الاثنين، 23 مارس، 2009

انا و النتيجة و حربايتي !



السلام عليكم و رحمة الله و بركاته

الايام دي مليش مزاج اعمل اي حاجة خالص ! ، نتيجة التيرم الاول لسه مطلعطش لحد دلوقتي !
دماغي مش متظبطه خالص بسبب موضوع النتيجة ده ، في كذا حاجة بتعتمد على التقدير اللي هجيبه - و اذا كنت شايل اي مادة لا قدر الله ! ، و حتى نشاطاتي على النت بتتوقف على النتيجة !

اللي يشل الواحد ان تقريبا كل الكليات ظهرت النتيجة بتاعتها ما عدا احنا ! ، اي نعم احنا كتير شوية، بس مش للدرجة دي يعني !

المفروض انها تظهر الاسبوع ده او اللي بعده ، و لحد ما تطلع بقى ، هفضل كدا مزاجي متعكنن شوية !

--------------

و برده لحد ما تطلع النتيجة ، احب اعرفكم بالحرباية بتاعتي
عن نفسي بموت في الحيوانات عموما ، و الزواحف خصوصاً ، و الحشرات كمان
بحب اتفرج عليهم ، امسكهم ، و كمان اربيهم ^_^ - انا عارف اني هلاقي ناس بتقول عليا مهووس -

و الحمد لله عندي ام "عاقلة" مش زي الامهات التانية اللي تقولك يع و بتخاف من الحيوانات و الحشرات ! - بجد مش عارف هعمل ايه في مراتي لو طلع فيها الداء الغبي ده ! - ، و بالتالي معنديش مشكلة في دخول الحاجات دي البيت - بل و غرفة النوم كمان -
الحمد لله والدي و والدتي مطلعنا - انا و اخواتي - ، مش بنخاف ولا بنقرف من حاجة ، هما بس كانوا بيقولونا ابعدوا عن اي حاجة ممكن تجيب امراض و يعرفونا على الامراض و اعراضها ، معلومات عنهاو كدا يعني ، بجد ربنا يكرمهم :)


اكتر حاجة بتخنق منها في المدينة انها مفهاش حيوانات ولا حشرات متنوعة ! ، مش هتلاقي اكتر من الطوب و الاسمنت ! ، نفسي اسكن في منطقة طبيعية و على البحر ، سينا مثلا ولا حاجة ، بس ده مش موجود غير في الاحلام فقط :)

المهم يعني ، كام صورة لحربايتي المبجلة
و على فكرة ، لونها بيكون احسن من كدا لما يكون قوة ضوء كويسة و حالتها المزاجية تمام ^_^


اضغط على الصور لمشاهدتها بحجم كبير

صورة 5 صورة 6

صورة 3 صورة 1

صورة 4 صورة 2

على فكرة الحرباية وديعة جدا ، و عضتها مش بتوجع خالص ^_^

------------------------------

بجد الحرباية دي من الكائنات الرائعة ، كل حاجة فيها تخليك تقول سبحان الله

((يعني بصراحة كائن فريد من نوعه ,, كل حاجة فيه فريده ,,,

يعني عين الحرباء اللي بتلف في جميع الاتجاهات و كل عين منفصله عن التانية في التركيز

ولا امكاينة تغيير لونها على حسب المكان اللي هى فيه ,,

ولا ايدها ,, المتحورة عشان تقدر تتسلق و تتعلق على الشجر ,,

ولا لسانها و طريقة عمله في اصطياد الحشرات ,,

و لا مرونتها و استغلالها لديلها كيد خامسة ,,

ولا ولا ولا ,,, !!

