الجمعة، 28 أغسطس، 2009

Uget + مقابلة شخصية + حملة .

السلام عليكم و رحمة الله و بركاته





تدوينة ثلاثية على السريع D:

ـ
-----------


# Uget Download Manager .

اول الاسبوع اللي فات انضميت لمشروع Uget - صفحة المشروع على سورس فورج - ، برنامج يو جت مدير تحميل جميل جدا ، بسيط و خفيف و فيه مميزات جميلة جدا و كمان حر و مفتوح المصدر ، و الاجمل انه مكتوب بـ GTK+ ، يعني بيستخدم نفس المكتبات المستخدمة في جنوم - الواجهة الرسمية لعدد من نوزيعات جنو/لينوكس المشهورة زي اوبنتو ، فيدورا ، دبيان ، ريد هات و غيرهم -

طبعا انا مش مبرمج و مليش في البرمجة - بغض النظر عن شوية باش سكربتنج على شوية بايثون - ، لكن مين قال عشان تساهم في البرمجيات الحرة لازم تكون مبرمج ؟ : )
ممكن تساعد باي شكل من الاشكال ، اي طريقة متاحة ليك ساعد بيها ، اكيد مجهودك ده هيستفاد منه ناس كتير : )

مطور البرنامج "Raymond Huang" و معروف على الانترنت باسم plushuang ، الوضع الحالي هو هيهتم بالبرنامج نفسه من ناحية البرمجة ، و انا ههتم بالحاجات التانية المتعلقة بالبرنامج ، او حاجة عملتها ، عمل شعار جديد للبرنامج لان الشعار القديم مكنش ليه دلالة تقريبا ! ، و برده مش انا اللي عملت الشعار ، انا بس نظمت موضوع لجمع الافكار لشعار البرنامج ، و شاركت ببعض الافكار من ضمنها الفكرة الحالية للتصميم ، انما التصميم كان الاخ الفاضل صفوان المعروف باسم saf1 - ما شاء الله عليه عنده حس فني جميل جدا -

و ده الشعار اللي توصلنا اليه




ونفس التصميم مع بعض التعديلات



البرنامج اسمه Uget ، مغنطيس على شكل U ، بيدل على قوة الجذب (التحميل) ، على الاقل فيه فكرة D:

حاليا انا شغال على الموقع البرنامج ، لان تقريبا مكنش ليه موقع فعلي - الموقع القديم مكنش يسر عدو ولا حبيب D: - ، استخدمت تطبيق ورد برس (wordpress) كنظام ادارة للمحتوى ، تقريبا الموقع يعتبر خلص ، مش فاضل غير كام حاجة بسيطة كدا و هيبدأ تشغيل الموقع مع صدور النسخة 1.5 من يو جت ، و ده اللي وصلتله حاليا .


Uget web site



اضغط على الصورة للتكبير



----------------------------


# مقابلة شخصية لوظيفة .
من يومين ، روحت عشان المقابلة الشخصية (interview) عشان شغل دعم فني في شركة كمبيوتر بتاعت استضافة و حاجات زي كدا ، كانت تجربة مفيدة جدا بالنسبة ليا ، بالرغم ان المقابلة مكانتش زي ما انا عاوز ، انما نظراً لان دي تقريبا اول مقابلة شخصية لوظيفة ، استفدت من حاجات كتيرة ، و اخدت بالي من كذا نقطة مهمة .

اتصال الشركة كان بناء على ترشيح احد المعارف اللي شغالين في الشركة ليا ، لشغل الوظيفة - طبعا كنت بعت الـ cv بتاعي قبل ما اروح -
و لاني معرفش مكان الشركة تحديدا ، اول حاجة عملتها بعد اتصال الشركة بيا ، اني روحت لويكي مابيا و بحثت على اسم الشارع اللي فيه الشركة و بعض المعالم المحيطة بيها ، و قدرت اوصل لمقر الشركة بالظبط و ده ساعدني اني اقدر اوصل بسهولة من غير ما اتوه في الطريق ، موقع ويكي مابيا WikiMapia هو موقع خرائط تشاركي ، بنفس نظام الويكي ، اي شخص ممكن يشارك فيه و يضيف اسم مكان هو يعرفه او اسم شارع او اي مَعْلم تاني ، فعلا استفدت من الموقع ده كتير ، و من وقت للتاني بشارك فيه بإضافة اسماء الاماكن و الشوارع اللي اعرفها .

