السبت، 27 ديسمبر 2014

ملخص سبتمبر، وأكتوبر 2014.

مرة تانية، تسليط الضوء على بعض الأحداث من الفترة اللي فاتت، كانوا شهرين رائعين فعلاً، يمكن أهمها حصولي على شهادة RHCE :-)

- السنة الأولى لموقع "كتب عربية حرة"! (١ سبتمبر ٢٠١٤).

موقع كتب عربية حرة اللي أنشأته في ٢٠١٣ كمل سنته الأول! كانت سنة مليئة بالإنجازات، وسعيد جداً إن الموقع حقق سريعاً جزء من الأهداف اللي اتعمل عشانها :-)

كل تفاصيل السنة في المقال على مدونة الموقع "سنة على موقع كتب عربية حرة!".

- شجرة غريبة؟ (٢٣ سبتمبر ٢٠١٤).


شجرة كنت بشوفها كتير وفي أماكن مختلفة، من القاهرة لحد شرم الشيخ ودهب في سينا! وبلاحظ إن الناس بتقطعها على طول، في حد قالي إنها ممكن تكون بتنتج مخدر أو حاجة زي كدا وبالتالي الناس بتقطعها، بس مكانش منطقي بالنسبة ليا.

بعد الكثير من السؤال والفحص والمحص، أخيراً عرفت نوع الشجرة، طلع اسمها الدارج "عشر" أو "أشخر" ... وطلعت سامة جداً عشان كدا الناس بتحرقها أو بتقطعها أول بأول! كويس إني ملعبتش فيها لإني من النوع اللي بيحب يستكشف الحاجات الجديدة والغريبة! D:

عشار باسق - Calotropis procera - صحة أونلاين: نباتات سامة! - موسوعة النباتات الطبيعية: العشر

- وثيقة تعريفية عن موقع LibreBooks.Org (٢٦ سبتمبر ٢٠١٤).

في شهر مايو اللي فات، عملت ملف تعريفي Brochure عن مشروع "كتب عربية حرة" للمشاركة في مسابقة أفضل المواقع العربية للويب واللي فزنا فيها بالمركز الأول.

ومع الذكرى السنوية الأولى للمشروع، قررت تحديث الملف ونشره على الموقع "وثيقة تعريفية حول مشروع كتب عربية حرة."

الملف ده مش مجرد ملف تعريفي وشامل، لأ كمان فيه كل الأدوات اللي استعملناها في عمل الموقع! واللي كلها برمجيات حرة مفتوحة المصدر! :-)

- زيارة مرسى مطروح لأول مرة (٥ أكتوبر ٢٠١٤).

أخيراً، في عيد الأضحى سنة 1435 رحت مدينة مرسى مطروح! المدينة ظريفة جداً مياه نقية، وشواطئ بيضاء رائعة ... كانت تجربة عظيمة مع ناس ظريف :-)

وللعلم عشان الناس ديماً بتقع في الغلطة دي، مرسى مطروح وإن كانت مدينة ساحلية، فهي في الأصل ذات طابع بدوي، يعني الأكل البحري هناك على قده جداً، إنما الشوي واللحوم رائعة، ولازم تجرب لحوم المراعي اللي هناك ... من أفضل النوعيات اللي جربتها في حياتي على الإطلاق!


صورة التقطها أول ما وصلت :-)

الجدير بالذكر، إني كسرت الرقم القياسي بتاعي في القفز في الماء D: وقفزت من فوق صخرة حوالي ٦ متر في المية، أعتقد ده أعلى ارتفاع وصلتله في البحر بعد القفز من فوق اليخت في شرم الشيخ السنة اللي فاتت. الصخرة بتاعت شاطئ الغرام ... أيوة بتاع فيلم ليلى مراد D:

الصخرة ملهاش مطلع، يعني بتتسلق عليها كيف السحالي DDD: ولما بتطلع ملهاش منزل، يعني لو معجبكش الوضع فوق مفيش حل مينفعش تنزل لازم تنط، لقيت كذا حد بينطها وفي مكان عميق بما فيه الكفاية عشان تنط من الارتفاع ده بأمان (هو حواليه شوية صخور بس بمسافة آمنة يعني)، وعليه قررت أتسلق وانط من فوق D:

لما طلعت المنظر يبدوا أصعب ومختلف، كان في شوية رهبة يعني، بس أنا كدا كدا طلعت يعني ومفيش نزول، فمفيش فايدة من الخوف D:

الظريف في الموضوع إني من النوع اللي بيحب يحلل الأمور قبل ما ياخد أي خطوة، بس المرة دي أخدت كل القرارات في أسرع وقت عشان قررت أبقى أحمق وواثق أفضل من حكيم ومرتاب D: (ماشي ماشي حسبتها بعقلانية بردو مش فاتح الموضوع على البحري يعني D:)

- الحصول على شهادة RHCE (٩ أكتوبر ٢٠١٤).