مخلوق اكثر من رائع ,, فعلا من اروع ما رأيت ,, ))

اخيرا و ليس اخراً ، شويت معلومات عامة و كام جزء صغير من افلام وثائقية عن الحرباء :)


يوتيوب
عالم الطبيعة: الحرباء
نفسي في واحدة صغيرة زي اللي في اخر الفيديو ده ^_^

و لو عاوز فيديوهات اكتر بس ابحث في يوتويب عن chameleon


ويكيبيديا
الحرباء
- للاسف المقال ضعيف جدا ، ان شاء الله هحاول ضيف ليه في اقرب فرصة -


----------------------------------

ملحوظة اخيرة ، انا مش بحتفظ بالحيوانات عندي ، بربيها فترة صغيرة و في الاخر بطلق سراحهافي مكان امن :)

هناك 15 تعليقًا:

  1. عاجبني اسم التدوينة D:
    وواحشني كلامك عن مفتوح المصدر وعن الحرباية والحاجات دي :))

    ربنا معاك ان شاء الله النتيجة تطلع كويسة

    ردحذف
  2. حضرتك محسسنى إنك بتعمل إعلان لعروسه فبتقول مميزاتها :D

    --------

    لأ بجد سبحان الله فعلاً قادر على كل شىء هيا كائن حلو وكل حاجه بس شكلها مخيف شويه يعنى أنا مقدرش أمسكها مش لأنى بقرف او أخاف ما انا يا ما شرحت ضفادع وصراصير وسمك وأرانب وسحالى وكل حاجه :D

    بس ممكن أتخض منها ..

    عامة أنا بحب أتفرج على الحشرات وأتابعها وأحياناً أغلس عليها
    ونفسى امنية حقياتى يبقى عندى حوض سمك :)

    ربنا يوفق حضرتك فى النتيجه دى إتأخرت أوى خير إن شاء الله ..

    وعذراً ع الرغى دا

    ردحذف
  3. وعليكم السلام ورحمة الله ..

    مش أول زياره ليا في مدونة حضرتك بس ده أول تعليق ..

    ربنا يطمنك على نتيجتك ويفرحك بنجاحك يا رب ..

    بالنسبه للحرباءة المبجله ف" سبحان الله " فعلا ممكن أحب أتابعها من بعيد بس مش بأستسيغ ربيتها أو التعامل معاها ..

    قليل جدا إللي بألاقيهم بيهتموا بالزواحف والحشرات والكائنات دي
    أنا عن نفسي بأحب الحيوانات جدا
    بس بأهتم أكتر بالحيوانات الأخرى زي الخيل والقطط والكلاب والعصافير
    ونفسي جدا أربي نمر أو ذئب بس ده طبعا صعب جداااا ..

    وبجد ما شاء الله عجبني جدا تفهم والديك في نقطة تربية الحيوانات

    ردحذف
  4. HelSiNg : واحشني جدا و الله ^_^
    المفروض نروح نغتال الناس بتوع كل الطلبة دول ، عشان المنتدى اللي مقفول بقاله كتير ده :@

    و ربنا ييسر في النتيجة ، انا بدأ اقلق فعلا :)

    ---------

    زهرة الأمل : عروسة ؟ D:
    دي لو عروسة فكلها مميزات بصراحة D:

    هى فعلا كائن غريب شوية ، فيه حاجات كدا مش موجودة عند اغلب الكائنات التانية ، بس فعلا كائن لطيف جدا :)

    و ان شاء الله امنيت حظرتك تتحقق و يكون عندك حوض سمك :)

    و على الرحب و السعة في اي وقت ، الرغي مش بفلوس هنا D:

    -----------

    إني ملكة : حقيقي نورتي المدونة يا فندم :)

    الزواحف دي بجد من الكائنات اللطيفة جدا ، فيها تنوع غريب كدا :)

    و برده مفيش مانع من انواع تانية من الحيوانات D:

    و يا ريت كل اب و ام فكروا في الموضوع ده و هما بيربو عيالهم ، لان الابن هبقى في يوم من الايام اب ، و البنت هتبقى في يوم من الايام ام ، و لو كانوا بيخافوا عيالهم هتطلع بتخاف برده !

