الجمعة، 16 أبريل 2010

آخر تدوينة قبل السبات!

السلام عليكم و رحمة الله و بركاته

اخر تدوينة قبل ما اشيل الكمبيوتر و اركز في المذاكرة : )

النتيجة ظهرت الاسبوع اللي فات، و للاسف كما توقعت، كانت سيئة جدا، يمكن اسوأ نتيجة من أول ما دخلت الكلية!

بعد ما خلصت الامتحانات كتبت:

اخيرا الامتحانات خلصت و عدى حوالي اسبوع من يوم ما خلصت ، كانت للاسف امتحانات مش كويسة ، مش عارف في ايه السنة دي ، الامتحانات كانت اصعب من كل سنة ! و مرضت تلات مرات في فترة الامتحانات !! مع اني غالبا بكون حريص بشكل اكبر في فترة الامتحانات اني اتجنب مسببات الامراض عشان الامتحانات ، لكن تلات مرات امرض في فترة الامتحانات دي غريبة فعلا !! ، الحمد لله على كل شيء طبعًا ، بس المشكلة ان الواحد بيزعل لما يكون مذاكر كويس لكن مجموعة من العوامل الخارجيه بتأثر في نتيجته

و فعلا كما توقعت! بصراحة انا متضايق جدا! لكن عموما الحمد لله، الحزن مش هيفيد بحاجة دلوقتي، هحاول أبذل افضل ما عندي التيرم ده، و ربنا ييسر : )

------

من فترة جربت محمل جديد معروف بـ BURG و المبني على GRUB2، برنامج بورج بيوفر الاختيار بين الانظمة بشكل رسومي جميل. البرنامج بيوفر مجموعة من السمات الجميلة، قمت بعمل لمسة عربية على سمة من السمات:


على اليمين، السمة قبل التعديل ، على الشمال السمة الجديدة اللي عملتها:

proto arabic n  freedom

اضغط على الصورة للتكبير (و مش كل شوية هقول اضغط على الصورة!
http://img256.imageshack.us/img256/4118/biggrineb.gif)


لتحميل السمة الجديدة و معلومات أكتر عنها: سمة عربية لمحمل الاقلاع BURG.
معلومات اكتر BURG : الاختيار بين انظمة التشغيل بشكل رسومي ، رائع !

------------------

من فترة استعملت البرنامج الرائع انكسكيب لتحبير رسومات كنت رسمتها بإيدي من فترة ^_^

في الرسمة دي مستعملتش الخط العادي، انما الخط السميك من المنتصف و رفيع من الاطراف.

البطريق رسم يدوي بطريق بالانكسكيب

بالمناسبة ده نفس البطريق اللي كنت رسمته بشكل كارتوني بالجيمب .

الرسمة التانية شخصية اخواتي الصغيرين بيحبوها، سلمى من موقع بنين و بنات (مع بعض التعديلات، لإنها مبقتش شبهها اساسا http://img256.imageshack.us/img256/4118/biggrineb.gif)

سلمى رسم يدوي سلمى بالانكسكيب


ده فيديو في اقل من دقيقة و نص بيوضح الطريقة اللي استعملها - الفيديو بصيغة ogg ، يعني ممكن تشغيله على فاير فوكس بشكل مباشر ; )

http://www.archive.org/download/inkscape_test/inkscape_test.ogv

بالمناسبة، الرسمة في الفيديو كانت لتوضيح فكرة معينة، رسمتها في دقيقتين على سطح غير مستوي (مخدة
http://img256.imageshack.us/img256/4118/biggrineb.gif)


معلومات أكتر عن الانكسكيب الرائع


Inkscape
Inkscape للرسوميات المتجهة - وادي التقنية

--------

اخيرا، الحمد لله خلصنا البحث و سلمناه، عملنا فيه شغل كويس، و ربنا ييسر في النتيجة : )
حاليا دي صفحة العنوان و ملخص البحث، لاني مش عارف اذا مسموح نشر البحث قبل النتيجة ولا ﻷ!

صفحة العنوان ملخص البحث

---------



دعواتكم بقى، و ان شاء الله تكون امتحانات كويسة على الجميع : )

الأحد، 4 أبريل 2010

ملخص مهرجان البرمجيات الحرة في ساقية الصاوي.