كانت عيدية سادس يوم العيد D:


نتيجة امتحان Red hat Certified Engineer - RHCE ظهرت وجبت 100% كمان :-)
الـ ID بتاعي هو: 140-128-760 ...الحمد لله :‑)

- زيارة الغردقة لأول مرة (٢١ أكتوبر ٢٠١٤).

مكان جديد الواحد يجربه! أخيراً زرت الغردقة لأول مرة، البلد ظريفة وأرخص بكتير مقارنة بشرم الشيخ ودهب ... ومليانة روس -روسيين يعني- بالهبل D:

قعدت أربع أيام في منطقة الدهار، الفندق ظريف، والمية جميلة، وطبعاً كان لازم أجرب مطعم مميز هناك .. أصل مينفعش أقطع كل المسافة دي (حوالي 530 كيلومتر من القاهرة) ومجربش مطعم مميز D:

جربت أشهر مطعم في المدينة وهو مطعم أسماك المينا، كان حلو جداً، وأعتقد إني هجرب المرة الجاية -إن شاء الله- مطعم Starfish :-)


صورة من مركز بحوث الطاقة المتجددة قبل الغردقة
دي غير مزرعة المولدات الهوائية اللي عند الزعفرانة).

يمكن أكتر الحاجات اللي خلتني سعيد بالرحلة دي هي إني أخيراً شوفت طواحين الهواء اللي موجودة في الزعفرانة (قبل الغردقة بحوالي 265) ... واللي كانت جزء من بحث شاركت فيه في سنة 2010 عن الطاقة البديلة وفزنا بالمركز التالت.

منظر بديع جداً!

- الانتهاء من كورس M102: MongoDB for DBAs (٢٧ أكتوبر ٢٠١٤).

في الواقع ده أول MOOC ليا D: ( مجربتش قبل كدا أتعلم من الـ MOOCs عشان مش بقدر أتفرج على الفيديوهات D: )

سجلت في كورس M102: MongoDB for DBAs اللي بدأ ٣٠ سبتمبر (سبع أسابيع هيخلص ١١ نوفمبر)، لكن شوفت نسخة من نفس الكورس اتعملت قبل كدا وخلصته في عشر أيام منفصلين، يعني كل أخلص شوية (كان ممكن يكون أقل من كدا بس مفيش أي مكسب من ضغط المدة حالياً).

مكنتش اتعاملت مع مونجو أكتر من مجرد عمل dump من الداتا بيز على أحد السرفرات، ويادوبك أعرف يعني إيه NoSQL. إنما دلوقتي من بكرة لو حبيت أشتغل إنفيرومنت شغالة بـ MongoDB (حتى لو scale كبير) معنديش أي مشكلة D:

وعرفت الفروق بين الـ SQL والـ NoSQL بشكل أفضل، وطريقة شغل الـ NoSQL databases عموماً وتفاصيل شغل MongoDB وكتير من الحاجات الظريفة. كنت بفكر أدخل الامتحان بتاع C100DBA بس للأسف آخر معاد للتسجيل كان قرب وأعتقد هزنق نفسي على الفاضي ... فممكن لاحقاً في أي وقت :‑)

المهم، ليه ده إنجاز عظيم بالنسبة ليا؟ D:

  • كنت بحاول أثبت لنفسي إني أقدر أتعلم حاجة معينة حتى لو معرفش عنها أي حاجة في مدة قصيرة ... يعني from zero to hero في مجرد كام يوم : )
  • مش محتاج أكرس كل وقتي لأي حاجة بتعلمها جديد، يعني في شغل، ومواصلات، والتزامات تانية كتير، وده مكنتش بعمله كتير قبل كدا.
  • إني أقدر أعمل الحاجات بشكل منفصل عن بعض، يعني العشر أيام دول مكانوش ورا بعض وفي كذا حاجة ما بينهم، وده في حد ذاته شيء كويس وإنك تفضل محافظ على تركيزك.
  • آخر حاجة أنا واحد مش بيعرف يتفرج على فيديوهات على الكمبيوتر نهائياً، الفيديو لو ١٢ دقيقة يبقى طويل جداً D: عشان كدا كل الحاجات اللي اتعلمتها كانت من كتب أو تناقل خبرات، وأقل حاجة اتعلمت منها كانت الفيديوهات. كون إني أقدر أخلص الكم ده من الفيديوهات شيء عظيم حقاً من ناحية الالتزام حتى بحاجة مش بحبها.

الظريف إن من فترة صغيرة واحد عامل سكربت بـ scrape المواقع ويعملها في داتابيز NoSQL ـ (JSON) ... وكنت سعيد إني فاهم كل الحاجات اللي بيعملها وبيتكلم عنها :‑)
الحمد لله :‑)

- تجربة مطعم Viking (٣٠ أكتوبر ٢٠١٤).