    ردحذف
  5. هههههههههههههههههه

    ربنا يوفقك يا رب

    بس أنا افتكرت بكلامك عن الرحباية الموضوع الرائع الممتع اللى اتفتح عنها في كل الطلبة

    وحشني كل الطلبة جدا

    وأنا بكرر إني بخاف جدا من الحشرات والزواحف وبترعب منها وكلامك عنها مقدرش يغير من نظرتي فتفوتة

    بجد يعني أنا برفع قبعتي لطنط إنها شجاعة جدا كده :D

    عن نفسي لو حد مهما كان قالي أجيبلك حاجة من الحاجات دي في بيتي أو حتى على قرب 50 ياردة مني مش عارفه ساعتها ممكن أعمل فيه ايه :D

    مدونة حضرتك حلوة ما شاء الله

    وعلى فكرة أنا نزلت كتابك عن اللينكس وإن شاء الله حقرأه :)

    في أمان الله

    ردحذف
  6. Maha : يااااه ، فعلا نورتي المدونة يا استاذه لوتس :)

    فعلا الموضوع اللي كان في كل الطلبة ده جميل جدا ، حتى قبل ما المنتدى يقع كنت بقلب في المواضيع القديمة و شوفت الموضوع ده ، بجد موت على نفسي من الضحك ، و كمان كان مووع مفيد جدا و فيه معلومات حلوة D:

    و الله الموضوع تعود برده ، يعني مثلا ممكن حظرتك تجربي مبدئياً سلحفة في حوض او حتى ضب D:


    و اتمنى فعلا ان الكتاب يكون مفيد ، و حظرتك تبدأي باستعمال اللينوكس و البرمجيات الحرة ، او على الاقل دعمهم :)

    ردحذف
  7. الله يسترها عليك ياأحمد

    يامفترى أنا مستحيل اربي حيوان أو حشرات فىالبيت ... يامجنون

    ردحذف
  8. ahmedmisry :
    ليه بس يا احمد ، الحاجات دي كميلة خالص D:

    ردحذف
  9. مرحبا الصراحه جميله جدا جدا ولكن العيب الموجود بها ان لها متطلبات صعبه مثل إضاءه مخصصه للحراره لكي تناسب الطبيعه التي تعيش بها وايضا حشرات مع اني اضن انه لم اجد هذه الحرباء في المحلات حتى اجد لها الحشرات ولكنها تبقى حيوان جميل

    ردحذف
  10. ابوشافي : بالنسبة للمتطلبات ، العائق الاساسي الاكل ، لانها غالبا في الحبس مش هترضى تاكل اي نوع من الحشرات :(

    انما موضوع الاضاءة ، ابقى طلعها كل يوم في مكان مشمس ، فوق السطوح ولا حاجة يعني D:

    نورت المدونة يا ابو شافي :)

    ردحذف
  11. انت بتغيظني ياجدع انت ..
    انت عارف اني نفسي اربيها :(

    بدل ماتطلق سراحها لمكان آمن ، أطلقها إلى يدي :(

    DrKonafa

    ردحذف
  12. AmR :
    استخدم لينوكس و انا اجيبلك واحده p:

    لا بجد ،

    ان شاء الله يكون عندك واحده و احسن منها كمان - تكون مُقرنه ولا حاجة يعني D:

    ^_^

    ردحذف
  13. أنا عندي 3 حربايات مثل حربايتك

    ومدونتك رائعة بس الأمهات كلهم عاقلات مش بس امك ، تحياتي لك ولأمك وربنا يحفظلك اياها :)

    ردحذف
  14. > غير معرف :
    امهات كتير عاقلات ، لكن في اي شيء يتعلق بالكائنات الغريبة او الحشرات ،،،، مقولكش يعني ، اجاركم الله D:

    ردحذف
  15. صيانه امانا
    http://www.seyanaservice.com/amana
    وللتواصل معنا على صفحة الفيس :
    https://www.facebook.com/332099063840476/
    وللتواصل معنا على اليوتيوب :
    https://www.youtube.com/watch?v=hXLNghvEL_I

    ردحذف