المركز الثالث في مسابقة بحوث جامعة القاهرة ^_^

السلام عليكم ورحمة الله وبركاته

قبل ما أنسى قلت اكتب عن احتفالية تكريم الفائزين في مسابقة البحوث العلمية على مستوى جامعة القاهرة، واللي كنت مشارك فيها كقائد لمجموعة بحثية مكونة من تلات أفراد أنا واحد منهم بالإضافة لمشرف على البحث من هيئة التدريس. الاحتفالية وتسليم الجوائز كان أول امبارح الاتنين ١\١١\٢٠١٠ بس طبعا النتيجة معلن عنها من فترة. إن شاء الله البحث هيتم نشره قريبا.

البحث كان عن "الطاقة البديلة" وهو من المواضيع المحببة ليا، لإن ليه شقين، بيئي واقتصادي وشخصيا من المحبين للفرعين ^_^
الحمد لله البحث جاب المركز التالت فقط بفارق أربع نقط عن المركز الأول ^_^ والدكتور من لجنة التحكيم أشاد بمجموعتنا وقال إنها تعتبر مجموعة بحثية نموذجية من حيث الشكل لإن الباحثين من كليات مختلفة وبالتالي يتم تغطية البحث من عدة جوانب.

في الحقيقة كانت تجربة رائعة جدا بالنسبة ليا من أكتر من ناحية، القدرة على قيادة فريق، العمل الجماعي، التعامل مع الضغوطات وغيرهم. وفعلا المكسب اللي بيجي بتعب بيكون ليه طعم رائع! إن شاء الله ناوي أكتب عن التجربة دي وعن الصعوبات والتحديات اللي واجهناها : )

شكرا للأستاذ محمد فكري المشرف الاكاديمي للمجموعة، وشكرا للفريق الجميل حسين اللي للأسف مقدرش يحضر عشان دخل الجيش، وحبيبي اللينوكساوي محمد طه ^_^ وطبعا شكر كبير للصديق العزيز من الجزائر الحبيبة "أمين روخ" مشرف قسم البرمجة في مجتمع لينُكس العربي، اللي متأخرش في المساعدة لما طلبت منه الحصول على مراجع ومعلومات عن الطاقة في فرنسا ^_^


هنا صفحة العنوان وملخص البحث (المقدمة كُتبت سريعا محتاجة إعادة هيكلة )

صورة أثناء تسليم الجوائز

وهنا بعض الصور الملتقطة في الاحتفالية، فيهم صور لتابلوه فيه لرؤساء جامعة القاهرة من أول الأستاذ أحمد لطفي السيد، هنا معلومات أكتر "رؤساء جامعة القاهرة منذ عام 1908 وحتى الآن (٢٠١٠)"


إن شاء الله في اقرب فرصة هبقى أصور الشهادة ^_^
بالمناسبة البحث ده معمول بالكامل باستخدام البرمجيات الحرة فقط!

دلوقتي أرجع لاستكمال العمل في كتاب أوبنتو!

المزيد »

قصة قصيرة كتبها أخويا.

امبارح لقيت أخويا الصغير شريف (مش صغير أوي يعني D: ده في تانية ثانوي عام) بيقولي أنا كتبت قصة تعالا أحكيهالك! وفعلا حكاهالي، وعجبتني جدا ^_^


عجبتني فكرتها وكمان لإن أخويا أصلا مش بيقرأ قصص ولا ليه في الأدب والروايات، ولا حتى من محبي متابعة الأفلام والمسلسلات! مرة واحدة قال هكتب قصة وقعد كتبها! لدرجة إني شكيت فيه هههههههه وحاولت أبحث عن الرواية على النت، بس الولد طلع صادق، ملقتش القصة أو حتى واحدة شبهها!

دي تعتبر أول قصة ليه (كان في قصة غيرها صغيرة أوي كتبها أول إمبارح D:) ونشرها في منتدى واحد تحت اسمه مستعار "xTHE_Draagon"، قولتله هنزلها على مدونتي ووافق، انا منزلها زي ما كتبها بالظبط، فقط صححت سريعا بعض الأخطاء الإملائية (أغلب الأخطاء كانت في همزة القطع وألف الوصل، الهمزات، التاء المربوطة في آخر الكلمة) يعني مجيتش ناحية الأسلوب أو التعابير.

أنا قولته على بعض النقاط بخصوص الأسلوب، لكن بما إني مش من محبي الروايات والقصص فأكيد مش هقدر أفيده أوي، فياريت أي حد عنده تعليق يكتبه عشان أقولهوله : )

------------------------------

قصة بقلم: شريف أبوزيد.

كان يعيش شخص يدعي هيثم وهو في الثامنة عشرة من عمره...وهو يعمل علي اختراع آلة غريبة الفكرة
وهي أنه يستطيع أن يرى الأشياء المتناهية الصغر ... التي لا تدركها الأبصار
ولكن انتظر ...هو لا يريد اختراع ميكروسكوب
بل يريد أن يصنع آلة تبث أشعة علي عينه لتغير تركيب خلايا عينه ويرى الجراثيم الصغيرة بمجرد أن يدقق النظر في أي شيء
بعد أن انتهى من تلك الآلة التي كان يصنعها من دون علم أي احد ...حتي أمه لم يخبرها
جاء يوم التجربة ...فحص كل شيء فيها نظري وقد حان موعد العملي
وقد وضع تلك الآلة التي تشبه النظارة الشمسية علي عينه وهو متحمس لرؤية الأجسام الصغيرة بمجرد التدقيق فيها
ولم يخاف أن يفقد بصره
وضغط علي الزر وقد بدأت الآلة بالعمل
وهي تسلط أشعة علي عينه لتحدث بعض التغير في خلاياها
تم انتهاء وقت عمل الآلة وتوقفت عن العمل
وخلع هيثم الآلة من علي عينه وهو متحمس
وظل يدقق في أجزاء الغرفة ولم يرى أي جسم صغير ... وخاب أمله وهو يقول " لقد فشل الاختراع "
وهو في حالة من الحزن لاحظ شيء جداً ابيض اللون يمر أمام النافذة وهو شيء يشبه قنديل البحر
فاسرع متجها ناحية النافذة يقول " ما هذا "
ولم يجد ذلك الشيء الذي يشبه قنديل البحر الذي مر أمامه للحظات وهو يطير
فقال " هذه مجرد تهيؤات "
فاستلقى علي السرير ونام
وقام من نومه في الليل للذهاب إلى الحمام
فسمع أصوات غريبة تأتي من ناحية النافذة
فذهب ليرى ما أمر تلك الأصوات
فرأي مثل ذلك الكائن الذي يطير ويشبه قنديل البحر
ولكن وجد منها مجموعة بأحجام مختلفة تحلق بعيد عن النافذة
وظل يفرك عينيه بيده ليعرف هل هذا حقيقي أم تهيؤات
وظن انه يحلم ولكن لا... فهو لا يحلم وهذا حقيقي
فظل يراقبهم من بعيد وهم يتحركون يمين ويسار
وفجأة!!! ظهر كائن غريب يختلف شكله عن الباقي
عندما ظهر ذلك الكائن الغريب وقفت باقي الكائنات صف واحد ...احتراماً له
وكأنه القائد وهم الجنود ...وذلك الكائن الجديد يشبه النصف الأعلى من جسم الإنسان
ولكن بدون ملامح وبدون شعر وبدون أصابع في يده ولونه ابيض
وظل يقف أمام جنوده ويتحدث معهم وجنوده واقفين بكل احترم
وكل هذا الوقت وهيثم يراقبهم من النافذة
وفجأة!!! يأتي كائن آخر وهو أشبه بالجنود ولكن لونه داكن قليلا ويبدو عليه القوة
فبدأت الجنود البيضاء تهاجم ذلك الكائن الذي يشبههم ولكن لونه مختلف
هاجموه بشيء يشبه الغبار الأبيض
ولكن تلك الهجمات لا تجدي معه أي نفع وهو واقف في مكانه كانه يسخر منهم
وفجأة!!! توقفت كل الكائنات البيضاء عن الهجوم احتراما لقائدهم الذي سيبدأ بهجومه القوي
وقف القائد أمام ذلك الكائن داكن اللون لثواني ثم رفع يده إلى أعلى
وما يرى هيثم إلا شعاع ابيض قوي ينزل من السماء علي ذلك الكائن
وظل الكائن يصرخ من شدة الألم
اسرع هيثم ليأتي بالكاميرا ويصور ذلك المشهد
وبالفعل صوره
وفجأة!!!توقف ذلك الشعاع عن النزول
وسقط الكائن داكن اللون علي الأرض
ورحل القائد مع جنوده وظلت صورتهم تتلاشي شيئا...فشيئا ...حتى اختفوا
كاد هيثم أن لا يصدق عينه ... هل يوجد قناديل بحر طائرة ...و لو لا يوجد ... فما هذه الكائنات
في اليوم التالي ذهب هيثم إلى الاستوديو ليحمض فلمه الذي فيه صورة الشعاع الأبيض والكائنات الغريبة
ترك الفيلم عند الاستوديو حتي يحمض وذهب إلى المدرسة ليحكي لأصدقائه بما حدث
وحكي لهم وهم في طريقهم للاستوديو ليأخذ الصورة
وعندما وصل إلى الاستوديو وجد المفاجأة !!! الصورة كانت مجرد صوره للسماء في الليل
بلا كائنات ولا أي شيء
وعاد هيثم إلى المنزل بعد أن أصدقائه سخروا منه
وهو ملقى علي السرير يفكر في الأمر
هل كنت أتخيل...!! لو كنت أتخيل ... كيف التقط الصورة...!وأنا امسكها الآن في يدي!!!
وفجأة!!!...تذكر أمر الآلة التي صنعها..
ونهض ليفحص الآلة ...ويعرف سبب فشلها
وأعاد النظر في التصميم النظري ...
وبعد إعادة معادلاته فوجئ بالنتائج!!!
تلك الآلة التي صممها ليرى الأجسام الصغيرة...وقع خطأ في المعادلات أصبحت بدلا أن تجعله يرى الأجسام الصغيرة أصبحت تجعله يرى الأشباح!!!
صدمه ذلك ... وتأكد أن الذي شاهده في الليلة الماضية كانت أشباح
وظل طول اليوم خائف من الذي تلك النتائج ...هل سأظل هكذا طيلة حياتي!!! ...ما الذي فعلته في نفسي هذا!!!
ثم نام واستيقظ في الليل
سمع نفس الأصوات وشاهد نفس الكائنات التي تشبه قناديل البحر البيضاء ومعهم قائدهم المختلف
الذي يشبه نصف جسم الإنسان الأعلى ولكنه ابيض ومن غير ملامح ولا شعر ولا أصابع...والذي اكتشف أنها أشباح
ظل يراقبهم مرة أخرى
لكن هذه المرة أحست الأشباح أن ذلك البشري الذي ظل ينظر باتجاههم في الليلة الماضية ويكرر فعله تلك الليلة يستطيع أن يراهم
وهيثم ما زال ينظر عليهم
وفجأة!!!تحركت الأشباح نحو نافذة هيثم
وهيثم يقلق من اقترابهم ...وظلوا يقتربوا شيئا ...فشيئا
حتي وصلوا إلى النافذة ودخلوا إلى الغرفة وانتشروا فيها وقائدهم معهم
وهيثم يكاد يموت من الخوف
فتأكد قائد الأشباح أن ذلك الإنسان البشري يستطيع رؤيتهم
وبدأ قائد الأشباح بالتكلم مع هيثم...فقال له " لا تقلق فنحن من النوع الطيب لا نؤذي أحد من غير سبب..أنا اعرف انك تراني وهذا اول بشري نعرفه يستطيع أن يرى الأشباح...اسمعني جيداُ...ولكن لن أبدأ بالكلام حتي تهدأ وتوقف هذا الارتجاف من الخوف..."
فحس هيثم انهم لا يريدوا أن يؤذوه وقال " ماذا تريدون مني ؟ "
فقال قائد الأشباح " نريدك أن تساعدنا"
فقال هيثم " أساعدكم...ولكن كيف ...فأنا إنسان وانتم أشباح "
قال القائد"سأحكي لك قصة قديمة ...هي التي ستجعلك تتأكد أننا لسنا مؤذين كما تظن"
فقال هيثم "أنا أحسست أنكم لستم هكذا ولكن احكي لي هيا"
قال القائد "كنا نعيش في عالم الأشباح ...عالمنا الجميل الذي لا مشاكل فيه ...كنا في قرية هادئة تعيش في سعادة
يحكمنا حاكم عادل...و فجأة ...أتى بعض الغزاة إلى قريتنا وهم الأشباح داكنة اللون التي انت رأيتني وأنا اقتل واحد منهم في الليلة الماضية..
جاءت تلك الأشباح داكنة اللون التي هي أقوي مننا في الحقيقة
لتسير في قريتنا ويقتلوا كل ضعيف فيها ويعملوننا أسوأ معاملة...
ففي صباح من الأصباح...عندما كانت قرية الأشباح نائمة ...هربنا نحن الأشباح البيضاء من القرية في صمت وهدوء
لنأتي هنا ونكون جيش قوي ثم نرجع لمحاربة أعدائنا الأشباح داكنة اللون"
فقال هيثم " وما الذي استطيع أن افعله أنا "
قال القائد"انت تستطيع أن تساعدنا ...فالإنسان لديه قوة قوية جدا لا يشعر بها...قوة رهيبة لا تدركوا مدي قوتها انتم يا أيها البشر "
قفال هيثم " قوة! أنا امتلك قوة...عن أي قوة تتحدث؟"
فقال القائد "الصوت...صراخ الإنسان يولد موجات لو تعرض لها الأشباح ستنفجر أجسامها في الحال "
فقال هيثم وعلي وجهه ابتسامة " ولا تخاف أنت وجنودك الأشباح أن اصرخ الآن وأقتلكم جميعا"
فقال القائد " لن تستطيع...فنحن الأشباح البيضاء لدينا في أجسامنا بعض المضادات لتلك الصرخات فلا نتأثر بها بشكل مباشر
نعم تؤثر فينا ولكن ليس بشكل مباشر مثل الأشباح داكنة اللون...فالأشباح داكنة اللون لديها القدرة علي الهجوم ولكن لو تعرضت لصرخه إنسان تنفجر أجسامها وتموت في الحال.."