وصلت للشركة بسلام و الحمد لله ، و لقيت واحد صاحبي كنت متوقع الاقيه لاننا تقريبا نفس المستوى في المعرفة ، و لاننا برده نعرف نفس الشخص اللي رشحنا للشغل ده D:
الرخم في الموضوع ان اليوم ده شعري مكنش ليه مزاج يتسرح !! D: ، جيبته في جميع الاتجاهات و مش عاوز يتسرح كويس برده !! ، في الحالات اللي زي دي كنت بلبس عليه كاب و خلاص - سكلتون و الكاب الاحمر علامة مسجلة D: - ، بس اكيد مش هروح مقابلة شخصية و انا لابس كاب يعني ! ، في الاخر سرحته اي حاجة و نزلت D:


المهم ، قعدنا حوالي 10 دقايق ، بعدين هو دخل الاول لانه كان موجود الاول ، بعد ما خرج دخلت انا : )

من قبل ما اروح اساسا و انا عارف ان امكانية اني اشتغل في مكان بدوام كامل قليلة جدا ، و ده بسبب ظروف الدراسة - ده بغض النظر عن موضوع الجيش يعني - ، لاني باخد اجازة من كل حاجة و حتى الكمبيوتر في البيت ، لمدة شهرين او شهرين و نص كل تيرم !! ، يعني على اقصى تقدير لو اشتغلت من اول الاجازة اكتر مدة متوصالة هقدر اشتغلها هى خمس شهور بس !!
لكن مع ذلك كنت واخد الموضوع بكل جدية ، لاني اكيد هطلع بحاجة مفيدة من التجربة دي حتى لو مشتغلتش ، و حتى حاجات مفيدة على المستوى الاجتماعي ، زي تقبل فكرة الرفض ، و انهم مش هيرفضوك عشان شخصك انما هيرفضوك عشان انت مش مناسب للوظيفة دي تحديدا - ان شاء الله قريب ناوي اكتب موضوع عن "الخوف من الرفض" : ) -

المقابلة نفسها كان لطيفة جدا ، و مفهاش اي توتر ، و في الاول سأل اسئلة عادية زي ساكن فين ، بتدرس ايه ، مجموعك ، بتحضر محاضرات الجامعة ولا ﻷ - طبعا السؤال ده ليه علاقة بالشغل بشكل عام - ، و شوية حاجات تانية كدا .
قبل ما اروح محضرتش اي كلام عشان اقوله ، و كنت متوقع انه هيسأل على حاجات معينة ، لكن اللي حصل انه مسألش على حاجة بعينها ، و قالي اتكلم عن الحاجات اللي تعرفها ! ، و ده خلاني مش مرتبك انما مكنش في حاجة معينة في دماغي ، فكنت بحاول افتكر كذا حاجة اعرفها و كذا حاجة اتعاملت فيها ، بس برده مقدرتش اقول كل حاجة - منها حاجات مهمة و ليها صلة بالشغل ! -

اللي فهمته من جزء ده انك ببساطة المفروض تكون رايح المقابلة عشان تتفاخر ، مش التفاخر في معناه السيء ، انما مفيش مجال للتواضع او تهميش اي شيء انت عملته ، قول كل حاجة كبيرة و صغيرة انت عملتها او جربتها سواء كانت مرتبطة بالوظيفة بشكل مباشر او غير مباشر .

طبعا مش محتاج اتكلم عن الثقة بالنفس ، ممكن تكون متوتر نوعاً ما و ده شيء طبيعي خصوصاً اذا كانت المقابلات الاولى او وظيفة مهمة بالنسبة ليك ، لكن اكيد من اهم الاشياء انك تكون واثق من نفسك بشكل كويس : )

كان من ضمن الاسئلة ، سؤال عن مدة الاجازة اللي ممكن تاخدها خلال السنة ، قلته بكل وضوح و بدون اي تلاعب ، ان الامتحانات لوحدها بتاخد حوالي شهر كل تيرم ، و انا بحتاج شهر او شهر و شوية قبل كل امتحانات عشان اعرف اذاكر بشكل كويس ، يعني المجموع اربع شهور !! ، تقريباً هو تفاجئ بحاجة زي كدا و لسان حاله بيقول ازاي هتشتغل كدا D: ، ف زي ما قولت في الاول ، انا متوقع ان نسبتي قليلة جدا الحصول على الشغل ده - على الاقل بدوام كامل - بسبب موضوع الدراسة ، و خصوصاً ان السنة اللي جاية دي الرابعة و الاخيرة و لازم اركز فيها كويس جدا ، و بعد كدا لما اخلص ابقى اعمل اللي انا عاوزه : )

في حاجات تانية كنت اعوز اكتبها بس نسيتها !! ، لو افتكرتها هبقى ارجع اعدل التدوينة : )

----------------------------

# حملة "أوقف العادة السرية" .
بغض النظر عن اني فعلا مش بحب كلمة "حملة" ! ، لان كل شوية تلاقي كام واحد عاملك "حملة" عن مش عارف ايه كدا !

المهم ، محمود و المعروف بإسم "محب سينين" ، عامل موضوع جميل عن العادة السرية ، و اضراها و ادلة تحريمها و معلومات عنها .

يمكن الموضوع بالنسبة ليا مش جديد تمامأً ، لاني قبل كدا عملت بحث مكثف عن كل ما يتعلق بالعادة السرية على سبيل العلم بالشيء .
تعليقي على الموضوع ، هتلاقي مواضيع و ابحاث علمية بتقول ان الموضوع مش مضر و مفيد كمان ! (كل او اغلب الابحاث العلمية بتتكلم عن القيام بيها بدون افراط ) و حتى اراء فقهية بتقول ان العادة السرية هى فقط مكروهه ، او مباحة عند الضرورة فقط ,او حتى مستحبة ! ( مفيش رأي فقهي بيقول باستحبابها ، هى مباحة عن الضرورة فقط ، عذرا غلطة مني ) .

الموضوع فيه كلام كتير و ز ما قولت في كذا رأي فقهي في الموضوع زي مثلاً انها مباحة عند الخوف من الوقوع في الزنا - الخوف من الوقوع في الزنا لازم طبعا يكون مبني على اسباب جدية و حقيقية ، مش مجرد ان واحد يشوف واحده غير محتشمه في الشارع يقول انا خايف اقع في الزنا ! - ، و كمان في اشياء ليها فوائد و لكن فوائدها لا تقارن بأضرارها !!

لكن اللي انا متأكد منه انه مش من المعقول نحط النار جنب البنزين و نقول يمكن متحصلش حريقة !!

العادة السرية زي الادمان بالظبط ، مش هينفع اقول الهروين لو اتاخد على جرعات تقليلة بشكل متباعد مش هيعمل حاجة بل مفيد كمان !! ، لما بتاخد جرعة في التانية في التالتة مش هتقدر تمنع نفسك ، و اي واحد بحث عن الموضوع ده اكيد هيكون عارف ان في ناس بتفضل تمارسها حتى بعد الجواز !!!! ، يعني غالبا الوضوع بيتحول لادمان في الاخر !

المهم يعني ، اقروا الموضوع ، و برده ابحثوا عن الاراء التانية اللي بتتكلم عن نفس الموضوع عشان تكونوا عندكم فكرة كاملة : )
و زي ما بيقول في بداية الموضوع
من الواقع المر الذى نعيشه والذى لا ينبغى السكوت عنه بسبب الحياء وبسبب المشكلات التى تسببها تلك الممارسة الممقوتة كان يجب الكتابة عنها وبيان مخاطرها وأضرارها فليس من المفترض أن يمنع الحياء الخير





مش عارف ليه الكلام عن الموضوع ده بالذات بيفكرني بموضوع "حزام العفة" (chastity belt) ، و ادوات منع الاستمناء" عند الرجال (male anti masturbation device) !! ، ادوات كانت بتستخدم من القرن الـ 15 الى اواخر القرن 18 في اوربا - مفيش روابط ، لان كل الروابط اللي بتتكلم عنها ملغومة ! -

هناك 5 تعليقات:

  1. السلام عليكم

    أعجبتني كثيرا فكرة المشاركة في المشاريع الجماعية على sourceforge حتى و لو لم يكن المرء مبرمجا
    :)


    ملاحظة: لو تم فصل الموضوع إلى ثلاث أقسام لكان أفضل حتى يتسنى لكل فرد أن يعلق على الجزء الذي يود التعليق عليه منفصلا عن الباقي :) مجرد رأي :)

    ردحذف
  2. السلام عليك ورحمة الله
    ازيك يا أحمد
    أنا حأعلق على الجزء الخاص بى
    الإقتباس 1:(((هتلاقي مواضيع و ابحاث علمية بتقول ان الموضوع مش مضر و مفيد كمان ! )))
    يقولون اسأل مجرب ولا تسأل خبير
    و كل المصادر التى ذكرتها بها آراء مجربين وخبراء أيضا , المشكلة فى أطباء الغرب إن هما مش حاسين بالمجتمع العربى , هما عندهم girlfriend & boyfriend فبيتصرفو بالحرام الأكبر وليس بنكاح اليد كما هو الحال عندنا

    اقتباس2:(((و حتى اراء فقهية بتقول ان العادة السرية هى فقط مكروهه ، او عند الضرورة او حتى مستحبة !)))
    لا يوجد رأى فقهى واحد يقول أنها مستحبة
    حتى ابن حزم الذى قال بإباحتهاقال أنها مكروهة وفعل دنىء
    وهناك من ردو على ابن حزم بردود قوية
    اقتباس3:(((
    العادة السرية زي الادمان بالظبط ، مش هينفع اقول الهروين لو اتاخد على جرعات تقليلة بشكل متباعد مش هيعمل حاجة بل مفيد كمان !! ، لما بتاخد جرعة في التانية في التالتة مش هتقدر تمنع نفسك ، و اي واحد بحث عن الموضوع ده اكيد هيكون عارف ان في ناس بتفضل تمارسها حتى بعد الجواز !!!!)))
    أحييك على هذا التشبيه التمثيلى