مطعم فايكنج من المطاعم اللي كنت حابب أجربها من فترة طويلة، بس كل مرة بيحصل حاجة تأجل الموضوع، فايكنج من مطاعم مشويات الـ Tex-Mex ... من أفضل المطاعم اللي جربها في القاهرة، هو غالي شوية عن أغلب المطاعم لكنه رائع فعلاً وتجربة مميزة وأعتقد إني هروح تاني قريب :-)

الخميس، 13 نوفمبر 2014

أين أشيائي؟ D:

من فترة كبيرة وأنا عاوز أجمع أهم الحاجات اللي عملتها في صفحة واحدة :‑)
من كام يوم كنت رايق قعد ظبطت صفحة على المدونة HTML/CSS جمعت بعض أفضل الحاجات اللي عملتها على مدار آخر كام سنة.

الحاجات مترتبة بحسب الموضوعات والسنة اللي عملتها فيها، مع بعض التعديلات الخاصة في الـ CSS ... هحاول أحدثها من وقت للتاني :-)
أخيراً جمعت أشيائي ... أنا سعيد DDD:

الجمعة، 7 نوفمبر 2014

ملخص يونيو، يوليو، أغسطس 2014

همممم كانت فترة كبيرة المرة دي مكتبتش فيها! طيب إيه أهم الحاجات خلال ما يقرب من ٣ شهور؟


- تجربة الـ Reverse bungee لأول مرة (٢٥ يونيو ٢٠١٤).

بما إني من هواة المغامرات، قررت أجرب الـ Reverse Bungee مع أحد الأصدقاء البرنسيين D:
في شهر يونيو اللي فات أنا و Islam A. Hassan سمعنا إن في Reverse Bungee اتعمل في مول العرب في ٦ أكتوبر ورحنا نجرب. لو مش عارف تحديداً إيه هو الريفيرس بانجي مكن تشوف لينك ويكيبيديا (فيه فيديو بالمناسبة).

كانت تجربة ظريفة الانطلاق على ارتفاع زي ده مع كتير من الأدرنالين، أهي تصبيرة لحين تجربة Bungee حقيقي! D:






- الملتقى الأول لوضع خارطة طريق "استراتيجية البرمجيات الحرة مفتوحة المصدر" (٢٦ يونيو ٢٠١٤).

حضرت مؤتمر عن تفعيل البرمجيات الحرة مفتوحة المصدر في مصر سواء على مستوى الحكومة أو القطاع الخاص. بالفعل أصبح عندنا استراتيجية معتمدة من وزارة الاتصالات (حمل وثيقة الاستراتيجية).
المؤتمر كان كويس وواعد جداً، وشيء ممتاز إن الواحد يشوف التقدم ده وإن كانت الخطوات بطيئة، لكن لسه في أمل :-)

- حضور سيشن عن OpenStack (٤ يوليو ٢٠١٤).

سيشن ظريفة ويوم لطيف عن OpenStack عمله ضياء رضوان كمقدمة عن أوبن ستاك، السيشن كانت ممتازة واليوم نفسه كان رائع، كان فيه إفطار لمجموعة كبيرة من الناس المهتمين بالتقنية والنشطين على أرض الواقع بشكل كبير!

- مقال عن Kano (٧ يوليو ٢٠١٤).

كتبت مقال عن Kano على موقع زاش، كانو، الحاسوب الذي يمكن لأي شخص صُنعه! هو عبارة عن Kit مبنية على حاسوب راسبري باي Raspberry Pi المصغر، كانو معمول لحل مشكلة انفصال الجيل الجديد عن فهم التكنولوجيا بشكل عميق ... أظن إن الاقتباس ده هيوضح الفكرة أكتر:

جهاز Kano والذي يعرف نفسه بأنه "A computer anyone can make"، وربما يكون "كانو" أحد أكثر المشاريع اتصالاً وتكميلاً لفكرة راسبيري باي الأصلية، وهي أن يمكن لأي شخص أن يصنع حاسوبه بالشكل الذي يريد وأن يتعلم عليه ويعدله بالشكل الذي يريده، ببساطة أن يتحول الشخص من مجرد مستهلك للتكنولوجيا إلى صانع ومشارك حقيقي. هذا الأمر مثالي جداً للشباب في المراحل المختلفة حيث يمكنهم التعرف على التكنولوجيا عن قرب، وليس فقط بطريقة استهلاكية.

مع أدوات مثل راسبيري باي وكانو والبرمجيات الحرة مفتوحة المصدر، يمكن الوصول لاستفادة عظيمة من شغف وحماس الشباب الصغير، فمن كان يتخيل حاسوب بـ ٣٥ دولار؟ من كان يتخيل وصول موسوعة ويكيبيديا الحرة لأدغال أفريقيا دون إنترنت حتى؟ في الحقيقة إن تعلم التكنولوجيا في عمر صغير ولكل الطبقات بغض النظر عن البلد أو اللغة سيفتح مجالاً واسعاً للابتكار ولتحسين حياة الكثيرين حول العالم.

- سكربت fixparts بواجهة رسومية (١٨ يوليو ٢٠١٤).

