السبت، 11 أبريل 2009

خارج الخدمة مؤقتاً : )

السلام عليكم و رحمة الله و بركاته

من يومين جدول الامتحانات نزل ، و ما زلنا المجموعة الوحيدة (سنة تالته - مجموعة أ) اللي لسه نتيجتها مطلعتش !
ناس تقول سبب التاخير مادة "القانون الدولي الخاص" ، ناس كتير شايفين ان الدكتور اللي بيدي المادة شرحه صعب مع ان شرح الدكتور جميل جدا بس هو اسلوبه قديم شوية .
و ناس بتقول سبب التأخير مادة "قانون العمل" ، المادة سهلة بس فعلا كتاب المادة كان كبير شوية - اكتر من 1000 صفحة - ، يعني تخيل ان ملزمة المراجعة النهائية - ليلة الامتحان - اكتر من 150 صفحة كبيرة ! - مقاس A4 - ، و الامتحان بتاع المادة كان كبيييير جدا و عاوز وقت كتير و تكون سريع جدا في الكتابة ، يعني عن نفسي و اعتقد ان ناس كتييير كانت عارفه الامتحان كله بس ملحقتش تكتب فيه حاجة !

بس بشكل عام التأخير ده ساعات بيحصل عشان درجات النجاح المتدنية جداً في مادة معينة ، و صعب على عميد الكلية يعتمد نتيجة فيها مادة نسبة النجاح فيها قليلة !


المهم يعني ،

ان شاء الله الامتحانات هتبدأ يوم 26 /5 ، و هتستمر حوالي تلات اسابيع و شوية ، يعني من هنا للامتحانات فاضل حوالي شهر و نص ، و في الوقت ده قبل كل امتحانات بيتشال الكمبيوتر بشكل نهائي و يكون خارج نطاق الخدمة لحد ما بعد الامتحانات : )
بصراحة هو اجراء كويس بالنسبة لواحد مصنف انه مدمن كمبيوتر ، و الغريب ان عقلي في الفترة دي بيشتغل بقوة 300٪ D:

بس ده ميمنعش من وجود نشاط جانبي صغير كدا لان اكيد مش هقعد اذاكر 24 ساعة في اليوم ، بفكر في تجربة تصميم خط الكتروني بسيييط جدا كتجربة مبدئية - هصممه على الورق الاول طبعاً - : )

بالاضافة لشوية حاجات جانبية تانية كدا : )

---------------------------------

التيرم ده مواده طويلة و متشعبة شوية و محتاج تركيز اكتر : )

عشان كدا و لحد بعد الامتحانات هكون "خارج الخدمة مؤقتاً" لمدة تقرب من الشهرين و نص تقريبا سواء على المدونة او على النت عموماً .

اخيراً : احب اعرض الفيديو الفائز في مسابقة "نحن لينوكس" ،


اضغط على الصورة عشان تشوف الفيديو
الفيديو الفائز بعنوان "What Does it Mean to be Free" "ماذا يعني ان تكون حراً" .
بجد فيديو جميل جدا و معبر و كان عاجبي جدا او ما شوفته - توقعت انه اللي هيفوز D: -

---------------------


اضغط على الصورة عشان تشوف الفيديو
و الفيديو ده "مش فائز في المسابقة" بس برده بحبه جدا جدا (و مؤثر جدا كمان) و يعتبر من اقدم الاعلانات الدعائية لنظام لينوكس ، الفيديو بعنوان "Be Linux"


---------------------------------


في النهاية ، استودعكم الله الذي لا تضيع ودائعه ، و ان شاء الله ارجع للنت في اقرب فرصة بعد الامتحانات


الخميس، 9 أبريل 2009

الجيوب الانفية .


السلام عليكم و رحمة الله و بركاته

في اول الاسبوع روحت كشفت عند دكتور "انف ، اذن و حنجرة" ، بقالي فترة عندي مشكلة في الاحبال الصوتية ، صوتي بقى غرييييب جدا ، كنت متوقع ان المشكلة اساسها الجيوب الانفية ، و اللي اساسا كان فيها مشكلة بسبب نزلة شُعبية جامدة كانت جاتلي في تالته ثانوي ، الحمد لله اثار النزله راحت من زمان ، بس مشكلة الجيوب الانفية بدأت تظهر مع بداية المرحلة الجامعية - من سنتين و شوية تقريبا كدا - ، كنت بحاول قدر الامكان تجنب اي حاجة ممكن تاثر على الجيوب و تعمل التهابات ، بس كانت في شوية اعراض كدا بتيجي من وقت للتاني بشكل خفيف ، لكن الفترة الاخيرة دي الموضوع مأثر اوي على الاحبال الصوتية و بالتالي صوتي : )

