عاوز حاجة اكسرها :@ :@ :@

بجد مضايق جدا :@

عاوز حاجة اكسرها :@:@@@@:@:@

يخرب بيت الغباء :@:@:@





تعديل : هبقى اجي بليل ولا لما اهدا شوية اوضح في ايه بالظبط :@
شعارنا هو : احنا ننتج ليه طالما الصين بتنتج !

-------------------------

تعديل ٢ :
تقريبا اول مرة احس فعلا اني عاوز اكسر حاجة من الغضب ، يعني غالبا بستعمل التعبير ده مجازا ، بس تقريبا الشخص الهادي شوية لما بيضايق بينفجر فعلا !

بس مفيش احسن من عمل موضوع كمبيوتري خفيف لتهدئة الاعصاب

Retriever Download Manager - مدير تحميل ممتاز .




كنت مضايق ليه ؟
لسبب بسيط جدا ، لان بجد العيب مش في الحكومة ،ولا في الامكانيات ، ولا في العادات و تقاليد المجتمع ! ، العيب فينا احنا بس ! و مش في اي حاجة تانية !

حالنا كدا عشان احنا استسلمنا للامر الواقع ، بنقول نعود نفسنا على المشكلة و نتعايش معاها مش بنحاول نحلها ! ، مش بنحاول حتى !



الموضوع بختصار يعني ، الاسبوعين اللي فاتوا دول قولنا ننزل على ارض الواقع و نكلم الناس عن البرمجيات الحرة و نظام اللينوكس ، و عن اننا المفروض ندفع تمن البرامج اللي بنستعملها دي او نشوف بديل مجاني - اللي هو موجود فعلا مش بنقولهم على حاجة مش موجودة - ، يعني المفروض نبطل الكراك و السريال و نشتري او نستعمل البديل !

و اكيد انا مش بنقول سيبوا اللي قدامكم و اللي وراكم و من يوم و ليله سيبوا البرامج و سيبوا الوندوز كمان و ابدأوا في استخدام اللينوكس !! ، بقول حاجة بسيطة اوي "ما لا يدرك كله لا ترك جله" !!

يعني اللي يقدر يغير برنامج و يشوف البديل ليه ، يغير ! ، و اللي ميقدرش - لسبب منطقي و حقيقي مش سبب اي كلام ! - يخليه لحد ما يلاقي بديل او يبدأ يتعلم على البرنامج الجديد لحد ما يعرف يتعامل معاه كويس

و خلوا بالكم اننا كنا بنكلم مستخدمين عاديين جدا ، مش شركات او مؤسسات في بيئة انتاجية !

برده نقول يا جماعة طيب اضعف الايمان حاولوا تبعدوا عن الصيغة المملوكة لشركات معينة و استعملوا صيغ قياسية - مثلا زي صيغة rar ، صيغة مملوكة و مفيش غير الناس بتوع winrar هما اللي يقدروا يعملوا ملف rar ، يعني لازم تشتري المنتج بتاعهم و بالشروط بتاعتهم
مع ان في كذا صيغة حرة الضغط بتاعها ممتاز جدا زي bz2 و 7z ! ، و مع ذلك لا حياة لمن تنادي !

يا جماعة استعملوا اي متصفح تاني غير الزفتبلورر ده ، اي متصفح تاني ماشي تبع المعايير القياسية ، زي فاير فوكس او اوبرا ، او حتى سفاري ، تلاقي اللي يقولك اصل المواقع بتفتح احسن على الاكسبلورر - ده اساسا عيب المواقع اللي ماشية على معايير ميكروسوفت مش المعايير القياسية ، و لو المواقع دي لقت ناس كتير بتستعمل متصفح تاني غير الاكسبلورر هتظبط نفسها على المعايير القياسية ، و ده مصلحة لينا كلنا !!!!

يا جماعة متبصوش تحت رجلكم و بصوا لقدام !! و على فكرة مواقع قليلة جدا اللي مش متوافقة مع الفاير فوكس و غيره ، ممكن ممتعرضش كويس بس هتشتغل عادي !
ده غير المتصفحات التانية دي مليانة مميزات عن الزفتبلورر ده غير موضوع المعايير القياسية ده !!!