فقال هيثم " سآتي معكم وأساعدكم"
قال القائد " انتظر هذا سيأخذ بعض الوقت ...فصوتك ما زال ضعيف ...سنأخذك إلى عالمنا لتعيش فترة من الزمن معنا ..وتقابل ملك الأشباح لتتعرف عليه فأنا مجرد قائد لست الملك ويجب موافقه الملك
وسنعطيك الأشياء اللازمة لتقوي النبرة التي نحتاجها في صوتك "
واكمل القائد كلامه " هيا ...هيا بسرعة قبل أن يطلع الصباح علينا ونعجز عن السير في الشوارع في الصباح فإن ضوء الشمس يسبب لنا ضرر كبير في أجسامنا "
فترك هيثم رسالة لأمه حتي لا تقلق عليه في الشهور التي سيغيب فيها عن المنزل
وحمل الأشباح الجنود هيثم وأخذوه إلى عالم الأشباح وقابلوا ملك الأشباح ليعرضوا عليه الفكرة ...فرح الملك
واعطي ملك الأشباح لهيثم قوة تجعله قادر علي الطيران مثلهم
وعاش هيثم عدة شهور في تلك القرية الجميلة مع الأشباح الطيبة المخلصة الذين أحبوه وأحبهم
حتي قد حان موعد المعركة بين الأشباح البيضاء والأشباح داكنة اللون
ومشى هيثم مع أصدقائه ..وهو يطير بالقوة التي أعطاها له ملك الأشباح
ووصلوا لمكان المعركة وما كان يفعل هيثم إلا أنه يصرخ بتلك الصرخات كان يموت عشرات وعشرات من الأشباح الأعداء داكنة اللون
واسترجع الأشباح البيضاء قريتهم
وأعادوا هيثم إلى منزله بعد أن طلب منهم ذلك...
وتمني هيثم أن القدرة علي رؤية الأشباح لا يفقدها أبداً
ولم ينسي الأشباح هيثم أبدا ولا الذي فعله معهم
وظلت الأشباح البيضاء تزور هيثم كل فترة من الزمن وهم لا يستطيعوا أن ينسوه ولا ينسى الذين أحبهم وأحبوه.

المزيد »

تعرف على موقع Apartment Therapy

السلام عليكم ورحمة الله و بركاته

كان في موقع جامد عاوز اتكلم عليه من فترة، وقبل ما أبدا في بعض الحاجات واتشغل، قولت اكتب عنه على السريع : )

الموضوع وما فيه، إني من فترة كنت عاوز أفهم أكتر أسس تأثيث الشقق (وعشان الناس اللي بتحب تنجم، أنا مش هتجوز قريب ولا حاجة، الموضوع مجرد معلومات عامة مش اكتر D:) ومفيش أفضل من إنك تشوف الحاجات اللي الناس عاملنها فعلا في بيوتهم!

وموقع أبارتمنت ثيرابي بيوفر ده! كنت عارف الموقع من فترة بسبب مؤسسه ماكسويل جيلينهام رايان، واللي يعتبر مثال ممتاز في تأسيس موقع ناجح ومتميز ليه عدد كبير من المتابعين. لكن من قريب بدات اتابع الموقع بشكل فعلي عن طريق خلاصات RSS (ممكن من هنا تعرف ازاي تتابع الموقع والمدونات بطريقة سهلة جدا عن طريق rss)

حقيقي الموقع رائع جدا وبيعرض أفكار ممتازة، وأحسن حاجة عجبتني إنه مش زي كتير من المواقع بتجيب حاجات خرافية كأنها جاية من فندق سبع نجوم! ﻷ ده بيجيب حاجات واقعية وناس كتير عاملاها فعلا! (طبعا مع مراعاة فرق المستوى لانه أصلا بيكلم بشكل أساسي الناس في أمريكا وأروبا) بس بشكل عام هو ينفع أي حد في أي مكان لإن مجرد الافكار اللي بيعرضها ممكن الواحد يحاكيها أو بينفذها فعلا في أي بيئة تقريبا.

الجميل كمان إنهم في الموقع بيهتموا بالتبسيط عشان أنا في الحقيقية من أنصار تبسيط أي حاجة والبعد عن التشويش اللي ملهوش لازمة. الظريف كمان إنه حاليا مش موقع واحد، هو عبارة عن موقع رئيسي واربع أقسام أو مواقع تانية مرتبطة بالأول، الموقع الرئيسي Apartment Therapy واللي فيه بيتم استعراض الأثاث وكل ما يتعلق بتنظيم البيت. بعد كدا أول واحد قسم Unplggd وهو عن التقنية داخل البيت، يعني مثلا ازاي تتعامل مع الأسلاك الكتير بتاعت الكمبيوتر وملحقاته، ازاي ترتب ديسكتوبك بطريقة مريحة، ازاي تنظام الأجهزة الإلكترونية في البيت وغيرهم. تاني واحد Re-Nest وهو عن البيئة داخل البيت، يعني الاعتماد على المواد القابلة لاعادة التصنيع وزراعة المنزلية، وبعض النصائح المفيدة بخصوص البيئة. تالت واحد The Kitchn زي ما هو باين من أسمه عن الطبخ والأكل، والقسم ده معمول لحل مشكلة في المدن الكبيرة الأمريكية إنهم كتير من الأحيان مش بيعملوا أكل في البيت ومعتمدين على المطاعم والوجبات السريعة! رابع واحد Ohdeedoh ومتحاولش تدور على معنى الكلمة دي عشان ببساطة دي أول كلمة نطقتها بنت ماكسويل الصغيرة مش أكتر! والموقع ده بيتكم عن تربية الأطفال وتهيئة الجول المثالي ليهم في البيت، خصوصا تاثيث غرف الاطفال.
و ك كمان في Market Place وهو جزء مخصص للمحلات والشركات الصغيرة عشان تعرض منتجاتها

الموقع جامد جدا ومحتواه غزير عشان قائم عليه فريق عمل كبير نوعا ما، يعني ممكن فوق الـ ١٠ مواضيع في اليوم! (عشان كدا أنصح بشدة تتابعه عن طريق خلاصات rss زي ما وضحت فوق) إيه رأيكم في مثال؟

فكرت قبل كدا تستعمل أغلفة الكتب كلوحة فنية؟

من الافكار العبقرية جدا جدا جدا -على الأقل بالنسبة ليا!- اللي شوفتها في الموقع. يعني لوحة فيها كام غلاف لكتب، ويا سلام لو الكتب دي كانت عندك فعلا، رائعة فعلا. وقبل ما تسأل نفس السؤال اللي سألته، يعني هو احنا هنقطع الغلاف من على الكتاب؟ (ده شيء غير وارد اصلا D:) طلع إن مؤسسة بنجوين (وهي مؤسسة نشر كبيرة ومعروفة عندهم) كانت طرحت ١٠٠ غلاف لكتب نشرتهم، والأغلفة دي على ورق زي الصور الشخصية (٤×٦)، احنا عندنا هنا ممكن نعمل أي غلاف على السكانر ونطبعة على نفس نوع الورق ده، الطباعة من النوع ده مش غالية يعني.

بالمناسبة لو هتعمل الموضوع ده إيه الكتب اللي تفضل تحطها في اللوحة؟ : )



أخيرا متنسوش تقروا قصة مؤسس الموقع ماكسويل جيلينهام رايان بالعربي من هنا "ملخص كلمة ماكسويل"



استمتعوا : )

المزيد »

كتاب - قل لا واكسب نفسك.

كتاب قراته قبل كدا وكتبت عنه في أحد المنتديات الطلابية، بس شكلي محتاج أقراه تاني عشان أنا إنسان وبنسى!
كل شخص جواه جزء لطيف، وده شيء جميل، بس لو حسيت إنك لطيف أكتر من اللازم يبقى عليك تتخلص من الموضوع ده!

------

الكتاب متعلق بمشكلة موجودة عند اغلب الناس وإن كانت بنسب متفاوته بين شخص والتاني، كل فترة لما الواحد بيقيم نفسه ويشوف عيوبه اللي المفروض يتخلص منها ويشوف مميزاته اللي المفروض يزودها، كان من ضمن العيوب اعتقد إني لطيف زيادة عن اللزوم ومش بحب ازعل حد! الحمد لله اتخلصت من جزء كبير من المشكلة قبل ما اشوف الكتاب حتى، بس لما قريت الكتاب حسيت إني فعلا كان لازم اتخلص منها من زمان!

الكتاب "قل لا واكسب نفسك" لمهندس اسمه حسين جمعه، باختصار بيتكلم عن الناس اللي عندها مشكلة في قول كلمة "ﻷ" ومش بس المهم إن الواحد يقول ﻷ، إنما يقول لأ وميحسش بتأنيب الضمير او عدم الارتياح!

