء ب في التلات اسئلة عبارة عن جزئية واحدة في الكتاب! يعني اللي مذاكرش الجزئية دي هيضيع منه اكتر من تلت الامتحان، و الجزئية دي اللي ملحقتش اراجعها عشان عييت! أخيرا الدكتور كان من النوع اللي مش بيدي الدرجات بسهولة، فالمحصلة إني جبت ٧ (درجة النجاح ١٠ و الشخص ليه ٤ درجات رأفة في السنة)

الامتحان التاني كنت عيان فيه برده، بس الامتحان ده مش مشكلته إني عيان، المشكلة إن المادة طويييييلة جدا (كتاب حوالي ١٠٠٠ صفحة و المشكلة إن المادة مفهاش عملي، كله نظري، يعني كنت بدخل لجنة الامتحان مش برفع راسي من على الورقة غير بعد انتهاء الوقت يعني تلات ساعات!) نفس الدكتور كان بيدينا السنة اللي فاتت، كنت عارف الامتحان بس ملحقش أحل اكتر من نص الامتحان! السنة دي اتكرر نفس الوضع بالظبط نفس الدكتور، نفس المادة الكبيرة، نفس نظام الامتحان، نفس الوضع، و بالتالي نفس الدرجة، ٨!

كدا المادة التانية هتتجبر و تبقى ١٠، و يتبقى درجتين رأفة، يعني مش هينفعوا مع المادة اللي بـ ٧! عملت إلتماس في المادين، عشان أخد أي درجة، لكن للأسف مفيش أي حاجة.



نيجي للفصل الدراسي التاني، كان كبير جدا، ست مواد كل مادة مجزئة لأكتر من كتاب (من كتابين لأربعة، و المادة اللي كتاب واحد كانت حوالي ٩٥٠ صفحة!) في وقت الامتحانات كنت بحاول بكل الطرق الابتعاد عن أي شيء ممكن ينقلي أي مرض! لدرجة كنت بغسل ايدي بالصابون أكتر من ١٤ مرة في اليوم ههههههههههه D:
لكن لإن المكتوب على الجبين لازم تشوفه العين، و لكل شخص قَدَره، في ليلة مادة الدولي الخاص و اللي كان فيها دكتور صعب و دقيق، معروف إنه مش بيدي الدرجات غير بالقطارة! يعني لو جبت ١١ في مادته يبقى انت كدا شخص متفوق D: (مع ذلك هو دكتور محترم جدا ما شاء الله و عنده علم غزير جدا في مجاله)، دخلت أنام شوية عشان أبدأ المراجعة خلال ليلة الامتحان (و ده أهم وقت بالنسبة ليا عشان بجمع فيه المادة كلها) و فترة الإمتحانات معروف فيها إن الكهربا بتقطع فيها كتير في أجزاء كتير من القاهرة الكبرى، اللي حصل إني لما نمت الكهربا قطعت، فحد فصل المكيف، فلما الكهربا جت تاني المكيف مكنش شغال، فطبيعي و أنا نايم أحس بالحر فرميت الغطا من عليا، بعد فترة حد شغل المكيف بس مغطانيش D: و أنا مكنش عندي نية أطول في النوم فكنت في مكان غلط، كنت في مواجهة هواء المكيف تماما! الخلاصة أخدت برد في معدتي! يعني الموضوع المرة دي مش مؤثر بيولوجي زي الميكروبات، إنما تأثير فيزيائي :D

طبعا مع أول أكل نزل في معدتي بعد ما صحيت، بقى عندي ألم فظيع في بطني، لدرجة مش قادر حتى أقعد! بدأت أعمل مشروبات سخنة يمكن تفيد، لكن للأسف كانت محتاجه وقت طويل، و مكنش في حل غير الدواء، لكن أنا كنت عارف النتيجة الحتمية للدوا، النوم! المفروض إني كنت اراجع لمدة ١٠ ساعات تقريبا قبل الامتحان، لكن على ما ألم بطني يخف انتهى الحال بساعتين بس! ساعتين مع كمية كبيرة من الاحباط و التوتر، قلت خلاص المادة دي كدا هنزل فيها : (

بس بعد شوية صغيرين بدأت أحفز نفسي ذاتيا، مع أقل من ساعين مراجعة، معنديش شيء أخسره! فقلت لازم أبذل أفضل ما عندي، لازم أوصل لأقصى مجهود عندي. راجعت اللي أقدر عليه و روحت الامتحان، و كانت المفاجأة
D:
الدكتور جايب امتحان خزعبلي! D: امتحان شكله غريب غير الأسلوب المعروف للدكتور، طويل، اغلبه عملي، كل سؤال فيه أ ب ج، مقسومين لـ ١ ٢ ٣ !!!!
حتى الناس اللي ذاكرت كويس كانوا بيجاهدوا للحصول على الدرجات، يعني مشكلة على مستوى الدفعة كلها! يعني أنا لو قلت مفيش أمل إني أعمل حاجة في ساعتين قبل الامتحانات كنت هكون بذاكر في المادة دي دلوقتي!!