و غيره كتير من الحاجات الصغيرة اللي ممكن تفيد فعلا و من غير اي مجهود حقيقي !!


و برده نفس النظام بالنسبة للينوكس ، يعني انت اساسا مش دافع تمن الوندوز ولا تمن البرامج اللي عليه و بتتشرط !!! ، يا احنا بنقول حاجة بسيطة اوي ، ادي لنفسك فرصة التجربة فقط لا غير ، حرر نفسك من الصندوق اللي انت مغطي بيه دماغك !!

طيب بس جرب ، عشان تكون راضيت ضميرك ، و قبل ضميرك حتى يكون ليك عذر قدام ربنا ، و تقول انا بذلت جهدي يا رب و معرفتش !

المشكلة بقى ان البرمجيات الحرة و المفتوحة المصدر دي مش برمجيات رديئة ولا زبالة الاكواد ، لا دي حاجة ممتازة جدا و ساعات بتتفوق على البرمجيات المغلقة ، و برده ممكن في بعض المجالات اقل شوية ، بس ده في سبيل مميزات كتيييير جدا سواء تقنية او اقتصادية و سياسية او حتى اجتماعية و اخلاقية !!!!

و برده في الاول و الاخر بنقول اللي ميقدرش يحول فعلا خلاص مش مشكلة بس خليه متابع لان البرمجيات الحرة و المفتوحة المصدر بتتطور بسرعة جدا ، بس المهم يكون السبب حقيقي مش كسل و تخاذل منك انت !!



اللي يفقعني بقى ان الناس مش عاوزه تبذل مجهود و عاوزين الحاجة على الجاهز ! ، عاوزين يحطوا رجل على رجل و الحاجة تجيلهم لغاية عندهم !!! و ده عمره ما هيحصل !!

لازم قبل كل حاجة نغير نفسنامن جوه الاول و الا هنفضل. كدا في اسفل سافلين !!!

المشكلة ان حججنا مش حقيقة ، كلها بسبب الكسل و التخاذل و اننا بنبص تحت رجلينا و مش بنبص لقدام !! ، و كل الحجج شبه بعض ! و ده ان دل على حاجةفده دليل ان العيب فينا من جوا !!

اللي يقولك اصل احنا كدا كدا مش بندفع حاجة !! حد بقى يقولي ازاي هنبني صناعة على حاجة غير مشروعة !! ، تخيلوا مثلا اننا عاوزين نعمل صناعةعلى تجارة المخدرات !!
او على اقل تقدير ، اننا نبني صناعة على حاجة ثانوية !! ، يعني تخيلوا لو اقتصاد دولة مبني على تغليف المنتجات !! يعني بنحط المنتج في كيس فقط لا غير ، يوم ما نتطور هنصنع الاكياس مش اكتر !

او اللي يقولك اصل التغيير صعب !! ، طيب ما طبيعي اي تغيير عاوز مجهود !! ، بس ايه المميزات اللي هنحصل عليها من التغيير !!
طيب ما الجواز تغيير !! ، و الخلفة تغيير !! ، و التعليم تغيير و عاوز مجهود !!! و غيره و غيره !!

و بنفس المنطق ، ما نموت نفسنا احسن عشان منعملش مجهود !!


و اخيرا فلنرفع شعار "ليه ننتج طالما غيرنا بينتج" ، و "ليه نتعلم نصطاد السمك طالما في غيرنا بيصطاد و يدينا" !!

بس مش مشكلة اذا اتحكم فينا ، و مش مشكلة اذا كان في ايده يجوعنا في اي وقت ، و مشكلة اذا بقينا متخلفين ! و مش مشكل اذا كنا عاملين زي ال،،،،،، بناكل و نشرب و ننام !!!


اللي مزعلني فعلا ان الناس مش عاوزين حتى يعملوا اللي تحت ايدهم او اللي يقدروا عليه !!
و هو ده الفرق بين الرضا و الاستسلام !

و هقولها تاني ، العيب فينا احنا بس مش في اي حاجة تانية !

و بالشكل ده هنفضل طول عمرنا تحت و همافوق !