بالرغم من إن مقدمة الكتاب فيها نوع من بهرجة الكتب الأمريكية وكانت هتخليني اقفل الكتاب! بس ديما مش لازم الواحد يحكم على الكتاب من عنوانه، أو حتى مقدمته! (أصلا بعد كدا لما قريت نبذه عن المؤلف لقيته فعلا كان عايش في أمريكا!). الكتاب بشكل عام لذيذ، ويسرد بعض الحكايات والمواقف اللي اتقال فيها "ﻷ" فكانت منقذة لصاحبها، والمواقف اللي كان لازم يتقال فيها "ﻷ" وإيه اللي حصل لصاحب القصة عشان مقدرش يقول الحرفين دول!

وطبعا الكتاب مش بيدعوا الناس لانها تقول "ﻷ" وخلاص زي ما في بعض الناس بتعمل وتفتكرها قوة شخصية! عشان كدا بيفرق بين أنواع ﻷ، مثلا لما يكون الشيء اللي قدامك غير منطقي، زي لما تلاقي جهاز تمنه خمس آلاف جنيه وواحد بيعرضه عليك بألفين وبالكرتونه بس! يعني ده أكيد مسروق أو فيه حاجه، وهنا المفروض تقول ﻷ من غير تفكير أو تأخير! وبرده نوع تاني من ﻷ وهو في الحاجات الغلط، زي عرض رشوة أو عرض غير أخلاقي فهنا لازم تقول ﻷ بكل حزم، برده نوع كمان من ﻷ هو في المسائل العائلية أو الشخصية، مثلا واحد عاوز يستلف منك حاجة، المفروض تقوله لأ بلباقه ... وكدا يعني.

أخيرا، الكتاب حوالي ١٦٠ صفحة من الحجم المتوسط، وموجود في مكتبة مبارك الرئيسية، هتلاقوه ناحية رف علم النفس (في الحقيقة مش عارف ليه مش موجود في الفهرس!) وكان في كتاب بنفس الفكرة مترجم، بس مش فاكر اسمه!



وافتكر، كلمة من حرفين هتريحك كتير، قل لا واكسب نفسك!

المزيد »

أهلا تويتر!

فعلت حسابي على تويتر!

يمكن أكون متأخر كتير، لكن في الحقيقة مش بحب أكون مجرد شخص ماشي على الموضة! قبل كدا مكنتش محتاج تويتر، و آخر شيء محتاجه المزيد من تشويش المواقع الاجتماعية اللي بتاكل الوقت أكل!

لكن حاليا محتاجه في شوية حاجات، عشان كدا قررت تفعيله (من مدة عملت حساب على الموقع لكن مستعملتهوش فعليا)

بالرغم من إني مسجل متأخر بس مش ناوي اقعد أدور على الناس اللي هتابعها، يادوب كام شخص، عشان هحاول اخلي متابعتي لتويتر في أقل حدودها! كفاية المواقع اللي بتابعها على خلاصات rss .

أضفت الرابط للأيكونه اللي في المدونة من فوق.

و كنت بحثت على سمة خفيفة لصفحتي على تويتر، بس من الواضح إني هستعمل شكل قريب من المستعمل في المدونة هنا!

غالبا هستعمل واجهة الويب، وبفكر ادور على برنامج سطح مكتب للكتابة على تويتر، نظام اوبنتو لينوكس بيجي معاه برنامج بتاع المواقع الاجتماعية اسمه Gwibber الجميل إن نظام لينوكس فيه برامج كتير بتقوم بنفس المهمة و بشكل ممتاز، يعني هختار براحتي.

أخيرا رابط حسابي أهه ^_^

https://twitter.com/AhmedAbouZaid

المزيد »

أخيرا...

السلام عليكم ورحمة الله وبركاته

أخيرا خلصت المادة اللي عليا!

أول مرة في حياتي أذاكر/امتحن في الوقت ده من السنة! والظريف إني بمتحن على درجة واحدة D:

بس في الحقيقة واضح إني كنت عيان بذمة وضمير، في أجزاء كتير كنت مفوتها، يعني كنت في حالة صعبة جدا D:

اممممم، في كذا حاجة عاوز اعملها الفترة دي،

أشوف ورق الجيش، والإصدار التاني من كتاب أوبنتو، وكام موضوع تاني كانوا متوقفين الفترة اللي فاتت بسبب الامتحان!

وقررت كمان أفتح مدونة عن الدرجات الهوائية! (يعني عجلة، بسكلته، سيكل، بيكالا، اختار الكلمة المناسبة للهجتك D:)

هعمل المدونة دي عشان من المؤسف والمعيب كون أمة عدد المنتمين ليها يزيد عن الـ ٤٠٠ مليون شخص ومفيش موقع واحد بالعربي بيتكلم عن الدراجات الهوائية!! وكأنها موضوع في العلوم النووية! تخيلوا إني تقريبا سألت كل اللي أعرفهم (و اللي معرفهمش كمان!) مفيش واحد فيهم يعرف حاجة عن الفرق بين أنواع الدراجات؟ (الأنواع مش أسماء الشركات!)

المشكلة الحقيقة مش إن مفيش موقع، المشكلة إن الثقافة نفسها شبه منعدمة! بستغرب إن الناس بتشوف ركوب الدراجات الهوائية قلة قيمة أو إنها يا للأطفال يا للفقراء! ممكن استوعب الكلام ده من شخص كبير في السن في عمر والدي، لكن الغريب إن حتى الشباب بيشوف الموضوع بنفس الطريقة! وبعد كدا بنسأل هو لسه في حد بيعبد الأصنام لحد دلوقتي؟! أيوة إحنا بنعبد أصنام أهلنا المتمثلة في العادات والتقاليد، وبنتعامل مع حاجات كتير على أساس "هذا ما وجدنا عليه أباؤنا"!

عموما افتتاح المدونة هيكون في أقرب وقت، مع إن الفترة الجاية معالمها مش واضحة تماما، وممكن انقطع لمدة سنة على الأقل عن الانترنت عشان أداء الخدمة العسكرية! لكن على أي حال المدونة بإذن الله هتتفتح عاجلا أو آجلا! وطبعا الكتابة فيها هتكون بالعربية الفصحى (للمرة الـ١٢ أنا بكتب بالعامية في المدونة هنا عشان هي مدونة شخصية، لكن أغلب إن لم يكن كل المواضيع العامة -زي المواضيع التقنية- بتكون بالفصحى تماما)

إذا كنت مهتم بالدراجات الهوائية أو تحب تتعرف عليها أكتر، ممكن تحفظ رابط المدونة عندك لحين افتتاحها : )

الدراجات الهوائية بالعربية (مازالت تحت الإنشاء)

كمان، إن شاء الله على يوم ٢٣-١٠ أو ٣٠-١٠ هيتعمل احتفالية في القاهرة بالنسخة الجديدة من أوبنتو (Ubuntu (10.0 Maverick Meerkat وبإذن الله هشارك فيها وهتكلم عن المجموعة المكتبية أوبن أوفس دوت أورج (OpenOffice.org) الاحتفالية هتكون في كلية الهندسة جامعة القاهرة، والدعوة عامة ^_^

إن شاء الله لما يتم التأكيد على الميعاد هنزل اعلان في المدونة : )

ربنا ييسر الفترة، والواحد يعرف ينجز فيها : )

المزيد »

الترجمة على الطريقة القديمة.

السلام عليكم و رحمة الله و بركاته

في كل فترة امتحانات، الكمبيوتر بيتشال، وببدأ أركز أكتر واكثف المذاكرة، الفترة بيوصل فيها عقلي لأعلى حالات التشابك! وبيجيلي أفكار ممتازة، وعشان الفكرة متضعش وفي نفس الوقت مفيش حاجة تشتتني عن المذاكرة، بخصص كشكول اكتب فيه الأفكار أو التخطيطات اللي ممكن اعملها في الأجازة.

من ضمن الأشياء اللي كنت عاوز أعملها في الأجازة الصيفية، هي الترجمة بالطريقة التقليدية، يعني مفيش كمبيوتر، مفيش قاموس إلكتروني، فقط بالورقة والقلم والقاموس الورقي! الموضوع ممتع جدا وبيزيد من الحصيلة اللغوية بشكل ممتاز.

كان في عدة مواضيع مرشحة للترجمة، و هما كالتالي:

١. The Beauty Of Typography: Writing Systems And Calligraphy Of The World.[ثقافة عامة - خط و كتابة]

مقالة ممتازة عن أشكال الكتابة في أنحاء العالم، رائع جدا! بيتكلم عن الكتابة الجنوب شرق أسيوية (ياباني، كوري، صيني)، العربية، الهندية.

٢. Bridgeman Art Library v. Corel Corp.. [حقوق ملكية - قانوني]

قضية في أمريكا بين شركتين، عن التعامل مع المواد اللي بقت ضمن الملكية العامة لانتهاء مدة حماية الملكية الفكرة عليها ( حاليا في أمريكا و في أغلب الدول مدتها = حياة المؤلف + ٧٠ سنة).

٣. Kickstartup - Successful fundraising with Kickstarter.com & (re)making Art Space Tokyo. [إدارة أعمال]

قصة نجاح تمويل و طباعة كتاب في اليابان.

٤. Paul Graham Articles. [متنوع - إدارة أعمال]

مقال من مقالات بول جراهام، وهو مبرمج و مطور لغة برمجة Lisp، ليه اهتمامات تانية تاريخية و عن إدارة الأعمال.

٥. Top 25 LinuxJournal.com Articles of All Time - Part1, Part2. [تقني]

أفضل ٢٥ مقال على لينوكس جورنال.

٦. Copyright Term Extension Act. [حقوق ملكية - قانوني]

قانون تمديد حقوق الملكية الفكرية، اللي بيسموه برده قانون حماية ميكي ماوس! المعروف إن حقوق الملكية الفكرية كانت محدودة المدة، في الأول كانت ٢٤ سنة بعد كدا غيروها لـ ١٤ سنة قابلة للتجديد مرة واحدة يعني ٢٨ سنة، بعد كدا اتغيرت و بقت مدة حياة المؤلف + سبعين سنة، بعد كدا بتبقى ضمن الملكية العامة يعني أي حد يقدر يستفيد منها بأي طريقة. حقوق الملكية اللي كانت بتحمي شخصية ميكي المملوكة لوالت ديزني كانت هتنتهي و بالتالي الشخصية هتكون ملكية عامة، فطلع قانون يزود مدة الحقوق الملكية، و مرة تانية قبل إنتهاء المدة التانية، طلع قانون يزود مدة حقوق الملكية! كأن القانون معمول لحماية شخصية ميكي ماوس! (أصلا شركة والت ديزني تعتبر لوبي بحد ذاتها!)

٧. Most Popular DIY Projects of 2009.

موضوع من على موقع life hacker (هاكر بمعنى الشخص اللي بيعمل تعديلات في الحاجة عشان تناسب احتياجاته). ** DIY = do it yourself

و كان في موضوع عن النباتات العصارية والصبار، بس للأسف مش لاقيه.