بالنسبة ليا العملي أفضل بكتير عشان محتاج فهم أكتر من الحفظ، و الحمد لله عديت في المادة دي ^_^ لكن للأسف ناس كتير نزلوا فيها، و جايبين أرقام غريبة يعني ٢ أو ٣ من ٢٠!

ده غير امتحانين كمان، كانوا صعبين جدا! فالمحصلة النهائية تلات امتحانات صبعة جدا و تلات امتحانات صعبة بس D:
مثلا في مادة الدكتور أول مرة يحاضر لسنة رابعة، و بالتالي معندهوش أي امتحانات سابقة، و كمان مرضاش يقول أي شيء على شكل الامتحان حتى! و كان في جزء عملي نزل في الآخر قالنا مقرر عليكم و ممكن يجي في الامتحان، يعني مفيش أي معلومة واحدة ممكن تعين الطلاب في المذاكرة! في الآخر مجاش عملي (يعني خلانا نذاكر جزء هو مش ناوي يجيبه!) العملي جه نظري!! يعني الاجزاء اللي بتيجي فها مسائل عملي جبها نظري يعني ارتباك لأبعد الحدود D:

بس الحمد لله أهو خلص بخيره و شره، و مع إنه كان ترم رخم جدا بس كان ممتع برده ^_^

 


-------------------------


بالمناسبة اللي جابلي النتيجة الترم ده برده صديقي الصدوق "باسم"، قولت يعني الراجل جابلي نتيجة ٧ فصول قبل كدا خليه يكمل المجموعة و يجيب التامن ههههههههههههه
شخصيا مش بكون متلهف على النتيجة زي أغلب الناس! تطلع وقت ما تطلع، يعني لو طلعت بدري هاخد درجات أكتر؟ ولا لو اتعلقت انهارده و جبتها بكرة هلاقي الدرجات قلت؟ مش عارف الناس مسروعة على إيه D:


كدا يعتبر -تقريبا- خلصت مرحلة الجامعة، كانوا أربع سنين رائعين فعلا، استمتعت كتير، اكتسبت خبرات أكتر، و الأكيد اصبحت أنضج بكتير : ) ربنا ييسر في الفترة اللي جاية : )

هناك 18 تعليقًا:

  1. طيب اخلص اللي ورايا واعدي عليكم مرة تانية :D

    ردحذف
  2. مبروك يا أستاذ أحمد النجاح والتخرج ، وربنا يكرمك في الإلتماس إن شاء الله هما سعات بيعملوا حجات غريبه جداً
    أنا كنت جايبه 74,67% والجيد جداً من 75% شوف حضرتك أنا لما كان حد يسألني جايبه تقدير إيه كنت بقول جيد لأني مقدرش أقول جيد جداً بس هو واقف على 3 من عشره !!

    عموماً خير إن شاء الله ، المهم فرحة التخرج والحياه الجايه إن شاء الله

    ردحذف
  3. هو الواحد يعرف صدفة من توقيعك كدا
    مبارك يا ريس وربنا يكرمك في الدرجة دي

    ربنا يارب يكتب لك النجاح دايما في حياتك

    عقبال الجيش بقى :P

    وتكمل وكيل نيابة ولا مش ناوي :D

    بالتوفيق يارب وربنا ييسر لك ويسعدك في كل مستقبلك
    اللهم آمين :)

    ردحذف
  4. سلام الله عليك

    أحمد أبو زيد !

    الرد نزل أهو خلاص الحمد لله ^_^

    ألف مبروك لحضرتك و الحمد لله علي كل شىء في المادة دي

    ربنا ييسر لك يا رب و تاخد الدرجة دي و تعدي

    و ربنا يكرمك يا رب في حياتك الجاية إن شاء الله

    و في ليونكس و الخط العربي كمان ^_^

    ردحذف
  5. ألف مبروك يا أحمد، بإذن الله تعدي المادة علي خير :D

    ردحذف
  6. أ. احمد ابو زيد

    مبروك النجاح يا فندم وان شاء الله المادة تعدي بخير ^_^

    عاوزين مواضيع لينكساوية اكتر بقى :D

    ردحذف
  7. ربنا يكرمكم كلكم يا رب، و شكرا على الدعوات الجميلة ^_^

    -------

    >ابراهيم:
    ماشي يا ابراهيم، عدي علينا مرة تانية p:

    ـ
    > ophelia-CFD:
    الله يبارك في حضرتك ^_^
    فعلا حاجة رخمة جدا لما الموضوع يقف على كام من عشرة :@
    بس أكيد خير إن شاء الله، و طالما الواحد عمل اللي عليه، ربنا مش بيضيع مجهود حد أبدا : )

    بس إيه الجيد جدا اللي من ٧٥٪ دي D:
    إحنا عندنا الجيد جدا من ٨٠٪، و في درجات رأفة للتقدير التراكمي (تقريبا درجتين أو اربع درجات)، يعني لو واحد فاضله على التقدير الأعلى أربع درجات بياخدهم عشان يدخل في التقدير ده.