    كنت سأسألك عن قالب الإقتباس ... ولكن عرفت أنه من القالب الذى تستخدمه فحذفت مشاركتى السابقة
    شكرا على الإشارة إلى الحملة يا عسل
    أراك بخير
    وبالتوفيق فى الوظيفة
    السلام عليك ورحمة الله

    ردحذف
  3. > djug :
    فكر البرمجيات الحرة يقوم بالاساس على المشاركة ، الكل يشارك و الكل يستفيد في النهاية : )
    الذي يريد ان يساعد بالتأكيد سيجد الطريقة ، انما من لا يريد بذل مجهود لن يفعل شيء حتى لو توافرت لديه كل الامكانيات : )

    بالنسبة للملاحظة معك حق ، فهى في محلها فعلا ، تنظيمياً يفترض فصل كل موضوع بمفرده .

    لكن كما ترى عدد الردود قليل جدا - بالنسبة لي هذه ليست مشكلة ولا اسعى لزيادة عدد الردود - ، و بالتالي فصل المواضيع لن يشكل فارقاً كبيرا : )

    و شكرا لك على نصيحتك الغالية ^_^

    --------

    > محب سينين :
    شكرا يا محمود على التصحيح ، و تم التصحيح و اضافة بعض التوضحيات الصغيرة ^_^

    و على فكرة اغلب الابحاث و الاراء الطبية بتتكلم عن ضررها في حالة الافراط فيها ، و ده غالبا اللي بيحصل ، ان الموضوع بيكون عامل زي الادمان بالظبط .

    بالنسبة للجزء بتاع الاقتباس ، ممكن تضيفه لمدونتك ، تعالا على قناة الـ irc بتاعت مجتمع لينوكس العربي و انا اقولك ازاي ^_^

    و ربنا يكرمك ,و جعل الموضوع اللي عملته في ميزان حسناتك ^_^ .

    ردحذف
  4. بالنسبة للخطأ فعادى كلنا بنغلط المهم نعترف بالغلط
    أنا حتى كنت كاتب موضوع مصيبة فى أحد المنتديات الإسلامية
    الموضوع كان غلط فى غلط وغريب جدا .. ورغم ذلك جاءتنى ردود الشكر المعروفة
    ولم يعارضنى وقتها سوى واحدة كانت مشتركة فى المنتدى ربنا يكرمها
    رغم إن مفيش حد كان قادر يرد عليا ولا حتى هذه المرأة بأى دليل حتى المشرفين

    ومن ساعتها وأنا انشغلت بالتفكير فى الموضوع إلى أن هدانى الله للأدلة لتصحيح خطأى الفادح
    وقمت بعمل موضوع فيه تصحيح الخطأ وارسال رسالة خاصة لكل من تواجد بالموضوع القديم بالتصحيح
    الموضوع كان مصيبة بجد .. الحمد لله إنى خلصت من ذنبه

    ((((بالنسبة للجزء بتاع الاقتباس ، ممكن تضيفه لمدونتك ، تعالا على قناة الـ irc بتاعت مجتمع لينوكس العربي و انا اقولك ازاي ^_^))))
    دى رشوة علشان أدخل القناة؟؟
    أنا بدخل ساعات بس انت ما بتكونش موجود
    والمرة إلى لقيتك فيها زحلقتنى بالسحور
    مش ناسيك على فكرة X) ;)

    ردحذف
  5. > محب سينين :
    و الله على النت في حاجات كتير غريبة و حاجات اكتر ملهاش اساس من الصحة ، الغلط في نفسه زي ما قولت مش مشكلة بس المفروض الواحد عشان يكتب في مجال معين لازم يكون عنده الحد الادنى من المعرفة في المجال ده .
    المشكلة الحقيقية بقى ، ان في ناس بتستغل الموضوع ده عن عمد لنشر معلومات خاطئة او الترويج لمعتقدات باطلة !

    ربنا يلطف بينا : )

    -------

    بالنسبة لموضوع القناة ، و الله انا نفسي مش بدخل القناة كتير حاليا D:
    بس قولت عشان لو معندكش خلفية في الـ css او html نعمل الموضوع بشكل مباشرة على الـ irc

    و يا عمي ميكنش قلبك اسود ، حظك اني كنت لسه داخل القناة و لقيت السحور جاهز و الفجر مش فاضله كتير خيرها في غيرها ان شاء الله : )

    ردحذف