اللطيف إن وقت ما بدات الترجمة أول موضوع اتكتب ليه جزء تاني عن لغات أخرى زي اللاتيني، العبرية، المنغولية و غيرهم (ياريت حد يترجمه، بحيث يكون الموضوعين متكاملين و بيغطوا عدد كبير من اللغات)

The Beauty Of Typography: Writing Systems And Calligraphy, Part 2

 قبل رمضان بدات فعلا في ترجمة أول مقال، وخلصت الجزء الصيني، بس رمضان دخل والوقت مكنش متظبط بالنسبة ليا، لما رمضان خلص كان في حاجات لازم اعملها! ولحد دلوقتي لسه في كذا حاجة لازم تخلص، وإن شاء الله على السبت اللي بعد الجاي هستكمل كتابة الإصدار التاني من "الدليل العملي في استخدام اوبنتو"، ده غير أوراق الخدمة العسكرية!

لكن مازال عندي نية لاستكمال الترجمة في أقرب فرصة بس حبيت اكتب عن الموضوع ممكن حد يلاقي الموضوع ممتع زي ما بستمتع بيه : )

شوية نصائح على الماشي:

• يفضل إنك تبحث عن موضوع متعرفش عنه أوي عشان تلاقي حاجة تترجمها إذا كنت بتدرس بلغة أجنبة، يعني ميجيش واحد في طب و بيدرس بالإنجليزي ويترجم موضوع درسه قبل كدا! حاول تشوف مواضيع بعيده عن مجال دراستك إذا كنت بتدرس بلغة أجنبية عشان تستمتع اكتر.
• برده إذا كنت عاوز تزيد المتعة، استخدم قاموس إنجليزي-إنجليزي و لو مقدرتش تفهم معنى الكلمة ابحث في القاموس إنجليزي-عربي.
• يفضل بشدة تطبع المقال على ورق و تترجمه بعيد عن الكمبيوتر!

بس كدا، استمتعوا ^_^

المزيد »

مراجعة لبرنامج FocusWriter.

من يومين، كتبت عن برنامج FocusWriter، في موقع وادي التقنية، ودي نبذة عن البرنامج:

مع انتشار التقنيات والأجهزة الحديثة أصبح هناك الكثير من التشويش الذي يحيط بالشخص أثناء استخدامه الكمبيوتر والأجهزة الحالية. حتى البرمجيات نفسها لم تسلم من ذلك وزادت البهرجة فيها، أصبح مطوري البرامج يتسابقون على إضافة الخصائص لبرامجهم، مما أدى إلى زيادة التشويش في واجهات البرامج (تلك أحد الأسباب التي تجعلني لا أفضل أسلوب العديد من برامج KDE).

لذا دعوني أعرفكم بالبرنامج الجميل FocusWriter، هو محرر نصوص حر مفتوح المصدر، متعدد المنصات (يعمل على جنولينوكس، وندوز، ماك) يهدف لزيادة التركيز على الكتابة، الكتابة فقط ولا شيء آخر. فكرة البرنامج تقوم على إزالة كل تشويش واجهة الاستخدام، والتركيز على النص، مما يزيد كفائة عملية الكتابة ويعزز توارد الأفكار بشكل سلس ومرتب.

ممكن تقرأوا الموضوع كامل من هنا FocusWriter، أنت والنصوص فقط.

استمتعوا : )

المزيد »

صور - الإفطار الأول لمجتمع لينوكس في القاهرة

السلام عليكم و رحمة الله و بركاته

في الحقيقة، أنا واحد من الناس اللي بتكره فكرة بقاء الناس في العالم الافتراضي ديما، و عدم تواصلهم على أرض الواقع، بالرغم من إني مش بصنف نفسي كشخص اجتماعي! بكره كون كل شخص قاعد ورا شاشة و على مقعده الوثير، و إنترنته السريع، و بيتعامل مع شخصيات افتراضية، على الإنترنت بعض الناس بتكون أقرب للمثالية و تخفي الأجزاء السيئة في شخصيتها، و البعض الآخر بيستغل عدم وجود تواصل مباشر و بيكون أسوأ! بعض الناس بتكون أجرأ على الإنترنت، و البعض الآخر بيكون أكثر ظرفا! كل شخص بيستغل الإنترنت بشكل مختلف، لكن في النهاية الحقيقة هي الحقيقة، و إننا في الأول و الآخر بشر : )

يمكن الموضوع ده بيكون بشكل مختلف في المنتديات التقنية أو الخاصة بالكمبيوتر، خصوصا اللي مفهاش قسم اجتماعي، المنتديات دي بحس كإننا رجال آليين! مع إننا في الواقع أشخاص ليهم نفس الميول و الإتجاهات، و من اللطيف إن الواحد يتعرف على أشخاص ليهم إهتماماته.

عشان كدا، قررت -و من فترة طويلة- تنظيم إفطار جماعي لأعضاء منتدى مجتمع لينوكس العربي، عشان نتعرف على بعض أكتر، و يكون في تواصل اجتماعي أكبر بعيدا عن المواضيع التقنية. اقترحت الفكرة في أول رمضان اللي فات، و ناس كتير عجبتهم الفكرة، و الحمد لله تم أول إفطار جماعي لأعضاء مجتمع لينوكس العربي في القاهرة.
طبعا الإفطار بقاله مدة، بس كان لازم الكتابة عنه في المدونة و لو بعد حين، و و أهو حصل الحمد لله : )

المكان: من أفضل الحدائق العامة في القاهرة، حديقة الأزهر.

الزمان: الإثنين ٢٠ رمضان ١٤٣١هـ -- ٣٠ أغسطس ٢٠١٠م.

كنا سبعة، العدد ميعتبرش كبير لإنها كانت أول مرة، و في ناس كتير كانت ناوية تيجي و معرفتش عشان ظروفهم الشخصية، بس أكيد إن شاء الله هيكون العدد أكبر، حقيقي كان يوم جميل جدا، و اتعرفت بناس جميلة ما شاء الله عليهم، و إن شاء الله يكون الإفطار السنوي عادة دائمة للينوكساوية في القاهرة : )

ناوي اكتب عن تجربة تنظيم الفطار ده، بس وقت تاني إن شاء الله. 

و طبعا كل الشكر لعبد الرحمن غانم اللي ساعد كتير في تنظيم الإفطار ده ^_^

هنا تلاقوا ألبوم فيه كل الصور اللي اتاخدت في الإفطار، الصور إلتقطها كذا شخص، بس كتير من الصور إلتقطها أنس عماد. و الأجهزة المستخدمة في التصوير هي:

OLYMPUS D555Z,C315Z - SONY ERICSSON P1 - Nokia E66

بالمناسبة، أنا رفعت كل الصور، الكويسة منها و الوحشة، اللي فيها مشكلة في الإضاءة و اللي الواحد طالع فيها شكله بايخ! (أنا شخصيا ليا هنا صور فظيعة ) عشان ببساطة الحياة كدا فعلا، مش دايما مثالية!

بالرغم من إني بهتم أكتر بالاستمتاع باللحظة بدل تجفيفها و الاحتفاظ بيها كذكريات، لكن هنا بعض الصور اللطيفة:

جامع محمد علي في قلعة صلاح الدين الأيوبي- الصورة متصورة من داخل حديقة الأزهر

 

أنا آخر واحد على الشمال، اللي لابس أخضر.

أنس عماد، نص قعدة أو نص وقفة D:

بحب الصور اللي بتتاخد في أي وقت كدا D:

 

جرادة مسكينة لقيتها هناك، اسيبها يعني؟ لازم آخد مع سعادتها صورة D:

و مش عارف إيه الكاميرات اللي بتستهبل دي؟ أنا إيدي مكنش فيها عرق ظاهر! خلاص يعني من الدقة مقطعة بعضها و جايبة إنعكاس الضوء على حبيبات العرق في مسام إيدي؟

صورة لذيذة، فكرة أنس، بس لسه في واحد مجاش :-)

 

أنا اللي صورتها دي، لمبة في الأرض وسط النباتات، شكلها كان تحفة بس الإضاءة بتاعت الكاميرا كانت المفروض تتظبط عن كدا!

أخيرا، صورة من صفحة حديقة الأزهر في ويكيبيديا، مش إحنا اللي صورناها لكنها جميلة : )

شكرا ليكم جميعا، كان لقاء جميل فعلا : )
و إذا كنت مستخدم نظام جنو\لينوكس في القاهرة و ما حولها، ممكن تشرفنا السنة الجاية، و لو مكنتش من مصر حاول تشوف الناس اللي بتستخدم لينوكس في مدينتك و حضّروا ليوم مشابه، أكيد هيكون رائع : )

المزيد »

كاريكاتير - حفلة ناموس!

السلام عليكم

لما الواحد يكون قرفان من كتر الهبل اللي بيشوفه، أو حتى لأي سبب تاني، فمن الأفضل إنك تغير جو أو تعمل شيء بتحبه. بالنسبة ليا من الحاجات اللي بفضل أعملها، إني أكتب عن موضوع من الموضوعات العامة أو عن الكمبيوتر، و برده أعمل حاجات محتاجة شوية دقة و صبر، بحس إنها بتضغظ القرف في كبسولات صغيرة و بالتالي يسهل التخلص منها : )

المهم،

زي ما هو معروف الناموس بيكون أكتر نشاطا ليلا، و ده لغرض واحد و هو سفك دماء الأبرياء النيام! و لكن نظرا لإني من الناس اللي أفضل أوقات التحصيل ليها الدراسي بيكون بالليل، خصوصا بعد الساعة ١٢ (منتصف الليل)، غالبا بواجه الناموس النشط و أنا صاحي!

شخصيا عندي اتلدغ من ناموس الشارع كله بس مستعملش المبيدات اللي بتترش زي البيروسول! عشان كدا غالبا بنستعمل الأقراص طاردة الباعوض زي ريد، كيتو، إزالو! مع إني شخصيا أعتقد إن الحل المثالي لتجنب لدغات الناموس هي "الناموسية" (و إياكم حد يقولي إيه الناموسية دي!) لكن مشكلتها إنها مش عملية غير للنوم، و كمان للتطور الحاصل في البيوت، مبقاش في حاجة تتعلق فيها الناموسية! و مازلت فاكر لماكنت أنا و أخويا صغيرين و بنجيب كل الأشياء الطويلة في البيت عشان نثبت الناموسية بالشكل المثالي زي ما كانت بتتثبت في عواميد السراير العتيقة اللي انقرضت دلوقتي و مش هتشوفها غير بيت جدك أو جد أبوك حتى!

المهم تاني،

الناموس ليه مواسم، و جزء كبير منه بيكون في الشتا، الواحد بيدخل الأوضة و يقفل على نفسه عشان يذاكر، كل شوية يلاقي ناموسة عمالة تقرف فيه، يقول في عقله، مش هقوم اشغل قرص ريد عشان لو قمت من على المذاكرة غالبا مش هرجع تاني قريب! فيقوم مموت الناموسة الرخمة، يلاقي اختها جاهزة عشان تقوم بمهمة اختها الشهيدة! المشكلة إنهم مش بيظهروا مرة واحدة، فعلا تحس إنهم ماشيين بالدور! عشان كدا بعد ما الواحد يموت ١٧ ، ١٨ ناموسة، يقتنع إن في كتائب ناموس مستنين دورهم، و عليه يقوم يحط قرص في الجهاز و يشغله.

يفضل الجهاز شغال، و برده لسه في ناموس، استنى شوية، برده لسه في ناموس، أبص لجهاز الناموس ألاقي الناموس بيطير حواليه، لأ و كمان ساعات ألاقي ناموس واقف جنبه بيدفى!!
ساعتها كنت رسمت كاريكاتير في الورق اللي بذاكر فيه، و قولت أحبره على الكمبيوتر عشان تخفيف القرف و بمناسبة ظهور الناموسات اليانعات في الأرجاء المحلية لبيتنا.