في مشكلة بتتكرر من وقت للتاني لما واحد بيجي يسطب أوبنتو عنده، برنامج التسطيب بتاع أوبنتو بيشوف الهارد كله كأنه مش متقسم، أو بمعنى أصح مش بيشوف البارتشنات. المشكلة في الواقع مش بسبب أوبنتو، المشكلة بسبب بعض برامج التقسيم الغبية اللي بتحسب البارتشنات بشكل غلط، فيجي أوبنتو المحترم بيحاول يقراها بشكل مظبوط فمش بيعرف! المشكلة بتكون في الـ partitions table اللي اتعمل غلط. حل الموضوع ده كان برنامج صغير بيشتغل عن طريق الـ command line اسمه fixparts ... يعني ملهوش GUI الوحد يستعمله منها.

كان عندي ساعة فاضية وعاوز أروش فيها شوية، قولت أعمل bash script على السريع وأعمله GUI ببرنامج Zenity واللي بييجي مع أوبنتو افتراضياً. عملت سكربت بياخد باكب من الـ partitions table، ويعملها restore، وأخيراً بيصلح المشكلة بتاعت البارتشنز تيبول.

هتدخل Live CD وتشغل السكربت وبعد الريستارت المفروض إن المشكلة تكون اتحلت. البرنامج جربته على Ubuntu 14.04، وجربته كذا مرة واتأكدت إنه شغال بشكل كويس لكن في النهاية ده مجرد سكربت اتكتب واتجرب في ساعة وبالتالي مفيش ضمان إنه يشتغل عند فخلي بالك. السكربت على GitHub:

- زيارة دهب لأول مرة (٢٩ يوليو ٢٠١٤).

في أجازة عيد الفطر، قررت أروح "دهب" مع بعض الأصدقاء، مدينة دهب بتقع على خليج العقبة! بتبعد حوالي ٦٠٠ كيلومتر عن القاهرة يعني حوالي ٨ ساعات بالأتوبيس! دهب مكان بديع جداً، سواء الصحرا أو البحر أو ما بينهما، تكوينات صخرية آسرة وبحر وشعب مرجانية وبيئة بحرية لسه شابة ... كانت رحلة خزعبلية في الحقيقة :‑)


- الحصول على شهادة RHCSA (١٧ أغسطس ٢٠١٤).

نجحت في RHCSA ـ (Red Hat Certified System Administrator) بحمد الله وبنسبة 100% ^_^
وفي شهر أكتوبر حصلت على RHCE ـ (Red Hat Certified Engineer) الحمد لله بنفس النسبة. Certification ID: 140-128-760


- يوم تدريبي في Orange Labs (١٩ أغسطس ٢٠١٤).

عملت يوم تدريبي عن البرمجيات الحرة مفتوحة المصدر وأساسيات لينوكس ديسكتوب و CLI في Orange Labs في القرية الذكية Smart Village.
التدريب لحوالي 14 شخص في internship تبع شركة Orange، نصهم من الأكاديمية العربية والنص التاني حاسبات القاهرة ... وكانوا برنسيين جداً ومتجاوبين وحابين يتعلموا يعني ... كان يوم لطيف وممتع.


- تجربة مطعم Mr.Wok الصيني (٢٣ أغسطس ٢٠١٤).

مطعم تيك أواي صيني في الزمالك، للأسف معجبنيش خالص عشان هو مخصص للتيك أواي الصيني! كويس إني كنت جربت أكل صيني حقيقي قبل كدا في كذا مكان وإلا كنت حكمت على الأكل كله إنه وحش!

- بطيخ أصفر لأول مرة! (٢٩ أغسطس ٢٠١٤).

كانت تجربة ظريفة D:
الطعم مش مختلف كتير، مفتقد بس المذاق المميز للون الأحمر! لكن ظريف يعني D:

الثلاثاء، 23 سبتمبر 2014

تدوينة سريعة

أظرف حاجة ممكن تحصل للواحد هي الناس اللي ممكن يغيّروا حاجات كتير في حياته بسبب ملحوظة صغيرة قالها لك أو خلاك تاخد بالك منها.

قد تكون ملحوظة فعلاً صغيرة، ممكن تكون مجرد حديث عابر، ممكن تكون أي حاجة صغيرة لأبعد حد ممكن.

لو أخدت بالك منها، ممكن تعمل تغيير صغير جداً جداً جداً، مجرد نص درجة تغيير، لكن مع الوقت، كل ما بتتقدم لقدام، الزاوية بتكبر أكتر، لحد ما في يوم لما تبص لورا كدا، تكتشف أد إيه التغيير ده كان عظيم

الناس دي فعلاً ببقى ممتن ليهم جداً، حتى لو مكانوش عارفين إنهم عملوا ده حتى :‑)

الخميس، 24 يوليو 2014

ملخص مارس، أبريل، مايو ٢٠١٤.