ممكن الموضوع مش حاجة جديدة بس لما بتكلم الناس على ارض الواقع و ناس شباب مش ناس قديمة ، و تشوف مقدار السلبية اللي احنا فيها حتى في الحاجات اللي نقدر نعملها ، اللحظة دي ممكن تحزن و تحس بالغضب ده كله !

** ياه ، ايه كل اللي كتبته ده ! O_O

المزيد »

انا و النتيجة و حربايتي !

السلام عليكم و رحمة الله و بركاته

الايام دي مليش مزاج اعمل اي حاجة خالص ! ، نتيجة التيرم الاول لسه مطلعطش لحد دلوقتي !
دماغي مش متظبطه خالص بسبب موضوع النتيجة ده ، في كذا حاجة بتعتمد على التقدير اللي هجيبه - و اذا كنت شايل اي مادة لا قدر الله ! ، و حتى نشاطاتي على النت بتتوقف على النتيجة !

اللي يشل الواحد ان تقريبا كل الكليات ظهرت النتيجة بتاعتها ما عدا احنا ! ، اي نعم احنا كتير شوية، بس مش للدرجة دي يعني !

المفروض انها تظهر الاسبوع ده او اللي بعده ، و لحد ما تطلع بقى ، هفضل كدا مزاجي متعكنن شوية !

--------------

و برده لحد ما تطلع النتيجة ، احب اعرفكم بالحرباية بتاعتي
عن نفسي بموت في الحيوانات عموما ، و الزواحف خصوصاً ، و الحشرات كمان
بحب اتفرج عليهم ، امسكهم ، و كمان اربيهم ^_^ - انا عارف اني هلاقي ناس بتقول عليا مهووس -

و الحمد لله عندي ام "عاقلة" مش زي الامهات التانية اللي تقولك يع و بتخاف من الحيوانات و الحشرات ! - بجد مش عارف هعمل ايه في مراتي لو طلع فيها الداء الغبي ده ! - ، و بالتالي معنديش مشكلة في دخول الحاجات دي البيت - بل و غرفة النوم كمان -
الحمد لله والدي و والدتي مطلعنا - انا و اخواتي - ، مش بنخاف ولا بنقرف من حاجة ، هما بس كانوا بيقولونا ابعدوا عن اي حاجة ممكن تجيب امراض و يعرفونا على الامراض و اعراضها ، معلومات عنهاو كدا يعني ، بجد ربنا يكرمهم :)


اكتر حاجة بتخنق منها في المدينة انها مفهاش حيوانات ولا حشرات متنوعة ! ، مش هتلاقي اكتر من الطوب و الاسمنت ! ، نفسي اسكن في منطقة طبيعية و على البحر ، سينا مثلا ولا حاجة ، بس ده مش موجود غير في الاحلام فقط :)

المهم يعني ، كام صورة لحربايتي المبجلة
و على فكرة ، لونها بيكون احسن من كدا لما يكون قوة ضوء كويسة و حالتها المزاجية تمام ^_^


اضغط على الصور لمشاهدتها بحجم كبير







على فكرة الحرباية وديعة جدا ، و عضتها مش بتوجع خالص ^_^

------------------------------

بجد الحرباية دي من الكائنات الرائعة ، كل حاجة فيها تخليك تقول سبحان الله

((يعني بصراحة كائن فريد من نوعه ,, كل حاجة فيه فريده ,,,

يعني عين الحرباء اللي بتلف في جميع الاتجاهات و كل عين منفصله عن التانية في التركيز

ولا امكاينة تغيير لونها على حسب المكان اللي هى فيه ,,

ولا ايدها ,, المتحورة عشان تقدر تتسلق و تتعلق على الشجر ,,

ولا لسانها و طريقة عمله في اصطياد الحشرات ,,

و لا مرونتها و استغلالها لديلها كيد خامسة ,,

ولا ولا ولا ,,, !!