اضغط على الصورة للتكبير

استمتعوا D:




آه بالمناسبة، إذا كنت في مكان فيه ناموس كتير، أو ناموس من فصيلة أبو جاموس اللي مش بيتأثر بحاجة، ممكن تبقى تجرب قبل النوم بفترة احرق أقراص الكيتو أو الريد بدل ما تحطها في الجهاز، بس اعملها زي البخور كدا يعني مش بتكون مولعة بنار، دي تعتبر من أفضل الطرق للتخلص من كافة أشكال الناموس، و متنساش تهوي الأوضة شوية بعد الموضوع ده، و متقلقش الناموس مش هيهوب تاني ناحية الأوضة لفترة من الزمن تكفي إنك تنام قرير العين مرتاح البال.

المزيد »

كتاباتي، البحث في المدونة و أشياء أخرى.

السلام عليكم و رحمة الله و بركاته

# أخيرا صفحة "كتاباتي" اكتملت!

الصفحة فيها مقدمة صغيرة عن تعرفي على الإنترنت، و أهم المواضع و المقالات اللي كتبتها من أول لما بقى عندي جهاز كمبيوتر في البيت، يعني خلال الأربع سنين اللي فاتوا!

و أنا بكتب الصفحة كنت سعيد فعلا إني حقق جزء كبير من الأهداف اللي حددتها أول ما عرفت الأنترنت، و هي ببساطة البعد عن أي شيء فيه مضيعة للوقت و الجهد، زي نقاشات الجديلة العقيمة اللي مفهاش فايدة!و التركيز على الإنتاج، إنتاج محتوى جيد ذو قيمة و مفيد!

اغلب المواضع اللي كتبتها منقولة في كل مكان على الإنترنت و ده شيء كويس جدا، لإني بشجع على نشر المحتوى لكن طبعا مع احترام حقوق الملكية الفكرية.

كتبت حاجات كتير، يمكن أهمها كتاب الدليل العملي في استخدام أوبنتو لينُكس (و حاليا بحضر للإصدار التاني منه إن شاء الله)، و كتيب عن البرمجيات الحرة المفتوحة المصدر على نظام وندوز، و الإتنين حققوا نسبة انتشار ممتازة جدا، خصوصا الكتاب الأول عمل حوالي ١٥ ألف تحميل! (في الحقيقة ده فقط اللي عرفت احسبه! لإني اثناء نشر الكتاب على الإنترنت مكنش في دماغي حساب مرات التحميل و مستوى الإنتشار، و بالتالي في روابط كتير معرفتش احسب منها عدد مرات التحميل!).

يمكن اغلب المواضع خلال الفترة اللي فاتت هي المواضيع التقنية، لكن الفترة جاية إن شاء الله ناوي أكتب عن أشياء أخرى بهتم بيها من صغري لكن لم تنل حظها من الكتابة، زي المواضيع الاجتماعية، البيئية، الاقتصادية، و غيرهم : )

# أضفت مؤخرا أيكونة للبحث، و استخدمت البحث المخصص من جوجل.

بس اعتقد إني في وقت لاحق هخلي الأيكونات تحت الكلام مش جنبه!

  

# من فترة كنت بدور على خدمة للمراسلة عن طريق نموذج البريد الإلكتروني email form، جرب كذا موقع بيقدم الخدمة، يا إما فيهم مشكلة! (معلش لو حد راسلني قبل كدا و مردتش عليه!) في كذا خدمة كويسة لكن المشكلة إنهم مش بيدعموا غير اللغات اللاتينية فقط زي الإنجليزي! يعني الخانات و الكلام اللي عليها بيكون من الشمال لليمين!

موقع WUFOO من المواقع الممتازة جدا لكن برده نفس المشكلة من الشمال لليمين! راسلت فريق الموقع، قالولي إن معندهمش نية قريبة لدعم الغات اللي بتتكتب من اليمين للشمال زي العربي!

لكن الجميل إن عندهم خاصية للتعديل على شكل النماذج اللي عندهم باستخدام css، حملت قالب css بتاعهم و عدلت فيه و خليت اتجاه النموذج من اليمين للشمال، و حاليا أنا بستعمله و شغال كويس ^_^

هنا هتلاقي ملف css اللي بستخدمه.

و من كام يوم لقيت موقع EmailMe Form و هو لنفس الغرض و شكله بيدعم العربي كويس لإني عرفته عن طريق مدونة عربية، أنا مستريح مع الموقع الحالي، بس ممكن اجربه مرة تانية.

بالمناسبة، نصيحة مهمة جدا، إذا قررت استعمال نموذج المراسلة، لازم كل فترة تتأكد إن النموذج شغال و مفهوش اي مشكلة! تتأكد يعني تستعمله و تجرب تبعت منه رسالة لنفسك!

# أعتقد حاليا مش فاضل غير شوية تظبيطات هنا و هناك، و  صفحة "من يكون؟" : )

المزيد »

عبرو لهم عن امتنانكم : )

السلام عليكم ورحمة الله وبركاته

حاجة كنت كتبتها قبل كدا، اعتقد ده أفضل وقت ليها بمناسبة العيد، يمكن يكون يوم العيد خلص، لكن المفروض يكون العيد في قلبنا طول السنة  : )

لو سمحت، أي شخص تشعر ناحيته بمشاعر كويسة، أبسط حاجة انك تقوله. صديق، قريب، معلم، أو حتى شخص ملكش علاقة بيه وبتشوفه كل فين وفين!

أبسط حاجة تقوله شكرا، شكرا من اعماق قلبك وبكل صدق.

كتير من الأحيان السبب اللي بيمنعك انك تعبر عن امتنانك مش موجود غير في راسك وبس!

كنت غبي جدا لما حسيت اني عاوز اعبر عن امتناني لشخص ما لكن معملتش كدا عشان ميفتكرش اني بعمل كدا عشان مصلحة!

> وكنت غبي برده لما كنت محتاج حاجة من شخص لكن قررت مطلبهاش عشان اعبر ليه عن امتناني! لاني فكرت انه ممكن يفهم الموضوع غلط.

لكن بعد فترة اكتشفت إن مفيش أي تضاد بين المصالح والتعبير الصادق عن المشاعر والحب، وكتير من الأحيان إن الواحد هو اللي بيحط الحواجز، واللي في الحقيقة مش موجودة في أي مكان غير عقله.

التعبير عن الامتنان ممكن يكون من أبسط الأشياء، ليكن أثره بيكون أكبر مما تتوقع!

ممكن مجرد انك تسلم على شخص بحرارة وتشكره بصدق على شيء عمله ليك، ممكن يكون بكارت صغير فيه كلمة شكر بأفضل خط عندك، ممكن بهدية رمزية قليلة في سعرها لكن كبيرة في معناها، وافتكر إن الهدايا اللي بتكون من غير مناسبة بتكون أجمل : )

أو حتى وردة حقيقية أو شيكولاتة طعمها جميل ملفوف عليها فيونكة بلون مبهج : )

متستناش مقابل لإنك احتمال مش هتلاقي، عبر عن امتنانك عشان انت عاوز تعمل كدا، عشان هتبقى أسعد إذا عملت كدا.

صدقني لما تعبر عن امتنانك هتكون في حال أفضل، والشخص التاني كمان. هتكون سعيد ومعنوياتك مرتفعة بل وكمان ثقتك في نفسك أعلى بكتير، حاجات كتير صغيرة ليها أثر كبير جدا، يمكن يكون أثر أكبير مما تتخيله : )

التعبير عن الامتنان لشخص معين مش محتاج مناسبة ولا تحضير ولا أي مقدمات حتى، إبدء دلوقتي وفكر في شخص حاسس ناحيته بشعور جميل وقوله، أو حضرله هدية رمزية لكنها بكل الحب والإمتنان.

> وافتكر إن الهدية أحلى لما تكون مغلفة، وبتكون أجمل وأجمل لما تكون شخصية، زي لما يكون معاها كارت فيه اسم الشخص ويا سلام لو إنت اللي عامل الكارت، وطبعا مش محتاج أقول الهدية عمرها أبدا ما كانت بتمنها : )

بس كدا : )

المزيد »

عيد فطر سعيد - ١٤٣١ هـ

السلام عليكم و رحمة الله و بركاته

 

 العيد ده مش عارف ماله جميل كدا ليه ^_^
عيد سعيد على كل الناس ^_^
كل سنة وانتو طيبين : )

المزيد »

نجحت ^_^

السلام عليكم و رحمة الله و بركاته

# ملحوظة: التدوينة طويلة، لو عندك حاجة، خلصها و عدي علينا مرة تاينة D:

الحمد لله النتيجة ظهرت امبارح و نجحت صافي في الفصل الدراسي التاني ^_^ كان ترم رخم فعلا!

بس للأسف لسه معايا مادة من الترم الأول، و واقفة على درجة! عملت فيها التماس الترم الأول بس مخدتش أي درجة : (
المادة سهلة و لولا الموضوع بتاع الترم الأول كنت عديت منها بتقدير كمان، بس بصراحة مش عاوز امتحنها تاني، هحاول أشوف إذا كان في أي إلتماس عشان أخد الدرجة دي.

و للأسف برده بسبب إني عييت الترم الأول، أول سنة أنزل عن جيد بعد ما كنت جيد مرتفع و كان فاضلي كام درجة على الجيد جدا (جيد جدا في حقوق القاهرة يعني تقدير ممتاز، حتى أوائل الكلية بيكونوا جايبين جيد جدا مش امتياز، بس طبعا بيكونوا قريبين جدا من الامتياز) بس الفرق بسيط و إن شاء الله يتغطى بدرجات التلات سنين اللي فاتوا : )

الحمد لله : )


لاحظت شيء غريب جدا، إن السنة بتاعت نهاية كل مرحلة اعيا فيها، او زي ما بنسميها سنة الشهادة (تالتة اعدادي، ثانوي عام، رابعة كلية!) كشخص مسلم طبيعي أكون مؤمن بوجود الحسد، بس مش بحب الاشارة للحسد لاني بحس إنه شماعة الفاشلين! و كمان حتى مع الحاجات اللي حصلت دي مفيش مرة الموضوع أثر عليا بشكل كبير و لله الحمد : )

يعني في امتحانات تالتة اعدادي جالي التهاب في جفون العين، كنت داخل الامتحانات بعينين شبه مغلقتين!
تانية ثانوي، نزلة شعبية حادة أثرت عليا بشكل كبير، لكن كان من حسن حظي -و للأسف في نفس الوقت!- إن الكلية اللي كنت عاوز ادخلها (كلية الحقوق) كانت من أقل الكليات مجموعا! (للاسف عشان الكلية دي مش واخدة وضعها كويس زي باقي الكليات، و ناس كتير بتعتبرها كلية من كليات القاع!) و الحمد لله فترة الثانوي عدت على خير و مجموعي كان مجموعي أكبر من المجموع المطلوب في الكلية بل و بفائض كويس كمان.
رابعة كلية الحقوق، الفصل الدراسي الأول مرضت تلات مرات خلال خمس امتحانات! يعني دمار!

الكويس في الموضوع إن كل المرات اللي عييت فيها كان بسبب أمراض مؤقتة، يعني الحمد لله الإلتهاب بتاع العين كان بسبب ميكروب بسيط مش مرض مزمن. أثر النزلة الشعبية راح بشكل كبير خلال سنتين. العيا بتاع الفصل الدراسي اللي فات برده كان ميكروب بسيط و مفيش شيء مقلق.