ونعود مرة أخرى لتدوينة سريعة جداً فيها ملخص لأهم الحاجات اللي حصلت. مارس، أبريل، مايو ٢٠١٤.

- حضور سيشن عن Hadoop (٢ مارس ٢٠١٤).

أول مرة أتعمق في هادوب بالشكل ده، والسيشن كانت ظريفة جداً، والمحاضر كمان.

- إتمام ترجمة سندات رخص المشاع الإبداعي للغة العربية (٣ مارس ٢٠١٤).

أخيراً اتممنا ترجمة سندات رخص المشاع الإبداع Creative Commons deeds، وبناء على ده اللغة العربية قفزت من المركز الـ ٤٢ تقريباً إلى لغة مترجمة بنسبة ١٠٠٪ (الظريف دلوقتي عشان اسم اللغة العربية بيبدأ بحرف A ف بقى على أول القايمة D: زي ما بتوضح الصورة).
ده كان إنجاز رائع، ومحتاجين نعمل مراجعات أكتر الفترة الجاية.

- كراش كورس Regex ـ (14 مارس ٢٠١٤).

عملت كراش كورس (كروس مصغر مكثف لمدة يوم واحد) عن ريجكس، لو متعرفش إيه هي ممكن تاخد معلومة سريعة عنها.
الريجكس كانت من الحاجات اللي استعملها بكثافة على مدار السنين اللي فاتت، وحبيت إني أعرف ناس أكتر عليها واستخدامتها.
دي كانت المواضيع اللي شرحتها.
  • Regular expressions, What? Why? How?
  • Basic regex.
  • Extended regex.
  • Character Classes.
  • Back References.
  • Greedy and Lazy regex.
  • Unicode.
  • Tips and Tricks.

- احتفالية Varnish 4.0 ـ (٢٩ أبريل ٢٠١٤).

كان يوم جميل وقضيت وقت لطيف وقابلت ناس ظريفة : )

- الفوز بمسابقة أفضل المواقع العربية (٤ مايو ٢٠١٤).

موقع كتب عربية حرة فاز بالمركز الأول في مسابقة أفضل المواقع العربية في مصر، قبل حتى إتمام عامه الأول :-)
تفاصيل أكتر على مدونة موقع كتب عربية حرة.

الصورة في المقال من حفل تسليم جوائز مسابقة المواقع العربية في AUC يوم 4 مايو 2014 وفاز موقع "كتب عربية حرة" بالمركز الأول في المسابقة.
المقال من جريدة الشروق عدد 19 مايو 2014 الصفحة رقم 11.

- المشاركة في ندوة اكتشف رُخَص المشاع الإبداعي في مكتبة الاسكندرية (٥ مايو ٢٠١٤).

يوم لطيف آخر :-)

- جولة تجارب مطاعم (٢٠ مايو ٢٠١٤).

آخر يوم قبل إكمال سنتي الـ ٢٥ ... كان يوم خزعبلي حقاً D:
مع صديقين جربنا مطاعم كتير في اسكندرية سواء أكل أو حلو، أكبر اكتشاف لينا اليوم ده كان محل اسمه "ألبان سويسرا" رهييييب! أي حد ينزل اسكندرية لازم يجربه D:

- اليوبيل الفضي، ٢٥ سنة على الأرض (٢١ مايو ٢٠١٤).

هنا كنت كملت ٢٥ سنة على كوكب الأرض :-)

- مطعم يمني لأول مرة. (٢٧ مايو ٢٠١٤).

مطعم لطيف في الدقي، بس بما إن مطاعم حضرموت منتشرة في مصر فالتجربة مكانتش مختلفة كتير.

- مطعم أسماك الحوراني (٨ يونيو ٢٠١٤).

محتاج أجرب المكان تاني عشان أقدر أحكم عليه، مش عارف إذا معجبنيش ولا بس اليوم ده اللي مكانش مظبوط.

الخميس، 13 فبراير 2014

ملخص ١٣\٢\٢٠١٤

هممممم مكتبتش بقالي فترة، انهاردة رايق وأعتقد إنه فرصة كويسة للكتابة :-)


- لقاء لينكساوي جداً (17 ديسمبر 2013)
يوم كان مميز جداً، روحت فيه قفير لابز (وقبل ما حد يسألني هو إيه قفير لابز ده شوف الفيديو في الموقع بتاعهم)، قابلت عدد من الأصدقاء وقابلت ضياء رضوان لأول مرة، واللي كان واحد من الناس اللي عرفهم عن طريق الإنترنت فعلاً حابب إني أقابلهم على أرض الواقع.

التجمع كان لنقاش تقني عام ولإطلاق النسخة الجديدة Fedora 20 خصوصاً (ومش عارف مين اللي مفهم الناس إن توزيعات لينوكس ضد بعد D:)
وكان لابد من تذكار مميز ليوم مميز زي ده :-)


صورة جماعية للمشاركين، بالإضافة لفلاشة ريد هات ودبوس وستيكر فيدورا :-)


- إيفنت Mozilla Power '13 ـ (20 ديسمبر 2013)
يوم 20 و 21 ديسمبر 2013 كانوا يومين مميزين جداً، قامت فيه مجموعة Mozilla Egypt بعمل احتفالية عن موزيلا الرائعة من نشاطات وبرمجيات مميزة في الجامعة البريطانية في مدينة الرحاب/القاهرة.