السلام عليكم و رحمة الله و بركاته

مهرجان البرمجيات الحرة في ساقية الصاوي اللي كنت اشرت اليه اول امبارح، اليوم كان جميل جدا، استمعت بيه و اتعرفت فيه على ناس زي الفل ^_^

كان في حوالي تسع جلسات شغالين بالتوازي، الجلسات عبارة عن المحاضر و معاه مجموعة من الناس اللي حضرت، الجلسات كانت متنوعة بين تعريف بالبرمجيات الحرة و المفتوحة المصدر، ثقافة البرمجيات الحرة، طريقة تثبيت اوبنتو، لينوكس مقابل وندوز، البرمجة باستخدام مكتبات qt، البرمجة باستخدام لغة بايثون، تطبيق دروبال لادارة المحتوى، الأمن و الحماية، و بعض الجلسات التانية.

اليوم بدأ من ٩ الصبح، للساعة ٥ العصر، انا وصلت تقريبا الساعة ١٠,٣٠ ، يعني لحقت اليوم من أوله.

كنت متفق مع ناس اعرفهم من مجتمع لينوكس العربي اننا نتقابل، فعليا اغلبنا منعرفش بعض ولا شوفنا حتى صور لبعض، كل التعامل كان في العالم الافتراضي ، لكن قدرنا نتعرف على بعض و نتجمع بسهولة : )
الناس اللي من مجتمع لينوكس العربي مقابلتش غير واحد بس منهم على ارض الواقع، و هو عبد الرحمن غانم (مبرمج بلغة روبي و مكتبات كيوت)

و برده سلمت على بعض الناس و المحاضرين اللي كنت شوفتهم قبل كدا أو اعرفهم من على النت، و خصوصا ان منهم ناس كانوا جايين من اسكندرية، يعني سفر.

بعد ما شوفت مين جه و مين مجاش، قلت احضركام جلسة، مكنش عندي مشكلة اني اقوم بدور المبتدئ ، لان المهرجان اساسا موجه للمبتدئين و المستخدمين الجدد\المحتملين، فكنت بتفاعل و اسأل عن حاجات انا عارفها ، ده مش رخامة يعني، لانه من ناحية بحفز الناس انها تسأل و تتفاعل اكتر مع الشخص اللي بيشرح، و من ناحية تانية لو في اي نقطة حاسس انها هتكون مفيدة و المحاضر نسيها فيفتكرها، و بشكل عام بحب اشوف طريقة شرح و محاضرة الناس : )

حضرة جلسات ثقافة البرمجيات الحرة، البرمجة باستخدام بايثون، التصميم التجهي باستخدام انكسكيب.


في نهاية اليوم، عملوا فقرة عامة عن مفهوم البرمجيات الحرة و اهم الاسئلة اللي بتتسأل عنها، و كان في اتنين واحد منهم بيمثل البرمجيات المغلقة و غير الحرة و هو اللي بيسأل، و التاني بيمثل البرمجيات الحرة و المفتوحة المصدر و بيجاوب على الأسئلة، بعد ما خلصت الاسئلة الشائعة، سألوا الحضور اذا كان عندهم أي اسئلة، في ناس سألت و اتجاوب عليهم، و طبعا لازم تلاقي في النص كدا كام واحد دماغه ميكروسوفتيه صرفة، و برده اتجاوب عليه تمام
الفقرة كانت جميلة و فيها نوع من الفكاهة.


للاسف الناس معرفتش تعمل بث حي عشان الواي فاي كان خربان في المكان! فتعمل تسجيل بس تقريبا.





الواحد بيكون سعيد انه يشوف حاجة زي كدا و يشوف ناس بتبذل مجهود كبير عشان تنشر البرمجيات الحرة و المفتوحة المصدر، و بشكل عام اليوم كان كويس جدا و شخصيا استمتعت بيه : )


---------

طبعا في مناسبة زي دي لازم ناخد صورة جماعية، دي صورة جماعية للناس اللي حضرت من مجتمع لينوكس العربي:

صورة جماعية
ـ
اضغط على الصورة للتكبير

انا اللي بيشاور عليه السهم D:

الجمعة، 2 أبريل 2010

مهرجان البرمجيات الحرة، ساقية الصاوي - بث مباشر.


السلام عليكم و رحمة الله و بركاته


اعلان يوم البرمجيات الحرة في ساقية الصاوي ٢٠١٠

كالعادة متأخر بس عرفت من شوية ان هيكون في بث مباشر لمهرجان البرمجيات الحرة في ساقية الصاوي (القاهرة)

رابط البث

http://www.bahaa.biz/live.html

الناس اللي مش هتعرف تيجي او اللي برا مصر ممكن تتابع من هنا، بس يا رب الموضوع يمش كويس و ميحصلش مشاكل في البث D: