الجمعة، 26 يونيو، 2009

اول اسبوع خلص + شوية اكتئاب !


السلام عليكم و رحمة الله و بركاته

ادي اول اسبوع بعد نهاية الامتحانات خلص ، و ما زال عندي شوية اكتئاب ، شكله كدا من اثار الامتحانات ! - بقالي اكتر من شهر فحت و ردم ! -

في حاجات كتير ناوي اعملها ان شاء الله ، بس مليش نفس لأي حاجة خالص ، ولا حتى القعاد على الكمبيوتر !

مش عارف في ايه بالظبط ، بس حاسس اني مخنوق من كل حاجة !


و ما شاء الله الاجازة شكلها مبشرة يعني !

مش عارف ايه النظام ده ، الواحد يقعد على الكمبيوتر في الدراسة يلاقي اهله يقولوله قوم ذاكر ، يقعد في الاجازة يقولوا ارحم نفسك من الكمبيوتر !! ، مش عارف اعمل ايه يعني !

و والدي مش عارف ماله بيا بقاله فترة كدا زي ما يكون مستقصدني ، و كأن البيت كله خلص من المشاكل و مفيش غيري !
شوية يقعد يكلمني عن التخن و اضراره و انه وحش و مش عارف ايه كدا ، مع انه المفروض عارف اني في فترة الامتحانات طبيعي جدا بتخن شوية عشان نشاطي بيكون محدود شوية و بحاول اركز في المذاكرة ، دا غير اني مش بتخن اوي يعني ، هما كلهم خمسه سته كيلو يعني ! ، و مع اول نشاط بعد ما الامتحانات تخلص برجع عادي خالص !


و برده شوية يكلمني على طول الشخص و ازاي بيأثر في حياته ، و ان مفيش حد بيرضى بالرجالة القصيرين لما يجو يتجوزو و مش عارف ايه ! ، و اني مش ببذل نشاط كبير او بلعب رياضة عشان كدا انا قصير !
طيب اعمل ايه يعني ؟ ، مثلا وزن الواحد ممكن الواحد يتحكم فيه - و ان كان في ناس فعلا مهما عملت بيكون تحكمها في وزنها صعب ، دول يموتوا نفسهم يعني ولا ايه ؟ - ، انما بالنسبة للطول دي حاجة بشكل اساسي وراثية و جزء كبير منها بيتحدد بالوراثة ! - مع ان والدي طويل يعني - ، و برده مع ذلك انا مش قصير اوي ، انا في حدود 171 - 172 سنتي ، يعني مع الشعر و الكوتش ببقي كأني 175 سنتيمتر !!
و الله انا مش هقعد اشغل نفسي بشيء مش بيدي ! ، انما اشغل نفسي بحاجة اقدر اتحكم فيها ، اطور من نفسي ، و ازود مهاراتي و معارفي !

و الموضوع اساسا مش هيفرق يعني في اي حاجة ! ، هو بس في نقطة الجواز دي هتفرق شوية على المستوى الاجتماعي ، و ان الست لازم تكون اقصر من الراجل و مش عارف ايه كدا ، ماشي مفيش مشاكل يعني ، البنات يومين دول خلاص يعني مش ناطحات سحاب ، اكيد هلاقي بنت في حدود الـ 170 سنتي - محدش بس يقولي ان الطول مش مهم خالص ، لا مهم ، و في اكتر من منتدى و خصوصا في المنتديات الطلابية ، اتفتح مواضيع زي دي ، و هل البنت تقبل بولد اقصر منها ولا لأ ، و اغلبهم قال لأ ، و حتى اللي قال ايوه ، مع الوقت و اختلاطهم بالناس اجتماعيا ، كتير منهم هيغير رأيه لـ "لأ" برده - : )

و مع العلم ان اخويا الاصغر مني على طول بقى اطول مني دلوقتي و اخويا الوسطاني قرب يبقى اطول مني ، و معنديش مشاكل يعني و مش هموت نفسي !!


و برده شوية كمان ، يقعد يكلمني عن الكمبيوتر بيخلي الواحد مش اجتماعي ، و بيجيب اكتئاب ، و المفروض انزل اتعامل مع الناس في الحياة الواقعية ، و الكلام ده !
ماشي يعني ، مفيش مشاكل ، بس انا مش من النوع اللي بيحب ينزل الشارع عمال على بطال كدا ! ، بنزل الشارع عشان غرض معين و ارجع تاني ، و لازم يكون غرض محدد و ذو قيمة ! ، مش بعرف انزل و اتصرمح في الشوارع كدا ولا اقف على النواصي ، ولا اقعد مع اصحابي نقعد نجيب في سيرة الناس و ننم ده و نغتاب ده !

اي نعم انا بصنف نفسي اني من المدمنين على الكمبيوتر/الانترنت ، بس اذا كان عندي مسئولية او شيء المفروض اعمله بعمله ، و بقية الوقت بقعد على الكمببيوتر اعمل حاجة مفيدة برده ! ، يعني الموضوع في كل الحالات مش خارج عن الحد !



اللي يغيظيني بقى ان بقدرة قادر كل ده مرتبط بالكمبيوتر بطريقة ما ، و ان في رابط عجيب بين الحاجات دي كلها و بين اني بقعد على الكمبيوتر !!!

---------------------------------------

عموماً ، انا حالياً بدور على اي شغل بعيد عن البيت ، و بعيد عن المنطقة كلها اساساً ، ربنا يسهل و الاقي شغله كويس و متكنش مملة !