اليوم الأول كان لكل الناس، اليوم التاني كان للمطورين بشكل خاص وفيه كلام عن تقنيات الويب ونظام Firefox OS الرائع.

كنت من ضمن المتحدثين في اليوم الأول، كان في فقرات عامة بيحضرها كل الناس في قاعة كبيرة، وبعد كدا مجموعات (ما بين 5 لـ 8) بتشتغل على التوازي، أنا كان ليا مجموعة بتتكلم عن البرمحيات الحرة وموزيلا كنموذج لها.


باقي الصور على فيس بوك.

كان يوم مميز جداً بالنسبة ليا، استمتعت وقابلت عدد كبير من الناس لأول مرة، بالرغم من إننا نعرف بعض على الإنترنت من فترة طويلة بعضهم تمتد لسنين! مثلاً زي البرنس الكبير مصعب اللي قعدنا نخطط 20 مرة إننا نتقابل وكل مرة منعرفش نظبط يوم مشترك D: وطبعاً الثلاثي البرنس زي ما بحب أسميهم D: ـ عمرو صبحي، عبد الله ضياء، ومحمد الشرنوبي.

خلصنا اليوم ورجعنا لوسط البلد وطبعاً ميتين من الجوع، قولنا نجرب مطعم جديد، ووقع الاختيار على "Pastaweesy" في المهندسين، المكان صغير وحميمي، وبيعمل مكرونات مميزة جداً ... أنا مش هتكلم كتير بس فعلاً لازم يتجرب!


- أكل ماليزي وشهادة عضوية أوبنتو .. رائع! (24 ديسمبر 2013)
كان يوم مزدوج، قررنا أنا وصديق العزيز محمود طاهر إننا نجرب مطعم ماليزي -وكان أول مرة نجرب أكل ماليزي في الحقيقة- كان في محل قريب مننا في الحي السابع في مدينة نصر اسمه Mutiara، موتيارا هو زيه زي كتير من محلات الأكل الشرق آسوية في المنطقة دي، غالباً بيكون نتيجة طلاب جايين يدرسوا في جامعة الأزهر وبيفتحو محل لمساعدتهم في المصاريف.

موتيارا أقرب لمطعم شعبي منه للمطاعم في المنطقة ده، لكن في الحقيقة أكله جميل وطعمه رائع! أكلنا شوربة تام يام وجمجوم وشوية حاجات تانية أنا مش فاكر اسمها لكن كانت لذيذة D:

في آخر اليوم لقيت حد بيتصل بيا من البيت وبيقولي إن في مغلف جاي ليا من انجلترا! قعدت أفتكر كدا شوية، وافتكرت إن في يوم 6\9\2013 طلبت شهادة عضوية أوبنتو اللي كنت أخدتها يوم 4\1\2013 (واللي اكتشفت دلوقتي إني نسيت أكتب عنها في المدونة!)

Ubuntu Official Ubuntu Membership means recognition of significant and sustained contribution to Ubuntu and the Ubuntu community.

عضوية أوبنتو الرسمية (Official Ubuntu Membership) هي عضوية بتمنح للأشخاص اللي ليهم نشاط أو مساهمات مميزة لأوبنتو وخصوصاً مجتمعياً وبيتم منحها بعد مقابلة على الإنترنت مع بعض أعضاء مجلس أوبنتو. وقدمت ليها السنة اللي فاتت وأخدتها :-)

ودي صور الطرد والشهادة ^_^



- تابلت 7 بوصة! (31 ديسمبر 2013)
في آخر ساعات في سنة 2013 قررت أنزل أشتري تابلت بعد عدة محاولات لشراء Nexus 7 2013 واللي كنت قررت شراؤه من أمريكا لإن سعره في مصر مبالغ فيه بشكل كبير! لكن كالعادة تأتي الرياح بما لا تشتهي السفن ... بعد ما كان من الممكن من كام شهر ألاقي 5 من أصدقائي برا البلد وراجعين قريب، اللي رايح أمريكا واللي رايح أوروبا واللي رايح الصين، مش لاقي ولا واحد جاي قريب D:

في النهاية بعد عدة مقارنات قررت شراء Lenovo IdeaTab A3000 واللي كان بيحقق أفضل إمكانيات في مقابل السعر.