من اسبوعين كدا ، كنا عملنا محاضرتين عن البرمجيات الحرة و نظام لينوكس ، تبع "مجموعة مستخدمي جنو/لينوكس في القاهرة" ، طبعا انا كان صوتي في الضياع خالص ، بس قولت مش مشكلة ، اديها محاضرة و هتعدي ، انا هحاضر مش رايح اتجوز يعني D:

كانت اول محاضرة ليا و كانت بشكل عام كويسة ، بس نظرا لانها كانت اول محاضرة ليا قصاد عدد من الناس - العدد مش كبير اساسا D: - فالموضوع كان فيه شوية لخبطة كدا و كنت متوتر شوية بالاضافة اني بعاني في الكلام D:

المشكلة ان برده في محاضرة تانية بكره ان شاء الله ، و برده نفس مشكلة صوتي الخربان ده D: ، و مش هينفع اخد الدوا عشان الدكتور كان الطالب اشعة على الجيوب الانفية قبل بداية العلاج ، و لسه معملتشها :s
بس خير ان شاء الله : )



المهم يعني ، بعد ما روحت للدكتور ، و طلع زي ما توقعت الموضوع ليه علاقة بالجيوب الانفية ، و كتبلي على الدوا اللي لسه مجبتهوش عشان لسه معملتش اشعه D:

لما روحت البيت قولت ادور على معلومات اكتر عن الجيوب الانفية على النت : )

في مقال لطيف و بسيط عن "التهاب الجيوب الانفية" في موقع طبيب دوت كوم .

التهاب الجيوب الانفية



الموضوع بسيط و فيه معلومات و ارشادات مفيدة ، و اول مرة اخد بالي من "الجيوب الجبهية" ، كنت عارف التلاتة الباقيين : )
ربنا يسهل و اعمل الاشعة في اقرب فرصة و ابدا في العلاج و ان شاء الله الموضوع ميكنش مزمن : )



و حافظوا على جهازكم التنفسي و خلو بالكم منه بقى : )

الأحد، 5 أبريل 2009

ازاي تتابع المدونات على النت و زاي تتابع التعليقات كمان .


السلام عليكم و رحمة الله و بركاته

موضوع مختصر كدا عشان بلاقي ناس كتير بتدخل مدونتي من شريط اللي بيتكتب فيه عنوان المدونة ، او بيكونوا حافظين المدونات في المفضلة او الـ bookmarks ، مع ان في طرق تانية اسهل بكتير و بتوفر الوقت جدا rolleyes.gif


نظرا لعدد المدونات الكبير دلوقتي في امكانية متابعة المدونات عن طريق الـ rss ، و الار اس اس ده باختصار تقنية بتجيبلك اخر التدوينات من موقع او مدونة معينة ، يعني كل موقع تشترك فيه هيجيلك اخباره اول باول ، و كمان لو في موضوع معين عجبك ممكن تتابع الردود اللي فيه عن طريق الار اس اس برده ، او حتى لو عندك مدونة و مش بتاخد بالك من الناس اللي بترد عليك في المواضيع القديمة - زيي كدا biggrin.gif - ، ممكن تتابع الردود على مدونتك ، بحيث تشوف اخر الردود happy.gif


ممكن تستعمل برنامج عادي ، او تطبيق ويب زي جوجل ريدر .....


كمل الموضوع هنا :


ازاي تتابع المدونات على النت و زاي تتابع التعليقات كمان - منتدى كل الطلبة .

ازاي تتابع المدونات على النت و زاي تتابع التعليقات كمان - منتدى شمساوي .


-----------------------

كام موضوع بقى قبل ما الكمبيوتر يتشال : )

لعبة ذكاء لطيفة بطريقة علمية - Numpty Physics


السلام عليكم و رحمة الله و بركاته



لعبة ذكاء بسيطة و لطيفة بتعتمد على الفيزياء يعني زي الوزن و الارتداد و الحاجات دي ، المطلوب منك في اللعبة دي انك توصل الكورة الحمرا للنجمة الصفرا



-----------------

انت بترسم خطوط عشان تحرك الكورة الحمرا ، شوف الطريقة المناسبة عشان توصل الكورة للنجمة
كل خط عامل زي قطعة حديد ، و تقدر تعمل منه اشكال عشان تساعدك في توصيل الكورة

- التحكم :
الماوس عشان تعمل خطوط جديدة .
المسافة عشان توقف اللعبة مؤقتاً .
السكيب عشان تتراجع عن اخر تعديل ضفته .
الـ r عشان تبدا المرحلة من جديد .
الـ e ادوات تحرير كاملة عشان لوعندك فكرة تنفع كأرض - بلاش غش و متستعملش الخاصية دي في تعدية المراحل D: -

-----------------

- شوية معلومات :
اسم اللعبة : Numpty Physics .
نوع اللعبة : Drawing puzzle game .
السعر و الرخصة : مجانية مفتوحة المصدر .
محرك اللعبة : Box2D .