مخلوق اكثر من رائع ,, فعلا من اروع ما رأيت ,, ))

اخيرا و ليس اخراً ، شويت معلومات عامة و كام جزء صغير من افلام وثائقية عن الحرباء :)


يوتيوب

عالم الطبيعة: الحرباء
نفسي في واحدة صغيرة زي اللي في اخر الفيديو ده ^_^

اغرب المقاطع الوثائقية

الحرباء غرائب في الطبيعة

و لو عاوز فيديوهات اكتر بس ابحث في يوتويب عن chameleon


ويكيبيديا
الحرباء
- للاسف المقال ضعيف جدا ، ان شاء الله هحاول ضيف ليه في اقرب فرصة -


----------------------------------

ملحوظة اخيرة ، انا مش بحتفظ بالحيوانات عندي ، بربيها فترة صغيرة و في الاخر بطلق سراحهافي مكان امن :)

المزيد »

عاوز اعمل/بعمل ايه دلوقتي :#

السلام عليكم

---------------

في كذا حاجة عاوز اعملها الايام دي ، و محتاج انظم وقتي بشكل كويس بدل اللي بيحصل دلوقتي ده :s

مبدئيا هموت و اعمل اي عمل يدوي ، مش عارف ليه ليا مزاج اوي اليومين دول اعمل اي حاجة يدوية كدا ، اللي في دماغي دلوقتي الرسم ، بس رسم على كبير ، مش مجرد صفحة صغيرة ، او حتى حاجة زي الرسم على الزجاج

حاجة كمان عاوز ابدأ اذاكر بذمة شوية ، عشان التيرم ده تقيل جدا ! ، التيرم التاني عموما بيبقى تقيل و فيه مواد كتيرة

اممممممم ، ايه تاني ؟

عاوز اجدد اشتراك المكتبة ، عشان بقاله فترة منتهي ، و اشوف ايه اخبار النشاط هناك ممكن الواحد يلاقي حاجة جانبية كدا يعملها

بالنسبة للكمبيوتر ، حاليا عاوز بإذن الله هبدأ في ترجمة شرح اوبن اوفيس دوت اورج ، هروح اعمل موضوع في مجتمع لينوكس العربي ، و نعمل فريق للترجمة ، و الحمد لله ماشيين دلوقتي في موضوع مجموعة جنو/لينوكس القاهرة (CGLUG) ، ان شاء الله هنبدأ النشاط قريب جدا ، و برده في دماغي موضوع عن الـ stop motion بس الموضوع عاوز شوية قراية و تجربة عشان يطلع كويس ، و عاوز ارجع اقرا شوية في بايثون عشان بقالي فترة مقرتش فيها حاجة .



و كفاية كدا دلوقتي D:

# تعديل : نسيت حاجة عاوز اعملها ، عاوز احلق شعري D:
انا شعري بقى طويل اوي و بقيت عامل زي الغوريلا D:
ـ

المزيد »

مش مهم !

السلام عليكم و رحمة الله و بركاته

----------

طبيعي جداً ان الواحد كل ما بيكبر بيكتسب خبرة و يعرف حاجات اكتر ، حاجات ممكن يكون عارفها بشكل نظري ، انما بعد كدا بيوصل لمرحلة معينة و بيفهم الحاجات دي و يجربها بشكل عملي !

بعد فترة من الزمن ، من الاعدادي ، مروراً بالثانوي ، و بعد كدا في المرحلة الجامعية ، الواحد بيتأكد ان في حاجات كتير فعلا مش مهمة ، و الواحد شاغل دماغة بيها لفترة معينة ، بس في الاخر بعرف ان كلها حاجات مش مهمة بجد ! و ساعات بيحبس نفسه في قفص وهمي !


مش مهم اذا كنت رفيع زي عود القصب او تخين زي الشوال ، مش مهم اذا مكنش شعرك ناعم او حتى عامل زي السلك ! ، مش مهم لو مناخيرك طويلة او عريضة او حتى "معقوفة" ! ، مش مهم اذا مكانتش عنيك ملونة او زي عيون اليبانيين ، او حتى واسعين جدا لدرجة ان كل الناس بتعتقد انك حسود ! ، مش مهم شكلك اساساً ، لان مفيش حد كامل حتى على مستوى الشكل بس !