ممكن شوية كدا ، و اعمل موضوع عن الحاجات اللي عملتها الفترة اللي فاتت دي ، حتى على الاقل اصحي المدونة شوية : )



# لقيت حاجة شكلها حلو ، اروح اجربها و اعمل موضوع عنها

How to Run Android Applications on Ubuntu

هناك 3 تعليقات:

  1. مشكلة الإكتئاب عندى أنا مش لاقيلها حل!
    و فعلاً حاسس أن مفيش اقبال على الجلوس على الكمبيوتر زى الأول!
    ربنا يفك كربى و كربك :D
    أما بقى بالنسبة للطول يبقى أنا مش هجوز خالص! :S أو بالأحرى مس هلاقى واحدة أقصر منى :D
    و على العموم حاول تسمع لكلام أبوك (حتى لو مدايق من الكلام أو مش هتقدر تنفذة) من باب الطاعة حتى :)
    و ربنا يسهل و نطلع مستفيدين من الأجازة دى.

    ردحذف
  2. abom :
    لو لقيت انت حل قولي D:
    بس اكيد الحل هو الدخول في نشاط معين سواء شغل او مشروع برمجي جماعي على النت اوي اي حاجة محددة الهدف : )

    بالنسبة بقى لسمع الكلام ، اسمع كلام والدي في ايه بالظبط ؟ D:
    اطول نفسي يعني ؟ D:

    المشكلة مش في مجرد السمع ، المشكلة في التكرار ! ، يعني قالي المعلومة مرة و اتنين ، خلاص بقى D:

    عموما كل واحد بياخد نصيبه يا عبدو ، محدش بياخد نصيب غيره ، فالواحد يشغل نفسه بالحاجة اللي يقدر يطورها و ينميها افضل : )

    بس تقول ايه ، ساعات الحب الزايد من الاهل بيكون ممل في بعض الاوقات : )


    و ان شاء الله تكون اجازة جميلة علينا كلنا : )

    ردحذف
  3. ((مش عارف ايه النظام ده ، الواحد يقعد على الكمبيوتر في الدراسة يلاقي اهله يقولوله قوم ذاكر ، يقعد في الاجازة يقولوا ارحم نفسك من الكمبيوتر !! ، مش عارف اعمل ايه يعني !))

    ههههههههههه .. فعلا تقريبا لا يخلو بيت من هذا الموقف

    ((و الله انا مش هقعد اشغل نفسي بشيء مش بيدي ! ، انما اشغل نفسي بحاجة اقدر اتحكم فيها ، اطور من نفسي ، و ازود مهاراتي و معارفي !))

    ده الكلام الصح :)

    بالنسبة لنقطة :

    ((اللي يغيظيني بقى ان بقدرة قادر كل ده مرتبط بالكمبيوتر بطريقة ما ، و ان في رابط عجيب بين الحاجات دي كلها و بين اني بقعد على الكمبيوتر !!!))

    والدي برضه معارض جدا لطول فترة جلوسي على الكومبيوتر (واللى عماله تقل تدريجيا نتيجة الزهق والخنقة من ربط كل مشكلة أو غلط بطول استخدامي للكومبيوتر مع إنها بتكون بعيدة البعد عن الحاجات دي) وردي بيكون بسيط جدا .. لو جمعت يوميا ساعات نشاطاتي المختلفة : بقعد أقرأ في كتب ٣ ساعات وبتكلم مع صاحباتي أو بزورهم ساعتين أو تلاته وبشوف نشرات الأخبار ساعة أو اتنين و بسمع الراديو أو كاسيت أو غيره ساعة وبتعلم حاجات جديدة وبلعب ألعاب ده كله زائد ساعات دراستي عليه ﻷن تخصصي اصلا حاسوب .. مجموع الحاجات دي كلها بيروح في الكومبيوتر اللى وفر لي ده كله وبشكل أفضل ﻷني مش بكلم صاحباتي وقرايبي اللى في البلد بس ده كمان في الدول التانية وتقريبا ببلاش وبقرأ كتب يمكن متتوفرليش في البيت على شكل كتاب ورقي وبتعلم حاجات جديدة يمكن لو دورت في أي حتة إني اتعلمها مش حلاقي بالسهولة اللى حلاقيها على النت ده غير إني بكتسب مهارة وسرعة وخبرة كل مرة بقعد فيها على الجهاز والكومبيوتر هو أهم جهاز في عصرنا ومن مصلحتي إني أكون متمكنة منه ..

    مقابل إني بربط كل نشاطاتي بالكومبيوتر دايما بقى الأهل يربطوا كل مشكلة أو فشل أو أي حاجة متضايقين فيها منا بالكومبيوتر .. بطريقة أحيانا تكون (المضحك المبكي) لينا كأبناء

    ايه علاقة إن نور التلاجة مبيشتغلش بقعادي على الكومبيوتر .... ؟؟
    لا كله من الكومبيوتر .. هو كده !!

    وعلى فكرة .. مشكلة ظريفة جدا .. الآباء أحيانا بيكونوا معترضين فعلا على "تضييع الوقت على الكومبيوتر" لكن مفكروش يحطوا بديل للكومبيوتر يشغل أوقات أولادهم ؟؟

    وأقصد بالبديل عشان أنا عارفه إن النقطة دي برضه بتعمل اشكال .. بديل يكون مفيد والأهم إنه يوافق ميول الأولاد .. أو على الأقل يقدم بطريقة تخليهم مش رافضينه

    يعني لو الابن مكسل أو مش متحمس ممكن نشجعه بطريقة أو بأخرى والطرق عديدة

    هيييه .. ده حديث يطول الكلام فيه .. الخلاصة إن التدوينة عجبتني قوي ﻷنها بتمس مشكلة عند شريحة كبيرة من الشباب

    الله يسترها علينا :D

    ردحذف