تحميل اللعبة :

ليـنوكس
DEB - RPM


ونـــدوز

-----------------

صور للعبة :
-- اضغط على الصورة للتكبير --

Photobucket

Photobucket

Photobucket

-----------------

- دي مراحلة اضافية للي يخلص اللعبة D:
ـ
NP-complete


لو بتستعمل وندوز ضيف المراحل في الفولدر اللي اسمه data جوا اللعبة .

لوبتستعمل لينوكس ، ضيف المراحل في المسار ده
/home/YOR_USER/.numptyphysics

-----------------

ورونا شطارتكم بقى D: ، و بدون غش p:

الخميس، 2 أبريل 2009

اول تاج :)



السلام عليكم و رحمة الله و بركاته

اول واجب D: ، تاج مبعوتلي من طارق ، صاحب مدونة شخابيط : )

طارق واحد من الناس اللطيفة اللي عرفتها من على النت ، بس ديماً مشغول عننا بالكلية و الكورسات و مش عارف ايه كدا ، ربنا يوفقه : )

المهم يعني ، التاج اهه :

-----------------------------------------------


- اسمك ؟
احمد .


- المشهور بيه وسط اصحابك ؟
احمد او سكليتون برده - خصوصاً لو اصحابي من النت - ، او غالبا لقب العيلة .


- سنك ؟
20 سنة الا شهرين تقريبا D:


- مجال دراستك ؟
الحقوق (القانون) .


- اسم مدونتك ؟
من غير اسم تقريباً ، بس كاتب "skeleton-eel" بدل ما تبقى من غير عنوان كدا ، بس كنت بفكر اسميها "مجرد مدونة اخرى" بس قولت عادي يعني مش مكشلة يعني :) .


- صورتك الرمزية في المدونة بتعبر عن إيه ؟؟
صورتي الرمزية الحالة المفروض انها رسمة تشبهني ، بس في الحقيقة مبقتش شبه الصورة دي خالص !! بسبب قعادي على الكمبيوتر كتير عنيا دخلت لجوا و ظهرلي هالات سوده تحت العين ، و بقيت عامل زي العواجيز !

بس ان شاء الله فترة و تعدي يعني :)
الحاجة الكويسة في الموضوع اني فعلا بستفيد و بفيد في قعادي على الكمبيوتر مش بضيع وقتي على الفاضي :)


- هل فكرت في اغلاق المدونة والسبب ؟
لا ! ، و حتى لو قفلتها هسيبها زي ما هى كدا من غير ما احذفها ، مش عارف ليه الناس بعد ما تمشي ساعات بتحذف المدونة ! مع ان اي مدونة اكيد فيها حاجة مفيدة ، ممكن اي حد يجي ستفيد بيها بعد ما تمشي او حتى بعد ما تموت :)


- ايه رد فعلك لو حد قل ادبه في تعليق ؟
ده بيتوقف على تعريفك لـ "قل ادبه" ، قله ادب بشتيمه يعني ؟ ولا قلة ادب مجرد سخرية و كدا ؟ ، بس على العموم اي رد فيه الفاظ مش تمام هيتحذف .


- اسوأ مدونة ؟
امممممممم ، مفيش حاجة معينة ، بس عموما اي مدونة بحس ان اللي فيها كلامنجي او الناس اللي ماشية بنظام "خلقنا لنتعرض" ! ، و في الاول و الاخر ده مجرد احساس و مش بيغير من الحقيقة في حاجة :)


- هيحصل ايه للايميل بعد ما تموت ؟
اكيد هيموت معايا ، و الناس اللي اعرفهم على الماسنجر هيقولوا كان هنا في واحد اسمه احمد ، و مش عارف اذا كانوا هيقولوا كان كويس او وحش بس اكيد هيقولوا كان شخص غريب :)


- اديت الباسوورد لحد قبل كده ؟
مفتكرش .


- السفر بالنسبة لك ؟
اكيد حاجة ممتعة D: ، تغيير جو ، و تشوف اماكن جديدة ، و حتى وجوه جديده :)


- الموووود بتاعك ايه ؟؟
كويس و لله الحمد ، بس مرتبك شوية بسبب النتيجة اللي كل ده لسه مطلعتش ، و عاوز اذاكر كويس شوية .