و برده مش مهم اذا مكنتش وسيم جداً و مش شبه مش عارف مين كدا ! ، مش مهم لو مش بتجيب هدومك من الماركة الفلانية او المول الفلاني ! مش مهم حتى اذا كنت مش مهتم بمظهرك !

مش مهم اذا مكنش لاقي حد يفهمك صح بالرغم من ان عندك صحاب كتييير جدا ، او حتى معندكش !
مش مهم اذا كنت حاسس انك مهمش ، او ان مفيش حد مهتم برأيك ، او انك منطوي و الناس فاكرين انك مغرور و شايف نفسك ! كتير ما بيتم تفسير الصمت على اساس انه جهل او غرور !

مش مهم اذا مكنتش عبقري و ذو "ذكاء حاد" ، و مش بتعرف تعمل قسمه مطولة او حتى مش عارف جدول الضرب ! ، مش مهم تكون ذكي اساساً ! ، الحياة محتاجة حاجات تانية غير الذكاء !

مش مهم نظرت الناس ليك ، و اذا كانوا بيعتقدوا بصفات مش فيك ! ، مش مهم لو وصفوك بأسواء الصفات ! الكلام مش بيغير من الحقيقة حاجة !

كل ده مش مهم ، و غيرهم كتير ، حاجات فعلا مش مهمة و بنشغل نفسنا بيها ! ، حاجات كتير من دي شوفتها في الناس و فيا !
مش المفروض انك تزعل او تحس بالسوء بسبب اي حاجة من دول ، اكيد هيجي عليك يوم و هتحس بالرضا عن اغلب الحاجات دي ان مكنش كلها ! ، و هتعرف انك كنت بتركز على حاجات هبلة و محجم نفسك بسببها !


####################
المهم تكون ما انت عليه فعلاً ، المهم طيبة النفس + شوية ثقة + شوية خبرة + انك تكون شخص مفيد
####################

وخليك فاكر ان كل حاجة بتجي بمعاد معين !


اخيرا ، مش مهم اذا مكنش الموضوع منسق ، او الكلام مش مترابط ، المهم ما انا عليه دلوقتي : )

الحمد لله حمدا كثيرا : )

المزيد »

العنصر المشترك D:

السلام عليكم و رحمة الله و بركاته

حاجة كدا لاحظتها ، و كمان الموضوع طلع مش في مصر بس ، ده كمان في اغلب الدول العربية او الدول اللي فيها انظمة حاكمة فاسدة او مش قد المسئولية و مبلطة في الحكم برده !

العنصر المشترك بين كل الموالين للنظام الحاكم ، ان الحياة وردي !

يعني مثلا واحد اعرفه ، تبع الحزب الوطني ، تلاقي الحياة عنده وردي ، و يقولك الحكومة دي شغاله 100 100 ، و يقعد بقى يقولك انجازات الحكومة و مش انجازات الحكومة ، و اي حاجة تعملها الحكومة تبقى تمام !

برده كان في موضوع في مجتمع لينوكس العربي ، موضوع كدا عن توزيعة جزائرية ، و كان في شوية نقاشات في الموضوع ، و كان في واحد تبع النظام الحاكم ، تقريبا كان الوحيد اللي شايف ان الحياة وردي عندهم في الجزائر و كل حاجة تمام ! على عكس بقية الناس !

قبل كدا برده شوفت اكتر من مثال على الموضوع ده بس الموضوع بقى واضح اوي بالنسبة ليا !


--------------------------

عن نفسي مش بحب المعارضين اللي بيعترضوا على اي حاجة و خلاص ! ، اي حاجة تعملها الحكومة تلاقيهم بيعترضوا ! ، و برده مش بحب الناس المتشائمين و السوداوين ، و اللي تلاقيهم عندهم اكتئاب دائم و مش عاوزين يعملوا اي نشاط ، و يقولولك مفيش فايدة من اللي هنعمله !!

بس برده خلينا واقعيين و موضوعيين و لو شوية !
بلاش بقى نظام انتوا كلكم معارضين للنظام و مش عاوزين تعملوا حاجة و متخاذلين و مش عارف ايه كدا !!

الناس دول غالبا بيكونوا نوعين اساسيين ، نوع عايش الوهم فعلا ، و نوع بيوصل للي هو عاوز بالوسايط بما انه ليه معارف في النظام !