    >Dr. Osama:
    معلش يا دكتور، المشكلة إن النتيجة بتاعتنا اتأخرت بغباء زي من انت شايف، يعني أنا نفسي مكنتش اعرف p:

    جيش؟ أنا شخصيا عاوز ادخل الجيش D: بس سنة واحدة مش اكتر D:
    النيابة بقى مش عارف إذا موضوع المادة ده هيأثر ولا إيه!
    عموما ربنا يسهل يعني ^_^

    ردحذف
  8. > sh!ko:
    تمام ^_^
    الله يبارك في حضرتك، و ربنا يسهل في الدرجة دي و الواحد يخلص بقى D:
    و ربنا يستر علينا في الفترة الجاية D:

    ـ
    >abom:
    الله يبارك فيك يا عبد الرحمن ^_^
    ربنا يسهل و الواحد يخلص من المادة بدون امتحان D:
    دعواتك بقى ^_^


    >bisoo:
    الله يبارك في حضرتك ^_^
    عقابلك إن شاء الله ^_^

    و أكيد في مواضيع لينوكساوية كتير في الطريقة، يا مسهل D:

    ردحذف
  9. ألف مبروك يا ولد

    المفروض تعمل حفلة هنا بمناسبة وطوئي المدونة وإرسالي لتعليق -_-

    ردحذف
  10. الف مبروك استاذ احمد
    بالتوفيق فى حياتك العمليه ان شاء الله :)

    ردحذف
  11. 80% أول مرة أعرفها بصراحه بس هو عندنا 75% رضا أوي ، في كلية زي كليتنا حضرتك عارف المآساه يعني -_- !
    ورأفه كمان ، طب ياريت كان ينفع حضرتك كنت قولت بدري شويه قبل الشهاده ما تطلع :D

    خير خير ، عقبال الجيش ثم الشغل ثم الجواز إن شاء الله

    ردحذف
  12. مبرووووووووووووووك النجاح يا زلمه

    ردحذف
  13. أزال المؤلف هذا التعليق.

    ردحذف
  14. الجيد جدا يا ريس في الكليات العملية من 75 % والامتياز من 85 %

    وهو انت جيشك مش سنة ؟!!
    وإن شاء المادة مش هتأثر في حكاية النيابة دي

    ربنا ييسر لك الخير يارب
    اللهم آمين :)

    ردحذف
  15. مش شرط يا دكتور أسامة في الكليات العملية فقط

    انا كليتي مش عملية ولكن الجيد جدا من 75 % :)

    بس هي نظام الجامعات بصراحة

    ردحذف
  16. congrats ^_^
    مُبارك وفعلا حضرتك متعرفش الخير فين =)

    ردحذف
  17. >أحمد كمال:
    ألله يبارك فيك : )
    أعتقد مفيش أفضل من بعض العكوش المضيئة للاحتفال بتشريفك مدونتي المتواضعة p:


    >أنشودة:
    الله يبارك في حضرتك، و عقبالك إن شاء الله : )


    >Ophelia - cfd:
    دا طلع تقريبا احنا الكلية الوحيدة اللي فيها الجيد جدا من ٨٠٪ و الامتياز من ٩٠٪ D:
    خير إن شاء الله : )
    و من كيبورد حضرتك لباب السما D:

    ردحذف
  18. >Dr. Osama:
    دا طلع مش الكليات العملية بس، دا كل البلد كدا، إحنا الوحيدين اللي بينضحك علينا ولا إيه D:
    انا كدا عرفت ليه مفيش حد عندنا بيجيب امتياز D:

    أيوه الجيش سنة، بس مين عارف ممكن حظي يكون ضابط احتياط ولا حاجة D:

    ـ
    >bisoo:
    مش عارف بقى هي كل كليات الحقوق كدا ولا، جامعة القاهرة فقط، بس فاكر إني من فترة كبيرة قريت مقال بينتقد كليات الحقوق في الأقاليم، من ناحية سهولة الإمتحانات، و بالتالي أغلب الدفعة بتكون جايبة تقديرات! و إحنا هنا في القاهرة آخر واحد جاب تقدير تراكمي امتياز كان في سنة ٩٦ تقريبا D:

    ـ
    >Dina:
    الله يبارك في حضرتك ^_^
    اكيد خير إن شاء الله، ربنا ييسر الحال : )

    ردحذف