الحمد لله الذي عافنا مما ابتلى به كثيرا من خلقه، الحمد لله

-------------------------

الفصل الدراسي الأول كان شنيع فعلا، مجموعة من العوامل حصلت مع بعض فكانت قصم ضهر : (

مع إني مش بحب أسرد المشاكل اللي بتحصلي عشان بحس إني عامل زي التلميذ البليد اللي بيدور على حجة يتعذر بيها، لكن ممكن يكون اللي هكتبه محفز لأي شخص، و طالما الواحد بذل مجهود كويس و مكنش بسبب تخاذل منه، فربنا عمره ما هيضيع جهده : )

مرضت  تلات مرات في فترة الإمتحانات! (كنت مش قادر اتحرك من السرير مش مجرد عيا خفيف زي البرد!) و هما أصلا كلهم خمس مواد! و المشكلة كمان إن الموضوع مكنش مرض بس، المواد اللي مرضت فيها بس الحمد لله عديت فيها لاني كنت مذاكر، المشكلة بقى كانت في المادة اللي نزلت فيها، اللي حصل كالتالي:

المفروض الواحد بيقسم المنهج لأجزاء في المراجعة، راجعت جزء كبير من المنهج، يومين قبل الإمتحان مرضت، و بالتالي آخر جزء ملحقتش أراجعه، دخلت الإمتحان، لقليت الدكتور جايب امتحان غريب جدا! المادة جزئين، الطبيعي إن الامتحان بيغطي اغلب اجزاء المنهج من الجزئين، لكن اللي حصل إن الامتحان كان عبارة عن سؤال إجباري و تلات أسئلة اختياري نختار منها اتنين، المشكلة بقى إن الأسئلة الاختياري كانت عبارة عن فقرتين "أ" و "ب"، الجزء ب في التلات اسئلة عبارة عن جزئية واحدة في الكتاب! يعني اللي مذاكرش الجزئية دي هيضيع منه اكتر من تلت الامتحان، و الجزئية دي اللي ملحقتش اراجعها عشان عييت! أخيرا الدكتور كان من النوع اللي مش بيدي الدرجات بسهولة، فالمحصلة إني جبت ٧ (درجة النجاح ١٠ و الشخص ليه ٤ درجات رأفة في السنة)

الامتحان التاني كنت عيان فيه برده، بس الامتحان ده مش مشكلته إني عيان، المشكلة إن المادة طويييييلة جدا (كتاب حوالي ١٠٠٠ صفحة و المشكلة إن المادة مفهاش عملي، كله نظري، يعني كنت بدخل لجنة الامتحان مش برفع راسي من على الورقة غير بعد انتهاء الوقت يعني تلات ساعات!) نفس الدكتور كان بيدينا السنة اللي فاتت، كنت عارف الامتحان بس ملحقش أحل اكتر من نص الامتحان! السنة دي اتكرر نفس الوضع بالظبط نفس الدكتور، نفس المادة الكبيرة، نفس نظام الامتحان، نفس الوضع، و بالتالي نفس الدرجة، ٨!

كدا المادة التانية هتتجبر و تبقى ١٠، و يتبقى درجتين رأفة، يعني مش هينفعوا مع المادة اللي بـ ٧! عملت إلتماس في المادين، عشان أخد أي درجة، لكن للأسف مفيش أي حاجة.



نيجي للفصل الدراسي التاني، كان كبير جدا، ست مواد كل مادة مجزئة لأكتر من كتاب (من كتابين لأربعة، و المادة اللي كتاب واحد كانت حوالي ٩٥٠ صفحة!) في وقت الامتحانات كنت بحاول بكل الطرق الابتعاد عن أي شيء ممكن ينقلي أي مرض! لدرجة كنت بغسل ايدي بالصابون أكتر من ١٤ مرة في اليوم ههههههههههه D:
لكن لإن المكتوب على الجبين لازم تشوفه العين، و لكل شخص قَدَره، في ليلة مادة الدولي الخاص و اللي كان فيها دكتور صعب و دقيق، معروف إنه مش بيدي الدرجات غير بالقطارة! يعني لو جبت ١١ في مادته يبقى انت كدا شخص متفوق D: (مع ذلك هو دكتور محترم جدا ما شاء الله و عنده علم غزير جدا في مجاله)، دخلت أنام شوية عشان أبدأ المراجعة خلال ليلة الامتحان (و ده أهم وقت بالنسبة ليا عشان بجمع فيه المادة كلها) و فترة الإمتحانات معروف فيها إن الكهربا بتقطع فيها كتير في أجزاء كتير من القاهرة الكبرى، اللي حصل إني لما نمت الكهربا قطعت، فحد فصل المكيف، فلما الكهربا جت تاني المكيف مكنش شغال، فطبيعي و أنا نايم أحس بالحر فرميت الغطا من عليا، بعد فترة حد شغل المكيف بس مغطانيش D: و أنا مكنش عندي نية أطول في النوم فكنت في مكان غلط، كنت في مواجهة هواء المكيف تماما! الخلاصة أخدت برد في معدتي! يعني الموضوع المرة دي مش مؤثر بيولوجي زي الميكروبات، إنما تأثير فيزيائي :D

طبعا مع أول أكل نزل في معدتي بعد ما صحيت، بقى عندي ألم فظيع في بطني، لدرجة مش قادر حتى أقعد! بدأت أعمل مشروبات سخنة يمكن تفيد، لكن للأسف كانت محتاجه وقت طويل، و مكنش في حل غير الدواء، لكن أنا كنت عارف النتيجة الحتمية للدوا، النوم! المفروض إني كنت اراجع لمدة ١٠ ساعات تقريبا قبل الامتحان، لكن على ما ألم بطني يخف انتهى الحال بساعتين بس! ساعتين مع كمية كبيرة من الاحباط و التوتر، قلت خلاص المادة دي كدا هنزل فيها : (

بس بعد شوية صغيرين بدأت أحفز نفسي ذاتيا، مع أقل من ساعين مراجعة، معنديش شيء أخسره! فقلت لازم أبذل أفضل ما عندي، لازم أوصل لأقصى مجهود عندي. راجعت اللي أقدر عليه و روحت الامتحان، و كانت المفاجأة D:
الدكتور جايب امتحان خزعبلي! D: امتحان شكله غريب غير الأسلوب المعروف للدكتور، طويل، اغلبه عملي، كل سؤال فيه أ ب ج، مقسومين لـ ١ ٢ ٣ !!!!
حتى الناس اللي ذاكرت كويس كانوا بيجاهدوا للحصول على الدرجات، يعني مشكلة على مستوى الدفعة كلها! يعني أنا لو قلت مفيش أمل إني أعمل حاجة في ساعتين قبل الامتحانات كنت هكون بذاكر في المادة دي دلوقتي!!

بالنسبة ليا العملي أفضل بكتير عشان محتاج فهم أكتر من الحفظ، و الحمد لله عديت في المادة دي ^_^ لكن للأسف ناس كتير نزلوا فيها، و جايبين أرقام غريبة يعني ٢ أو ٣ من ٢٠!

ده غير امتحانين كمان، كانوا صعبين جدا! فالمحصلة النهائية تلات امتحانات صبعة جدا و تلات امتحانات صعبة بس D:
مثلا في مادة الدكتور أول مرة يحاضر لسنة رابعة، و بالتالي معندهوش أي امتحانات سابقة، و كمان مرضاش يقول أي شيء على شكل الامتحان حتى! و كان في جزء عملي نزل في الآخر قالنا مقرر عليكم و ممكن يجي في الامتحان، يعني مفيش أي معلومة واحدة ممكن تعين الطلاب في المذاكرة! في الآخر مجاش عملي (يعني خلانا نذاكر جزء هو مش ناوي يجيبه!) العملي جه نظري!! يعني الاجزاء اللي بتيجي فها مسائل عملي جبها نظري يعني ارتباك لأبعد الحدود D:

بس الحمد لله أهو خلص بخيره و شره، و مع إنه كان ترم رخم جدا بس كان ممتع برده ^_^

 

-------------------------

بالمناسبة اللي جابلي النتيجة الترم ده برده صديقي الصدوق "باسم"، قولت يعني الراجل جابلي نتيجة ٧ فصول قبل كدا خليه يكمل المجموعة و يجيب التامن ههههههههههههه
شخصيا مش بكون متلهف على النتيجة زي أغلب الناس! تطلع وقت ما تطلع، يعني لو طلعت بدري هاخد درجات أكتر؟ ولا لو اتعلقت انهارده و جبتها بكرة هلاقي الدرجات قلت؟ مش عارف الناس مسروعة على إيه D:


كدا يعتبر -تقريبا- خلصت مرحلة الجامعة، كانوا أربع سنين رائعين فعلا، استمتعت كتير، اكتسبت خبرات أكتر، و الأكيد اصبحت أنضج بكتير : ) ربنا ييسر في الفترة اللي جاية : )

المزيد »

رمضان كريم : )

السلام عليكم و رحمة الله و بركاته

- كل سنة وانتوا طيبين بمناسبة شهر رمضان، و يا رب كل الناس تقدر تستفاد من الشهر ده على أكمل وجه : )

ناوي إن شاء الله اطبق نظام جديد الشهر ده (أو على الأقل هحاول!)، و هو الجلوس على الكمبيوتر يوم و يوم! يعني يوم اقعد على الكمبيوتر عادي و يوم ملمسش فيه الكمبيوتر! اعتقد ده هيوفر لي وقت كويس.

- حتى اللحظة نتيجة الكلية لسه مظهرتش! شكل الكلية هتنزلها على ليلة القدر ولا حاجة D:

و بالشكل ده تقديم أوراق الجيش هيكون على شهر عشرة بخلاف اغلب الكليات اللي المفروض ان طلابها قدموا اوراقهم فعلا لان نتيجتهم ظهرت من زمان!

- اعتقد اني هبدأ استخدم بشكل أكبر خاصية التدوين المصغر المدمجة في قالب المدونة، عشان منقطعش تماما عن المدونة، أو للمواضيع الصغيرة اللي مش محتاجة تدوينة كاملة. و هتكون التدوينات دي بلون مميز و تحت تصنيف "تدوينات مصغرة".

- امبارح (الأربعاء) كان أول يوم من رمضان و رائع كالعادة، كانوا في البيت عندنا معزومين عند قرايبنا، بس أنا و أخويا ملحقناهمش! و لقينا أخويا تاني مش رايح برضه، و بالتالي و قررنا نفطر مع نفسنا في البيت ^_^

بما إني من كبار مشجعي فن الطعام و الاعتماد على النفس في كل حاجة، فعمل الأكل مش مشكلة بالنسبة ليا، الحمد لله بعرف أعمل انواع كتير من الأكل و بتطلع حلوة كمان. بس المشكلة ناكل إيه D:

بعد المداولات و المناقشات قررنا ناكل شومن! الشومن (chow mein) و هي أكلة صينية و موجودة في دول جنوب شرق آسيا التانية زي اليابان و كوريا مع اختلاف المسميات. الشومن ببساطة عبارة عن نودلز مع خضار مقلية و دجاج أو جمبري. بعد البحث و التعرف على طرق تحضير الوصفة من الإنترنت نروح للخطو التانية.