المهم يعني ، من الموضوع ده مش عاوز اقول غير ارحمونا بقى ! متبقوش انتوا و النظام بتقرفونا في عيشتنا ! عاوزين نتغير بجد !


-----------------------

ملحوظة اخيرة احترامي للجميع سواء كان موالي للنظام او معارض او حتى ملهوش اي توجه ، بس الموضوع ممكن اعتباره مجرد فضفضة او نصيحة : )

المزيد »

رحلة الايتام لواحة سقارة : )

السلام عليكم و رحمة الله و بركاته

يوم الجمعة اللي فات كان بجد يوم جميل جدا ، كان في رحلة للايتام تبع جمعية الروان ، و تم اختيار مكان سمه واحة سقارة - هى مش واحة حقيقة انما المكان اسمه كدا - ، بس مكان لطيف جدا ، خضرة ، و رمل و مية و مراجيح و حاجة اخر جمال يعني ^_^

ده يعتبر اول تفاعل حقيقي في نشاط زي ده ، كل النشاطات التطوعية اللي قبل كدا لسبب ما كنت بتجنب النشاطات الاجتماعية زي زيارة دور الايتام و المسنين و الحاجات اللي زي كدا ، و من حوالي اسبوعين ، كنت اول مرة اروح دار ايتام ، و كمان الدار فيها مسنين

فأول مرة اروح و ألاقي ايتام تحت ، و مسنين فوق ، بعدها جالي حاجة زي اكتئاب او فترة تفكير في الواقع ، ان بجد كل واحد لازم يحمد ربنا كتير اوي على النعمة اللي هو فيها و ان ليه اب و ام بيراعوه و يخافوا عليه حتى لو كبرت و اتجوزت و كمانت خلفت هتفضل ابنهم اللي بيحبوه و بيخافوا عليه : )

(( و قل ربي أرحمهما كما ربياني صغيراً ))
ربنا يرحمهم و يغفرلهم و يديهم الصح و طول العمر : )

---------------------

المهم يعني ، قولت احاول ابدأ من جديد في حاجة تعتبر ترفيهية نوعاً ما ، انا كنت عارف ان في رحلة بس مخدتش بالي منها غير قبل انطلاق الرحلة بساعتين تلاتة ! ، و كمان كنت مطبق و المفروض اني لسه هدخل انام عشان اعرف اصحى على صلاة ضهر الجمعة ، بس قولت خليني احاول يمكن الحق : )

و الحمد لله وصلت بعد الميعاد بشوية بس مكانوش مشيوا لسه ، و ركبنا الاتوبيس و وصلنا الواحة بسلام الحمد لله - طلعت قريبة اساسا -

هو كان يوم غريب شوية ، الجو كان بدأ يقلب ، بس الحمد لله الشمس طلعت شوية و ممطرتش ، و ناس اغما عليهم - من المشرفين مش الاطفال - ، و خطبة الجمعة كانت غريبة شوية ، مش وحشة بس اسلوب الشيخ كان غريب شوية ، تلاقيه بيتكلم على حاجة و كل شوية يدخل في موضوع فرعي و الموضوع الفرعي يدخلنا في موضوع فرعي تاني و بعد كدا يرجع للموضوع الاساسي
و كمان باين كدا ان الجامع بناه الممثل حسن حسني او انه ساكن هناك ، و كان بيصلي فيه ، و العيال اللي كانوا بيصلوا معانا اصروا يروحوا يسلموا عليه

بس بجد كان يوم جميل جدا ما شاء الله ، لعبت مع الاطفال ، استمتعت ، اتعرفت على ناس جديدة ، و كمان ضهري اتقطم من كتر مرجحة العيال

و دول كام صورة على الماشي كدا لحد ما ابقى اجمع الصور من الناس اللي صورت D:

> > اضغط على الصورة للتكبير < <


# لكل الناس اللي نظمت الرحلة دي و شاركت فيها و حتى اللي كان عاوز و معرفش يجي ، جزاكم كل خير
متجمعين في الجنة ان شاء الله : )

المزيد »