الجهاز كدا بقاله أكتر من شهر معايا، جهاز كويس جداً في الأداء، عيبه الوحيد الإكسسوارات الخاصة بيه مش متوفرة في السوق!! طبعاً الحل استعمال إكسسوارات منتجات أخرى (أقرب جهاز ليه هو Samsung Galaxy Tab 2 7.0 P3100) بس هيبقى في مشاكل زي الكاميرا هتبقى متغطية وأشياء من هذا القبيل ... لدرجة إني كنت بفكر أطلب حاجاته من أمازون أنا وعدد من الأصدقاء!
عموماً، كنت عملت جزء عن بعض أفضل البرامج اللي جربتها على الأندرويد ... الشيطان بيعلب في عقلي دلوقتي إن على غرار كتاب "دليل البرمجيات الحرة مفتوحة المصدر لويندوز" أعمل كتاب تاني اسمه "دليل البرمجيات الحرة مفتوحة المصدر لأندرويد" D:


- ريجكس وسوشي! (8 يناير 2014)
يوم مزدوج آخر، عملت سيشن سريعة في الشغل عن Regex (كنت كتبت قبل كدا مقال بعناون "استخدام Regular Expression في تهيئة النصوص." مفيد جداً لأي حد حابب يبدأ يتعلم الريجكس.)، بعدها بليل قبلت بعض الأصدقاء اللينوكساويين في مطعم ياباني، وجربنا قدر مهول من السوشي D:

المطعم اسمه Tsunami Sushi في الزمالك بالقرب من مكتبة ديوان، يعتبر أول مرة أجرب سوشي بشكل فعلي وبالتنوع ده، وطبعاً كما أغلب مطاعم السوشي كمية الأكل قليلة والسعر كبير، بس كانت تجربة ممتازة والأكل كان ظريف جداً.


- البرنس ومقابلة صديق قديم جديد (14 يناير 2014)
لإن رضا البطن أهم من رضا الناس .. ولإنك لما بتطلع من عنده بتحس بسعادة غامرة بغض النظر عن تضاعف حجم معدتك مرتين أو تلاتة .. ولإن برنس ليه احترامه D:

كانت تجربة مطعم "البرنس" (اسمه كدا للي ميعرفهوش) المشهور في امبابة مع عصابة الشر السابقة من اللينكساويين D:
أعتقد إن أي واحد يعرف مطعم البرنس هيكون عارف إنه مش محتاج كلام كتير يعني D:

لكن المميز في اليوم ده بالإضافة لمقابلة الأصدقاء اللينكساويين والأكل في البرنس، إن قابلت إبراهيم محمود بدون أي تخطيط، وهو واحد من اللي عرفتهم لسنين على الإنترنت ونظراً لإنه ساكن في مدينة الأقصر فمكانية لقائنا كانت محدودة جداً، لكن كان مؤخراً كان في القاهرة وجه اللقاء اللينكساوي البرنسي ده D: وده كان شيء ممتاز جداً في الحقيقة، وعقبال المرة الجاية لما أقابله في الأقصر :-)


- في المنصورة (21 يناير 2014)
للتوثيق يعني، كنت في المنصورة اليوم ده بغض النظر كنت بعمل إيه :-)


- ٣ شهور على كتاب دليل البرمجيات الحرة مفتوحة المصدر (23 يناير 2014)
يوم 23 يكون عدى 3 شهور على الإصدار التالت من كتاب "دليل البرمجيات الحرة مفتوحة المصدر" واللي كان واحد من الحاجات اللي أنا سعيد إني عملتها :)

أكتر من 8000 تحميل مباشر، أكتر من 2000 شير الشبكات الاجتماعية المتنوعة زي فيس بوك، تويتر، جوجل بلس، يعني بواقع حوالي 22 شير في اليوم، وتقييم 4.44 من أصل 5 نقط على جودريدز ... والأهم إشادة من قطاعات واسعة من الناس سواء مختصين أو قرّاء عاديين :‑)

بجانب الأهداف الرئيسية للكتاب، في هدف مهم في كل الكتب اللي بعملها، إن البرمجيات الحرة مفتوحة المصدر قادرة تنافس في كل المجالات، العبرة ديماً بالشخص اللي بيستعملها أكتر من البرامج نفسها، برمجيات مميزة قادرة تطلع مواد مميزة :)


- لقاء على موقع أضف (12 فبراير 2014)
امبارح اتنشر حديث ليا على موقع أضف، نقدر سميه لقاء صوحفي صغير كدا D:

كل يوم، يختار المزيد والمزيد من الأشخاص الانتقال لاستخدام البرمجيّات الحرّة مفتوحة المصدر بدلًا من تقيدهم ببرمجيات مغلقة باهظة الثمن وخاضعة لشروط الشركات الكبرى التي تنتجها. وهناك من يذهبون أبعد من ذلك بأن يقوموا أنفسهم بنشر هذه البرمجيات الحرّة عبر الكتابة عنها وزيادة المحتوى المعرفي العربي حولها لتقديمها للجمهور العربي؛ حيث تتيح لهم حرية الاستخدام وحرية النسخ والتوزيع والاشتقاق والتعديل عليها بما يتناسب واحتياجاتهم أيًا كانت درجة التعقيد التي يحتاجونها من نفس البرامج والتطبيقات.