المكونات، النودلز ببساطة استخدمنا إندومي (و يا ريت محدش يجيب سيرة الحوار الفكسان بتاع الاندومي يسبب الموت و مش عارف إيه اللي انتشر فجأة في المنتديات! أيوة الإندومي زيه زي كتير من المنتجات اللي بناكلها كل يوم فيها مواد صناعية، بداية من الشبسي لحد مرقة الدجاج المكعبات! حاجة معروفة من قرن يعني، و انا شخصيا عارفها من ابتدائي! و على العموم لو انت شخص اورجانك أوي كدا ممكن متستعملش التوابل اللي معاها! انا مش بقول منهتمش بصحتنا بس فعلا بتشل من الحاجات اللي بتنتشر مرة واحدة كدا و كأنها اكتشاف علمي عظيم!) افضل طعم مناسب للأكله دي اعتقد إنه "الشعرية المقلية (اللي الكيس بتاعه أبيض). بعد كدا نشوف الخضار، أي خضار ذات قوام مش مائي تنفع تستخدم، يعني بسلة، فاصوليا خضرا، جزر، كوسة، بروكلي، فلفل رومي أو حتى ماشروم و طبعا البصل مكون أساسي. طيب نيجي لموضوع البروتين، اللحوم يعني D:

بعد بحث سريع على الإنترنت، لقيت موقع مفيد جدا بيجيب العروض الدورية للسوبر ماركتس الكبيرة زي كارفور و أبو زكرى و المحمل و غيرهم، الموقع هو "عروض دوت نت"، و احنا بيتنا قريب منه فرع أبو زكري، مترو، و المحمل، يعني براحتنا بقى، بس مش براحتنا أوي عشان أصلا الموضوع ده مكنش معمول حسابه لاننا المفروض كنا هنفطر عند قرايبنا، يعني يا رب الفلوس تكفي D: في النهاية استقرينا على الدجاج (المجمد طبعا D:)

طبعا كان الوقت متأخر نوعا ما، و الخضار اللي في السوق باقي التنقيه، يعني حالتها مش أوي، لإن اللي اشترى اشترى من بدري! المهم انتهى الحال بالغاء فكرة شراء الخضار بتاعت الشومن! و الاكتفاء بخضار السلطة زي الطماطم و الخيار ... إلخ.

كدا الوصفة بقت مش مظبوطة أوي بس تمشي برده. مسكت الدجاجة المسكينة و فصلت اللحم عن العضم لحد ما بقت هيكل عظمي D: (و طبعا الهيكل العظمي ده مش بيترمي! إنما بيتعمل منه مرقة)، قطعت اللحم لشرائح و تبلته بالبهارات الأساسية (ملح، فلفل اسمر، شطة، كمون) و كمان واحدة من التوابل اللي موجودة مع الإندومي، و اتنين من صوص الصويا اللي معاها برده، و خل، مع بعض النغزات بالشوكة عشان اللحم يتشرب التتبيلة بشكل كويس و سبتها مدة ٢٠ دقيقة تقريبا تتشرب التتبيلة. (في الوقت ده كنت بعمل شوية حاجات تانية زي التمر بالحليب و الكركديه) بعد كدا سويتها عادي خالص بالسفع على الزيت. و أخيرا عملت النودلز، بس لازم تكون المية فيها قليلة قدر المستطاع (يعني مش بالطريقة التانية اللي بتكون فيها شوربة كتير). و في النهاية تخلطهم على بعض او تحطهم جنب بعض، براحتك، و بالهنا و الشفا ^_^

المفروض كان في خضار نص مقلية بس الأكلة ملهاش نصيب تكمل، و زي ما انتوا شايفين تعتبر أكله سريعة و مفهاش أي مهارات خاصة D: بس المهم ان طعمها كان حلو و عجبت اخواتي ^_^

و طبعا الأخين اللي كانوا معايا كانوا بيشاركوا في التحضير بطريقة أو أخرى، ما هما مش بشوات يعني أنا اعمل الأكل و هما ياكلوا على الجاهز هههههههههههه. و مكانش فاضل غير أعواد الأكل الآسياوية D: صحيح محدش يعرف بتتباع فين في مصر؟

و لنا لقاء آخر إن شاء الله بخصوص فن الطعام، ممن يكون عن البرجر النباتي مثلا D: و كل سنة و انتوا طيبين مرة تانية ^_^

المزيد »

أهلا بالسمة الجديدة : )

السلام عليكم ورحمة الله وبركاته

 النت كان مقطوع بقاله كام يوم ولسه فيه شوية مشاكل! بس ده ميمنعش من تفعيل السمة الجديدة D:
بانتهاء اللمسات الأخيرة، تم تفعيل السمة (theme) الجديدة واللي لسه ملقتلهاش اسم D:

السمة مبنية على سمة "نيو" من إنتاج مدونة المصنع، لكن مع تبسيطها وإضافة لمسة عربية، مع ألوان مبهجة، وكمان تم اضافة خطوط جديدة (اخيرا اتخلصت من خط اريال وتاهوما!) الخطوط مضمنه عن طريق  @font-face (شرح عربي، شرح انجليزي)، يعني الخطوط هتظهر بشكل موحد سواء كانت موجودة عند على جهاز الشخص اللي بيتصفح الموقع ولا ﻷ، بس ده محتاج متصفح حديث، أغلب المتصفحات حاليا بتدعم الخاصية دي (فاير فوكس، كروم، اوبرا، وغيرهم)، ولا عزاء لمستخدمي المتصفحات المتخلفة!

استخدمت خطين رائعين، الأول للعناوين والتاني للمتن.
الخط الأول هو خط نسخ عثمان طه "Uthman Taha Naskh" وهو خط مجاني يصدر عن مجموعة الخطوط الحاسوبية.
الخط التاني هو الإصدار التالت من خط ون "KacstOne" وهو خط  نسخ سطري، حر ومفتوح المصدر من مجموعة خطوط مدينة الملك عبدالعزيز للعلوم والتقنية، والشكر موصول للأستاذ خالد حسني من مجموعة عرب آيز لتحديث الخط واطلاق الاصدار التالت منه.

أحب اوضح شيء بسيط، السمة أساسية مش مؤقتة، عشان محدش يفتكر انها عشان رمضان بس! بحاول حاليا اتعرف اكتر على الزخرفة العربية والإسلامية بأنواعها، لاننا فعلا عندنا تراث رائع لا يقل عن تراث أي حضارة تانية، محتاجين بس ننفض عنه التراب، ونخليه مواكب للحداثة زي استخدام الالوان المبهجة والتقنيات الحديثة مع المحافظة على الأصالة والعراقة : )
مع إني مش عارف إذا كنت هقدر أوصل للهدف ده ولا ﻷ لكني بحاول : )


وإن شاء الله في أقرب وقت هحاول انضفها أكتر من الأخطاء عشان تكون متوافقة مع المعايير القياسية للويب (أنا مستلم السمة بحاجة وتلاتين خطأ وتنبيه، دلوقتي الأخطاء وصلت لحاجة وستين، مع إنه على مدونتة التجارب حوالي أربعين خطأ، مش عارف أنا عملته ايه بس )


أخيرا، طبعا أي تعليقات أو ملاحظات على السمة الجديدة (حتى لو كانت صغيرة!) مرحب بيها تماما : )

المزيد »

حاول تستمتع بحياتك : )

السلام عليكم و رحمة الله و بركاته

بما إن السمة الجديدة شبه جاهزة، فبقالي فترة متحمس و عاوز انقل للمدونة بعض الحاجات اللي كتبتها قبل كدا، او بعض الأشياء اللي بعملها او بقراها.
 

ساعات الواحد بيفضل يقول "بكرة هيكون أحسن"، و يفضل مستنى بكرة، بعد كدا يكتشف إن بكرة مش أحسن أوي من دلوقتي، أو حتى مش أحسن خالص! و يفضل حابس نفسه في دايرة مغلقة، و يجي عليه وقت يكون قضى جزء كبير من عمره و هو لسه مستني بكره عشان يمكن يكون أفضل! الأفضل إن الواحد يستمتع بحياته زي ما هي، و يستمتع بكل فترة فيها، أيوه شيء غبي إنك تبقى عارف بوجود مشكلة  و كمان عارف حلها، بس عارف إنها مش هتتحل غير بانتهاء فترة معينة! فالأفضل إنك تتعامل مع الوضع الحالي بكل ما فيه. إستمتع وقت الفرح، و حاول متزلعش وقت الحزن، لإن كل شيء و ليه نهاية : )


مع إني مش بحب كلمة "خاطرة" بس مش لاقي ليها اسم تاني بصراحة! عموما اهه الخاطرة اللي جت في دماغي من حوالي تلات اسابيع، و كتبت عنها بدون تحضير، حبيت افكر نفسي بيها و أفكر اللي حواليا كمان : )

-------

حاول تستمتع بحياتك و بكل فترة فيها مهما كانت المشاكل اللي فيها، مفيش حياة وردية على طول و مفيش حياة سودة على طول، كل الناس عندهم مشاكل بس في بيقدر يستمتع، وجود مشاكل مش معناه انك متستمتعش بحياتك، استمتاعك بحياتك مش معناه ان مفيش مشاكل، الموضوع بسيط بس المهم انك تفهم الموضوع ده فالوقت المناسب مش بعد ما يضيع جزء كبير من عمرك.

حاول تستمتع بكل فترة و مرحلة في حياتك و متفضلش مستني المرحلة اللي بعديها و تقول اكيد المرحلة اللي جاية هتكون افضل، و لما تيجي المرحلة دي تلاقي نفسك برده حاطط أمل على المرحلة اللي بعديها، و تيجي بعد فترة تلاقي نفسك قضيت اغلب عمرك و لسه مش مستمتع و مش حاسس انك سعيد،،، و افتكر ان السعادة طريق بيتمشي فيه مش هدف بتوصله.

كل الناس عندها مشاكل في حياتها، حاول تحل مشاكلك بذكاء، الشيء القوي الصلب لو اتعرض لضغط قوي هيتكسر، و الشيء الطري و ملهوش هيكل لو اتعرض لضغط هيتشكل بحسب الضغط ده و هيفضل على طول كدا، حاول يبقى عندك نوع من المرونة مع المشاكل، متكنش صلب اوي فتتكسر و مكنش طري اوي فتتغير تماما، ببساطة خليك مرن!

مش كل المشاكل لازم تتحل! في مشاكل خاصة بمرحلة معينة في حياتك و بمجرد انتقالك للمرحلة اللي بعدها المشكلة هتروح لوحدها، في مشاكل بتكون محتاجة وقت مش اكتر، حل المشكلة بسرعة ممكن يكون تأثيره أسوأ من المشكلة نفسها، كل مشكلة ليها حل، بس لازم تدور على الحل المظبوط، الحل ممكن يكون ببساطة انه تسيبها من غير حل، لانها هتتحل لوحدها، سواء عشان نوع المشكلة كدا او انها مشكلة مؤقته مرتبطة بفترة معينة مش اكتر.



اللي عاوز قوله باختصار، مفيش حد معندهوش مشاكل، حاول تستمتع بكل فترة من حياتك و اياك تفضل منتظر المرحلة الجاية و تقول اكيد هتبقى احسن و هكون سعيد فيها، و إذا ملقتش اللي يسعدك حاول تسعد نفسك.


بس كدا.

المزيد »

ملخص ....

السلام عليكم و رحمة الله و بركاته

بقالي فترة مكتبتش حاجة!

- بعمل حاجات كتير الفترة دي، منها الإصدار التاني من كتاب أوبنتو "الدليل العملي"، تقريبا الغلاف بقى جاهز، و طبعا التخطيط كان خلصان من فترة، و الحمد لله خلصت جزء كويس منه، بس أعتقد اني محتاج أسرع شوية.

