الاثنين، 18 أكتوبر 2010

كتاب - قل لا واكسب نفسك.

كتاب قراته قبل كدا وكتبت عنه في أحد المنتديات الطلابية، بس شكلي محتاج أقراه تاني عشان أنا إنسان وبنسى!
كل شخص جواه جزء لطيف، وده شيء جميل، بس لو حسيت إنك لطيف أكتر من اللازم يبقى عليك تتخلص من الموضوع ده!
------


الكتاب متعلق بمشكلة موجودة عند اغلب الناس وإن كانت بنسب متفاوته بين شخص والتاني، كل فترة لما الواحد بيقيم نفسه ويشوف عيوبه اللي المفروض يتخلص منها ويشوف مميزاته اللي المفروض يزودها، كان من ضمن العيوب اعتقد إني لطيف زيادة عن اللزوم ومش بحب ازعل حد! الحمد لله اتخلصت من جزء كبير من المشكلة قبل ما اشوف الكتاب حتى، بس لما قريت الكتاب حسيت إني فعلا كان لازم اتخلص منها من زمان!

الكتاب "قل لا واكسب نفسك" لمهندس اسمه حسين جمعه، باختصار بيتكلم عن الناس اللي عندها مشكلة في قول كلمة "ﻷ" ومش بس المهم إن الواحد يقول ﻷ، إنما يقول لأ وميحسش بتأنيب الضمير او عدم الارتياح!

https://lh6.googleusercontent.com/_tb7UW2nr6KA/TWlodgQWcLI/AAAAAAAAAUU/_0DUthzsSs4/sayno.png

بالرغم من إن مقدمة الكتاب فيها نوع من بهرجة الكتب الأمريكية وكانت هتخليني اقفل الكتاب! بس ديما مش لازم الواحد يحكم على الكتاب من عنوانه، أو حتى مقدمته! (أصلا بعد كدا لما قريت نبذه عن المؤلف لقيته فعلا كان عايش في أمريكا!). الكتاب بشكل عام لذيذ، ويسرد بعض الحكايات والمواقف اللي اتقال فيها "ﻷ" فكانت منقذة لصاحبها، والمواقف اللي كان لازم يتقال فيها "ﻷ" وإيه اللي حصل لصاحب القصة عشان مقدرش يقول الحرفين دول!

وطبعا الكتاب مش بيدعوا الناس لانها تقول "ﻷ" وخلاص زي ما في بعض الناس بتعمل وتفتكرها قوة شخصية! عشان كدا بيفرق بين أنواع ﻷ، مثلا لما يكون الشيء اللي قدامك غير منطقي، زي لما تلاقي جهاز تمنه خمس آلاف جنيه وواحد بيعرضه عليك بألفين وبالكرتونه بس! يعني ده أكيد مسروق أو فيه حاجه، وهنا المفروض تقول ﻷ من غير تفكير أو تأخير! وبرده نوع تاني من ﻷ وهو في الحاجات الغلط، زي عرض رشوة أو عرض غير أخلاقي فهنا لازم تقول ﻷ بكل حزم، برده نوع كمان من ﻷ هو في المسائل العائلية أو الشخصية، مثلا واحد عاوز يستلف منك حاجة، المفروض تقوله لأ بلباقه ... وكدا يعني.

أخيرا، الكتاب حوالي ١٦٠ صفحة من الحجم المتوسط، وموجود في مكتبة مبارك الرئيسية، هتلاقوه ناحية رف علم النفس (في الحقيقة مش عارف ليه مش موجود في الفهرس!) وكان في كتاب بنفس الفكرة مترجم، بس مش فاكر اسمه!



وافتكر، كلمة من حرفين هتريحك كتير، قل لا واكسب نفسك!

هناك تعليقان (2):

  1. الكتاب دا فكرنى بكتاب قريته لمصطفى امين اسمه " لا "
    بيتكلم عن نفسى الهدف بس كان جميل و اتكتب بالكامل من داخل زنزانه فى ابو زعبل :D , و ان شاء الله اقرا قل لا و اكسب نفسك فى اقرب فرصه

    ردحذف
  2. الكتاب ده قرأته مرتين عامل زى الأفيون إدمان وبدور عليه تانى وعايز أقرأه ..........بجد من الكتب الرائعة ..كل الشكر والتحية للكاتب

    ردحذف