وضمن اهتمامنا في أضِف - مؤسسة التعبير الرقمي العربي بالبرمجيات الحرّة مفتوحة المصدر ومساهمتنا في نشرها وتطويرها، أجرينا هذا الحديث مع أحد الأشخاص المهتمين مثلنا بهذه القضية وهو أحمد محمد أبوزيد ليخبرنا عن تجربته في استخدام البرمجيات الحرّة ونشر المعرفة عنها من خلال المقالات والكتب التي صدرت له حولها.

باقي التفاصيل على اللينك: عن تجربة مستخدم وكاتب تقني واختياره للبرمجيات الحُرّة.


- المركز التالت في مسابقة التدوين التانية (13 فبراير 2014)
انهاردة تم الإعلان عن نتيجة مسابقة التدوين التانية اللي عملها الأخ عبد الله المهيري، والإنفوجرافيك اللي كنت مشارك بيه "تعرف على المشاع الإبداعي في 3 دقائق." فاز بالمركز التالت ^_^

شيء ممتاز، واﻷفضل إن جالي عدد من الرسايل وكلمني كذا شخص قالي إنه بعد ما شاف الإنفوجرافيك فهم فكرة كرييتف كومونز بشكل أحسن وعرف إيه الفرق بين الرخص المختلفة بشكل أفضل ... وده الغرض الرئيسي من الإنفوجرافيك، تبسيط وتوضيح بعض الأمور اللي ممكن تكون غامضة بعض الشيء :-)


كفاية كدا لحد هنا :-)

الخميس، 6 فبراير 2014

إنفوجرافيك - تعرف على المشاع الإبداعي في ٣ دقائق.



على مدار معرفتي بالمشاع الإبداعي Creative Commons دائماً كانت هناك مشكلة في توضيح فكرته على المستوى العربي، وذلك بسبب قلة المواضيع التي تتحدث عنه فضلاً عن عدم وجود مرجع واحد بسيط يوضح الفكرة.

من المهم دائماً وجود مرجع مبسط، مختصر وصغير قدر المستطاع، ومنسق بشكل جيد يوضح فكرة ما لأي شخص لم يسمع بها من قبل، مثل موقع العديد من الأشياء التي عملت عليها من قبل لنفس الهدف، كتب عربية حرة، كتاب أوبنتو ببساطة، كتاب دليل البرمجيات الحرة مفتوحة المصدر، وغيرهم فقط تعطه هذا المرجع وأنت تعرف أنه بعد قراءته سيكون الأمر أوضح بكثير قبل أن يفعل، وأردت أن يكون هناك شيء مماثل عن المشاع الإبداعي.

من مدة وأنا أريد عمل شيء كهذا لكن كل مرة أنشغل ببعض الأمور، لكن مؤخراً مسابقة الأخ عبد الله المهيري حفزتني لإنهاء هذا العمل، وقد فكرت في أفضل طريقة لعمله، وجدت أن الإنفوجرافيك سيكون مثالي لهذا، فالجميع يحبون الإنفوجرافيك :-)

إنفوجرافيك للتعريف بما هو المشاع الإبداعي، توضيح رخص المشاع الإبداعي وبنودها، التوافق بين الرخص، البحث عن مواد مرخصة برخص المشاع الإبداعي وبعض الأشياء الأخرى.

هذا العمل حر، أُنتج باستخدام برنامج التصميم Inkscape وعدد آخر من البرمجيات الحرة مفتوحة المصدر (حتى الخطوط المستخدمة)، ومرخص برخصة المشاع الإبداعي النسبة - الترخيص بالمثل، الإصدار 4,0، وهو ضمن مسابقة التدوين الثانية.

يمكن مشاهدة الإنفوجرافيك كامل عن طريق الضغط على الصورة التالية، ومصدره متوفر بصيغة SVG، فهذا عمل حر ويمكنك التعديل عليه بما ينساسب احتياجاتك ;)


ونظراً لأني أفضل دائماً ملفات PDF حيث الحروف المصقولة والحجم الصغير (وفي الواقع الآن العديد من المتصفحات لديها عارض PDF مدمج) فقد قمت بعمل نسخة من الإنفوجرافيك بصيغة PDF وقد جربته على أكثر من شاشة خصوصاً الشاشات الصغيرة (تابلت ٧ بوصة فما فوق) وكان يعمل بشكل ممتاز (عدا مشكلة صغيرة في تعامل بعض البرامج مع الشفافية سأقوم بضبطها لاحقاً قمت بضبطه ويعمل الآن بشكل ممتاز مع جميع البرامج التي جربتها)، وكالعادة استعملت البرنامج الرائع PDF Chain في ضبطت الميتاداتا للملف، فكما أقول دائماً ملف PDF من غير ميتاداتا ليس الأفضل :-)

استمتعوا، ولا تنسوا مشاركة الإنفوجرافيك ليعرف أكبر قدر من الناس عن المشاع الإبداعي وأهميته :-)