- كذا كلية نتيجتها طلعت، اللي نجح و اللي اخد لقب "خريج"، و تقريبا إحنا كالعادة هنكون آخر ناس و النتيجة مش قبل اسبوعين تلاته!!

- برده الفترة اللي فاتت جربت توزيعة slitaz جنو\لينُكس، واحدة من أصغر توزيعات لينُكس، حجمها ٣٠ ميجا بس! و بتبدأ بـ ٥٠ ميجا في الرامات، يعني لو عندك رامات ١٢٨ هتشتغل معاك زي الفل! سليتاز مش مجرد توزيعة فاضية، في الحقيقة هي توزيعة كاملة و بيكون معاها برامج كمان! بالإضافة للوحة تحكم و مدير حزم بيسهل تثبيت البرامج بشكل كبير. و كمان مدعومة في برنامج UNetbootin، يعني ممكن تركيبها على فلاشة بكل سهولة.

- اعتقد إني شخص صبور، لكن لما بلاقي نفسي بعمل حاجة لفترة طويلة بحاول من وقت للتاني أغير الحاجة اللي بعملها و اعمل حاجة تانية، و نظرا لاني بقالي فترة مركز على إنهاء الكتاب، قولت اتوقف شوية و اعمل حاجة غير، فكنت بسلي نفسي شوية في تجربة و تعديل سمات بلوجر، و عملت مدونة للتجارب.

جربت كذا سمة، و تذكرت السمة اللي عملها أحمد عبد المنعم اللي كان معروف باسم "كتوم"  صاحب مدونة المصنع، و هي مدونة جميلة جدا متخصصة في تطوير مواقع الويب. من المدونات الجميلة جدا فعلا، مع اني يا دوب عندي خلفية بسيطة في html و css لكن بستمتع جدا كل ما ازورها، و بكون مش عاوز اقفل الصفحة، بحس ان الأخ أحمد عبد المنعم بيكتب المواضيع من قلبه!

المهم، بعد شوية تعديلات على السمة عشان تكون مبسطة أكتر، بحس ان كل الحاجات الإضافية دي عبارة عن تشويش ملهوش لازمة! و مع ان كتير شايفين ان سمة مدونتي في شكلها الحالي بسيطة أكتر من الازم، لكن أعتقد إنها محتاجة تكون ابسط و منسقة بشكل أفضل! عموما ده الشكل الحالي للتصميم، طبعا مش النهائي و هتلاقيوا حاجات غريبة بتحصل فيه، بس غالبا هيكون محافظ على الشكل العام البسيط ده!

امممم، ايه تاني؟ ... آه افتكرت





-  من كام يوم حضرت فرح أخت صديقي الصدوق باسم، أو زي ما بقول عليه في مصر "الأنتيم"!، مع اني بحاول ابقدر المستطاع تجنب أي فرح عشان استريح من الوش و وجع الدماغ، لكن بأي حال من الأحوال مكنش ينفع محضرش الفرح ده، لان زي ما بقول باسم ده أخويا من أب و أم تانين D: احنا مع بعض في كل حاجة تقريبا من ابتدائي : )


في الحقيقية الفرح ده خلاني أبص للموضوع بشكل تاني، أعتقد إن الأفراح دي فعلا من الحاجات المؤثرة جدا، خصوصا فيما يتعلق بأب و أم العريس و العروسة، يعني مثلا من اللحظات المؤثرة جدا لما كانوا بيحيوا والد و والدة العريس، فوالدة العريس أخدته بالحضن، أنا شوية و كنت هعيط من كتر ملامح السعادة اللي ظاهرة على والدة العريس D:


ربنا يكرمهم و يوفقهم في حياتهم، و يكونوا أسرة سعيدة : )

و عقبال باسم D:

المزيد »

سطح مكتبي - 8\7\2010.

السلام عليكم و رحمة الله و بركاته

أخيرا أول امبارح سطبت اوبنتو ١٠.٠٤، و بعد شوية تظبيطات النظام بقى جاهز للمهام الشاقة D:



الخلفية للمبدع وسام شوكت.
حملها من هنا


بحاول ابطل العادة الوندوزية العتيقة بتاعت الأيكونات على سطح المكتب! حاليا بحاول أخلي سطح المكتب فاضي قدر الإمكان بحيث يكون زي مسرح العمليات و بعد ما انتهي من الحاجات اللي بعملها انضفه تاني D:

-----

بحاول اتعامل مع النظام ببساطة أكتر، يعني ليه الأيكونات الأساسية (زي كمبيوتر و نتورك و الهوم) طالما انهم موجودين في القوائم اللي فوق!
كتير من الأحيان بحاول أركز في عمل شيء معين و في النهاية بلاقي نفس بعمل اربع حاجات في نفس الوقت !!! (عشان كدا انا أنصار جنوم شل! لان الواجهة بتزيد التركيز و الانتاجية بشكل واضح)



برده من أول الحاجات اللي بعملها بعد التسطيب بقوم باستبدال مدير الملفات nautilus بـ nautilus elementary و هو عبارن عن نسخة مبسطة من الأول و قابل للتخصيص كمان!



تقد تضيف مخزن البرنامج لنظام عشان تحصل على آخر تحديثات
ppa:am-monkeyd/nautilus-elementary-ppa

-----

و طبعا أول برنامج بسطبه بيكون حبيبي ubuntu tweak، واحد من البرامج العبقرية فعلا! و بيوفر وقت كبير جدا جدا!



-----



برده من الحاجات اللي مش بستغنى عنها لاني بصراحة مش بستحمل ملل مواقع رفع الصور ولا برامج رفع الصور! عشان كان من أول الحاجات اللي بحثت عنها لما بدأت استعمل لينوكس.

و النتيجة كانت سكربت لرفع الصور لموقع ImageShack.us بكل سهولة بمجرد كليك يمين على الصورة!

اللي يحب يجرب السكربت هيلاقيه هنا، مع ملاحظة انه مش للتركيب بشكل مباشر، يعني هتحتاج عمل بعض الخطوات (إن شاء الله في أقرب فرصة هعمل منه نسخة جاهزة للاستخدام بشكل مباشر)
باش سكربت بواجهة رسومية لرفع الصور على موقع ImageShack.us














كفاية كدا دلوقتي D:

المزيد »

الامتحانات خلصت، أخيرا!

السلام عليكم و رحمة الله و بركاته

أخيرا بعد حوالي شهرين و نص من الانقطاع شبه التام عن الإنترنت (و عن حاجات تانية كتير كمان!)، و أكتر من تلات أسابيع من الامتحانات و شد الأعصاب بشكل بشع، خلصت أخيرا الإمتحانات من يومين!
في البداية بعتذر لأي شخص كتب تعليق في المدونة و مردتش عليه الفترة اللي فاتت، معلش زي ما شايفين، مفيش كمبيوتر و امتحانات و كدا يعني : )


سنة رابعة دي من أولها سنة شنيعة بصراحة! و مواد الفصل الدراسي التاني تنفع تدرس في سنة كاملة! ست مواد كل مادة فيهم ما شاء الله، مادة كتابها مقرب على ١٠٠٠ صفحة، مادة تلات كتب، مادة أربع كتب ... بلاش أكمل أحسن xD

و الامتحانات برده ما شاء الله يعني، منهم تلات امتحانات يخلوا الواحد يشد في شعره

مع اني مستمتع جدا بالدراسة من أول يوم دخلت فيه الكلية، و لحد آخر يوم، لكن الترم ده كان فعلا صعب جدا و الضغط فيه عالي، لكن الحمد لله الواحد بذل مجهود كويس و ربنا ييسر في النتيجة : )

-------

المهم، الامتحانات خلصت و الأجازة جت، و بما ان - المفروض! - ان دي السنة الأخيرة في الكلية، يعني لسه في مواضيع الجيش (الخدمة العسكرية) و شوية حاجات كدا قبل ما الواحد يبدأ المرحلة الجديدة : )

ديما في كل فترة امتحانات لما بشيل الكمبيوتر عشان أركز في المذاكرة، بخصص كشكول بكتب فيه أي فكرة بتيجي في دماغي، و ده ليه فايدتين اساسيتين، الأولى عشان اصفي ذهني من أي حاجة تشتت تركيزي في المذاكرة، و التانية عشان الفكرة متضعش (و في فترة الإمتحانات بيكون في أفكار عبقرية فعلا خسارة تضيع )، لكن الترم بخلاف أي ترم ده كتبت كمية حاجات كتير جدا O_o (اصلا في العادي الافكار و الحاجات اللي كنت بكتبها كانت بتكفي الأجازة و تفيض، نما بكمية الحاجات اللي انا كتبتها دي انا كدا معايا مخزون لمدة سنتين مقدما ) ، تقريبا كتر الضغط و التركيز الذهني في المذاكرة بيخلي عقل الواحد يوصل لدرجة عالية من درجات التشابك


حاليا بحاول استرخي شوية و اخطط للحاجات اللي إن شاء الله ناوي أعملها في الأجازة، بس الأول اصل الجهاز بتاعي لان فيه مشكلة في الكهربا بتاعت اللوحة الأم (الـ motherboard يعني ولا مؤاخذة)، درجة الحرارة عند المعالج فو الـ ٨٠ درجة! و مكان المشكلة أصلا الناحية المقابلة للمعالج، يعني تخيلوا بقى درجة الحرارة كام في مكان المشكلة!

بفكر غير الجهاز كله و اشتري جهاز جديد، بس اعتقد ان الموضوع ده متوقف على اذا كنت هدخل الجيش ولا ﻷ (شخصيا انا عاوز ادخل! هي سنة، هتعدي بالطول أو بالعرض، و على أي حال هتكون تجربة جديدة اكيد اكيد هستفاد منها حاجة!)


-----

من أول الحاجات اللي ناوي اعملها ان شاء الله، التحضير للاصدار التاني لكتاب "الدليل العملي في استخدام أوبنتو"، استقريت على الغلاف و بدأت التخطيط للشكل و المحتوى العام، ان شاء الله هيكون فيه تغييرات ممتازة سواء من الناحية الشكلية أو الموضوعية : )

-----

من فترة كنت عملت سمة لحمل الإقلاع الرسومي BURG (هتلاقي معلومات أكتر عن البرنامج في الرابط) باسم "العربية و الحرية" و هي عبارة عن سمة مع لمسة عربية، و كنت استعملت خط الكتروني لكتابة الجملة، بس لقيت انها اذا اتكتبت بخط الثلث هتكون أجمل بكتير، لكن للاسف معنديش أي خط ثلث و معرفش واحد مجاني، عشان كدا قولت أكتب الكلمتين من الصفر (يعني بدون الاعتماد على أي خط الكتروني) و اعتمدت في الكتابة - او بالاحرى الرسم! - على بعض المخطوطات القديمة و طبعا باستخدام البرنامج الرائع انكسكيب ^_^

خلفية السمة بعد تعديل الكتابة

فعلا، الخط العربي ده عبقري!



صحيح اي واحد عنده خلفية عن الثلث هيقدر يطلع بعض الأخطاء، لكنها كانت تجربة سريعة عشان اشوف الوضع هيكون عامل ازاي، و مين عارف، ممكن على بداية السنة الجديدة يكون متوافر خط ثلث احترافي و طبعا حر ; )

-------


اممممممم ايه تاني؟ مش فاكر p:


بس في النهاية ممكن اقول تبا لكرة القدم أفيون الشعوب! و تبا للمهاويس اللي سايبين حالهم و اشغالهم و عمالين يتابعوا كاس العالم!

المزيد »