- بتعمل ايه في وقت فراغك ؟
اكيد الكمبيوتر و الانترنت D: ، النت لوحده عالم تاني ، و شوية قراءة و شوية في المكتبة ، و اي حاجة مفيدة يعني ^_^


- الأكلة المفضلة ؟؟
الرز بالسمك - خصوصا لو كان من الاسماك الزيتية زي الماكريل كدا - ، و الكبسة بالفراخ ، و كمان المكرونة بالبشاميل - بقو كام اكله كدا ؟ D: -


- الصفات التي أخذتها من والدي ؟
مش عارف بصراحة ، مفيش حاجة معينة D: ، بس ممكن اقول ايه الصفات اللي ماخدتاهش من والدي D:
كنت ديما بحاول تلافي الصفات الوحشة ، مثلا صفة زي العصبية ، والدي عصبي جدا جدا ! ، انا على العكس تماماً هادئ جدا و بعرف اتمالك اعصابي بسهولة :)


- الصفات التي أخذتها من والدتي ؟
الطيبة و الصبر .


- اكتر ست حاجات بتكرههم ؟
مش هقول الكدب ، الخداع ، الغرور و الحاجات دي لان كل الناس بتكرههم بس الفرق في الاولويات يعني ، بس اقدر اقول من اكتر الحاجات اللي بكرهها :
القول من غير عمل ! - التعميم ! - التعصب ! (التعصب غير العصبية ) - استغلال الجهل عند الناس ! - الاشاعات ! - النمطية ! .


- اكتر ست حاجات بحبها ؟
امممممم ، مش عارف ، بحب كل حاجة بصراحة D: ، بس ممكن نقول :
الكمبيوتر و النت طبعاً - القراءة - تعلم حاجات جديدة - الشخبطة ( دي حاجة شبه الرسم كدا ) - مساعدة الناس - الحرف اليدوية .

و الجنو/لينوكس طبعاً D:


- شخصيتك نوعها إيه ؟
في الحقيقة معنديش وصف معين لشخصيتي ، بس انا شخص هادي قليل الكلام ، براقب في صمت ، مش اجتماعي اوي بس اقدر اتعامل مع الناس كويس ، ديما ما تلاحقني كلمة "غريب" يمكن عشان ليا اهتمامات مختلفة عن اغلب الناس ، ممكن اعمل حاجات مجنونة شوية بس عمري ما اضر حد ، مثابر و متفائل نوعا ما ، بس الاكيد اني في الاخر "انسان" :)


- لماذا دخلت عالم التدوين من الاساس ؟
المدونة مكان افضفض و اكتب الحاجات اللي بفكر فيها بعيد عن التقنية و القانون ، يعني كبديل لقلة الكلام ، و بردو بضيف لينكات لاي موضوع تقني او موضوع مفيد بعمله فى المنتديات .


- أحلي جملة قيلت في وصف مدونتك ؟
مش فاكر بصراحة - مش فاكر ان اتقال حاجة اساسا :)


- اهمية التعليقات بالنسبة لك ؟
اكيد بحترم كل رد يتكتب في المدونة ، بس اساسا اغلب التدوينات عبارة عن واحد بيكلم نفسه ، فمفيش مجال للرد اساسا ، فموضوع الرد ده عادي يعني :)


- احلى بوست كتبته ...ضع اللينك , ثم اذكر لماذا ؟
في المدونة ؟ لسه متكتبش ، انما من الناحية التقنية ، الكتابين دول سعيد جداً اني عملتهم
# المدخل نحو البرامج المفتوحة المصدر .
# الدليل العملي في استخدام اوبنتو لينوكس .

و بحبهم لانهم الحمد لله افادوا ناس كتير :)

- أفضل مدونة قراتها ؟
مش فاكر ، في مدونات كتير اوي حلوة .


- أفضل بوست قراته ؟
برده في مواضيع كتير اوي حلوة قريتها .


- الشغل بالنسبة لي ؟
بالنسبة ليا ولا ليك ؟ D:
الشغل ليه كذا فايدة ، اداة لمساعدة الناس ، طريقة لتحقيق الذات ، و اكيد وسيلة لكسب الرزق .


- الانترنت بالنسبة لك ؟
حاليا الانترنت بقى جزء مني و انا جزء منه ، مكان وااااسع للمعرفة و العلم و مشاركة المعلومات .


- تمرر التاج ده لمين ؟
مش همرره لحد لان تقريبا كل اللي اعرفهم كتبوا التاج ده ، بس اللي عاوزه ياخده - مع اني بكرهه الجملة دي جدا :@ -




بس اللي يقرا التاج يقولي على حاجتين D:

هو ليه اسمه "تاج" ؟ ، المفروض ان التاج بالانجليزي (tag) يعني وسم ، يعني بيستعمل مع مجموعة حاجات ليها نفس الموضوع - اغلب الاسئلة بتاعت التاجات اللي بشوفها ملهاش علاقة ببعض اساسا D:

الحاجة التانية بقى ، محدش عنده عروسة ليا ؟ ، اصل انا بصراحة ناوي اتجوز في اقرب فرصة D:

لا بجد ، يا ريت تدعولي بالزوجة و الذرية الصالحة :) - و كمان ادعو يجو بسرعة مش عاوز استنى كتير D: