الثلاثاء، 24 فبراير 2009

شرح حزمة Phoronix Test Suite ، لعمل اختبارات الاداء و المقارنات .


السلام عليكم

من فترة كبيرة جربت اعمل كومبيل لنواة لينوكس على اوبنتو ، كان في حاجة معينة كنت عاوز اعملها ، المفروض انها بتخلي اداء النظام افضل مع تطبيقات المستخدم العادي - مش السرفرات يعني - ، فعملت كوبيل ، و كل حاجة بقت تمام ، بس كنت عاوز اعرف فعلا في فرق ولا

بحثت ، لقيت Phoronix Test Suite ، بس ساعتها تقريبا لما انقطع كابل الانترنت عن مصر في المرة الاولى ، و النت كان بطيييييء جدا ، و نظراً لان الاختبارات اللي بيعملها البرنامج بتنزل من على النت ، مكملتش الموضوع ، بس الحمد لله جرب البرنامج من كام يوم كدا و عملت شرح بسيط لاطريقة استعماله : )



شرح حزمة Phoronix Test Suite ، لعمل اختبارات الاداء و المقارنات - مجتمع لينوكس العربي .
شرح حزمة Phoronix Test Suite ، لعمل اختبارات الاداء و المقارنات - الفريق العربي للبرمجة .

شرح حزمة Phoronix Test Suite ، لعمل اختبارات الاداء و المقارنات - عرب هارد وير .


----------------------

اتمنى تستمتعوا بالموضوع : )


الخميس، 19 فبراير 2009

امبارح قابلت ....


السلام عليكم

بقالي كام يوم مش بكتب حاجة ، في كذا حاجة عاوز اكتب عنها ، بس واضح اني لسه مش متعود على نظام الفضفضة و كتابة الاحداث : )

-------------

المهم

امبارح قابلت ، كريم المغربي، صاحب المدونة دي (Mutati0N) ، و دي (مَغرَبي) ^_^

قعدنا بتاع ساعتين و نص نتكلم ، عن حاجات كمبيوترية ، عن نظام جنو/لينوكس ، البرمجيات الحرة ، الرخص البرمجية ، لغات البرمجة ، و عموما عن الدعاية للبرمجيات الحرة في الجامعة ، موضوع كدا ناوين نعملوا مع كام واحد تاني : )

انا اساساً مكنتش قادر اتكلم كويس عشان اثار البرد ، بس كانت فرصة ممتازة جدا ، ان الواحد يتكلم مع حد زي كريم ، ما شاء الله عليه يعني : )

بس كلت دماغه من كتر الكلام بصراحة D:

دي اول مقابلة على ارض الواقع - و ان شاءا لله مش هتكون الاخيرة - ، بس اساسا اكتشفت قبل امتحانات نص السنة اننا ساكنين قريب من بعض ، فرق محطة بس : )

و ان شاء الله هيكون في مقابلات تاني و تالت : )

الأربعاء، 11 فبراير 2009

عيان : (


السلام عليكم و رحمة الله و بركاته

بقالي يومين عيان ، برد مع احتقان في الحلق : (
المشكلة اساساً مش في العيا ، المشكلة في ما بعد العيا ، البلغم بيتعبني اوي :@

مع اني مستمتع جدا بالبرد ده - مع ان الجو مش برد اوي يعني - ، احساس جميل ان الواحد قاعد على الكمبيوتر كدا و صوابعه متلجة D:

الأحد، 8 فبراير 2009

يادي النيلة :@

السلام عليكم

مش عارف ايه الغباء ده :@ ، لما تبقى مظبط نفسك على معاد معين و في الاخر تلاقي نفسك غلطان في المعاد ده !

اول امبارح - الجمعة - كان فرح واحد اعرفه ، و كنت فاكر ان الفرح يوم السبت ! ، مع اني اتأكدت من الميعاد مرتين بس هى ثبتت معايا السبت 7 فبراير !

و على هذا فضيت نفسي يوم السبت و اذ اتفاجئ ان واحد صاحبي من اللي كانوا رايحين الفرح بيكلمني عشان يقولي انت مجتش ليه :@

و ده فرح يعني مش معاد ممكن يتكرر كدا يعني !


غبااااااااااااء :@



بس خير ان شاء الله ، مين عارف لو كنت روحت كان ممكن يحصل ايه : )

الأحد، 1 فبراير 2009

ملخص سريع


السلام عليكم و رحمة الله و بركاته

اخيرا الواحد خلص من الامتحانات و وجع الدماغ بتاعها ده ! ، و الحمد لله الامتحانات كانت كويسة ، باستثناء امتحان واحد كان طوييييل جدا ، بس برده كل تمام الترم ده و ربنا ييسر الترم التاني اللي بيكون غبي جدا !

المهم

في الفترة اللي بيتشال فيها الكمبيوتر و ببدأ اذاكر بشكل كويس ، بحاول افكر في اي مواضيع تتعمل و اكتبها ، و اي افكار تيجي في دماغي ، و بطلع بشوية حاجات و مواضيع بعملها لما اخلص امتحانات بغض النظر عن الاجازة نفسها يعني .

في الاول عاوز انشط الموضوع بتاع "مجموعة مستخدمي جنو/لينوكس في القاهرة" ، مش بحب تكون الفكرة سببها بس شوية حماس كدا و خلاص و بعد كدا مفيش اي حاجة بتتنفذ ، بس ان شاء الله الموضوع ده هيكمل حتى لو كنا شخصين بس : )

بعد كدا في شوية حاجات عامة ، مثلا عاوز ابدأ اتعلم بايثون تاني - كنت بدأت شوية في اجازة الصيف اللي فات - ، بس دلوقتي الوضع اتغيير كتير ، و StrikerX عمل شوية مواضيع 100 100 بالعربي بتشرح بايثون بشكل جميل جدا .

بحاول اساهم مع مجموعة عرب ايز في عمل خطوط جديده او الترجمة ، بس واضح ان موضوع الخطوط ده هيطول شوية لحد ما اعرف فيه كويس .

و كمان في مشروع لتعريب شرح كتاب عن اوبن اوفيس 3 ، من موقع OOoAuthors.org ، و شكلنا هنبدأ بالكتاب التعريفي بالاوبن اوفيس "Getting Started with OpenOffice.org 3" ، و كمان لسه نازل جزء جديد خاص ببرنامج ريتر - محرر النصوص - "OpenOffice.org 3 Writer Guide" ، لما نشوف بس الناس اللي هترجم ناوية على ايه .

# بالاضافة الى كام موضوع تاني كدا زي موضوع تعريفي ببرنامج "synfig" الخاص بعمل الرسوم المتحركة - الكارتون يعني -

# حزمة "Phoronix Test" الخاصة بعمل اختبار للاجهزة و البرامج ، يعني مثلاً بتقارن اداء برنامج معين على توزيعة اوبنتو و اداؤه على توزيعة فيدورا ، او مثلا كفائة كارت الشاشة مع الاصدارات الجديدة للتعريفات و خصائص تانية كتير ممتازة جداً - بقالي كتير اوي عاوز اعمل شرح للحزمة دي -

# شرح رفع الملفات على موقع ارشيف => Archive.org

و شوية مواضيع تانية ربنا يسهل و اخلصهم في اقرب وقت : )

---------------------------------------------------

من يومين كدا قولت اجرب منت و اشوف هى عاجبة الناس اوي كدا ليه - بغض النظر انها بتنزل بالكودكس و الجافا و شوية تظبيطات كدا - ، او حاجة واجهتني مشكلة النت ، مدير الشبكات الجديد 0.7 بتاع اوبنتو 8.10 و منت 6 فيه مشاكل في الاتصال بالانترنت ! فجرب كام افتكاسه كدا و في الاخر حذفته و عملت النت بشكل يدوي ، و عملت موضوع بالحل في مجتمع لينوكس العربي =>> " عدم اتصال مدير الشبكات الجديد في اوبنتو 8.10 - منت 6"

التوزيعة لذيذة فعلا و فيها شوية اضافات مفيدة ، بس الحاجة العجيبة فعلا انها اتسطبت في اقل من 7 دقايق ! ، بس كنت بسطب النسخة من الفلاشة مش من الاسطوانة عن طريق برنامج UNetbootin ، فمش عارف هل السرعة دي بسبب التوزيعة ولا بسبب ان زمن وصول الفلاشة اكبر من الاسطوانة !

بس اول حاجة غيرت في شكل الواجهة الغبي بتاع من ده و خليته زي اوبنتو عشان بيوفر مساحة كبيرة و سرعة في التعامل ، صورة للديسك توب بتاعي => اضغط على الصورة للتكبير .

Free Image Hosting at www.ImageShack.us

-------------------------------

طبعاً كالعادة وقفت شوية خدمات مش محتاجها ، و جربت الادوات الخاصة بالتوزيعة ، بعد كدا ثبت شوية البرامج الاساسية اللي بحتاجها ، ظبت النسخة يعني .

طبعا عشان يضيفوا الكودكس شالوا شوية برامج من النسخة ، هى برامج مش مهمة اوي بس حتى الخطوط الاضافية زي خطوط شالوها ، و نزلت الخطوط من مدير الحزم زي خطوط arabeyes و kacst ، و كمان كان في مشكلة مع برنامج توتيم الخاص بتشغيل الوسائط ، انه مش بيعرض الترجمة !

بعد كدا كله تمام و التوزيعة كويسه بس هى مجرد اوبنتو + الاضافات مش شايف فرق كتير ! بس عادي يعني هفضل اشتغل عليها لاني كأني شغال على اوبنتو .





بس كدا كفاية ، و ربنا يجعلها اجازة حلوة ^_^